ហាងកាហ្វេដែលបង្កើតមុនគេបង្អស់នៅលើពិភពលោក

នាពេលបច្ចុប្បន្ននេះ ហាងកាហ្វេជាច្រើនកំពុងកកើតមានឥតឈប់ឈរនៅលើទីផ្សារពិភពលោក ដោយមានការប្រកួតប្រជែងគ្នាយ៉ាងខ្លាំងទាំងរសជាតិ និងគំនិតនៃការរចនាហាង ដើម្បីកសាងម៉ាកយីហោឱ្យមានភាពរឹងមាំក្នុងការទាក់ទាញ ក៏ដូចជារក្សាអតិថិជនឱ្យបានច្រើន។ ទោះបីជាយ៉ាងនេះក្ដី តើអ្នកមានដឹងទេថា ហាងកាហ្វេមួយណាដែលបានបង្កើតឡើងមុនគេបង្អស់? ច្បាស់ណាស់ មានមនុស្សយ៉ាងតិចដែលបានដឹង ដូច្នេះខ្លឹមសារខាងក្រោមនឹងបង្ហាញអំពីហាងកាហ្វេមួយនោះ ព្រមទាំងបង្ហាញពីដំណើរការវិវត្តន៍របស់ហាង។

រឿងរ៉ាវសង្ខេប

ហាងកាហ្វេដំបូងបានកើតឡើងនៅទីក្រុងខនស្ទែនទីណូបែល (Constantinople) នៃប្រទេសទួរគី តាំងពីឆ្នាំ 1475 មកម្ល៉េះ ហើយហាងកាហ្វេនោះមានឈ្មោះថា Kiva Han ដោយផ្ដោតលើកាហ្វេខ្មៅ រសជាតិដើម។

នៅឆ្នាំ 1529 ជនជាតិអឺរ៉ុបក៏បានកែច្នៃកាហ្វេដោយប្រើក្រែម និងមានរសជាតិផ្អែម ដែលជារសជាតិថ្មីមួយ ហើយក៏ជាការបង្កើតហាងកាហ្វេដំបូងនៅប្រទេសអឺរ៉ុប។

នៅឆ្នាំ 1652 ហាងកាហ្វេចាប់ផ្ដើមរីកដុះដាលដល់ប្រទេសអង់គ្លេស ដែលមានឈ្មោះថា The Turk’s Head។ ចំពោះការចាប់ផ្ដើមបើកហាងកាហ្វេនៅអង់គ្លេស ដោយសារឈ្មួញជនជាតិអង់គ្លេសម្នាក់បានធ្វើជំនួញជាមួយនឹងប្រទេសទួរគី ដោយក្នុងនោះក៏មានកាហ្វេផងដែរ។ ហាងកាហ្វេ ត្រូវបានគេចាត់ទុកថា ជាកន្លែងដ៏ល្អសម្រាប់សមាគមន៍អាជីវកម្មនៅអង់គ្លេស។

នៅឆ្នាំ 1792 ហាងកាហ្វេឈ្មោះ Tontine បានបង្កើតឡើងនៅទីក្រុងញូវយ៉កនៃសហរដ្ឋអាមេរិក ដែលវាក៏ជាកន្លែងមួយសម្រាប់សមាគមន៍អាជីវកម្មដូចនៅអង់គ្លេសដែរ។

នៅឆ្នាំ 1946 ក៏ចាប់ផ្ដើមមានម៉ាស៊ីនឆុងកាហ្វេ គឺ Espresso Piston នៅប្រទេសអ៊ីតាលី។ ម៉ាស៊ីននោះ វាកាន់តែធ្វើឱ្យមានភាពងាយស្រួលប្រើ សុវត្ថិភាព និងទាន់សម័យជាងមុន។

បន្ទាប់ពីនោះ ហាងកាហ្វេក៏ចាប់ផ្ដើមមានការវិត្តន៍ទៅមុខដោយមានភាពទាន់សម័យច្រើន ដូចជារបៀបនៃការឆុងកាហ្វេកាន់តែល្អជាងមុនជាមួយម៉ាស៊ីនឆុងទំនើប ព្រមទាំងការបន្ថែមនូវមុខម្ហូបជាច្រើនទាំងអាហារថ្ងៃត្រង់ និងអាហារពេលល្ងាច។ បន្ថែមពីនេះ ហាងកាហ្វេក៏ចាប់ផ្ដើមមានភាពរីកចម្រើនលើគំនិតរចនាហាងឱ្យកាន់តែល្អជាងមុន ដើម្បីបង្កើតបរិយាកាសដ៏អស្ចារ្យសម្រាប់អតិថិជន។

គួរបញ្ជាក់ផងដែរថា ហាងកាហ្វេដ៏ពេញនិយមដែលមានបន្ថែមនូវអាហារពេលល្ងាច គឺត្រូវបានបង្កើតឡើងដំបូងនៅប្រទេសកាណាដា ហើយហាងកាហ្វេមានឈ្មោះថា Tim Hortons។ ហើយក៏មានហាងកាហ្វេល្បីៗកើតមានបន្តបន្ទាប់ទៀត ដូចជាហាងកាហ្វេ Starbucks ជាដើម កាលពីឆ្នាំ 1971 នៅទីក្រុងស៊ីថល (Seattle) ។

ពាណិជ្ជកម្ម

របៀបសរសេរឆ្លើយតបបង្ហាញការយល់ចិត្តទៅកាន់អតិថិជន

Sann Thaven

ការសរសេរឆ្លើយតបទៅកាន់អតិថិជននៅលើបណ្ដាញសង្គមប្រកបដោយការយល់ចិត្ត និងមានវិជ្ជាជីវៈជារឿងដ៏សំខាន់ដែលក្រុមអ្នកឆ្លើយតបជាមួយអតិថិជនគួរតែគិតពិចារណា។ បន្ថែមពីនេះ ដើម្បីបង្កើនប្រសិទ្ធភាពក្នុងការឆ្លើយតបជាមួយអតិថិជនពោរពេញដោយការយល់ចិត្ត អ្នកត្រូវអនុវត្តន៍តាមវិធីខាងក្រោម៖

1. ចាត់ទុកអតិថិជនជាមនុស្សសំខាន់

ជាធម្មជាតិរបស់មនុស្សនៅពេលដែលចាត់ទុកនរណាម្នាក់ ឬច្រើននាក់ជាមនុស្សសំខាន់ ពួកគេតែងតែបង្ហាញនូវការយកចិត្តទុកដាក់ និងឆ្លើយតបបែបយល់ចិត្តដោយស្វ័យប្រវត្តិ។ ហេតុដូចនេះ ចំពោះអតិថិជនក៏ដូចគ្នា អ្នកត្រូវតែចាត់ទុកពួកគេជាមនុស្សសំខាន់ ហើយបង្ហាញនូវការយកចិត្តទុកដាក់ និងការយល់ចិត្ត តាមរយៈការផ្ដល់នូវសេវាកម្មអតិថិជនដ៏ល្អ។

បន្ថែមពីនេះ ការបង្ហាញការយល់ចិត្តដល់អតិថិជន អ្នកត្រូវតែដាក់ខ្លួនឯងចូលនៅក្នុងស្ថានភាពរបស់អតិថិជន និងបង្ហាញពីការឆ្លើយតបដែលយល់ពីស្ថានភាពនោះ ព្រមទាំងផ្ដល់ជាដំណោះស្រាយដ៏ល្អសម្រាប់ពួកគេ ជាជាងគ្រាន់តែនិយាយពាក្យសុំទោស ហើយក៏បញ្ចប់សន្ទនា។ អ្នកត្រូវដឹងថា អតិថិជនចង់បានការយល់ចិត្តច្រើនជាងការនិយាយសុំទោសពួកគេ។

2. ប្រើប្រាស់ភាសាធម្មជាតិនៃការយល់ចិត្តផ្ទាល់ខ្លួន

កុំព្យាយាមនិយាយបែបផ្លូវការខ្លាំងពេករហូតធ្វើឱ្យអតិថិជនមានអារម្មណ៍ថាអ្នកព្យាយាមសម្ដែងពីការយល់ចិត្ត ប៉ុន្តែអ្នកត្រូវព្យាយាមសរសេរអ្វីដែលជាភាសាធម្មជាតិរបស់អ្នកដើម្បីបង្ហាញពីការយល់អំពីស្ថានភាពរបស់អតិថិជន និងការនិយាយបែបធម្មជាតិ មិនមែនជាការសម្ដែង ហើយមានវិជ្ជាជីវៈ។

បន្ថែមពីនេះ ក៏អ្នកអាចហ្វឹកហាត់លើការប្រើប្រាស់ការសរសេរ ក៏ដូចជាការនិយាយបែបយល់ចិត្តឱ្យបានច្រើន ព្រមទាំងរក្សានូវម៉ាកយីហោក្រុមហ៊ុនកាន់តែមានគុណតម្លៃល្អ។

3. ការសួរសំណួរបញ្ជាក់

នៅពេលអតិថិជនសាកសួរ ឬក៏ពួកគេត្រូវការជំនួយពីអ្នកលើអ្វីមួយ អ្នកត្រូវតែធ្វើជាអ្នកស្ដាប់ដ៏ល្អ ដើម្បីដឹងថាពួកគេត្រូវការអ្វី ឬមានបញ្ហាអ្វី បន្ទាប់មកអ្នកត្រូវតែលើកជាសំណួរសួរបញ្ជាក់ មុននឹងអ្នកផ្ដល់ជាដំណោះស្រាយជូនពួកគេ។ ធ្វើបែបនេះ អតិថិជនកាន់តែមានអារម្មណ៍ថាមានអ្នកយកចិត្តទុកដាក់ ហើយព្យាយាមយល់អំពីពួកគេ និងមានអារម្មណ៍ថាពួកគេនឹងទទួលបានដំណោះស្រាយដ៏ល្អ។ល។

ពាណិជ្ជកម្ម

មុនសរសេរផែនការអាជីវកម្ម ក៏ត្រូវសិក្សាពី Porter’s 5 Forces ដែរ!

Sann Thaven

ការសរសេរផែនការអាជីវកម្មឱ្យបានល្អ និងមានភាពច្បាស់លាស់ ទាមទារឱ្យមានការសិក្សាលើផ្នែកជាច្រើនទាំងសិក្សាពីទីផ្សារគោលដៅ ទំហំទីផ្សារ យុទ្ធសាស្រ្តទីផ្សារ ផែនការហិរញ្ញវត្ថុ និងជាច្រើនទៀត។ ទោះបីជាយ៉ាងនេះក្ដី មុននឹងសរសេរផែនការអាជីវកម្ម អ្នកក៏ត្រូវសិក្សាពី Porter’s 5 Forces ផងដែរ។

តើអ្វីជា Porter’s 5 Forces?

Porter’s Five Forces គឺជាគំរូដែលកំណត់ និងវិភាគនូវកម្លាំងប្រកួតប្រជែងចំនួនប្រាំ ដើម្បីជួយម្ចាស់អាជីវកម្មឱ្យស្គាល់ពីចំណុចខ្សោយ និងភាពខ្លាំងរបស់អាជីវកម្មរបស់ខ្លួនបានយ៉ាងជាក់លាក់។ បន្ថែមពីនេះ វាក៏ជួយម្ចាស់អាជីវកម្មអាចយកអនុវត្តន៍លើផ្នែកណាមួយនៃសេដ្ឋកិច្ច ដើម្បីយល់ដឹងពីកម្រិតនៃការប្រកួតប្រជែងលើឧស្សាកម្មដែលគ្រោងនឹងចាប់ផ្ដើមដំណើរការនៅក្នុងទីផ្សារជាក់ស្ដែង និងអាចបង្កើតប្រាក់ចំណេញរយៈពេលវែងសម្រាប់ក្រុមហ៊ុន។ ជាញឹកញាប់ Porter’s Five Forces ត្រូវបានគេវិភាគ ដើម្បីកំណត់រចនាសម្ព័ន្ធអាជីវកម្មក្នុងការកំណត់យុទ្ធសាស្រ្តអាជីវកម្ម។ ហើយយុទ្ធសាស្រ្តអាជីវកម្មនេះ ពិតជាសំខាន់ដើម្បីបញ្ចូលនៅក្នុងផែនការអាជីវកម្ម។

គួរបញ្ជាក់ផងដែរថា Porter’s Five Forces ត្រូវបានដាក់ឈ្មោះដោយសាស្រ្តាចារ្យនៃសាលា Harvard Business School គឺលោក Michael E. Porter។

Porter’s Five Forces រួមមាន៖

ការប្រកួតប្រជែងនៅក្នុងឧស្សាហកម្ម (Competition in the industry)៖ ការវិភាគលើកម្រិតនៃការប្រកួតប្រជែងលើឧស្សាហកម្មដែលអ្នកគ្រោងនឹងចាប់ផ្ដើមនោះ ដើម្បីដឹងថា តើអាជីវកម្មរបស់អ្នកទទួលរងឥទ្ធិពលកម្រិតទាបឬខ្ពស់ ជាមួយនឹងការប្រកួតប្រជែងនៅក្នុងទីផ្សារជាក់ស្ដែង? ចំពោះការប្រកួតប្រជែងនេះ សំដៅលើ តើចំនួនគូប្រកួតប្រជែងរបស់អ្នកមានកម្រិតណា? តើពួកគេអាចមានឥទ្ធិពលលើអាជីវកម្មរបស់អ្នកកម្រិតណា? ហេតុអ្វីពួកគេមានឥទ្ធិពលកម្រិតទាប ឬកម្រិតខ្ពស់សម្រាប់អាជីវកម្មរបស់អ្នក?។ល។
សក្ដានុពលនៃអ្នកចូលថ្មីក្នុងឧស្សាហកម្មនេះ (Potential of new entrants into the industry)៖ សំដៅលើការវិភាគលើអាជីវកម្មគូប្រកួតប្រជែងដែលអាចជ្រៀតចូលទីផ្សារថ្មី តើពួកគេមានឥទ្ធិពលកម្រិតណាសម្រាប់អ្នក? តើពួកគេអាចចំណាយពេលវេលា និងថវិកាតិចជាងអ្នកក្នុងការចូលទីផ្សារដែរទេ? ដូច្នេះត្រង់ចំណុចនេះ អ្នកត្រូវសិក្សាឱ្យបានច្រើន ថាតើអាជីវកម្មគូប្រកួតប្រជែងអាចចូលថ្មីក្នុងទីផ្សារ អាចនឹងមានឥទ្ធិពលខ្លាំង ឬក៏តិចសម្រាប់អាជីវកម្មរបស់អ្នក?
អំណាចនៃអ្នកផ្គត់ផ្គង់ (Power of suppliers)៖ ការវិភាគលើកម្រិតដែលអាជីវកម្មរបស់អ្នកទទួលរងឥទ្ធិពលពីអ្នកផ្គត់ផ្គង់ ថាតើវាស្ថិតនៅកម្រិតទាប ឬកម្រិតខ្ពស់? ហេតុអ្វី?
អំណាចរបស់អតិថិជន (Power of customers)៖ ការវិភាគលើឥទ្ធិពលដែលអតិថិជននឹងមានសម្រាប់អាជីវកម្មរបស់អ្នក ថាតើអ្វីដែលអាចធ្វើឱ្យអាជីវកម្មរបស់អ្នកបាត់បង់អតិថិជន? តើអតិថិជនមានឥទ្ធិពលទាមទារបញ្ចុះតម្លៃ ឬសំណើរផ្សេងៗដែលពួកគេយល់ថាល្អពីក្រុមហ៊ុនរបស់អ្នកកម្រិតណា? តើអ្នកនឹងធ្វើអ្វីដើម្បីកុំឱ្យអតិថិជនមានឥទ្ធិពលខ្លាំងលើអាជីវកម្មរបស់អ្នក?
ការគំរាមកំហែងនៃផលិតផលជំនួស (Threat of substitute products)៖ ការវិភាគលើផលិតផល សេវាកម្មដែលអាចជំនួសលើផលិតផលសេវាកម្មរបស់អ្នក តើមានកម្រិតណានៅក្នុងទីផ្សារ? តើអាជីវកម្មរបស់អ្នកនឹងទទួលរងឥទ្ធិពលបែបណាខ្លះ? តើអ្នកនឹងត្រូវដោះស្រាយបែបណា?

ហេតុអ្វីត្រូវសិក្សា Porter’s 5 Forces មុនពេលសរសេរផែនការអាជីវកម្ម?

ការសិក្សា Porter’s 5 Forces មុនពេលសរសេរផែនការអាជីវកម្ម វានឹងជួយ៖

អ្នកឱ្យស្គាល់យ៉ាងច្បាស់ពីបរិយាកាសប្រកួតប្រជែងនៅក្នុងទីផ្សារ
អ្នកក្នុងការរៀបចំយុទ្ធសាស្រ្តអាជីវកម្ម ដើម្បីយកឈ្នះនៅក្នុងទីផ្សារ
អ្នកឱ្យកាន់តែមានភាពជឿជាក់លើអាជីវកម្មរបស់ខ្លួនដើម្បីដំណើរការចូលក្នុងទីផ្សារ

ពាណិជ្ជកម្ម

តើត្រូវយល់ដឹងលើផ្នែកសំខាន់ៗនៃយុទ្ធសាស្រ្តអាជីវកម្មអ្វីខ្លះ?

Sann Thaven

យុទ្ធសាស្ត្រអាជីវកម្ម សំដៅលើគ្រោងនៃសកម្មភាព ក៏ដូចជាការសម្រេចចិត្តដែលក្រុមហ៊ុនគ្រោងនឹងធ្វើ ដើម្បីសម្រេចបាននូវគោលដៅ និងគោលបំណងរបស់ខ្លួន។ បន្ថែមពីនេះ វាក៏ជួយត្រួសត្រាយផ្លូវក្នុងការសម្រេចចិត្តលើការជួលបុគ្គលិកឱ្យបានត្រឹមត្រូវ និងមានប្រសិទ្ធភាពលើការបែងចែកធនធាន។

គួរបញ្ជាក់ផងដែរថា យុទ្ធសាស្រ្តទីផ្សារ វាមិនអាចមានភាពស្ថិតស្ថេររហូតបានឡើយ ដោយថ្ងៃនេះអាចធ្វើបានលទ្ធផលល្អ ប៉ុន្តែថ្ងៃបន្ទាប់អាចទទួលបានលទ្ធផលមិនល្អ ដូច្នេះវាទាមទារឱ្យមានការបត់បែន ការអាចសម្របតាមទីផ្សារបច្ចុប្បន្ន និងបន្តសិក្សាស្រាវជ្រាវជានិច្ចទៅតាមសម័យកាល។

ទោះបីជាយ៉ាងនេះក្ដី ខ្លឹមសារខាងក្រោមនឹងបង្ហាញបន្ថែមពីផ្នែកសំខាន់ៗមួយចំនួននៃយុទ្ធសាស្រ្តអាជីវកម្ម ដែលអ្នកគួរឈ្វេងយល់ ដោយដកស្រង់ខ្លឹមសារគោលពីគេហទំព័រ Indeed។

1. ចក្ខុវិស័យ និងគោលបំណងអាជីវកម្ម

ការធ្វើយុទ្ធសាស្រ្តអាជីវកម្ម គឺមានគោលបំណងជួយឱ្យម្ចាស់អាជីវកម្មទាំងអស់អាចសម្រេចនូវចក្ខុវិស័យ និងគោលបំណងអាជីវកម្មរបស់ពួកគេ តាមរយៈការបង្កើតនូវផែនការណែនាំបង្ហាញផ្លូវក្នុងការធ្វើសកម្មភាពបានច្បាស់លាស់លើអ្វីដែលត្រូវធ្វើ និងអ្វីដែលត្រូវទទួលខុសត្រូវលើជំហាននីមួយៗ។

2. គុណតម្លៃស្នូល

ការធ្វើយុទ្ធសាស្ត្រអាជីវកម្ម នឹងជួយណែនាំដល់អ្នកគ្រប់គ្រងជាន់ខ្ពស់ទាំងអស់ ក៏ដូចជានាយកដ្ឋាននានាអំពីអ្វីដែលគួរធ្វើ និងមិនគួរធ្វើ ដោយយោងទៅតាមគុណតម្លៃស្នូលរបស់ក្រុមហ៊ុន។ បន្ថែមពីនេះ វាក៏ជួយឱ្យមនុស្សគ្រប់គ្នានៅក្នុងក្រុមហ៊ុនដើរលើផ្លូវតែមួយ និងមានគោលដៅដូចគ្នាដើម្បីសម្រេច។

3. ការវិភាគ SWOT

SWOT តំណាងឱ្យពាក្យ Strengths (ចំណុចខ្លាំង) Weaknesses (ចំណុចខ្សោយ) Opportunities (ឱកាស) និងThreats (ការគំរាមកំហែង)។ ចំពោះការវិភាគ SWOT នេះនឹងត្រូវបានរួមបញ្ចូលនៅក្នុងគ្រប់យុទ្ធសាស្រ្តអាជីវកម្មទាំងអស់ ពីព្រោះវាផ្ដល់ឱ្យក្រុមហ៊ុនពឹងផ្អែកលើភាពខ្លាំងរបស់ខ្លួន និងអាចប្រើប្រាស់វាជាប្រប្រយោជន៍សម្រាប់ក្រុមហ៊ុនទាំងមូល។ បន្ថែមពីនេះ វាក៏ជួយឱ្យម្ចាស់អាជីវកម្មបានដឹងយ៉ាងច្បាស់ពីចំណុចខ្សោយ ក៏ដូចជាការគំរាមកំហែងនានា ដើម្បីត្រៀមដំណោះស្រាយក្នុងការការពារកុំឱ្យក្រុមហ៊ុនទទួលរងនូវហានិភ័យខ្ពស់នៅពេលដំណើរការអាជីវកម្មជាក់ស្ដែង។

4. តិចនិកប្រើប្រាស់ធនធានឱ្យមានប្រសិទ្ធភាព (Tactics)

ការធ្វើយុទ្ធសាស្រ្តអាជីវកម្ម ភាគច្រើនបង្ហាញនូវព័ត៌មានលម្អិតអំពីរបៀបប្រតិបត្តិការ និងរបៀបដែលការងារគួរតែត្រូវបានធ្វើដើម្បីបង្កើនប្រសិទ្ធភាព។ បន្ថែមពីនេះ អ្នកដឹកនាំនឹងត្រូវចេះបែងចែកទំនួលខុសត្រូវដល់បុគ្គលិកផ្សេងៗលើការអនុវត្តន៍តាមផ្នែកនីមួយៗ ដោយធ្វើយ៉ាងណាឱ្យការអនុវត្តនោះមានប្រសិទ្ធភាពខ្ពស់ ដោយសន្សំទាំងពេលវេលា និងធ្វើឱ្យការខិតខំប្រឹងប្រែងនោះមានប្រយោជន៍។

5. ផែនការបែងចែកធនធាន

ការធ្វើយុទ្ធសាស្ត្រអាជីវកម្ម ទាមទារឱ្យម្ចាស់អាជីវកម្មត្រូវស្វែងរកធនធានដែលត្រូវការចាំបាច់ដើម្បីធ្វើសកម្មភាពបំពេញកិច្ចការតាមផែនការដែលបានគ្រោងទុក ចេះពីរបៀបបែងចែកធនធាន និងអ្នកដែលនឹងទទួលខុសត្រូវលើការធ្វើសកម្មភាពនោះ។ ធ្វើបែបនេះ ទើបម្ចាស់អាជីវកម្មអាចមើលឃើញកន្លែងដែលត្រូវបន្ថែមធនធាន ដើម្បីបញ្ចប់គម្រោងផែនការ។

6. ការវាស់វែង

ការធ្វើយុទ្ធសាស្រ្តអាជីវកម្ម ក៏ទាមទារឱ្យមានការតាមដានលទ្ធផលរបស់ក្រុមហ៊ុនផងដែរ ដោយវាយតម្លៃលើរបៀបដែលកំពុងដំណើរការជាមួយនឹងគោលដៅដែលបានកំណត់មុនពេលចាប់ផ្ដើមយុទ្ធសាស្រ្ត។ ធ្វើបែបនេះ នឹងជួយម្ចាស់អាជីវកម្មឱ្យបន្តដំណើរទៅមុខជាមួយនឹងពេលវេលាកំណត់ជាក់លាក់ និងគោលដៅ ក៏ដូចជាគិតគូរយ៉ាងច្បាស់អំពីកញ្ចប់ថវិកា។

ពាណិជ្ជកម្ម

បើគ្មានលុយចាប់ផ្ដើមអាជីវកម្ម តើត្រូវធ្វើដូចម្ដេច?

Sann Thaven

នៅពេលគិតចង់ចាប់ផ្ដើមអាជីវកម្មមួយ ជាទូទៅមនុស្សយល់ឃើញថា ទាល់តែមានលុយគ្រប់គ្រាន់ធ្វើជាដើមទុនទើបអាចចាប់ផ្ដើមបាន ដូច្នេះបើគ្មានលុយគ្រប់គ្រាន់ ច្បាស់ជាមិនអាចចាប់ផ្ដើមអាជីវកម្មបានដែរហើយ? តើពិតទេ?

ចម្លើយ៖ មិនពិតនោះទេ ពីព្រោះបើអ្នកគ្មានលុយក្នុងការចាប់ផ្ដើមអាជីវកម្ម ក៏វាមានវិធីក្នុងការអាចចាប់ផ្ដើមអាជីវកម្មបានដែរ គ្រាន់តែអាជីវកម្មនោះស្ថិតនៅកម្រិតតូច។ អ្នកត្រូវដឹងថា លុយ គឺជាប្រភពដើមទុនដ៏សំខាន់ក្នុងការចាប់ផ្ដើម ក៏ដូចជាការពង្រីកអាជីវកម្មឱ្យកាន់តែធំ។ ប៉ុន្តែលុយ ក៏មិនមែនជាឧបសគ្គដ៏ធំក្នុងការរារាំងអ្នកមិនឱ្យចាប់ផ្ដើមបានដែរ។

តើត្រូវធ្វើដូចម្ដេចទើបចាប់ផ្ដើមអាជីវកម្មបាន បើឥលូវនេះគ្មានលុយ?

1. លក់សេវាកម្មលើចំណេះជំនាញដែលអ្នកមាន

នៅក្នុងចំណុចនេះ អ្នកត្រូវដឹងថា តើអ្វីជាចំណេះជំនាញដែលអ្នកកំពុងមាន? ហើយចំណេះជំនាញនោះអ្នកមានទេពកោសល្យខ្លាំង ព្រមទាំងកំពុងចង់រីកចម្រើនខ្លាំងលើផ្នែកនោះ? បន្ទាប់មកសរសេរដាក់ក្នុងកូនសៀវភៅមួយ ហើយអ្នកត្រូវគិតថា តើអ្នកនឹងទាញប្រយោជន៍បានអ្វីខ្លះពីចំណេះជំនាញដែលអ្នកមាននោះ?

ចំពោះការទាញយកប្រយោជន៍ពីចំណេះជំនាញដែលអ្នកមាននោះ គឺអ្នកអាចចាប់ផ្ដើមលក់សេវាកម្ម តាមរយៈការធ្វើការឱ្យក្រុមហ៊ុនណាមួយ ឬធ្វើការបែបឯករាជ្យឱ្យក្រុមហ៊ុនច្រើនកន្លែងលើផ្នែកដែលអ្នកមាន។ ឧទាហរណ៍ អ្នកមានចំណេះជំនាញផ្នែកទីផ្សារឌីជីថល ដូច្នេះអ្នកអាចជ្រើសរើសក្រុមហ៊ុនដែលអ្នកអាចលក់សេវាកម្មរបស់អ្នក ដោយធ្វើការលើផ្នែកនោះឱ្យបានល្អបំផុតដើម្បីទទួលបានប្រាក់កម្រៃ ព្រមទាំងអាចធ្វើជាអ្នកធ្វើការឯករាជ្យលើផ្នែកនោះផងដែរ។

សកម្មភាពនេះ ជាការចាប់ផ្ដើមបង្កើតដើមទុនដំបូង ដោយអ្នកទទួលបានទាំងប្រាក់ចំណូល និងបទពិសោធន៍ការងារជាក់ស្ដែង ព្រមទាំងធ្វើឱ្យចំណេះជំនាញរបស់អ្នកកាន់តែខ្លាំង ដែលអាចបង្ហាញជាបទពិសោធន៍ឱ្យក្រុមអតិថិជនគោលដៅរបស់អ្នកកាន់តែមានទំនុកចិត្តលើអ្នក នៅពេលអ្នកចាប់ផ្ដើមអាជីវកម្មផ្ទាល់ខ្លួន។

អ្នកត្រូវចងចាំថា ការលក់សេវាកម្មលើចំណេះជំនាញដែលអ្នកមាន ជាការចាប់ផ្ដើមដ៏ល្អបំផុត។

2. សរសេរគំរូអាជីវកម្មមួយដ៏រឹងមាំសម្រាប់ខ្លួនឯង

គំរូអាជីវកម្ម (Business Model) គឺជាអ្វីដែលអ្នកត្រូវធ្វើមុននឹងសរសេរផែនការអាជីវកម្មឱ្យមានភាពលម្អិតបាន ដោយសារតែគំរូអាជីវកម្ម វានឹងបង្ហាញថាអាជីវកម្មរបស់អ្នកអាចដំណើរការទៅមុខ និងអាចបង្កើតប្រាក់ចំណេញបានឬអត់។ អ្នកអាចឈ្វេងយល់បន្ថែមអំពីរបៀបសរសេរគំរូអាជីវកម្មរបស់ Canvas តាមរយៈតំណរភ្ជាប់នេះ https://kumnit.com/អាចទាញយក-និងមើលការពន្យល/ ។

ហេតុអ្វីត្រូវសរសេរគំរូអាជីវកម្មដ៏រឹងមាំសម្រាប់ខ្លួនឯងជាមុនសិន? ដោយសារតែ មុននឹងអាចចាប់ផ្ដើមអាជីវកម្មមួយបានល្អ មិនមែនចេះតែនឹកឃើញចាប់ផ្ដើមឡើយ គឺទាមទារឱ្យមានគំរូមួយក្នុងការអនុវត្តន៍ ដើម្បីវិភាគឱ្យឃើញថា អាជីវកម្មរបស់អ្នកអាចមានអនាគតវែងឆ្ងាយឬទេ ហើយមានប្រាក់ចំណេញឬអត់។ បន្ទាប់មកទើបចាប់ផ្ដើមសរសេរផែនការអាជីវកម្មលម្អិតក្នុងការចាប់ផ្ដើម។ ធ្វើបែបនេះ មុនពេលចាប់ផ្ដើមជារឿងដ៏ល្អបំផុត ទោះបីជាអ្នកមិនទាន់មានលុយក្នុងការចាប់ផ្ដើមក៏ពិតមែន ប៉ុន្តែគំរូអាជីវកម្មដ៏ល្អរបស់អ្នក នឹងជួយបង្ហាញផ្លូវអ្នកក្នុងការទទួលបានដើមទុនក្នុងការចាប់ផ្ដើមមិនខាន។

3. ប្រឡូកឱ្យបានច្រើនលើគំនិតអាជីវកម្មរបស់អ្នក

នៅពេលដែលអ្នកចេះលក់សេវាកម្មលើចំណេះជំនាញរបស់អ្នក និងរៀបចំការសរសេរគំរូអាជីវកម្មដ៏រឹងមាំសម្រាប់ខ្លួនឯង វាជាចំណុចចាប់ផ្ដើមដ៏ល្អ។ ជំហានបន្ទាប់ អ្នកត្រូវយកចំណេះជំនាញ ក៏ដូចជាគំនិតអាជីវកម្មរបស់អ្នកដែលអ្នកបានសរសេរចេញជាគំរូអាជីវកម្មនោះ យកមកប្រឡូកឱ្យបានច្រើននៅក្នុងទីផ្សារជាក់ស្ដែង ដើម្បីតេស្តមើលថាតើវាត្រូវមានចំណុចកែតម្រូវអ្វីទៀតទេ? ហើយត្រូវការអ្វីបន្ថែម?

ធ្វើបែបនេះ នឹងធ្វើឱ្យអ្នកកាន់តែជឿជាក់លើខ្លួនឯង ដើម្បីចាប់ផ្ដើមលើគំនិតអាជីវកម្មរបស់អ្នក ដោយអ្នកមានទាំងចំណេះជំនាញច្បាស់លាស់ និងមានបទពិសោធន៍ក្នុងការប្រឡូកច្រើនទៀត។ ទាំងនេះ សុទ្ធតែជាដើមទុន និងជាមូលដ្ឋានគ្រឹះដ៏សំខាន់ ដោយអ្នកមិនមែនចាប់ផ្ដើមអាជីវកម្មតាមគេតាមឯង និងចាប់ផ្ដើមតាមតែការនឹកឃើញឡើយ ប៉ុន្តែចាប់ផ្ដើមដោយមានក្បួនត្រឹមត្រូវ និងមានគំរូអាជីវកម្មជាក់លាក់ ដូច្នេះនៅពេលចាប់ផ្ដើមជាផ្លូវការ ច្បាស់ណាស់មិនខ្វះទេ អ្នកចាំវិនិយោគជាមួយ និងហានិភ័យទាបបំផុតក្នុងការរកស៊ីខាត ដោយសារអ្នកមានភាពជឿជាក់ និងមានមូលដ្ឋានគ្រឹះដ៏រឹងមាំរួចជាច្រើនក្នុងការចាប់ផ្ដើម ដោយអមជាមួយនឹងផែនការអាជីវកម្មច្បាស់លាស់។

4. កសាងម៉ាកយីផ្ទាល់ខ្លួនលើបណ្ដាញសង្គម

ការកសាងម៉ាកយីហោផ្ទាល់ខ្លួន គឺជារឿងសំខាន់ណាស់មុននឹងអ្នកចាប់ផ្ដើមអាជីវកម្ម ហើយអំឡុងពេលអ្នកគ្មានលុយក្នុងការចាប់ផ្ដើមទៀត ពីព្រោះវានឹងជួយអ្នកបង្កើតដៃគូសហការ និងមានអតិថិជនគាំទ្រជាច្រើននៅពេលអ្នកចាប់ផ្ដើមដំណើរការអាជីវកម្មជាផ្លូវការ។

ហេតុដូចនេះ អ្នកត្រូវតែបង្កើតមាតិកា និងបង្ហាញខ្លួននៅលើបណ្ដាញសង្គមឱ្យបានញឹកញាប់ ដោយផ្ដោតលើចំណេះជំនាញ ឬលើវិស័យណាមួយជាក់លាក់ដែលអ្នកមានគម្រោងចាប់ផ្ដើមរកស៊ីនោះ។ធ្វើបែបនេះ មនុស្សជាច្រើនចាប់ផ្ដើមចាត់ទុកអ្នកជាអ្នកជំនាញលើវិស័យនោះ ព្រមទាំងមានទំនុកចិត្តលើអ្នកកាន់តែខ្លាំង។ ម៉ាកយីហោផ្ទាល់ខ្លួនល្អ វានឹងនាំអ្នកឆ្ពោះទៅកាន់ភាពរីកចម្រើនកាន់តែខ្លាំង។

ពាណិជ្ជកម្ម

តើការឆ្លើយតបរហ័សនៅលើបណ្ដាញសង្គម មានសារៈសំខាន់អ្វី?

Sann Thaven

នៅលើបណ្ដាញសង្គមបច្ចុប្បន្ននេះ មានមនុស្សជាច្រើនកំពុងប្រើប្រាស់វា ហើយពួកគេសុទ្ធសឹងជាអតិថិជនគោលដៅសម្រាប់អ្នក ដែលនេះជាឱកាសក្នុងការធ្វើឱ្យអាជីវកម្មរបស់អ្នកកាន់តែរីកចម្រើន។ អាជីវកម្មមួយរីកចម្រើនបាន លុះត្រាតែអាជីវកម្មនោះអាចបង្កើតប្រាក់ចំណូល និងមានប្រាក់ចំណេញច្រើន ហើយដើម្បីធ្វើរឿងនេះបាន គឺទាមទារឱ្យមានអតិថិជនគាំទ្រច្រើនដូចគ្នា។ បន្ថែមពីនេះ ដើម្បីធ្វើឱ្យអតិថិជនគាំទ្រច្រើន ទាល់តែអ្នកមានអ្វីពិសេសសម្រាប់ផ្ដល់ជូនអតិថិជន និងធ្វើសកម្មភាពណាមួយដើម្បីបំពេញចិត្តរបស់ពួកគេផងដែរ ដូចពាក្យមួយគេតែងតែនិយាយថា “អតិថិជន គឺជាស្ដេច”។

លើសពីនេះ ម្ចាស់អាជីវកម្ម ក៏ត្រូវដឹងដែរថា នៅក្នុងសម័យនេះមនុស្សជួបជជែកគ្នា ឬសួរព័ត៌មានគ្នាតែនៅលើបណ្ដាញសង្គមភាគច្រើន ដូច្នេះអតិថិជនរបស់អ្នកក៏ភាគច្រើននឹងសួរនាំអំពីផលិតផលឬសេវាកម្មរបស់អ្នកនៅលើបណ្ដាញសង្គមដូចគ្នា។ ហេតុនេះ អ្នកត្រូវតែគិតគូរលើរបៀបឆ្លើយតបជាមួយអតិថិជន និងធ្វើឱ្យការឆ្លើយតបនោះមានភាពរហ័សទាន់ចិត្ត ដោយយឺតបំផុតត្រឹម 15 នាទី ឬតិចជាងនេះ កាន់តែល្អ។

ហេតុអ្វីការឆ្លើយតបជាមួយអតិថិជននៅលើបណ្ដាញសង្គមបានរហ័សមានសារៈសំខាន់?

1. អាចរក្សាការប្ដូរចិត្តអតិថិជន ពីព្រោះអតិថិជនមានជម្រើសច្រើន

នាពេលបច្ចុប្បន្ននេះមានអាជីវកម្មជាច្រើននៅលើទីផ្សារ ដោយអាជីវកម្មខ្លះមានផលិតផលសេវាកម្មស្រដៀងគ្នាឬដូចគ្នា ដើម្បីប្រកួតប្រជែងគ្នាដណ្ដើមទីផ្សារ។ ហេតុនេះ អតិថិជនក៏មានជម្រើសច្រើនដើម្បីសម្រេចចិត្តជ្រើសរើសផលិតផលឬសេវាកម្មពីក្រុមហ៊ុនណាមួយដែលពួកគេទុកចិត្ត មានការផ្ដល់សេវាកម្មអតិថិជនល្អ និងឆ្លើយតបរហ័សជាមួយពួកគេ។

កត្តានេះហើយ ទើបទាមទារឱ្យអ្នកត្រូវមានការឆ្លើយតបរហ័សនៅពេលអតិថិជនបានផ្ញើសារសួរអ្នកនៅលើបណ្ដាញសង្គម ដើម្បីចៀសវាងធ្វើឱ្យពួកគេប្ដូរចិត្តផ្ញើសារទៅសួររកកន្លែងផ្សេង និងសម្រេចចិត្តទិញផលិតផលសេវាកម្មនៅកន្លែងណាដែលឆ្លើយតបលឿនជាងអ្នក។

អ្នកត្រូវចងចាំថា ទោះបីជាក្រុមហ៊ុនរបស់អ្នកមានផលិតផលឬសេវាកម្មល្អប៉ុណ្ណាក៏ដោយ ក៏ប៉ុន្តែបើអ្នកមានការឆ្លើយតបយឺតយ៉ាវពេក នោះក៏ធ្វើឱ្យអតិថិជនមានការប្ដូរចិត្តដោយលែងត្រូវការ ឬក៏ទៅរកកន្លែងផ្សេងដែរ។ ហេតុនេះ ការឆ្លើយតបរហ័ស វានឹងជួយអ្នកដើម្បីរក្សាអតិថិជន និងបិទការលក់ជាមួយនឹងពួកគេក៏បានរហ័សផងដែរ។

2. ធ្វើឱ្យអតិថិជនកាន់តែសប្បាយចិត្ត

ការឆ្លើយតបរហ័ស នឹងធ្វើឱ្យអតិថិជនកាន់តែសប្បាយចិត្ត ពីព្រោះអតិថិជនចូលចិត្តបែបលឿនៗ ដោយមិនចូលចិត្តការរងចាំយូរ និងឆ្លើយតបនូវអ្វីស្របតាមការចង់ដឹង និងដោះស្រាយរាល់ចម្ងល់របស់ពួកគេ។ បន្ថែមពីនេះ វាក៏ជាឱកាសមួយសម្រាប់ក្រុមហ៊ុនរបស់អ្នក តាមរយៈការធ្វើឱ្យអតិថិជនចាប់ផ្ដើមសប្បាយចិត្តជាមួយនឹងក្រុមហ៊ុនរបស់អ្នក ហើយពួកគេអាចនឹងជួយណែនាំបន្ដទៅកាន់អ្នកផ្សេងទៀតអំពីចំណុចល្អរបស់ក្រុមហ៊ុនរបស់អ្នក។ល។

3. ឱកាសបិទការលក់បានច្រើន

ជាធម្មតាទេ ប្រសិនបើអតិថិជនចាប់អារម្មណ៍អ្វីមួយ ច្បាស់ណាស់ពួកគេនឹងផ្ញើសារដើម្បីសួរព័ត៌មានបន្ថែមអំពីផលិតផលឬសេវាកម្មរបស់អ្នកមិនខាន។ ហេតុដូចនេះ បើអតិថិជនមានការចាប់អារម្មណ៍ហើយ បើអ្នកឆ្លើយតបយឺតយ៉ាវពេកជាមួយអតិថិជន នោះអតិថិជននឹងឈប់ចាប់អារម្មណ៍ ឬប្ដូរចិត្តជាដើម ហេតុនេះវាក៏ជាកត្តាធ្វើឱ្យអ្នកបាត់បង់ឱកាសក្នុងការឈានដល់បិទការលក់ជាមួយអតិថិជនដែរ។ ហេតុដូច្នេះ អ្នកត្រូវព្យាយាមធ្វើយ៉ាងណា ឆ្លើយតបឱ្យបានលឿនបំផុតតាមដែលអាចធ្វើបាន ទោះបីជាអតិថិជនទិញឬមិនទិញក៏ដោយ ប៉ុន្តែអ្នកត្រូវចងចាំថា អតិថិជនកំពុងចាប់អារម្មណ៍ជាមួយនឹងផលិតផលសេវាកម្មរបស់អ្នក ដូច្នេះអ្នកត្រូវតែព្យាយាមផ្ដល់ព័ត៌មានឱ្យបានច្រើនលើអ្វីដែលអតិថិជនរបស់អ្នកចង់ដឹងបន្ថែម និងបង្ហាញថាអ្នកយកចិត្តទុកដាក់ជាមួយនឹងពួកគេ។ ធ្វើបែបនេះ អតិថិជននឹងចាប់ផ្ដើមគិតពិចារណាក្នុងការទិញ មិនថាទិញឥលូវ ឬក៏ថ្ងៃបន្ទាប់នោះទេ។

ពាណិជ្ជកម្ម

តើត្រូវធ្វើបែបណា ទើបទទួលបានគំនិតថ្មីៗជានិច្ច?

Sann Thaven

គំនិតថ្មីៗ ហើយមានភាពច្នៃប្រឌិត គឺជាផ្នែកមួយដែលមនុស្សយន្តមិនអាចមកជំនួសបានឡើយ មានតែមនុស្សប៉ុណ្ណោះទើបអាចមាន ព្រមទាំងអាចបង្កើតនូវអ្វីដែលអស្ចារ្យ និងអាចដោះស្រាយអ្វីមួយបានតាមរយៈការមានគំនិតថ្មីទាំងនោះ។ បន្ថែមពីនេះ គំនិតថ្មីក៏អាចជួយបុគ្គលម្នាក់ៗឱ្យរីកចម្រើននៅក្នុងអាជីព ផ្ទាល់ខ្លួន និងអាចជួយក្រុមហ៊ុន ឬអ្នកជុំវិញឱ្យរីកចម្រើនផងដែរ។ ទោះបីជាយ៉ាងនេះក្ដី មនុស្សក៏ចេះស្រេ្តស ស្មុគស្មាញ និងគាំងគំនិតដោយគិតអ្វីមិនចេញផងដែរ ដូច្នេះតើមានវិធីសាស្រ្ត ឬត្រូវធ្វើបែបណាទើបអាចមានគំនិតថ្មីៗជានិច្ច?

នៅក្នុងខ្លឹមសារខាងក្រោមនេះ នឹងបង្ហាញនូវគន្លឹះមួយចំនួនដើម្បីអនុវត្តន៍ក្នុងការទទួលបាននូវគំនិតថ្មីៗជានិច្ចសម្រាប់បំពេញកិច្ចការងារណាមួយឱ្យសម្រេចស្របតាមការរំពឹងទុក។

1. ការសម្រាក

អ្នកអាចអង្គុយ ឬក៏គេង ហើយបន្ធូរអារម្មណ៍ ដោយកុំធ្វើអ្វីទាំងអស់ក្រៅពីសម្រាក និងការស្ដាប់ភ្លេងកម្រអារម្មណ៍ ឬធ្វើសកម្មភាពណាមួយដែលវាបានជួយអ្នកឱ្យទទួលបាននូវអារម្មណ៍សម្រាក។ ធ្វើបែបនេះ វានឹងជួយអ្នកកាត់បន្ថយភាពតានតឹង ស្រ្ដេស ភាពនឿយហត់ និងការគិតស្មុគស្មាញនានា បន្ទាប់មកអ្នកនឹងកាន់តែមានអារម្មណ៍ស្រស់ស្រាយ និងល្អ ដើម្បីនឹកគិតនូវអ្វីដែលថ្មីមិនខាន។

2. ជជែកជាមួយបុគ្គលផ្សេងៗ

អ្នកអាចស្វែងរកបុគ្គលណាម្នាក់ ឬច្រើននាក់ ដែលអាចផ្ដល់ជាគំនិតថ្មីៗសម្រាប់អ្នកក្នុងការធ្វើអ្វីមួយ មិនថាការជជែកដោយផ្ទាល់ ឬការសន្ទនាតាមអនឡាញឡើយ អ្នកអាចទៅទំនាក់ទំនងជាមួយពួកគេដើម្បីសុំជាគំនិត ឬមតិយោបល់ ដើម្បីអ្នកអាចមានគំនិតថ្មីក្នុងការធ្វើរឿងដែលអ្នកចង់បាន។ អ្នកត្រូវដឹងថា ការជជែកជាមួយនឹងបុគ្គលដែលមានចំណេះដឹងច្រើនលើផ្នែកដែលអ្នកចង់ដឹង ពួកគេនឹងអាចមានគំនិតច្រើន ដែលជាចំណុចដែលជួយអ្នកឱ្យនឹកគិតឃើញនូវអ្វីដែលថ្មីជានិច្ច។ ឧទាហរណ៍ ប្រសិនបើអ្នកគាំងគំនិតក្នុងការបង្កើតមាតិកាថ្មីៗដើម្បីទាក់ទាញចិត្តអតិថិជន ដូច្នេះអ្នកអាចសុំការណាត់ជួបជជែកគ្នាអំពីការបង្កើតមាតិកាពីអ្នកដែលកំពុងប្រឡូកក្នុងវិស័យនោះដែរ ដើម្បីដោះដូរគំនិតគ្នា បម្លែងជាគំនិតថ្មីសម្រាប់អនុវត្តន៍។ល។

3. ធ្វើលំហាត់ប្រាណ

អ្នកអាចធ្វើលំហាត់ប្រាណ ដូចជាការជិះកង់ ការដើរ និងធ្វើសកម្មភាពនានា ដើម្បីជួយធ្វើឱ្យអ្នកកាន់តែស្រស់ស្រាយ ដោយមិននៅស្មុគនឹងគំនិតនៅកន្លែងងងឹត ឬក្នុងបន្ទប់។ នៅពេលអ្នកធ្វើសកម្មភាពកាន់តែច្រើន អ្នកនឹងទទួលបានអារម្មណ៍ថាអ្នករហ័សរហួនជាងមុន ស្រស់ស្រាយជាងមុន និងអាចមានគំនិតជាបន្តបន្ទាប់ដែលអ្នកនឹងគិតស្រមៃឃើញជាក់ជាមិនខាន។

4. ធ្វើការសិក្សាស្រាវជ្រាវដើម្បីបង្កើតគំនិតឱ្យបានច្រើន

អ្នកអាចចាប់ផ្ដើមធ្វើការសិក្សាស្រាវជ្រាវតាមប្រព័ន្ធអនឡាញ ឬអានសៀវភៅដែលទាក់ទងផ្នែកណាដែលអ្នកចង់ដឹងឱ្យបានច្រើន ដើម្បីមានចំណេះដឹងទូលំទូលាយ។ បន្ទាប់មកបង្កើតជាគំនិតឱ្យបានច្រើនតាមដែលអាចធ្វើបានឱ្យស្របតាមគោលដៅដែលអ្នកចង់បាន នោះអ្នកនឹងមានគំនិតថានឹងត្រូវធ្វើអ្វីបន្តទៀត និងអាចបង្រួមគំនិតទាំងនោះជាគំនិតថ្មីមួយ ឬនឹកឃើញគំនិតថ្មីៗជាបន្តបន្ទាប់។

5. កុំខ្លាចនឹងការសាកល្បង ឬការមានកំហុស

ប្រសិនបើអ្នកមានគំនិតក្នុងការធ្វើអ្វីមួយហើយ ចូរសាកល្បងធ្វើវា ដោយកុំគិតថាខ្លាចមានកំហុស ឬខ្លាចនេះ ខ្លាចនោះជាដើមឱ្យសោះ។ ចូរចងចាំថា ការសាកល្បង នឹងជួយអ្នកឱ្យមើលឃើញនូវចំណុចខ្វះខាត និងចំណុចដែលអ្នកត្រូវកែតម្រូវដើម្បីធ្វើវាឱ្យបានល្អប្រសើរជាងមុន។ បន្ថែមពីនេះ ការសាកល្បង ក៏ជាផ្នែកមួយដ៏សំខាន់ដែលជួយជំរុញអ្នកឱ្យមានគំនិតថ្មីៗជាបន្តបន្ទាប់ប្រកបដោយប្រសិទ្ធភាពខ្ពស់។

ពាណិជ្ជកម្ម

ហេតុអ្វីមានចំណេះដឹង និងជំនាញបច្ចេកទេសហើយ នៅតែមិនទាន់គ្រប់គ្រាន់?

Sann Thaven

មនុស្សគ្រប់គ្នាសុទ្ធតែមានសិទ្ធិក្នុងការទទួលបាននូវចំណេះដឹង និងមានជំនាញបច្ចេកទេសលើផ្នែកណាមួយទៅតាមចំណង់ចំណូលចិត្ត ទេសកោសល្យ និងក្ដីស្រមៃផ្ទាល់ខ្លួនពីការសិក្សារៀនសូត្រក្នុងសាលារៀន កន្លែងធ្វើការ បរិបទសង្គម និងការសិក្សាស្រាវជ្រាវនៅលើប្រព័ន្ធអ៊ីនធឺណិតជាដើម។

ចំណេះដឹង និងជំនាញបច្ចេកទេស គឺជាផ្នែកមួយដ៏សំខាន់សម្រាប់មនុស្សគ្រប់គ្នា ដើម្បីអាចបំពេញកិច្ចការងារបានយ៉ាងល្អ និងមានដំណើរការរលូន ប៉ុន្តែទោះបីជាយ៉ាងណា ដើម្បីប្រើប្រាស់ចំណេះដឹង និងជំនាញបច្ចេកទេសដែលមាននោះបានកាន់តែល្អនៅក្នុងការអនុវត្តន៍ជាក់ស្ដែង គឺទាមទារឱ្យបុគ្គលម្នាក់ៗត្រូវរៀនប្រឡូកនៅក្នុងសង្គមជាក់ស្ដែង និងចេះជំនាញទន់ឱ្យបានច្រើនផងដែរ ដូចជាភាពបត់បែនតាមកាលៈទេសៈ របៀបធ្វើការជាមួយមនុស្សគ្រប់ប្រភេទ ភាពជាអ្នកដឹកនាំ ការធ្វើការងារជាក្រុម ភាពវៃឆ្លាត ផ្នែកអារម្មណ៍ និងជាច្រើនទៀត។

បន្ថែមពីនេះ ខ្លឹមសារខាងក្រោមនឹងបង្ហាញនូវចំណុចមួយចំនួនដែលបញ្ជាក់យ៉ាងច្បាស់ថា ការមានចំណេះដឹង និងជំនាញបច្ចេកទេស វានៅមិនទាន់គ្រប់គ្រាន់នៅឡើយទេ។

1. មនុស្សមានគ្រប់ប្រភេទនៅក្នុងសង្គមជាក់ស្ដែង

មនុស្សគ្រប់គ្នា មិនអាចគេចផុតពីការធ្វើការងារជាមួយនឹងប្រភេទមនុស្សខុសៗគ្នាបានឡើយ មិនថាអ្នកស្ថិតនៅក្នុងឋានៈតួនាទីអ្វីឡើយ សុទ្ធតែត្រូវធ្វើការជាមួយមនុស្សទាំងអស់។ ការធ្វើការជាមួយមនុស្ស មិនត្រឹមតែទាមទារឱ្យអ្នកមានចំណេះដឹង និងជំនាញបច្ចេកទេសមួយច្បាស់លាស់ប៉ុណ្ណោះទេ ប៉ុន្តែវាក៏ទាមទារឱ្យអ្នកចេះធ្វើការជាមួយពួកគេផងដែរ ដូចជារបៀបទំនាក់ទំនងជាមួយពួកគេ និងរបៀបចុះសម្រុងក្នុងការបំពេញការជាមួយពួកគេជាដើម ដើម្បីបង្កើនផលិតភាពការងារ និងសម្រេចនូវគោលដៅណាមួយរួមគ្នា ឬសម្រេចនូវគោលបំណងជាក់លាក់របស់អ្នក ប្រសិនបើអ្នកជាងអ្នកមានតួនាទីខ្ពស់ ដូចជាម្ចាស់អាជីវកម្ម ថ្នាក់ដឹកនាំ។ល។

2. ការអភិវឌ្ឍន៍ជំនាញឱ្យមានភាពលេចធ្លោជាងគេ

មនុស្សគ្រប់គ្នា អាចមានជំនាញដូចគ្នា ឬខុសគ្នាទៅតាមចំណង់ចំណូលចិត្ត ឧទាហរណ៍ មនុស្ស 2 ឬច្រើននាក់ ចង់ក្លាយជាមេធាវីនាពេលអនាគត ដែលជាគោលបំណងដូចគ្នា ប៉ុន្តែក៏មានមនុស្ស 2 ឬច្រើននាក់ផ្សេងទៀត ចង់ក្លាយជាអ្នកជំនាញផ្នែកសរសេរកូដកម្មវិធី និងជំនាញផ្សេងទៀតខុសៗពីគ្នា។ ទោះបីជាយ៉ាងនេះក្ដី ពួកគេអាចហ្វឹកហាត់លើជំនាញនេះពីអ្នកជំនាញ ឬចេញពីសាលារៀនក្នុងរយៈពេលកំណត់ណាមួយដូចៗគ្នា ប៉ុន្តែនៅពេលអនុវត្តន៍ជាក់ស្ដែង មិនប្រាកដថា ពួកគេជួបស្ថានភាពដូចគ្នា និងមានសមត្ថភាពឆ្លាតវៃលើជំនាញដូចគ្នាទាំងអស់បានឡើយ ជាពិសេសការមានឆន្ទៈ និងការខិតខំព្យាយាមជាដើម ដែលអាចជួយពួកគេឱ្យរីកចម្រើនលើជំនាញដែលពួកគេចង់ក្លាយជានោះ។ ហេតុនេះ ទោះបីជាមានចំណេះដឹង និងមានជំនាញបច្ចេកទេសរួចហើយក៏ដោយ ក៏ត្រូវមានការអនុវត្តឱ្យបានច្រើនដើម្បីមានបទពិសោធន៍ក្នុងការពង្រីកសមត្ថភាព ពង្រីកចំណេះដឹង ពង្រីកសក្ដានុពល និងអភិវឌ្ឍន៍ជំនាញនោះឱ្យមានភាពរីកចម្រើនជាបន្តបន្ទាប់ទៅតាមសម័យកាល ដោយតែងតែមានភាពថ្មី ច្នៃប្រឌិត និងល្អលេចធ្លោរជាងអ្នកដែលមានជំនាញដូចអ្នក។

3. កសាងបណ្ដាញ និងម៉ាកយីហោផ្ទាល់ខ្លួនឱ្យបានល្អ

ការមានចំណេះដឹង និងជំនាញបច្ចេកទេស វាមិនទាន់មានភាពគ្រប់គ្រាន់ក្នុងការរីកចម្រើននៅក្នុងសង្គមជាក់ស្ដែងបានឡើយ គឺវាទាមទារឱ្យអ្នកចេះកសាងម៉ាកយីហោផ្ទាល់ខ្លួនឱ្យបានល្អលើចំណេះជំនាញដែលអ្នកមាន ដើម្បីធ្វើឱ្យមនុស្សផ្សេងទៀតកាន់តែមានទំនុកចិត្តនិងផ្ដល់គុណតម្លៃដល់អ្នក។ បន្ថែមពីនេះ ការបង្កើតបណ្ដាញទំនាក់ទំនងឱ្យបានច្រើនលើវិស័យដែលអ្នកចង់រីកចម្រើន ពីព្រោះបើអ្នកចង់រីកចម្រើនអ្វីមួយ គឺមិនអាចដើរទៅម្នាក់ឯងបាន ឬគ្រាន់តែមានចំណេះជំនាញតែមួយផ្នែកឡើយ ប៉ុន្តែត្រូវការអ្នកផ្សេងទៀតដើម្បីជួយ ទាំងការសហការរួមគ្នា ការជួយផ្ដល់ជាមតិយោបល់ និងការជួយបង្រៀន ជួយណែនាំបង្ហាញផ្លូវបន្ថែម តាមរយៈការបង្កើតបណ្ដាញទំនាក់ទំនងឱ្យបានច្រើន។ល។ ដូច្នេះការកសាងបណ្ដាញទំនាក់ទំនង និងកសាងម៉ាកយីហោផ្ទាល់ខ្លួន ជារឿងសំខាន់ដែលអ្នកត្រូវតែមានបន្ថែមទៀត ក្រៅពីការមានតែចំណេះដឹង និងជំនាញបច្ចេកទេស។

ពាណិជ្ជកម្ម

ទោះបីជាសេដ្ឋកិច្ចធ្លាក់ចុះ ក៏លោក Colin Huang អាចរក 3 ពាន់លានដុល្លារក្នុងមួយថ្ងៃដែរ! ហេតុអ្វី?

Sann Thaven

លោក Colin Huang ស្ថាបនិកក្រុមហ៊ុន Pinduoduo ដែលមានការិយាល័យកណ្ដាលនៅទីក្រុងសៀងហៃនៃប្រទេសចិន។ Pinduoduo ត្រូវបានបង្កើតឡើងក្នុងឆ្នាំ 2015 ហើយបានរីកចម្រើនក្លាយជាទីផ្សារអនឡាញដ៏ធំបំផុតសម្រាប់ផលិតផលកសិកម្មនៅក្នុងប្រទេសចិន។ បន្ថែមពីនេះ Pinduoduo ក៏ជាក្រុមហ៊ុនបញ្ចុះតម្លៃអនឡាញ ដែលជាគេហទំព័រពាណិជ្ជកម្មអេឡិចត្រូនិចដ៏ធំបំផុតមួយរបស់ប្រទេសចិនផងដែរ។ ក្រោយពីវេទិការពាណិជ្ជកម្មអាឡិចត្រូនិច Pinduoduo បានប្រកាសរបាយការណ៍ពីប្រាក់ចំណូលលើសពីការរំពឹងទុក ទទឹមនឹងនោះ Colin Huang បានកើនទ្រព្យសម្បត្តិ 3 ពាន់លានដុល្លារក្នុងមួយថ្ងៃ។ លោក Colin Huang ត្រូវបានជនជាតិចិនទទួលស្គាល់ថា គាត់ជាមហាសេដ្ឋីផ្នែកបច្ចេកវិទ្យាក្នុងវ័យ 42 ឆ្នាំ។ ចំពោះទ្រព្យសម្បត្តិភាគច្រើនដែលគាត់ទទួលបាន គឺចេញពីភាគហ៊ុនដែលបានចុះបញ្ជី Nasdaq របស់ Pinduoduo និងបានកើនឡើង 14.7% កាលពីថ្ងៃទី29 ខែសីហា ឆ្នាំ2022 នេះ។ បន្ថែមពីនេះ ចំពោះរបាយការណ៍ក្នុងត្រីមាសទីពីររបស់ Pinduoduo មានចំនួន 4.7 ពាន់លានដុល្លារដែលកើនឡើង 36% ធៀបនឹងឆ្នាំ 2021។ ប្រាក់ចំណូលសុទ្ធក្នុងអំឡុងពេលដូចគ្នានេះដែរ ស្ទើរតែបួនដងស្មើនឹង 1.3 ពាន់លានដុល្លារ។ ហើយនេះបើយោងតាមការចុះផ្សាយរបស់ទស្សនាវដ្ដី Forbes។

គួរបញ្ជាក់ផងដែរថា Pinduoduo អាចទាក់ទាញអ្នកប្រើប្រាស់ដោយការនាំយកទំនិញប្រចាំថ្ងៃ ដោយមានតម្លៃថោក ដូចជាស៊ុតតម្លៃ 1.7 ដុល្លារក្នុងមួយគីឡូក្រាម និងក្រដាសបង្គន់ដែលមានតម្លៃតិចជាង 1 ដុល្លារ។ លោក Ke Yan ប្រធានផ្នែកស្រាវជ្រាវនៅក្រុមហ៊ុន DZT Research ដែលមានមូលដ្ឋាននៅប្រទេសសិង្ហបុរី ក៏មានប្រសាសន៍ថា “ទោះបីជាសេដ្ឋកិច្ចធ្លាក់ចុះ ក៏វាជារឿងល្អសម្រាប់ Pinduoduo ដែរ” ។ បន្ថែមពីនេះ Pinduoduo ក៏កំពុងស្វែងរកការពង្រីកទៅក្រៅប្រទេសផងដែរ បើយោងតាមប្រសាសន៍របស់លោក Chen Lei ដែលបានកាន់តួនាទីជាប្រធានក្រុមប្រឹក្សាភិបាលនៃក្រុមហ៊ុន Pinduoduo បន្ទាប់ពីលោក Colin Huang បានលាឈប់ពីមុខតំណែងមួយនេះ កាលពីខែមីនា ឆ្នាំ2021។

ពាណិជ្ជកម្ម

ហេតុអ្វី Storytelling មានសារៈសំខាន់នៅក្នុងអាជីវកម្ម?

Sann Thaven

Storytelling បើបកក្នុងន័យអាជីវកម្ម គឺជាសារផ្សព្វផ្សាយបែបចិត្តសាស្រ្ត ដើម្បីទាក់ទាញអតិថិជន និងជំរុញឱ្យពួកគេធ្វើសកម្មភាពចង់បានផលិតផលសេវាកម្ម និងហ៊ានចំណាយប្រាក់លើផលិតផលសេវាកម្មរបស់អ្នក។ ហើយជាទូទៅ គេបក Storytelling ជាខ្មែរថា “ការនិទានរឿង” ។

ការធ្វើ Storytelling ភាគច្រើនគឺគេនិយាយបង្ហាញជាវីដេអូ ដើម្បីផ្ដល់នូវព័ត៌មានដែលមានប្រយោជន៍នៅក្នុងរឿងនិទាននោះ អ្វីដែលអាចជំរុញក្រុមការងារនៅក្នុងអាជីវកម្មនោះ អ្វីដែលម៉ាកយីហោរបស់អ្នកកំពុងស្ថិតនៅ និយាយអំពីអតិថិជនរបស់អ្នក អារម្មណ៍និងការចូលរួម ការចាប់ផ្តើមវិបត្តិនិងដំណោះស្រាយ និងព្យាយាមធ្វើអន្តរកម្មរវាងអតិថិជនជាមួយនឹងម៉ាកយីហោរបស់អ្នក។

Storytelling ពិតជាផ្នែកមួយដែលចូលរួមចំណែកយ៉ាងសំខាន់ក្នុងការជួយជំរុញឱ្យអាជីវកម្មកាន់តែមានភាពរីកចម្រើននៅលើទីផ្សារ។ កត្តានេះហើយ ខ្លឹមសារខាងក្រោមនឹងបង្ហាញនូវសារៈសំខាន់មួយចំនួន ដែលបង្ហាញថា Storytelling មានសារៈសំខាន់នៅក្នុងអាជីវកម្ម ហើយម្ចាស់អាជីវកម្មទាំងអស់គួរគិតពិចារណាលើការប្រើប្រាស់ Storytelling នៅក្នុងអាជីវកម្មរបស់ខ្លួនឯង។

1. Storytelling ផ្តល់នូវគុណសម្បត្តិប្រកួតប្រជែង

គុណសម្បត្តិប្រកួតប្រជែង (Competitive Advantage) សំដៅលើគុណលក្ខណៈដែលអនុញ្ញាតឱ្យក្រុមហ៊ុនផ្តល់នូវការបង្កើតផលិតផលសេវាកម្មដែលមានតម្លៃសមរម្យ និងមានគុណភាពខ្ពស់ជាងដៃគូប្រកួតប្រជែង ព្រមទាំងជួយធ្វើឱ្យអាជីវកម្មដំណើរការបានយូរអង្វែង ហើយក៏ពិបាកឱ្យដៃគូប្រកួតប្រជែងផ្សេងទៀតចម្លងតាមបានក្នុងរយៈពេលខ្លី។

បន្ថែមពីនេះ ប្រសិនបើក្រុមហ៊ុនមាន Storytelling វាកាន់តែផ្ដល់នូវគុណសម្បត្តិប្រកួតប្រជែង ដោយធ្វើឱ្យផលិតផលសេវាកម្មរបស់អ្នកស្ថិតនៅក្នុងការចងចាំរបស់អតិថិជន អាចយកឈ្នះលើអតិថិជន បង្កើតម៉ាកយីហោដ៏រឹងមាំ និងមានភាពលេចធ្លោរនៅក្នុងទីផ្សារ។ អ្វីដែលកាន់តែសំខាន់ទៀតនោះ Storytelling នឹងជំរុញឱ្យអតិថិជនកាន់តែមើលឃើញច្បាស់ពីគុណតម្លៃ និងភាពពិសេសរបស់ក្រុមហ៊ុនដែលនឹងផ្ដល់ជូនពួកគេ។

ជាឧទាហរណ៍ ក្រុមហ៊ុន Apple មានភាពលេចធ្លោរជាខ្លាំងក្នុងចំណោមអ្នកប្រើប្រាស់លើផលិតផលរបស់ខ្លួនក្នុងទីផ្សារប្រកួតប្រជែង ដោយលោក Steve Jobs ស្ថាបនិកក្រុមហ៊ុន Apple បានឡើងនិទានរឿងពីការចេញលក់ផលិតផល Apple របៀបដែលគាត់បានបង្កើតអត្ថប្រយោជន៍ផលិតផល Apple និងរបៀបដែលវាជួយធ្វើឱ្យជីវិតកាន់តែងាយស្រួលសម្រាប់អ្នកប្រើប្រាស់ រួមផ្សំជាមួយនឹងទេពកោសល្យនៃការនិទានរឿងរបស់ Jobs ទៀតនោះ វាបានធ្វើឱ្យពិភពលោកបានចាប់អារម្មណ៍ជាខ្លាំងលើផលិតផលរបស់ Apple និងសម្លឹងឃើញនូវចំណុចសំខាន់ដែល Apple ផ្ដល់ជូនពួកគេ។

2. Storytelling បង្កើនប្រសិទ្ធភាព និងការចូលរួមរបស់បុគ្គលិក

ក្រុមហ៊ុនអាចរីកចម្រើន និងជោគជ័យបានឆាប់រហ័ស គឺចាំបាច់ត្រូវមានក្រុមបុគ្គលិកក្នុងការចូលរួម និងបង្កើតផលិតភាពការងារខ្ពស់សម្រាប់ក្រុមហ៊ុន។

បើយោងតាមការសិក្សាស្រាវជ្រាវរបស់ David MacLeod និង Nita Clarke បានឱ្យដឹងថា ការនិទានរឿងបែបយុទ្ធសាស្រ្ត ជាវិធីមួយដែលល្អបំផុតក្នុងការភ្ជាប់ទំនាក់ទំនង និងជំរុញលើកទឹកចិត្តដល់ក្រុមការងារដើម្បីខិតខំបំពេញកិច្ចការងារចេញពីចិត្ត ពីបេះដូង និងព្យាយាមអស់ពីសមត្ថភាពដែលមាន។ ចំពោះរឿងដែលនិទានសម្រាប់បុគ្គលិក អាចមានដូចជារឿងរបស់ស្ថាបនិកដែលគាត់បានចាប់ផ្ដើមបង្កើតក្រុមហ៊ុនឡើង រឿងដែលជះឥទ្ធិពលដល់អតិថិជន រឿងដែលជះឥទ្ធិពលដល់ក្រុមការងារ និងរឿងដឹកនាំជាក់លាក់ណាមួយជាដើម។

គួរបញ្ជាក់ផងដែរថា ការនិទានរឿងនោះ ត្រូវតែធានាថាវាទាក់ទាញអារម្មណ៍របស់ក្រុមការងារ ហើយវាស្ថិតនៅក្នុងបរិបទជាក់ស្ដែង និងមានគោលបំណងជាក់លាក់។ បន្ទាប់មក អ្នកក៏អាចជំរុញលើកទឹកចិត្តដល់ក្រុមការងារក្នុងការចែករំលែកនូវរឿងរ៉ាវផ្ទាល់ខ្លួនដែលពួកគេជួបផងដែរ ដើម្បីធ្វើវាឱ្យក្លាយជាគំនិតផ្ដួចផ្ដើមសម្រាប់ក្រុមហ៊ុនទាំងមូល។

ធ្វើបែបនេះ ដើម្បីធ្វើឱ្យបុគ្គលិកទាំងអស់កាន់តែមានទំនាក់ទំនងល្អជាមួយក្រុមហ៊ុន និងមិនងាយផ្លាស់ប្ដូរចិត្តចាកចេញពីក្រុមហ៊ុនរបស់អ្នកឡើង គឺមានតែការព្យាយាម និងចូលរួមសកម្មភាពនានាដើម្បីជួយក្រុមហ៊ុនឱ្យកាន់តែរីកចម្រើនស្របតាមការរំពឹងទុក។

3. Storytelling ជួយភ្ជាប់ទំនាក់ទំនងជាមួយអតិថិជន និងបង្កើតភាពស្មោះត្រង់ដល់ម៉ាកយីហោ

នៅក្នុងចំណុចនេះ សំដៅលើការប្រើបច្ចេកទេសនិទានរឿងដើម្បីធ្វើបទបង្ហាញផ្សព្វផ្សាយផលិតផលសេវាកម្មទៅកាន់ក្រុមអតិថិជនគោលដៅ ដើម្បីទាញចំណាប់អារម្មណ៍ឱ្យពួកគេបានស្គាល់ មានទំនុកចិត្ត និងការចូលចិត្តខ្លាំងលើម៉ាកយីហោរបស់អ្នក រហូតអាចបម្លែងអតិថិជនធម្មតាឱ្យក្លាយជាអតិថិជនដ៏ស្មោះត្រង់ដល់ក្រុមហ៊ុន។ បន្ថែមពីនេះ ការនិទានរឿង ជាអ្វីដែលនឹងជំរុញឱ្យមនុស្សចាប់ផ្ដើមជជែកគ្នាអំពីម៉ាកយីហោរបស់អ្នក ព្រមទាំងជួយណែនាំប្រាប់គ្នាបន្ត និងជួយជំរុញការផ្សព្វផ្សាយលើប្រព័ន្ធសង្គមជំនួសអ្នកផងដែរ។

ពាណិជ្ជកម្ម

យុទ្ធសាស្ត្រទីផ្សារដែលធ្វើឱ្យ Apple មានភាពខុសប្លែកពីគេ!

Sann Thaven

យុទ្ធសាស្ត្រទីផ្សារ Apple គឺពឹងផ្អែកលើទស្សនៈរបស់លោក Steve Jobs ដែលជាស្ថាបនិក Apple ផ្ទាល់ ដោយគាត់យល់ថា “អតិថិជនមិនតែងតែដឹងពីអ្វីដែលពួកគេចង់បានឡើយ”។ ហេតុដូច្នេះ ជំនួសឱ្យការវិនិយោគលើការសិក្សាស្រាវជ្រាវដើម្បីឈ្វេងយល់ពីតម្រូវការចង់បានរបស់អតិថិជន Apple បានផ្ដោតលើការបង្កើតនូវលក្ខណៈពិសេស និងសមត្ថភាពច្នៃប្រឌិតលើផលិតផលរបស់ពួកគេ ដើម្បីធ្វើឱ្យអតិថិជនចង់បានផលិតផលរបស់ Apple វិញ។ បន្ថែមពីនេះ Apple តែងតែប្រើយុទ្ធសាស្ដ្រទីផ្សារដោយបង្ហាញនូវម៉ាកយីហោតិចតួច និងបង្ហាញនូវប្រសិទ្ធភាពខ្ពស់ច្រើនជាង។

Apple ក៏បានកំណត់គោលដៅសម្រាប់អ្នកប្រើប្រាស់លើផលិតផលដែលមានគុណភាពខ្ពស់ (premium products) ព្រមទាំងផ្ដោតលើល្បាយទំនាក់ទំនងទីផ្សាររបស់ក្រុមហ៊ុន Apple Inc. និងមានការយកចិត្តទុកដាក់ខ្ពស់លើការផ្សាយពាណិជ្ជកម្ម ប្រព័ន្ធផ្សព្វផ្សាយ និងការកសាងម៉ាកយីហោផ្ទាល់ខ្លួន។

ចំពោះយុទ្ធសាស្ត្រទីផ្សាររបស់ Apple ភាគច្រើនគឺមានការរួមបញ្ចូលនូវចំណុចសំខាន់ចំនួន 4 គឺ

1. ផ្តោតលើសំណើគុណតម្លៃទាក់ទាញ

សំណើគុណតម្លៃរបស់ Apple គឺផ្ដោតលើ “ការរចនាដ៏ស្រស់ស្អាតដែលមានការវេចខ្ចប់តូចជាងមុន” ព្រមទាំងអាចបង្កើតប្រាក់ចំណូលដោយគ្មានការប្រកួតប្រជែងខ្លាំងលើតម្លៃផលិតផលជាមួយនឹងដៃគូប្រកួតប្រជែងឡើយ ដោយក្រុមហ៊ុននេះសង្កត់ធ្ងន់លើសំណើរគុណតម្លៃពិសេសដោយបញ្ចូលក្នុងសារទំនាក់ទំនងទីផ្សារជាមួយនឹងអតិថិជន។ គួរបញ្ជាក់ផងដែរថា Apple គឺជាក្រុមហ៊ុនតែមួយគត់ដែលបានប្រើវិធីមួយដែលវាជាក្រុមហ៊ុនរចនា វេទិកាប្រព័ន្ធផ្សព្វផ្សាយ ក្រុមហ៊ុនផ្សព្វផ្សាយ ក្រុមហ៊ុនបង្កើតថាមពលកម្មវិធី និងក្រុមហ៊ុនផលិតកុំព្យូទ័រ ដោយធ្វើរឿងទាំងអស់នេះក្នុងពេលតែមួយ។ យុទ្ធសាស្រ្តនេះ បានធ្វើឱ្យទំនាក់ទំនងសំណើរគុណតម្លៃមានប្រសិទ្ធភាពខ្ពស់ ដោយធ្វើអតិថិជនមានភាពចំណេញ និងសន្សំសំចៃ។

2. ប្រសិទ្ធភាពប្រើប្រាស់លើការដាក់ផលិតផល

ក្រុមហ៊ុន Apple ភាគច្រើនមិនរកប្រាក់ចំណូលដោយប្រើការផ្សាយពាណិជ្ជកម្មតាមអ៊ីនធឺណិត Pay-Per-Click (PPC) នៅលើ Google ឬ Facebook ទេ។ ផ្ទុយទៅវិញ យុទ្ធសាស្ត្រទីផ្សាររបស់ Apple គឺពឹងផ្អែកចម្បងលើសសរស្តម្ភចំនួនពីរ គឺការដាក់ផលិតផលជាមួយតារាល្បី និងនៅក្នុងកម្មវិធីពេញនិយម និងការភ្ញាក់ផ្អើល (Buzz) ដែលបង្កើតឡើងដោយការណែនាំវិជ្ជមាន (positive reviews) នៅក្នុងប្រព័ន្ធផ្សព្វផ្សាយ។

ករណីគួរឱ្យកត់សម្គាល់បំផុតនៃការដាក់ផលិតផលរបស់ Apple រួមមានភាពយន្ត Transformers 4, Birdman, The Verge, Birdman និង Boyhood ក៏ដូចជាកម្មវិធីទូរទស្សន៍ល្បីៗដូចជា Saturday Night Live និង The Daily Show ។

3. ការណែនាំវិជ្ជមាននៅក្នុងប្រព័ន្ធផ្សព្វផ្សាយ

Apple ទទួលបាននូវអត្ថប្រយោជន៍គួរឱ្យកត់សម្គាល់ពីការភ្ញាក់ផ្អើល (Buzz)ដែលបង្កើតឡើងដោយការណែនាំវិជ្ជមាននៅក្នុងប្រព័ន្ធផ្សព្វផ្សាយ ទាំងប្រព័ន្ធផ្សព្វផ្សាយបែបប្រពៃណី និងប្រព័ន្ធផ្សព្វផ្សាយសង្គម។ អ្វីដែលក្រុមហ៊ុនសម្រេចបាននូវការវាយតម្លៃជាវិជ្ជមាន ដោយសារគុណភាពខ្ពស់ លក្ខណៈពិសេសខ្ពស់ ភាពជាក់លាក់នៃផលិតផល និងសេវាកម្មរបស់ខ្លួន។ បន្ថែមពីនេះ Apple បានធ្វើសកម្មភាពយ៉ាងសកម្មភាពនៅក្នុងប្រព័ន្ធផ្សព្វផ្សាយសង្គមដើម្បីឱ្យមានការពិនិត្យ និងវាយតម្លៃ ដែលយើងតែងតែនិយាយ “Review ផលិតផលថ្មីរបស់ Apple” ដើម្បីទទួលបានផលវិជ្ជមាន ដោយជាឧទាហរណ៍ Apple តែងតែផ្ញើ iPhone ថ្មីទៅកាន់បច្ចេកវិទ្យាដែលបានជ្រើសរើស និងប្រព័ន្ធផ្សព្វផ្សាយសំខាន់ៗ ដើម្បីអនុញ្ញាតឱ្យពួកគេផ្សព្វផ្សាយពីការវាយតម្លៃមុនពេលទូរស័ព្ទចេញលក់ជាផ្លូវការ។

4. ការនិទានរឿងតាមរយៈវីដេអូ និង viral marketing

ចំណាំ៖ Viral marketing សំដៅលើបច្ចេកទេសលក់ដែលពាក់ព័ន្ធនឹងព័ត៌មាន organic ឬព័ត៌មាននិយាយពីមាត់មួយទៅមាត់មួយអំពីផលិតផល ឬសេវាកម្ម ដើម្បីផ្សព្វផ្សាយក្នុងអត្រាកើនឡើងឥតឈប់ឈរ។

Apple បានផ្សព្វផ្សាយការនិទានរឿងរបស់ខ្លួនតាមរយៈវីដេអូ និងទីផ្សារមេរោគ (Viral Marketing) ដែលវាជាធាតុសំខាន់នៃយុទ្ធសាស្ត្រទីផ្សារសម្រាប់ Apple។ ការចូលទីផ្សារដំបូង ក៏ដូចជាការបង្កើតចំណូលបានយ៉ាងច្រើន គឺ Apple បានបង្ហាញសារទីផ្សាររបស់ខ្លួនតាមរយៈការនិទានរឿង ដោយវាឆ្លើយតបទៅនឹងតម្រូវការរបស់ក្រុមអតិថិជនគោលដៅ។

របាយការណ៍របស់ក្រុមហ៊ុន Apple Inc បានវិភាគនៃយុទ្ធសាស្ត្រទីផ្សាររបស់ Apple ដោយបង្ហាញពីការអនុវត្តក្របខ័ណ្ឌយុទ្ធសាស្ត្រវិភាគសំខាន់ៗក្នុងការសិក្សាអាជីវកម្ម ដូចជាSWOT, PESTEL, Porter’s Five Forces, Value Chain analysis, Ansoff Matrix និង McKinsey 7S Model នៅលើ Apple។ របាយការណ៍នេះក៏មានការវិភាគអំពីភាពជាអ្នកដឹកនាំរបស់ Apple រចនាសម្ព័ន្ធស្ថាប័ន និងវប្បធម៌របស់ក្រុមហ៊ុនផងដែរ ព្រមទាំងក៏មានការពិភាក្សាអំពីយុទ្ធសាស្ត្រអាជីវកម្ម Apple ប្រព័ន្ធអេកូ និងដំណោះស្រាយបញ្ហាទំនួលខុសត្រូវសង្គមរបស់ក្រុមហ៊ុន។

ពាណិជ្ជកម្ម

កត្តាសំខាន់ 2 នឹងធ្វើឱ្យអ្នកមិនអាចសម្រេចគោលដៅអាជីពការងារ!

Sann Thaven

មនុស្សម្នាក់ៗដែលកំពុងព្យាយាមសិក្សារៀនសូត្រតាំងពីថ្នាក់បឋមសិក្សា រហូតសម្រេចចិត្តមកបន្តការសិក្សាថ្នាក់បរិញ្ញាបត្រនៅសកលវិទ្យាល័យ សុទ្ធតែជាអ្នកដែលចង់ឃើញអនាគតរបស់ខ្លួនឯងមានភាពល្អប្រសើរ និងចង់សម្រេចនូវក្ដីស្រមៃរបស់ខ្លួនឯង ដោយមានអាជីពការងារច្បាស់លាស់ និងមានប្រភពចំណូលជាក់លាក់សម្រាប់ខ្លួនឯង។ ទោះបីជាយ៉ាងនេះក្ដី ការសម្រេចនូវក្ដីស្រមៃ មិនមែនមនុស្សគ្រប់គ្នាអាចធ្វើបានទាំងអស់ឡើយ ដោយមានអ្នកខ្លះក៏ជោគជ័យ ហើយអ្នកខ្លះទៀតក៏មិនជោគជ័យ ដោយសារតែកត្តាផ្សេងៗរបស់បុគ្គលម្នាក់ៗដែលពួកគាត់បានជួបប្រទះ។

ហេតុដូចនេះ នៅក្នុងខ្លឹមសារខាងក្រោម នឹងបង្ហាញនូវកត្តាសំខាន់គោលចំនួនពីរ ដែលមនុស្សគ្រប់គ្នាដែលចង់សម្រេចនូវគោលដៅអាជីពការងារក្នុងក្ដីស្រមៃត្រូវតែឈ្វេងយល់បន្ថែម ទោះបីជាអ្នកស្ថិតនៅក្នុងស្ថានភាពបែបណាក៏ដោយ។

1. មិនដឹងថាខ្លួនឯងចូលចិត្តអ្វីឱ្យពិតប្រាកដ

នៅពេលដែលអ្នកមិនប្រាកដក្នុងចិត្តថា អ្នកចូលចិត្តលើអ្វីនោះទេ វាជាកត្តាពិបាកបំផុតក្នុងការជ្រើសរើសអាជីពការងារមួយឱ្យបានត្រឹមត្រូវ និងពិបាករៀបចំផែនការសកម្មភាពដើម្បីសម្រេចគោលដៅអាជីពការងារឱ្យបានច្បាស់លាស់សម្រាប់ខ្លួនឯងនាពេលខាងមុខផងដែរ។ ហេតុនេះ ប្រសិនបើអ្នកចង់សម្រេចនូវគោលដៅអាជីពការងារសម្រាប់ខ្លួនឯង និងអាចធ្វើកិច្ចការងារណាដែលជាទេពកោសល្យផ្ទាល់ខ្លួន ចូរអ្នកត្រូវតែសិក្សាអំពីចំណង់ចំណូលចិត្តរបស់ខ្លួនឯង ថាតើអ្នកចូលចិត្តធ្វើការងារលើផ្នែកអ្វីជាងគេ? តើប្រភេទការងារបែបណា ដែលធ្វើឱ្យអ្នកកាន់តែធ្វើកាន់តែសប្បាយចិត្ត?

ឧទាហរណ៍ អ្នកចូលចិត្តផ្នែករៀបចំយុទ្ធសាស្រ្តទីផ្សារ ដូច្នេះត្រូវរកប្រភេទការងារណាដែលពាក់ព័ន្ធនឹងយុទ្ធសាស្រ្តទីផ្សារ។ បើអ្នកចូលចិត្តបង្កើតខ្លឹមសារវីដេអូចែករំលែកលើផ្នែកទីផ្សារ ដូច្នេះអ្នកអាច ធ្វើជាអ្នកបង្កើតមាតិកាដោយផ្ដោតលើការធ្វើទីផ្សារ។ល។

ជារួមមក ត្រូវស្វែងរកចំណាប់អារម្មណ៍ផ្ទាល់ខ្លួន ថាភាគច្រើនតើអ្នកចូលចិត្តលើផ្នែកអ្វីជាងគេ និងចូលចិត្តធ្វើអ្វីជាងគេ បន្ទាប់មកនឹកគិតអំពីគោលដៅនៃអាជីពការងារ ដើម្បីបម្លែងខ្លួនឯងឱ្យក្លាយជាអ្នកអាជីពលើអ្វីដែលអ្នកចូលចិត្តនោះ។ ធ្វើបែបនេះ ទើបឆាប់សម្រេចជោគជ័យលើគោលដៅអាជីពការងាររបស់អ្នក ហើយនឹងជួយឱ្យអ្នកធ្វើនូវអ្វីដែលមិនចេះធុញទ្រាន់ និងពេញចិត្តនឹងធ្វើវា។

2. មិនបានធ្វើការលើគោលដៅអាជីពដែលខ្លួនចង់សម្រេច

នៅក្នុងចំណុចនេះ ចង់សំដៅលើអ្នកដែលបានដឹងយ៉ាងច្បាស់ថា ពួកគេចូលចិត្តលើអ្វី និងមានទេពកោសល្យលើអ្វី ប៉ុន្តែពួកគេមិនបានព្យាយាមធ្វើការណាដែលជួយជំរុញឱ្យពួកគេជោគជ័យលើអាជីពការងារមួយច្បាស់លាស់សម្រាប់ខ្លួនឯងឡើយ ប៉ុន្តែភាគច្រើនពួកគេទុកវាចោលមួយឡែក ហើយគិតផ្ដោតតែការព្យាយាមធ្វើការណាដែលសម្រេចនូវគោលដៅស្របតាមការរំពឹងទុករបស់អ្នកដទៃ។

កត្តានេះហើយ ទាមទារឱ្យអ្នកត្រូវតែចេះរក្សាគោលជំហរបស់ខ្លួនឯង ថាខ្លួនឯងជានរណា និងចង់សម្រេចនូវគោលដៅអាជីពការងារអ្វី បន្ទាប់មកព្យាយាមធ្វើការណាដែលជួយជំរុញនូវភាពរីកចម្រើន និងឆាប់សម្រេចនូវគោលដៅផ្ទាល់ខ្លួន ជាជាងគ្រាន់តែផ្ដោតលើគោលដៅដែលអ្នកដទៃកំពុងចង់សម្រេច។

ពាណិជ្ជកម្ម

រវាងជំនាញ និងបទពិសោធន៍ តើមួយណាសំខាន់ជាង?

Sann Thaven

ជំនាញ និងបទពិសោធន៍ គឺសុទ្ធតែមានសារៈសំខាន់ដូចគ្នាសម្រាប់បុគ្គលម្នាក់ៗដោយមិនអាចខ្វះមួយណាបានឡើយ ពីព្រោះជំនាញ ជួយអ្នកឱ្យមានសមត្ថភាពបំពេញកិច្ចការងារមួយបានយ៉ាងល្អ ហើយបើអ្នកមានបទពិសោធន៍បន្ថែមទៀត នោះការងារនោះកាន់តែមានផលិតភាព។ ហេតុដូចនេះ ប្រសិនបើអ្នកចង់ក្លាយជាមនុស្សដែលមានគុណភាព និងទទួលបានឱកាសការងារខ្ពស់ក្នុងទីផ្សារ គឺអ្នកត្រូវតែធ្វើឱ្យខ្លួនឯងមានជំនាញលើផ្នែកណាមួយដែលអ្នកគិតថាខ្លួនឯងស្រលាញ់ និងមានទេពកោសល្យ ព្រមទាំងត្រូវតែស្វែងរកកិច្ចការងារពាក់ព័ន្ធនឹងផ្នែកនោះដើម្បីធ្វើឱ្យបានច្រើន ដើម្បីប្រៀបធៀបគ្នារវាងទ្រឹស្ដីដែលអ្នកបានរៀនសូត្រ និងការអនុវត្តន៍ជាក់ស្ដែងយ៉ាងណាដែរ។ ធ្វើបែបនេះ អ្នកនឹងកានតែមានបទពិសោធន៍ច្រើន និងស្ទាត់ជំនាញបន្ថែម។

គួរបញ្ជាក់ផងដែរថា ជំនាញ ត្រូវតែជាអ្វីដែលអ្នកត្រូវគិតពិចារណាដើម្បីបណ្ដុះបណ្ដាលខ្លួនឯងជាមុន បន្ទាប់មកត្រូវគិតលើការអនុវត្តន៍ ដើម្បីធ្វើឱ្យខ្លួនឯងមានបទពិសោធន៍បន្ថែម ក្នុងការបង្កើនភាពជឿជាក់លើខ្លួនឯង និងបង្កើតទំនុកចិត្តដល់អ្នកផ្សេងទៀត។

បន្ថែមពីនេះ ដើម្បីឈ្វេងយល់ឱ្យកាន់តែច្បាស់ជាងនេះ ខ្លឹមសារខាងក្រោមនឹងពន្យល់បង្ហាញទៀតអំពីជំនាញ និងបទពិសោធន៍ ក៏ដូចជាភាពពាក់ព័ន្ធគ្នា។

ឈ្វេងយល់អំពី “ជំនាញ”

ជំនាញ គឺសំដៅលើទេពកោសល្យ ឬសមត្ថភាពដែលកើតចេញពីការបណ្តុះបណ្តាល ឬការអនុវត្តជាក់ស្ដែងរបស់អ្នក ទាំងនៅកន្លែងធ្វើការ និងសាលារៀន ជាពិសេសកើតចេញពីការបណ្ដុះបណ្ដាលដោយទទួលបានការបញ្ជាក់ច្បាស់លាស់នៅគ្រឹះសា្ថនអប់រំណាមួយទាំងរដ្ឋ និងឯកជន។

ជំនាញ ត្រូវបានកសាងមូលដ្ឋានគ្រឹះដំបូងដោយសិក្សាអំពីលំនាំទ្រឹស្ដី និងការហ្វឹកហាត់ដោយយកចិត្តទុកដាក់ពីសំណាក់គ្រូ ដើម្បីឈានដល់ការអាចអនុវត្តន៍ជាក់ស្ដែងបាន ឬអាចជួយឱ្យអ្នកមានសមត្ថភាពកាន់តែខ្លាំងក្នុងការធ្វើអ្វីមួយកើតឡើង។ ឧទាហរណ៍៖ អ្នកចង់មានជំនាញផ្នែកទីផ្សារឌីជីថល ដូច្នេះអ្នកត្រូវស្វែងរកគ្រូ ឬសាលា ឬជ្រើសរើសវគ្គសិក្សាណាមួយដែលគួរឱ្យទុកចិត្ត ដើម្បីសិក្សារឈ្វេងយល់ស៊ីជម្រៅលើជំនាញនោះក្នុងរយៈពេលកំណត់ណាមួយ។ ក្រោយមកអ្នកបញ្ចប់ការសិក្សាតាមពេលកំណត់ ដោយមានលិខិតបញ្ជាក់ការសិក្សាច្បាស់លាស់ នោះមានន័យថា អ្នកបានកសាងមូលដ្ឋានគ្រឹះ និងបានបម្លែងខ្លួនឱ្យយល់ដឹងលើផ្នែកមួយនោះបានល្អ ហេតុនេះ វាគឺត្រូវបានរាប់បញ្ចូលថាជាជំនាញដែលអ្នកមាន។ បន្ថែមពីនេះ សូម្បីតែទេពកោសល្យដែលមានអ្នកមានតាំងពីកំណើត ហើយវាជាអ្វីដែលអ្នកធ្វើបានល្អបំផុត នោះក៏រាប់ថាជាជំនាញរបស់អ្នកដែរ ដូចជាអ្នកពូកែប្រាស្រ័យទំនាក់ទំនង ការចរចាជាមួយមនុស្ស សិល្បិៈក្នុងការនិយាយជាសាធារណៈ ឬការនិយាយបទបង្ហាញយ៉ាងល្អ និងជាច្រើនផ្សេងទៀត គ្រាន់តែជួនកាលជំនាញទាំងនោះវាក៏ត្រូវការឱ្យអ្នកសិក្សាស្រាវជ្រាវ ឬទទួលការបណ្ដុះបណ្ដាលបន្ថែម ដើម្បីទទួលបានចំណេះដឹងកាន់តែច្រើន និងកាន់តែស្ទាត់ជំនាញ។

អ្វីដែលកាន់តែសំខាន់ទៀតនោះ ជំនាញទាំងអស់ដែលអ្នកមាន ប្រសិនបើអ្នកចង់ធ្វើឱ្យវាកាន់តែល្អ និងបម្លែងខ្លួនឯងឱ្យក្លាយជាអ្នកជំនាញលើផ្នែកណាមួយ វាទាមទារឱ្យអ្នកអនុវត្តន៍ និងប្រឡូកជាមួយវាឱ្យបានកាន់តែច្រើននៅក្នុងទិដ្ឋភាពជាក់ស្ដែង ដោយមិនមែនគ្រាន់តែសិក្សាពីគ្រូ ឬពីសាលា ឬពីវគ្គសិក្សាណាមួយដើម្បីទទួលបានតែលិខិតបញ្ជាក់ការសិក្សាឡើយ។ ហើយចំណុចនេះ សំដៅលើការទាមទារឱ្យអ្នកមានបទពិសោធន៍លើការអនុវត្តន៍ជាក់ស្ដែងលើជំនាញដែលអ្នកមាន។

ចូរចងចាំថា ប្រសិនបើអ្នកមានតែជំនាញខ្លាំងប៉ុណ្ណាក៏ដោយ ប៉ុន្តែបើអ្នកខ្វះបទពិសោធន៍ក្នុងការអនុវត្តវានោះអ្នកដទៃក៏មិនទាន់ហ៊ានទុកចិត្តលើអ្នកទាំងស្រុង និងអ្នកអាចបាត់បង់ឱកាសជាច្រើនផងដែរ ដូចជាមុខតំណែងខ្ពស់ ប្រាក់ខែខ្ពស់ ការកសាងកេរ្តិ៏ឈ្មោះឱ្យបានល្អ និងអាទិភាពដែលគេជ្រើសរើសយកមកធ្វើការងារ ឬសហការជាមួយគេ។

ឈ្វេងយល់អំពី “បទពិសោធន៍”

បទពិសោធន៍ សំដៅលើទិដ្ឋភាព ឬហេតុការណ៍ដែលកើតឡើងចំពោះបុគ្គលម្នាក់ៗ ឬជាអ្វីដែលមនុស្សធ្លាប់ឆ្លងកាត់កន្លងមកនៅក្នុងជីវិតរបស់ពួកគេ។ ឧទាហរណ៍ បទពិសោធន៍បង្កើតកំហុសការងារលើផ្នែកណាមួយ បទពិសោធន៍ធ្វើការលើផ្នែកណាមួយក្នុងរយៈពេលណាមួយ និងបទពិសោធន៍ជាច្រើនទៀតដែលបុគ្គលម្នាក់ៗបានជួបប្រទះ។

គួរបញ្ជាក់ផងដែរថា បទពិសោធន៍វាជាផ្នែកមួយដែលជួយជំរុញឱ្យមនុស្សឱ្យកាន់តែមានភាពរីកចម្រើន និងស្ទាត់ជំនាញលើអ្វីមួយដែលពួកគេតែងតែឆ្លងកាត់។ ឧទាហរណ៍ អ្នករៀនផ្នែកសំណង់ស៊ីវិល ដូច្នេះពួកគេមានមូលហេតុគ្រឹះ និងការយល់ដឹងច្រើនលើការសាងសង់ ក៏ប៉ុន្តែក៏ទាមទារឱ្យពួកគេទៅអនុវត្តន៍ជាក់ស្ដែងលើកិច្ចការងារសាងសង់ផងដែរ ដើម្បីទទួលបានបទពិសោធន៍ការងារ និងកាន់តែស្ទាត់ជំនាញលើស្ថានភាពសាងសង់ជាក់ស្ដែង។ បន្ថែមពីនេះ ចំពោះបុគ្គលមួយចំនួន ពួកគាត់មិនបានទទួលការបណ្ដុះបណ្ដាលផ្នែកសំណង់ស៊ីវិលឡើយ ប៉ុន្តែពួកគាត់មានបទពិសោធន៍ធ្វើការផ្នែកសាងសង់ សួរថាវាជារឿងល្អទេ គឺល្អ គ្រាន់តែពួកគាត់អាចត្រឹមតែសាងសង់លើអគារ ឬការសាងសង់ណាដែលមានទំហំធម្មតាប៉ុណ្ណោះ ដោយគ្មាននរណាទុកចិត្តឱ្យពួកគាត់ដឹកនាំលើការសាងសង់ធំៗឡើយ។ល។ ដូច្នេះនៅក្នុងចំណុចនេះ ចង់បញ្ជាក់ថា មានជំនាញ ក៏ត្រូវមានបទពិសោធន៍ ហើយបើមានបទពិសោធន៍ ក៏ត្រូវកសាងចំណេះជំនាញផ្ទាល់ខ្លួនបន្ថែមដែរ ដើម្បីអាចឈានដល់កម្រិតកំពូលមួយ និងទទួលបានឱកាសល្អៗផ្សេងទៀតសម្រាប់ខ្លួនឯង។ ហើយនេះ គ្រាន់តែជាការលើកឧទាហរណ៍មួយផ្នែកប៉ុណ្ណោះដើម្បីឱ្យអ្នកឈ្វេងយល់។

ជារួមមក ជំនាញ និងបទពិសោធន៍ ជាផ្នែកដែលបំពេញឱ្យគ្នា ដោយមិនអាចមានតែជំនាញ ហើយគ្មានបទពិសោធន៍បានឡើយ ហើយបើមានបទពិសោធន៍ ក៏ត្រូវកសាងជំនាញសម្រាប់ខ្លួនឯងដែរ ដើម្បីធ្វើឱ្យខ្លួនឯងក្លាយជាអ្នកជំនាញ និងជាទីទុកចិត្តដល់អ្នកផ្សេងក្នុងការសហការធ្វើការជាមួយគ្នា។ល។

ពាណិជ្ជកម្ម

ហេតុអ្វីផ្លែត្រសក់ផ្អែមនៅជប៉ុន អាចលក់បានមួយផ្លៃតម្លៃ 200 ដុល្លារ?

Sann Thaven

ដំណាំផ្លែឈើអ្វីក៏ដោយ ភាគច្រើនមនុស្សតែងតែយល់ថា វាទាមទារការខិតខំថែទាំ និងចំណាយពេលយូរទម្រាំអាចប្រមូលផលបាន ព្រមទាំងអាចលក់បានក្នុងតម្លៃទាបនៅក្នុងទីផ្សារ។ ហើយនេះ ពិតជាការយល់ឃើញដ៏ត្រឹមត្រូវ ពីព្រោះវាពិតជាលក់បានតម្លៃទាប ប៉ុន្តែទោះបីជាយ៉ាងនេះក្ដី ប្រទេសជប៉ុនបានបម្លែងនូវភាពច្នៃប្រឌិតថ្មីមួយ ដោយអាចដាំដំណាំផ្លែត្រសក់ផ្អែមក្នុងរូបភាពប្លែក ហើយអាចលក់បានមួយផ្លែក្នុងតម្លៃ 200$ ឬអាចលក់បានលើសហ្នឹង។ ហេតុនេះ វាជាផ្នែកមួយជំរុញឱ្យកសិករផ្សេងទៀតទូទាំងប្រទេសមានសង្ឃឹមក្នុងកែច្នៃពីវិធីដាំដុះ និងបង្កើនយុទ្ធសាស្រ្តទីផ្សារដើម្បីអាចលក់ដំណាំផ្លែឈើផ្ទាល់ខ្លួនដែលមានតម្លៃខ្ពស់នៅក្នុងទីផ្សារ។

តើប្រទេសជប៉ុនធ្វើបែបណា ទើបអាចលក់ផ្លែត្រសក់ផ្អែមក្នុងតម្លៃ 200$ ឬតម្លៃលើសហ្នឹងបាន?

1. ការបង្ហាញនូវរឿងរ៉ាវដ៏ទាក់ទាញសម្រាប់ដំណើរការដាំដុះ

នៅក្នុងចំណុចនេះ គេបានព្យាយាមធ្វើយ៉ាងណាដើម្បីបង្ហាញទៅកាន់មហាជននៅជប៉ុនឱ្យមានទំនុកចិត្ត និងកាន់តែមានចំណាប់អារម្មណ៍លើដំណាំផ្លែត្រសក់ផ្អែមរបស់ពួកគេ ព្រមទាំងហ៊ានចំណាយលើការទិញផ្លែត្រសក់នេះក្នុងតម្លៃ 200 ដុល្លារ ឬអាចលើសនេះ។

ការបង្ហាញនូវរឿងរ៉ាវនៃការដាំដុះនោះ ពួកគេបានបង្ហាញថា ការដាំដុះផ្លែត្រសក់ផ្អែមនេះ ត្រូវបានជ្រើសរើសយកពូជត្រសក់ដែលល្បី និងមានគុណភាពបំផុតប្រចាំប្រទេសជប៉ុន គឺ Crown melons។ ចំពោះការដាំដុះវិញ កសិករជ្រើសរើសការដាំដុះនៅខេត្ត Shizuoka ព្រមទាំងត្រូវចំណាយពេលមើលថែទាំប្រកបដោយការយកចិត្តទុកដាក់ខ្ពស់ក្នុងរយៈពេល 100ថ្ងៃ។ បន្ថែមពីនេះ ពួកគេព្យាយាមធ្វើយ៉ាងណាឱ្យការដាំដុះផ្លែត្រសក់ផ្អែមនោះមានភាពល្អឥតខ្ចោះ ដើម្បីទទួលបាននូវរសជាតិដ៏ឆ្ងាញ់វិសេសវិសាល និងមានភាពល្អប្រណិតខុសពីការដាំដំណាំធម្មតា។

បន្ថែមពីនេះ ពួកគេអាចដាំផ្លែត្រសក់ប្រភេទនោះបានពេញមួយឆ្នាំ ពីព្រោះពួកគេមានបច្ចេកទេសក្នុងការដាំដុះ និងបច្ចេកទេសថែទាំបានយ៉ាងល្អបំផុត ទាំងបរិមាណទឹកដែលត្រូវស្រោច និងបរិមាណសីតុណ្ហភាពដើម្បីរក្សាវាឱ្យបានថេរពេញមួយឆ្នាំ។

2. កសាងកេរ្តិ៍ឈ្មោះ

ក្រៅពីការបង្ហាញអំពីដំណើរការដាំដុះ ដើម្បីធ្វើឱ្យមហាជនមានចំណាប់អារម្មណ៍ និងទទួលបានភាពប្លែកហើយ ពួកគេក៏ព្យាយាមបង្កើនទំនុកចិត្ត និងធ្វើឱ្យកេរ្តិ៍ឈ្មោះនៃដំណាំផ្លែត្រសក់ផ្អែមនេះកាន់តែមានភាពពេញនិយម និងល្បីល្បាញប្រចាំប្រទេសជប៉ុន តាមរយៈការវាយតម្លៃយ៉ាងម៉ត់ចត់ និងការដាក់កម្រិតពិន្ទុលើផ្លែនីមួយៗទៅតាមរូបរាង និងកម្រិតនៃរសជាតិ។ ធ្វើបែបនេះ ដើម្បីបង្កើនទំនុកចិត្តដល់អតិថិជន ព្រមទាំងធ្វើឱ្យអតិថិជនមានផ្នត់គំនិតមួយថា វាពិតជាសក្តិសមនឹងតម្លៃខ្ពស់ និងពិតជាធានានូវគុណភាពល្អ។ ហើយវាក៏បានបង្ហាញថា ដំណើរការដាំដុះ និងការវាយតម្លៃលើគុណភាពផ្លែត្រសក់ សុទ្ធតែមានជំនាញច្បាស់លាស់ ដែលអាចទុកចិត្តបាន និងមានសុវត្ថិភាព។

ហេតុដូចនេះ បើនិយាយជារួមមក យើងអាចសន្មត់បានថា ពួកគេព្យាយាមបង្ហាញនូវសាច់រឿងដ៏ទាក់ទាញលើដំណើរការដាំដុះប្រកបដោយការយកចិត្តទុកដាក់ខ្ពស់ និងមានការថែទាំបានល្អបំផុត ព្រមទាំងធានាទាំងរសជាតិ គុណភាព និងមានរូបរាងដ៏ប្រណិត។ អ្វីដែលកាន់តែសំខាន់ទៀតនោះ ពួកគេបានធ្វើឱ្យមនុស្សកាន់តែសម្លឹងឃើញនូវចំណុចខុសប្លែកពីគេនៃដំណាំផ្លែត្រសក់ផ្អែមរបស់ពួកគេផងដែរ។

ពាណិជ្ជកម្ម

តើការស្លៀកពាក់សមរម្យ មានគុណសម្បត្តិអ្វីខ្លះ?

Sann Thaven

ការស្លៀកពាក់ឱ្យបានសមរម្យ ជាអ្វីដែលមនុស្សមួយចំនួនបានយកចិត្តទុកដាក់ ប៉ុន្តែក៏មានមនុស្សមួយចំនួនទៀតដែលមិនបានយកចិត្តទុកដាក់ផងដែរ។ ហេតុនេះ នៅក្នុងខ្លឹមសារអត្ថបទនេះ នឹងបង្ហាញពីគុណសម្បត្តិមួយចំនួននៃការស្លៀកពាក់បែបសមរម្យ ដើម្បីជួយជំរុញឱ្យអ្នកដែលបានយកចិត្តទុកដាក់លើការស្លៀកពាក់បែបសមរម្យស្របតាមកាលៈទេសៈនោះ នៅតែរក្សានៃការយកចិត្តទុកដាក់ ហើយជំរុញដល់អ្នកផ្សេងទៀតដែលមិនបានខ្វល់លើរឿងស្លៀកពាក់បែបសមរម្យ ដោយគិតថាវាធម្មតា និងរក្សាទម្លាប់ស្លៀកពាក់តាមតែចិត្តចង់ ដើម្បីកែប្រែសម្រាប់ខ្លួនឯង។

គុណសម្បត្តិនៃការស្លៀកពាក់បែបសមរម្យ រួមមាន៖

1. បង្កើនទំនុកចិត្តដល់ខ្លួនឯង

នៅពេលអ្នកស្លៀកពាក់បែបសមរម្យ ហើយសមស្របទៅតាមកាលៈទេសៈ នោះវានឹងជួយធ្វើឱ្យអ្នកកាន់តែមានអារម្មណ៍ថាជឿជាក់លើការស្លៀកពាក់ផ្ទាល់ខ្លួន និងអាចបង្ហាញពីបុគ្គលិកលក្ខណៈផ្ទាល់ខ្លួន ព្រមទាំងធ្វើសកម្មភាពផ្សេងៗដោយភាពជឿជាក់ ដោយគ្មានភាពអៀនខ្មាសឡើយ។

2. មនុស្សផ្សេងទៀតនឹងផ្ដល់ការគោរពដល់អ្នក

ការស្លៀកពាក់បែបសមរម្យ ក៏ជាផ្នែកមួយដែលបង្ហាញពីគុណតម្លៃផ្ទាល់ខ្លួនរបស់អ្នក និងជួយលើកកម្ពស់អ្នកផងដែរ។ អ្នកត្រូវដឹងថា ធម្មជាតិរបស់មនុស្សជាទូទៅ តែងតែសម្លឹងមើលរូបភាពដែលពួកគេមើលឃើញពីខាងក្រៅ ហេតុនេះការស្លៀកពាក់ជារឿងសំខាន់។

ការស្លៀកពាក់ វានឹងលើកអំណាចដល់អ្នក ដែលធ្វើឱ្យមនុស្សជុំវិញគោរព និងឱ្យតម្លៃដល់អ្នក ដូច្នេះចូរព្យាយាមបង្កើតទម្លាប់ក្នុងការស្លៀកពាក់ឱ្យបានសមរម្យ សមស្របតាមកាលៈទេសៈ នោះតម្លៃរបស់អ្នកក៏វាពឹងផ្អែកលើការស្លៀកពាក់ផងដែរ។

3. បង្កើនភាពទាក់ទាញ

ប្រសិនបើអ្នកជាបុរស នឹងបង្ហាញពីភាពទាក់ទាញទៅកាន់នារី ហើយប្រសិនបើអ្នកជានារី នឹងបង្ហាញពីភាពទាក់ទាញទៅកាន់បុរស ព្រោះការស្លៀកពាក់នឹងកាន់តែលើកភាពស្រស់ស្អាតដល់អ្នក។ ហេតុនេះ ចូរជ្រើសរើសការស្លៀកពាក់ទៅតាមចំណង់ចំណូលចិត្ត ដោយប្រកាន់ខ្ជាប់នូវភាពសមរម្យ និងការស្លៀកពាក់ដែលអាចសរបង្ហាញពីបុគ្គលិកលក្ខណៈផ្ទាល់ខ្លួន ដើម្បីបង្ហាញពីភាពទាក់ទាញទៅកាន់អ្នកជុំវិញ។

បន្ថែមពីនេះ ការស្លៀកពាក់ ក៏បង្កើនភាពទាក់ទាញដើម្បីជំរុញឱ្យអ្នកទទួលបានឱកាសអ្វីមួយផងដែរ ដូចជាឱកាសការងារ ឱកាសមានទំនាក់ទំនងល្អជាមួយបុគ្គលខ្លាំងៗ និងឱកាសស្នេហា។ល។

ពាណិជ្ជកម្ម

រឿង 3 ដែលអ្នកត្រូវដឹង មុននឹងជ្រើសរើសយកគំនិតអាជីវកម្មណាមួយ!

Sann Thaven

មនុស្សម្នាក់ៗដែលមានក្ដីបំណងចង់ក្លាយជាម្ចាស់អាជីវកម្ម ឬសហគ្រិននាពេលអនាគត ពួកគេតែងតែមានគំនិតអាជីវកម្មជាច្រើនក្នុងការចាប់ផ្ដើម។ ហេតុនេះ អាចធ្វើឱ្យពួកគេសម្រេចចិត្តថា តើគួរសម្រេចចិត្តជ្រើសរើសគំនិតអាជីវកម្មមួយណា? ម្យ៉ាងទៀត ពួកគេបានជ្រើសរើសគំនិតអាជីវកម្មមួយរួចហើយ ដើម្បីចាប់ផ្ដើម ប៉ុន្តែពួកគេមិនដឹងថា គំនិតអាជីវកម្មនោះអាចដំណើរការ ឬមានទីផ្សារដែរទេ?

កត្តានេះហើយ ដើម្បីស្រាយនូវទុក្ខកង្វល់របស់អ្នកក្នុងការជ្រើសរើសគំនិតអាជីវកម្មមួយឱ្យបានល្អ និង មានសង្ឃឹមក្នុងការចាប់ផ្ដើមយ៉ាងរលូនទៅមុខបាន អ្នកត្រូវជ្រើសរើសគំនិតអាជីវកម្មណាមួយ ដោយផ្ដោតលើរឿង 3 ។

1. ក្ដីស្រលាញ់

អ្នកត្រូវដឹងថា គំនិតអាជីវកម្មដែលអ្នកមាននោះ វាកើតចេញពីការណែនាំពីអ្នកដទៃ ឬក៏អ្នកឃើញគេធ្វើអាជីវកម្មផ្នែកនោះរីកចម្រើន បន្ទាប់មកអ្នកក៏ចង់ចាប់ផ្ដើមវាដែរឬទេយ៉ាងណា។ ប៉ុន្តែជាការផ្ដល់យោបល់ ចូរជ្រើសរើសគំនិតអាជីវកម្មណាដែលកើតចេញពីក្ដីស្រលាញ់របស់អ្នក ឧទាហរណ៍អ្នកស្រលាញ់លើការដាំដុះ ដូច្នេះអាចចាប់ផ្ដើមជ្រើសរើសគំនិតអាជីវកម្មណាពាក់ព័ន្ធនឹងការដាំដុះ បើអ្នកស្រលាញ់ការលើការនិយាយជាធារណៈ ដូច្នេះអាចជ្រើសរើសគំនិតអាជីវកម្មណាដែលពាក់ព័ន្ធនឹងការនិយាយជាធារណៈ បើអ្នកចង់ក្លាយជាអ្នកជំនាញផ្នែកយុទ្ធសាស្រ្តទីផ្សារ ដូច្នេះអ្នកអាចជ្រើសរើសគំនិតអាជីវកម្មណាដែលអាចឱ្យអ្នកចាប់ផ្ដើមលើការបង្កើតសេវាកម្មផ្នែកយុទ្ធសាស្រ្តទីផ្សារ និងជាច្រើនជម្រើសទៀត ដែលអ្នកគិតពិចារណាលើខ្លួនឯង ថាតើអ្វីដែលអ្នកស្រលាញ់ និងតែងតែនឹកគិតស្រមៃចង់ក្លាយជា?

ការចាប់ផ្ដើមអាជីវកម្ម ជាមួយគំនិតអាជីវកម្មដែលជាការស្រលាញ់របស់អ្នក នោះវានឹងជួយឱ្យអ្នកកាន់តែមានកម្លាំងចិត្តក្នុងការចាប់ផ្ដើមវា ព្រមទាំងព្យាយាមជំនះគ្រប់ឧបសគ្គ ដោយមិនថាអ្នកជួបស្ថានភាពបែបណាឡើយ ក៏អ្នកមិនងាយបោះបង់វាចោលដែរ។

2. ចំណេះជំនាញ

អ្នកត្រូវសួរខ្លួនឯងថា តើគំនិតអាជីវកម្មដែលអ្នកចង់ចាប់ផ្ដើមនោះ អ្នកមានជំនាញលើវាដែរឬទេ? តើអ្នកមានចំណេះដឹងផ្នែកហ្នឹងកម្រិតណា? តើអ្នកនឹងត្រូវការសមាជិកក្រុមដើម្បីជួយលើជំនាញអ្វីខ្លះ?

ការចាប់ផ្ដើមអាជីវកម្ម ជាមួយនឹងគំនិតអាជីវកម្មដែលកើតចេញពីក្ដីស្រលាញ់ វាមិនទាន់ពេញលេញនៅឡើយនោះទេ គឺទាមទារឱ្យអ្នកមានចំណេះជំនាញលើវាបន្ថែមទៀត។ អ្នកត្រូវដឹងថា ប្រសិនបើអ្នកចាប់ផ្ដើមអាជីវកម្ម ដោយគ្មានចំណេះជំនាញលើវានោះទេ អាជីវកម្មដែលអ្នកចាប់ផ្ដើមនោះ វាមិនអាចមានដំណើរការបានយូរអង្វែង ឬទៅមុខបានវែងឆ្ងាយឡើយ។

3. អាចពង្រីកបាន

នៅចំណុចនេះ ចង់ឱ្យអ្នកគិតពិចារណាបន្ថែមទៀត ថាតើគំនិតអាជីវកម្មរបស់អ្នក អាចពង្រីកបានធំនាពេល 5ឆ្នាំខាងមុខដែរឬទេ? ប្រសិនបើគំនិតអាជីវកម្មរបស់អ្នក កើតចេញពីការជ្រើសរើសដោយក្ដីស្រលាញ់ និងការមានចំណេះជំនាញក៏ពិតមែន ក៏ប៉ុន្តែគំនិតអាជីវកម្មរបស់អ្នកមិនអាចពង្រីកទំហំទីផ្សារឱ្យបានធំ ដោយវាអាចស្ថិតនៅទំហំអាជីវកម្មថេរ នោះវាក៏មិនមែនជារឿងល្អដែរ ពីព្រោះអ្នកនឹងឆាប់ធុញទ្រាន់នឹងវា ដោយខិតខំធ្វើជាយូរណាស់មកហើយ ប៉ុន្តែដូចគ្មានឃើញលទ្ធផលរីកចម្រើននៅក្នុងទីផ្សារសោះ។ ហេតុនេះ អ្នកត្រូវប្រាកដថា គំនិតអាជីវកម្មរបស់អ្នក នឹងមានលទ្ធភាពអាចពង្រីកបានធំនាពេលអនាគតនៅក្នុងទីផ្សារ។

ពាណិជ្ជកម្ម

កំហុសដ៏ធំនៃយុទ្ធសាស្រ្តរបស់ Yahoo ដែលអ្នកអាចរៀនសូត្រ!

Sann Thaven

Yahoo ត្រូវបានបង្កើតឡើងដោយ Jerry Yang និង David Filo នៅខែមករា ឆ្នាំ 1994។ ដំបូងឡើយអ្នកទាំងពីរបានបង្កើតគេហទំព័រមួយដែលមានឈ្មោះថា “Jerry and David’s Guide to the World Wide Web” ដែលវាគ្រាន់តែជាបញ្ជីនៃគេហទំព័រផ្សេងទៀត ដោយត្រូវបានរៀបចំតាមឋានានុក្រមជាសន្ទស្សន៍ទំព័រដែលអាចស្វែងរកបាន។ នៅខែមេសា ឆ្នាំ1994 គេហទំព័រនោះក៏ត្រូវបានប្តូរឈ្មោះទៅជា “Yahoo!” វិញ ដែលពាក្យ “YAHOO” គឺជាពាក្យកាត់សម្រាប់ “Ot Another Hierarchically Oracle Oracle” ។ អំឡុងពេលនោះ Yahoo ទទួលបានការគាំទ្រយ៉ាងខ្លាំង និងរីកចម្រើនយ៉ាងឆាប់រហ័សពេញមួយទសវត្សទី 90។

Yahoo បានចេញជាសាធារណៈនៅខែមេសា ឆ្នាំ1996 និងមានតម្លៃភាគហ៊ុនកើនឡើង 600 ភាគរយក្នុងរយៈពេល 2ឆ្នាំ។ នៅឆ្នាំ 1998 Yahoo គឺជាចំណុចចាប់ផ្តើមដ៏ពេញនិយមបំផុតសម្រាប់អ្នកប្រើប្រាស់គេហទំព័រដែលទទួលបានការមើល 95 លានទំព័រក្នុងមួយថ្ងៃ។ បន្ថែមពីនេះ ក្រុមហ៊ុនក៏បានចាប់ផ្តើមរកប្រាក់ពីផ្ទាំងផ្សាយពាណិជ្ជកម្មដែលជាប្រភេទដំបូងរបស់ខ្លួន ហើយចាប់ផ្តើមរីកចម្រើនយ៉ាងឆាប់រហ័សផងដែរ។ គួរបញ្ជាក់ផងដែរថា Yahoo គឺជាកន្លែងផ្តល់សេវាគេហទំព័រ ដោយក្នុងនោះផ្តល់សេវាកម្ម ដូចជាម៉ាស៊ីនស្វែងរកគេហទំព័រ និងសេវាកម្មអ៊ីមែល។

ទោះបីជាក្រុមហ៊ុន Yahoo កំពុងដំណើរការអាជីវកម្មបានយ៉ាងល្អ និងទទួលបានភាពរីកចម្រើនយ៉ាងឆាប់រហ័សក៏ដោយ ប៉ុន្តែនៅចុងឆ្នាំ 2000 Yahoo ចាប់ផ្ដើមធ្លាក់ចុះវិញ ដោយសារកត្តាយុទ្ធសាស្រ្តមួយចំនួន។ នេះបើយោងតាមសេចក្ដីប្រកាសរបស់គេហទំព័រ The Strategy Story។

1. ការសម្រេចចិត្តខុស ដោយ Yahoo បានបដិសេធមិនទិញយក Google ក្នុងតម្លៃ 1 លានដុល្លារ

នៅក្នុងឆ្នាំ 1998 លោក Larry Page និង Sergei Brin ស្ថាបនិករបស់ក្រុមហ៊ុន Google បានដាក់ស្នើលក់ Algorithm ដែលខ្លួនទើបតែបង្កើតថ្មីទៅឱ្យ Yahoo ក្នុងតម្លៃ 1 លានដុល្លារ។ Algorithm នេះ គឺវាមានសមត្ថភាពជួយឱ្យម៉ាស៊ីនស្វែងរករបស់ Yahoo ដំណើរការលឿនជាងមុន និងបង្កើនបទពិសោធន៍នៃការស្វែងរកគេហទំព័រនានា ប៉ុន្តែ Yahoo បានបដិសេធមិនទិញយកវាឡើយ។ Yahoo បានបដិសេធមិនទិញ ដោយលើកយកនូវហេតុផលថា “ចង់ឱ្យអ្នកប្រើប្រាស់របស់ខ្លួនចំណាយពេលវេលាបន្ថែមទៀតនៅលើវេទិកាផ្ទាល់ខ្លួន និងមាតិការបស់ Yahoo ផ្សេងទៀត ដូច្នេះអាចរកប្រាក់បានកាន់តែច្រើនពីផ្ទាំងផ្សាយពាណិជ្ជកម្មនៅលើគេហទំព័រ”។

នៅក្នុងឆ្នាំ 2002 Yahoo ក៏បានបដិសេធសំណើទិញយក Google ក្នុងតម្លៃ 5 ពាន់លានដុល្លារម្ដងទៀត ដោយ Yahoo ចង់ទិញ Google ក្នុងតម្លៃ 3 ពាន់លានដុល្លារ ប៉ុន្តែ Google ចង់បាន 5 ពាន់លានដុល្លារ។ ដូច្នេះហើយ ទើបកិច្ចព្រមព្រៀងទិញយកនេះមិនបានសម្រេច។

ជាលទ្ធផលក្រុមហ៊ុន Google បានបម្លែងខ្លួនឱ្យក្លាយជាភាពពេញនិយមយ៉ាងខ្លាំងលើការប្រើប្រាស់ម៉ាស៊ីនស្វែងរកទូទាំងពិភពលោកនាពេលបច្ចុប្បន្ននេះ ដោយមនុស្សគ្រប់គ្នាអាចស្វែងរកអ្វីតាមដែលពួកគេចង់ស្រាវជ្រាវ ហើយមនុស្សចាប់ផ្ដើមឈប់គិតអំពី Yahoo។

2. ភាពបរាជ័យលើការសម្រេចចិត្តទិញ Geocities, Broadcast.com និង Tumblr

ការសម្រេចចិត្តចុះកិច្ចព្រមព្រៀងទិញយកគេហទំព័រ Geocities និង Broadcast.com បានធ្វើឱ្យ Yahoo ខាតបង់ជាច្រើន ពីព្រោះគេហទំព័រទាំងពីរនេះ មិនបាននាំមកនូវគុណតម្លៃដល់ក្រុមហ៊ុនបានឡើយ។

ចំពោះកិច្ចព្រមព្រៀងទិញ Geocities ក្នុងតម្លៃ $4.58 ពាន់លានដុល្លារ ដែលជាគេហទំព័រដែលអាចឱ្យអ្នកប្រើប្រាស់បង្កើតគេហទំព័រផ្ទាល់ខ្លួនរបស់ពួកគេ។ នៅក្នុងឆ្នាំ 2009 គេហទំព័រនេះ ក៏ត្រូវបានបិទទៅវិញ ពីព្រោះវាមិនបានផ្ដល់គុណតម្លៃណាមួយដល់ម្ចាស់ភាគហ៊ុនរបស់ Yahoo ឡើយ។

រីឯកិច្ចព្រមព្រៀងទិញយក Broadcast.com ក្នុងតម្លៃ $5.7 ពាន់លានដុល្លារ ដែលវាជាគេហទំព័រទូរទស្សន៍អនឡាញដែលត្រូវបានបង្កើតឡើងដោយ Mark Cuban។ ប៉ុន្តែក៏ត្រូវបរាជ័យ ដោយសារការភ្ជាប់អ៊ីនធឺណិតយឺតពេកក្នុងឆ្នាំ 1999 ដើម្បីដំណើរការមាតិកាវីដេអូប្រភេទនេះចេញពីបណ្តាញ។

បន្ថែមពីនេះ នៅក្នុងឆ្នាំ 2013 ក្រុមហ៊ុន Yahoo ក៏បានសម្រេចចិត្តទិញយក Tumblr ក្នុងតម្លៃ 1.1 ពាន់លានដុល្លារ ប៉ុន្តែក៏បានធ្វើឱ្យអ្នកប្រើប្រាស់ Tumblr ជាច្រើននាក់មានភាពមិនពេញចិត្តលើការទិញយកនេះ ហើយចុងក្រោយ Yahoo ក៏សម្រេចចិត្តលក់វាឱ្យទៅក្រុមហ៊ុន Verizon វិញកាលពីឆ្នាំ 2016។

3. ជ្រើសរើស CEO ខុស

Yahoo តែងតែសម្រេចចិត្តជួល CEO ខុសម្ដងហើយម្ដងទៀត ហេតុនេះហើយ នៅ Yahoo គ្មាន CEO ដើម្បីធ្វើប្រតិបត្តិការនានាឱ្យបានរលូនឡើយ។ បន្ថែមពីនេះ សមាជិកក្នុងក្រុមហ៊ុន ក៏មានអ្នកខ្លះបន្ទោសលើ Marissa Mayer ទាំងស្រុងចំពោះការសម្រេចចិត្តជ្រើសរើស CEO ខុសនេះ។ កត្តានេះហើយ បានធ្វើឱ្យ Yahoo មិនមានភាពរឹងមាំផ្ទៃខាងក្នុងឡើយ។

4. ចក្ខុវិស័យមិនច្បាស់លាស់ និងខ្សោយលើការដឹកនាំ

កំហុសនៃយុទ្ធសាស្ត្ររបស់ Yahoo គឺខ្វះចក្ខុវិស័យច្បាស់លាស់ និងគ្មានគោលបំណងរួមសម្រាប់ក្រុមហ៊ុន។ ទន្ទឹមនឹងនេះ ក្រុមហ៊ុន Google និង Microsoft មានភាពច្បាស់លាស់អំពីទិសដៅយុទ្ធសាស្ត្ររបស់ពួកគេ។

ពាណិជ្ជកម្ម

របៀបដកខ្លួនចេញពីជីវិតដ៏ធុញទ្រាន់របស់អ្នក

Sann Thaven

មនុស្សម្នាក់ៗ កើតមកតែងតែនាំនូវសេចក្ដីសុខ និងសេចក្ដីទុក្ខមកជាមួយគ្នា។ អ្នកខ្លះក៏មានជីវិតមួយដែលពោរពេញដោយភាពរីករាយច្រើនជាងភាពទុក្ខសោក ប៉ុន្តែក៏មានអ្នកខ្លះក៏មានជីវិតដែលមានភាពទុក្ខសោកច្រើនជាងភាពរីករាយ ហើយក៏មានអ្នកខ្លះទៀត ភាពរីករាយ និងភាពទុក្ខសោកដើរទទឹមគ្នាក៏មាន។ ចុះប្រសិនបើ អ្នកកំពុងជួបនូវស្ថានភាពមួយដែលធុញទ្រាន់នឹងជីវិតខ្លួនឯង ដោយគ្មានភាពរីកចម្រើនដូចគេ គ្មានភាពរីករាយច្រើនដូចគេ និងខ្វះអ្វីស្ទើរគ្រប់យ៉ាង តើអ្នកនឹងធ្វើបែបណា? តើអ្នកនឹងបញ្ចប់ជីវិតខ្លួនឯងឬ? តើអ្នកនឹងឃុំខ្លួនឯងក្នុងតែបន្ទប់ឬ? តើអ្នកនឹងចំណាយពេលនោះមកលើរឿងឥតប្រយោជន៍ផ្សេងៗឬ?

ហេតុនេះ ខ្លឹមសារខាងក្រោមនឹងជួយបង្ហាញនូវគន្លឹះបីចំណុច ដែលជួយផ្ដល់ជាគំនិតដល់អ្នកសម្រាប់ពិចារណា ដើម្បីដកខ្លួនចេញពីជីវិតមួយដែលអ្នកយល់ថា ពោរពេញដោយភាពធុញទ្រាន់ជាខ្លាំង។

1. កុំចំណាយពេលច្រើនលើរឿងគ្មានប្រយោជន៍

ប្រសិនបើអ្នកយល់ថាជីវិតរបស់អ្នកគ្មានន័យ មានភាពស្មុគស្មាញ ឬកំពុងមានអារម្មណ៍ធុញទ្រាន់នឹងជីវិតផ្ទាល់ខ្លួន ចូរកុំព្យាយាមយកពេលវេលានោះមកចំណាយលើបណ្ដាញសង្គម ការលេងហ្គេម ឬក៏ផឹកស្រា និងសកម្មភាពដែលមិនបានជួយអ្នកឱ្យសោះ ពីព្រោះសកម្មភាពទាំងនេះ មិនត្រឹមតែធ្វើឱ្យអ្នកខាតពេលប៉ុណ្ណោះទេ ប៉ុន្តែវានឹងបំផ្លាញអ្នកបន្តិចម្ដងៗ ព្រមទាំងជំរុញឱ្យអ្នកកាន់តែមានអារម្មណ៍ស្មុគស្មាញជាមួយជីវិតកាន់តែខ្លាំង និងយល់ថាជីវិតរបស់អ្នកនឹងគ្មានន័យលើសដើម។

ហេតុនេះហើយ ចូរកុំព្យាយាមចំណាយពេលទាំងនោះលើរឿងដែលគ្មានប្រយោជន៍ច្រើនពេក ប៉ុន្តែត្រូវចេះសម្រួលអារម្មណ៍ ការតាំងសមាធិ ការដើរលេងកំសាន្ត ការធ្វើលំហាត់ប្រាណ ការណាត់ជួបមនុស្សដែលអ្នកអាចចែករំលែករឿងក្នុងចិត្ត និងសកម្មភាពទាំងឡាយណាដែលជួយឱ្យកាន់តែធូរស្បើយ ហើយអាចបន្តសកម្មភាពឆ្ពោះទៅមុខបានយ៉ាងរលូន ដោយមិនមែនគេងអោបក្រសោមទុក្ខកង្វល់នោះតែក្នុងបន្ទប់ម្នាក់ឯងឡើយ។

2. ធ្វើខ្លួនឱ្យសកម្មលើរឿងមានប្រយោជន៍

អ្នកត្រូវផ្ដោតលើសកម្មភាពណាដែលជួយធ្វើឱ្យអ្នកកាន់តែមានអារម្មណ៍ល្អ បង្កើនចំណេះដឹង សមត្ថភាព និងរវល់ច្រើន។ សកម្មភាពទាំងនោះ រួមមាន៖

ការធ្វើខ្លួនឱ្យសកម្មលើការបង្កើនចំណេះដឹង តាមរយៈការអានសៀវភៅ មើលវីដេអូបង្វឹកវគ្គខ្លីៗ និងការសិក្សាស្រាវជ្រាវបន្ថែម។
ការធ្វើខ្លួនឱ្យសកម្មលើការពង្រឹងទំនាក់ទំនងជាមួយមនុស្សល្អៗ និងមនុស្សខ្លាំងពូកែនានាឱ្យបានច្រើន។
ការធ្វើខ្លួនឱ្យសកម្មលើការសម្រេចគោលដៅផ្ទាល់ខ្លួន និងការថែទាំសុខភាព។
និងការធ្វើខ្លួនឱ្យសកម្មលើរឿងទាំងឡាយណាដែលជួយអ្នកឱ្យកាន់តែទទួលបានភាពរីកចម្រើននៅក្នុងជីវិត។

ចូរអ្នកចងចាំថា នៅពេលអ្នករវល់ខ្លាំងលើសកម្មភាពណាដែលជួយឱ្យអ្នករីកចម្រើនឥតឈប់ឈរ ព្រមទាំងទទួលបានលទ្ធផលល្អជាបន្តបន្ទាប់នៅក្នុងជីវិត នោះអ្នកនឹងភ្លេចគិតលើការធ្វើសកម្មភាពណាដែលគ្មានប្រយោជន៍ ព្រមទាំងចាប់ផ្ដើមកាន់តែជឿជាក់លើខ្លួនឯង ផ្ដល់តម្លៃលើជីវិតខ្លួនឯង និងស្រលាញ់នឹងជីវិតរស់នៅប្រចាំថ្ងៃរបស់ខ្លួនឯងកាន់តែខ្លាំងជាក់ជាមិនខាន។

3. ត្រូវមានគោលដៅជាក់លាក់សម្រាប់ជីវិត

មនុស្សដែលរស់នៅក្នុងជីវិតដែលមានគោលដៅមិនច្បាស់លាស់ តែងតែមានបញ្ហាស្មុគស្មាញច្រើនជាងអ្នកដែលរស់នៅក្នុងជីវិតមួយដែលមានគោលដៅជាក់លាក់នៅក្នុងជីវិត។ ហេតុអ្វី? ពីព្រោះអ្នកដែលមានគោលដៅមិនជាក់លាក់ តែងតែមានស្ថានភាពមិននឹងនរ និងប្រែប្រួលជានិច្ច ដូចជាខ្យល់បកអ៊ីចឹង ប៉ុន្តែមនុស្សដែលមានគោលដៅជីវិតជាក់លាក់ ពួកគេតែងតែមានកម្លាំងចិត្តជានិច្ចក្នុងការធ្វើសកម្មភាពនានាដើម្បីសម្រេចវា និងរស់នៅដោយមានគោលបំណង ព្រមទាំងរស់នៅដោយមានក្ដីសង្ឃឹមជានិច្ចទោះបីជាជួបស្ថានភាពជីវិតបែបណាក៏ដោយ។

ពាណិជ្ជកម្ម

រឿង 4 យ៉ាង ដែលអ្នកមិនគួរមានអារម្មណ៍ខ្មាសគេឡើយ!

Sann Thaven

មនុស្សម្នាក់ៗ តែងតែមានក្ដីស្រមៃខ្ពស់ និងចង់មើលឃើញជីវិតផ្ទាល់ខ្លួនជួបតែរឿងល្អៗ ប៉ុន្តែទោះបីជាយ៉ាងនេះក្ដី ក៏វាមិនអាចសម្រេចបានទាំងអស់ផងដែរ គឺវាទាមទារឱ្យមនុស្សម្នាក់ៗនោះត្រូវមានការខិតខំប្រឹងប្រែង និងចេះដុះខាតសមត្ថភាពខ្លួនឯង ព្រមទាំងចេះបង្កើត និងចេះចាប់យកឱកាស។ បន្ថែមពីនេះ វាក៏ទាមទារការចូលរួមពីកត្តាផ្សេងៗដែរ ដូចជាកត្តាសេពគប់ កត្តាខ្លួនឯង កត្តាគ្រួសារ និងកត្តាបរិយាកាសរស់នៅប្រចាំថ្ងៃ។

អ្វីដែលកាន់តែសំខាន់នោះ ចូរពេញចិត្តនឹងជីវិតខ្លួនឯង និងព្យាយាមឱ្យអស់ពីសមត្ថភាពដើម្បីសម្រេចនូវគោលដៅជីវិតផ្ទាល់ខ្លួន ដោយគ្មានអារម្មណ៍ថាអន់ចិត្ត ឬខ្មាសគេ ដោយសាររឿងបួនយ៉ាងខាងក្រោមឱ្យសោះ។

1. ការមានឪពុកម្ដាយក្រីក្រ

អ្នកត្រូវអរគុណឪពុកម្ដាយរបស់អ្នកវិញ ដែលពួកគាត់មិនបានបោះបង់អ្នកចោល ហើយតែងតែជួយចិញ្ចឹមបីបាច់អ្នករហូតដល់ធំ និងជួយគាំទ្រអ្នកជានិច្ចក្នុងការធ្វើអ្វីមួយនៅក្នុងជីវិត។

2. ការមានសម្លៀកបំពាក់ចាស់ៗ

អ្នកត្រូវគិតឡើងថា មានមនុស្សជាច្រើននាក់ដែលពិបាកជាងអ្នកទៀត ពីព្រោះពួកគេមានសម្លៀកបំពាក់មិនគ្រប់គ្រាន់ ឬគ្មានតែម្ដង។

3. ការមានមិត្តភក្តិជាអ្នកក្រ

អ្នកត្រូវដឹងថា មានមិត្តភក្តិជាអ្នកក្រ មិនមែនអាក្រក់ឡើយ ពីព្រោះពួកគេនឹងរាប់អានអ្នកដោយចេញពីចិត្តស្មោះសរ និងតែងតែជួយអ្នកក្នុងគ្រាមានអាសន្ន។

4. ការរស់នៅក្នុងជីវិតសាមញ្ញ

អ្នកត្រូវដឹងថា បើជីវិតសាមញ្ញរបស់អ្នកធ្វើឱ្យអ្នកគ្មានសម្ពាធផ្លូវចិត្ត អាចធ្វើអ្វីជាខ្លួនឯង និងរីកចម្រើននៅក្នុងជីវិតផ្ទាល់ខ្លួន គឺវាគ្មានអ្វីត្រូវខ្មាសគេឡើយ។

ពាណិជ្ជកម្ម

ជំនាញដ៏សំខាន់ ដែលអ្នករចនាក្រាហ្វិកត្រូវតែមាន!

Sann Thaven

ជំនាញរចនាក្រាហ្វិក គឺជាជំនាញមួយដែលកំពុងមានតម្រូវការទីផ្សារការងារជាខ្លាំងទូទាំងពិភពលោក ពីព្រោះគ្រប់ប្រភេទអាជីវកម្មសុទ្ធតែត្រូវការអ្នករចនាក្រាហ្វិក។ ហេតុនេះ បើនរណាមានជំនាញមួយនេះខ្លាំង នឹងមានឱកាសរកប្រាក់ចំណូលបានច្រើន តាមរយៈការធ្វើការឯករាជ្យ ដើម្បីទទួលបានប្រាក់ចំណូលបន្ថែម និងធ្វើការនៅក្រុមហ៊ុនរដ្ឋ ឬឯកជន ដើម្បីទទួលបានប្រាក់ខែគោលប្រចាំខែ។

ទោះបីជាយ៉ាងនេះក្ដី អ្នករចនាក្រាហ្វិក ក៏ទទួលរងនូវសម្ពាធការងារ និងស្មុគនឹងគំនិតក្នុងការរចនាផងដែរ ដោយសារតែស្ទើគ្រប់ផ្នែកនៅក្នុងអាជីវកម្មតែងតែមករកអ្នករចនាក្រាហ្វិក ដើម្បីរចនាអ្វីមួយស្របតាមតម្រូវការរបស់ពួកគេ។ ហេតុនេះហើយ អ្នករចនាក្រាហ្វិកក៏ត្រូវមានភាពឆ្លាតវៃក្នុងការធ្វើការឱ្យបានល្អ ព្រមទាំងត្រូវមានជំនាញមួយចំនួនបន្ថែមទៀត ដើម្បីធ្វើឱ្យការងាររចនារបស់ខ្លួនកាន់តែមានភាពល្អពីមួយថ្ងៃទៅមួយថ្ងៃ និងអាចបំពេញចិត្តអតិថិជនស្របតាមតម្រូវការ។ ជំនាញទាំងនោះរួមមាន៖

1. ជំនាញបច្ចេកទេស

អ្នករចនាក្រាហ្វិក ត្រូវតែមានជំនាញបច្ចេកទេសលើការរចនាឱ្យបានខ្លាំង ដូចជា៖

យល់ដឹងច្បាស់ពីគោលការណ៍រចនា៖ អ្នករចនាក្រាហ្វិកត្រូវមានការយល់ដឹងពីរបៀបជ្រើសរើសយកបន្ទាត់ ពណ៌ រូបរាង លំហ វាយនភាព(texture) វាយអក្សរ(typography) មាត្រដ្ឋាន ភាពលេចធ្លោ ការសង្កត់ធ្ងន់ និងភាពចុះសម្រុងគ្នា ដើម្បីបង្កើតការរចនាឱ្យមើលឃើញថាទាក់ទាញ និងមានរចនាសម្ព័ន្ធនៃការរចនាបានល្អ។
គំនិតនៃការរចនា៖ អ្នករចនាក្រាហ្វិក ត្រូវតែចេះបង្កើតគំនិតក្នុងការចនា តាមរយៈការចេះសិក្សាស្រាវជ្រាវបន្ថែម ការអភិវឌ្ឍ ការវាយតម្លៃ និងការអនុវត្ត ដើម្បីអាចទទួលបានការរចនាមួយដែលមានភាពថ្មី និងច្នៃប្រឌិតខ្ពស់។
យល់ដឹងច្បាស់ពីម៉ាកយីហោ៖ អ្នករចនាក្រាហ្វិក ត្រូវតែមានការយល់ដឹងអំពីម៉ាកយីហោដែលខ្លួនកំពុងធ្វើការរចនា ដើម្បីធានាថាការរចនាបានជួយលើកកម្ពស់ម៉ាកយីហោនោះឱ្យកាន់តែមានភាពរស់រវើកតាមរយៈឡូហ្គោ ពណ៌ វាយអក្សរ(typography) រូបគំនូរ និងជាច្រើនទៀត។
វាយអក្សរ (typography)៖ ផ្នែកនេះ ជាធាតុដ៏សំខាន់មួយនៃការរចនាក្រាហ្វិក ហើយការវាយអក្សរដ៏ត្រឹមត្រូវ គឺការវាយអក្សរដែលអាចបង្កើតអត្ថន័យ និងទាក់ទាញអារម្មណ៍ ប៉ុន្តែបើការវាយអក្សរខុស នោះនឹងអាចធ្វើឱ្យរំខានដល់អតិថិជន ដែលបង្កើតភាពមិនពេញចិត្ត ឬបាត់ទំនុកចិត្តជាដើម។ កត្តានេះហើយ អ្នករចនាក្រាហ្វិចត្រូវមានជំនាញគ្រប់បែបយ៉ាង ចាប់ពីការជ្រើសរើសពុម្ពអក្សរឱ្យបានត្រឹមត្រូវសម្រាប់គម្រោងនីមួយៗ រហូតដល់ការវាយអក្សរ ការគូសវាស ការតាមដាន និងការនាំមុខ។
ការរចនាសម្រាប់ការបោះពុម្ព៖ អ្នករចនាក្រាហ្វិក ត្រូវតែមានការយល់ដឹងពីលំហូរនៅពេលការរចនានោះត្រូវមានបោះពុម្ព ដើម្បីធានាថារូបភាព ក៏ដូចជាកម្រិតពណ៌ទឹកថ្នាំចេញមកគឺល្អ ហើយទម្រង់ឯកសារក៏ត្រឹមត្រូវ។
ការរចនា UX និង UI៖ អ្នករចនាក្រាហ្វិក ត្រូវតែមានការយល់ដឹងអំពី UX និង UI ដើម្បីបង្កើតការរចនាឱ្យមានភាពទាក់ទាញភ្នែកអ្នកទស្សនា និងបង្ហាញមុខងារដែលងាយស្រួល ព្រមទាំងអាចធ្វើឱ្យការរចនាកាន់តែមានភាពល្អប្រសើរ។
បច្ចេកវិទ្យា៖ អ្នករចនាក្រាហ្វិក ទាមទារឱ្យធ្វើការជាមួយឧបករណ៍ក្នុងការរចនា ដូចជាAdobe Illustrator, Adobe InDesign, Adobe Photoshop, Adobe After Effects និង Sketch។ បន្ថែមពីនេះ ប្រសិនបើជាអ្នករចនាគេហទំព័រវិញ ទាមទារឱ្យមានចំណេះដឹងផ្នែកសរសេរកូដ និងស្គាល់ភាសាកម្មវិធី ដូចជាHTML និង CSS ក៏ដូចជាប្រព័ន្ធគ្រប់គ្រងខ្លឹមសារដូចជា WordPress ផងដែរ។

2. ជំនាញទន់

ក្រៅពីជំនាញបច្ចេកទេសនៃការរចនា អ្នករចនាក្រាហ្វិកក៏ទាមទារឱ្យមានជំនាញទន់ផងដែរ ដើម្បីជួយបង្កើនផលិតភាពការងារផ្ទាល់ខ្លួនឱ្យកាន់តែទទួលបានភាពជោគជ័យ។ ជំនាញទន់ដ៏សំខាន់សម្រាប់អ្នករចនាក្រាហ្វិក រួមមាន៖

ការច្នៃប្រឌិត៖ អ្នករចនាក្រាហ្វិក ត្រូវតែមានការអភិវឌ្ឃគំនិតថ្មីៗ និងប្លែកៗជានិច្ច ដោយមិនអាចធ្វើការរចនាលើអ្វីដដែលៗបានឡើយ ដោយធានាថាការរចនាត្រូវតែទាក់ទាញចំណាប់អារម្មណ៍របស់មនុស្ស និងធ្វើឱ្យការរចនាប្រកបដោយភាពច្នៃប្រឌិត។
ជំនាញទំនាក់ទំនង៖ អ្នករចនាក្រាហ្វិក តែងតែជួបមនុស្សច្រើន ជាពិសេសអ្នកពាក់ព័ន្ធក្នុងក្រុមហ៊ុន និងជាមួយអតិថិជន។ ហេតុនេះ អ្នកររចនា ត្រូវតែមានទំនាក់ទំនងជាមួយពួកគេដើម្បីពន្យល់ពីគំនិតរចនា និងសួរនាំបន្ថែមពីការរចនាឱ្យបានល្អស្របតាមការចង់បានរបស់ពួកគេ។
យុទ្ធសាស្រ្ត៖ អ្នករចនាក្រាហ្វិក តែងតែជាអ្នកគិតបែបយុទ្ធសាស្រ្ត ពីព្រោះពួកគេត្រូវគិតពិចារណាលើធាតុផ្សំនៃការរចនាមួយចំនួនឱ្យដំណើរការជាមួយគ្នា និងរបៀបបង្ហាញអត្ថន័យដ៏ល្អ ព្រមទាំងប្រកាន់ខ្ជាប់នូវស្ដង់ដាររចនា។ បន្ថែមពីនេះ ពួកគេក៏ត្រូវធ្វើការស្រាវជ្រាវពីទីផ្សារ ការបំផុសគំនិត ការបង្កើតរូបភាពតូចៗ(thumbnailing) ការអភិវឌ្ឍគំនិត និងការវាយតម្លៃការរចនា។
ជំនាញដោះស្រាយបញ្ហា៖ អ្នករចនាក្រាហ្វិក មានតួនាទីរចនាឱ្យបានល្អស្របតាមតម្រូវការអតិថិជន ប៉ុន្តែភាគច្រើនអតិថិជនតែងតែចង់បានការរចនាល្អ តែពួកគេមិនដឹងប្រាប់បែបណា ដោយគ្រាន់តែនិយាយពីគំនិតដែលពួកគេត្រូវការ ហើយឱ្យអ្នកគិតពិចារណាលើគំនិតរចនាដោយខ្លួនឯង។ ដូច្នេះអ្នកត្រូវមានតួនាទីមួយទៀត គឺការដោះស្រាយបញ្ហារបស់អតិថិជន ដោយរចនាអ្វីមួយនោះឱ្យត្រូវនឹងគោលបំណងរបស់ពួកគេ និងការដោះស្រាយបញ្ហារចនា ឬប្រែសម្រួលការរចនាដើម្បីបំពេញចិត្តអតិថិជន។
ជំនាញគ្រប់គ្រងពេលវេលា៖ អ្នករចនាក្រាហ្វិក ជាទូទៅធ្វើការរចនាលើគម្រោងជាច្រើនក្នុងពេលតែមួយ ដូច្នេះហើយអ្នករចនាត្រូវតែមានការគ្រប់គ្រងពេលវេលាឱ្យបានល្អ ដើម្បីបញ្ចប់ការងាររចនាជូនអតិថិជនស្របតាមតម្រូវការចង់បានរបស់ពួកគេ តាមរយៈការកំណត់ការងារអាទិភាព។

ពាណិជ្ជកម្ម

រឿងរ៉ាវសង្ខេប

1. ចាត់ទុកអតិថិជនជាមនុស្សសំខាន់

2. ប្រើប្រាស់ភាសាធម្មជាតិនៃការយល់ចិត្តផ្ទាល់ខ្លួន

3. ការសួរសំណួរបញ្ជាក់

តើអ្វីជា Porter’s 5 Forces?

ហេតុអ្វីត្រូវសិក្សា Porter’s 5 Forces មុនពេលសរសេរផែនការអាជីវកម្ម?

1. ចក្ខុវិស័យ និងគោលបំណងអាជីវកម្ម

2. គុណតម្លៃ​ស្នូល

3. ការវិភាគ SWOT

4. តិចនិកប្រើប្រាស់ធនធានឱ្យមានប្រសិទ្ធភាព (Tactics)

5. ផែនការបែងចែកធនធាន

6. ការវាស់វែង

1. លក់សេវាកម្មលើចំណេះជំនាញដែលអ្នកមាន

2. សរសេរគំរូអាជីវកម្មមួយដ៏រឹងមាំសម្រាប់ខ្លួនឯង

3. ប្រឡូកឱ្យបានច្រើនលើគំនិតអាជីវកម្មរបស់អ្នក

4. កសាងម៉ាកយីផ្ទាល់ខ្លួនលើបណ្ដាញសង្គម

1. អាចរក្សាការប្ដូរចិត្តអតិថិជន ពីព្រោះអតិថិជនមានជម្រើសច្រើន

2. ធ្វើឱ្យអតិថិជនកាន់តែសប្បាយចិត្ត

3. ឱកាសបិទការលក់បានច្រើន

1. ការសម្រាក

2. ជជែកជាមួយបុគ្គលផ្សេងៗ

3. ធ្វើលំហាត់ប្រាណ

4. ធ្វើការសិក្សាស្រាវជ្រាវដើម្បីបង្កើតគំនិតឱ្យបានច្រើន

5. កុំខ្លាចនឹងការសាកល្បង ឬការមានកំហុស

1. មនុស្សមានគ្រប់ប្រភេទនៅក្នុងសង្គមជាក់ស្ដែង

2. ការអភិវឌ្ឍន៍ជំនាញឱ្យមានភាពលេចធ្លោជាងគេ

3. កសាងបណ្ដាញ និងម៉ាកយីហោផ្ទាល់ខ្លួនឱ្យបានល្អ

1. Storytelling ផ្តល់នូវគុណសម្បត្តិប្រកួតប្រជែង

2. Storytelling បង្កើនប្រសិទ្ធភាព និងការចូលរួមរបស់បុគ្គលិក

3. Storytelling ជួយភ្ជាប់ទំនាក់ទំនងជាមួយអតិថិជន និងបង្កើតភាពស្មោះត្រង់ដល់ម៉ាកយីហោ

1. ផ្តោតលើសំណើគុណតម្លៃទាក់ទាញ

2. ប្រសិទ្ធភាពប្រើប្រាស់លើការដាក់ផលិតផល

3. ការណែនាំវិជ្ជមាននៅក្នុងប្រព័ន្ធផ្សព្វផ្សាយ

4. ការនិទានរឿងតាមរយៈវីដេអូ និង viral marketing

1. មិនដឹងថាខ្លួនឯងចូលចិត្តអ្វីឱ្យពិតប្រាកដ

2. មិនបានធ្វើការលើគោលដៅអាជីពដែលខ្លួនចង់សម្រេច

ឈ្វេងយល់អំពី “ជំនាញ”

ឈ្វេងយល់អំពី “បទពិសោធន៍”

1. ការបង្ហាញនូវរឿងរ៉ាវដ៏ទាក់ទាញសម្រាប់ដំណើរការដាំដុះ

2. កសាងកេរ្តិ៍ឈ្មោះ

គុណសម្បត្តិនៃការស្លៀកពាក់បែបសមរម្យ រួមមាន៖

1. បង្កើនទំនុកចិត្តដល់ខ្លួនឯង

2. មនុស្សផ្សេងទៀតនឹងផ្ដល់ការគោរពដល់អ្នក

3. បង្កើនភាពទាក់ទាញ

1. ក្ដីស្រលាញ់

2. ចំណេះជំនាញ

3. អាចពង្រីកបាន

1. ការសម្រេចចិត្តខុស ដោយ Yahoo បានបដិសេធមិនទិញយក Google ក្នុងតម្លៃ 1 លានដុល្លារ

2. ភាពបរាជ័យលើការសម្រេចចិត្តទិញ Geocities, Broadcast.com និង Tumblr

3. ជ្រើសរើស CEO ខុស

4. ចក្ខុវិស័យមិនច្បាស់លាស់ និងខ្សោយលើការដឹកនាំ

1. កុំចំណាយពេលច្រើនលើរឿងគ្មានប្រយោជន៍

2. ធ្វើខ្លួនឱ្យសកម្មលើរឿងមានប្រយោជន៍

3. ត្រូវមានគោលដៅជាក់លាក់សម្រាប់ជីវិត

1. ការមានឪពុកម្ដាយក្រីក្រ

2. ការមានសម្លៀកបំពាក់ចាស់ៗ

3. ការមានមិត្តភក្តិជាអ្នកក្រ

4. ការរស់នៅក្នុងជីវិតសាមញ្ញ

1. ជំនាញបច្ចេកទេស

2. ជំនាញទន់

2. គុណតម្លៃស្នូល