មេរៀនអំពីលុយដែលយុវវ័យត្រូវដឹងនិងរៀនសូត្រ!

លុយ ជាផ្នែកមួយដែលចាំបាច់នៅក្នុងជីវិតប្រចាំថ្ងៃរបស់មនុស្សគ្រប់រូប ពីព្រោះលុយអាចយកទៅដោះដូរយកអ្វីតាមតែខ្លួនឯងចង់បាន។ បន្ថែមពីនេះ លុយ ក៏ជាផ្នែកមួយដែលធ្វើឱ្យមនុស្សខិតខំធ្វើការ និងប្រកបមុខរបររកស៊ីទៅតាមចំណេះជំនាញរបស់បុគ្គលម្នាក់ៗ ដើម្បីទទួលបានប្រភពចំណូល មិនមែនអង្គុយសុខៗលុយវាធ្លាក់មកពីលើមេឃឡើយ។ ម្យ៉ាងវិញទៀត លុយ ក៏នាំមកផលវិបាកដល់មនុស្សផងដែរ តាមរយៈការដែលធ្វើឱ្យមនុស្សមានចិត្តគំនិតលោភលន់ និងចង់បានលុយច្រើនតាមតែចិត្តចង់បាន ដោយឈប់ខ្វល់អ្វីទាំងអស់ ដោយផ្ដោតតែលើការរកលុយមួយមុខក៏មានដែរ។

ហេតុដូចនេះហើយ ទើបពិភពលោកចាប់ផ្ដើមផ្ដល់សារៈសំខាន់លើចំណេះដឹងផ្នែកហិរញ្ញវត្ថុ ដើម្បីឱ្យមនុស្សគ្រប់គ្នាចេះគ្រប់គ្រង និងប្រើប្រាស់លុយឱ្យបានល្អ ដោយអាចយកលុយទាំងអស់នោះបង្កើនភាពរុងរឿងសម្រាប់ជីវិតផ្ទាល់ខ្លួន ជាជាងភាពស្មុគស្មាញនៅក្នុងជីវិត។

ហេតុដូច្នេះខ្លឹមសារខាងក្រោមនេះ នឹងបង្ហាញពីនូវចំណេះដឹងមួយចំនួនអំពីមេរៀនពីលុយ ដើម្បីឱ្យយុវវ័យទាំងអស់បានយល់ដឹង និងរៀនសូត្របន្ថែម។

1. ផ្លាស់ប្ដូរផ្នត់គំនិតលើលុយរបស់អ្នក

មនុស្សភាគច្រើននៅពេលគិតអំពីលុយ ពួកគេគ្រាន់តែគិតឃើញពីតួលេខប៉ុណ្ណោះ ប៉ុន្តែអ្នកត្រូវផ្លាស់ប្ដូរផ្នត់គំនិតនេះចេញ ដោយគិតអំពីលុយឱ្យលើសពីការគ្រាន់តែគិតអំពីតួលេខ។ អ្នកត្រូវដឹងថា ផ្នត់គំនិត អាកប្បកិរិយា និងគំរូនៃការចំណាយរបស់អ្នកជាប្រចាំថ្ងៃនោះ វាសុទ្ធតែប៉ះពាល់ដល់រចនាប័ទ្មក្នុងការគ្រប់គ្រងលុយរបស់អ្នក។

បន្ថែមពីនេះ អ្នកក៏ត្រូវផ្លាស់ប្ដូរផ្នត់គំនិតទាំងឡាយណាដែលអវិជ្ជមានចំពោះលុយ ដូចជាអ្នកខ្លាចរអាជាមួយលុយ អ្នកស្អប់លុយ និងផ្សេងៗទៀត ពីព្រោះវានឹងធ្វើឱ្យអ្នកជាមនុស្សមិនត្រូវធាតុជាមួយនឹងលុយ ហើយធ្វើអ្វីក៏មិនដែរមានផលល្អ ឬមានចំណូលបានច្រើនដែរ។ ម្យ៉ាងវិញទៀត បើយោងតាមប្រសាសន៍របស់លោកស្រី Catherine Alford អ្នកជំនាញផ្នែកហិរញ្ញវត្ថុ គឺគាត់ចង់ឱ្យអ្នកមានផ្នត់គំនិតវិជ្ជមានលើលុយឱ្យបានច្រើន នោះអ្នកនឹងមានកំណើននៃលុយមកកាន់ជីវិតរបស់អ្នក ហើយអ្នកក៏ត្រូវមានការរៀនសូត្រ ក៏ដូចជាយល់ដឹងអំពីលុយឱ្យបានច្រើន។

2. លុយមិនតែងតែមានតម្លៃនោះទេ

តើអ្នកធ្លាប់គិតថា នឹងព្យាយាមរកប្រាក់ចំណូលឱ្យបានច្រើនដែរឬទេ? តើអ្នកគិតថា នៅពេលអ្នកអាចរកប្រាក់ចំណូលបានច្រើនអ្នកនឹងសប្បាយចិត្តដែរឬទេ?

លុយពិតជាសំខាន់ណាស់សម្រាប់មនុស្សគ្រប់គ្នា ពីព្រោះលុយក៏បានចូលរួមចំណែកក្នុងការដោះស្រាយបញ្ហានានានៅក្នុងជីវិតរបស់មនុស្សដែរ ប៉ុន្តែវាមិនមែនមានន័យថា លុយ គឺមានតម្លៃគ្រប់ពេលនោះទេ។ អ្វីដែលសំខាន់ជាងលុយទៀតនោះ គឺការទទួលបានសន្តិភាព និងសុភមង្គមនៅក្នុងជីវិត។ ហេតុនេះហើយ ចូរកុំព្យាយាមធ្វើបាបខ្លួនឯងដោយសារចង់បានលុយច្រើន ដោយផ្ដោតតែធ្វើការដើម្បីលុយច្រើននិងព្យាយាមផ្ដោតលើការធ្វើការ 40 ម៉ោងក្នុងមួយសប្ដាហ៍ ឬលើសនេះ ដោយគ្មានពេលវេលាសម្រាកលំហែរកាយសម្រាប់ខ្លួនឯង និងចំណាយពេលវេលាល្អៗជាមួយមនុស្សជាទីស្រលាញ់ ព្រមទាំងមិនបានចំណាយពេលធ្វើអ្វីដែលខ្លួនឯងត្រូវធ្វើសម្រាប់ជីវិត។ល។

3. បង់ប្រាក់លើខ្លួនឯងមុនដំបូងគេ

ការបង់ប្រាក់លើខ្លួនឯងមុនដំបូងគេ (Pay yourself first) សំដៅលើយុទ្ធសាស្រ្តហិរញ្ញវត្ថុផ្ទាល់ខ្លួននៃការសន្សំសំចៃ និងការវិនិយោគដែលកើនឡើង និងធ្វើឱ្យបានជាប់លាប់ ឬអាចនិយាយឱ្យសាមញ្ញថា ការបង់ប្រាក់សន្សំ និងបង្កើតគណនីវិនិយោគផ្ទាល់ខ្លួនជាមុនសិន តាមរយៈការបង់ប្រាក់សម្រាប់អនាគតខ្លួនឯងដើម្បីសន្សំសម្រាប់តម្រូវការ និងការចំណាយរយៈពេលវែងរបស់អ្នក។ ឧទាហរណ៍ ការទិញធានារ៉ាប់រង ការបង្កើតមូលនិធិសង្គ្រោះបន្ទាន់ ការសងបំណុល និងបង់ប្រាក់នៅក្នុងគណនីថែទាំសុខភាពជាដើម។

4. ការវិនិយោគលើខ្លួនឯង

ការវិនិយោគលើខ្លួនឯង គឺជារឿងសំខាន់ណាស់ ហើយវាក៏ជាសកម្មភាពមួយធ្វើឱ្យមនុស្សកាន់តែរីកចម្រើនឥតឈប់ឈរ។ ហេតុនេះ ចូរប្រើប្រាស់ពេលវេលា ប្រាក់ដែលអ្នកមាន និងបញ្ចូលនូវការខិតខំប្រឹងប្រែងលើអ្វីមួយដែលអ្នកចង់សម្រេចនោះឱ្យបានច្រើន។ លុយ ក៏ជាផ្នែកមួយសំខាន់ក្នុងការជួយអ្នកឱ្យសម្រេចគោលដៅ និងមានភាពរីកចម្រើននៅក្នុងជីវិតផងដែរ តាមរយៈការប្រើប្រាស់លុយលើការទិញសៀវភៅ ទិញវគ្គសិក្សាខ្លីៗ ការទិញសំបុត្រចូលរួមសិក្ខាសាលា ការចំណាយលុយជួបជុំជាមួយនឹងរៀមម្បង ឬអ្នកមានចំណេះដឹងខ្ពស់ជាងអ្នក និងចំណាយលើអ្វីផ្សេងទៀតដែលជួយអ្នកឱ្យកាន់តែយល់ដឹង និងស្ទាត់ជំនាញលើផ្នែកណាមួយដែលអ្នកចង់រីកចម្រើននោះ។

ពាណិជ្ជកម្ម

ក្រសួងអប់រំ បានដាក់បញ្ចូលមុខវិជ្ជាផ្នែកហិរញ្ញវត្ថុ ចាប់ពីថ្នាក់ទី1 ដល់ថ្នាក់ទី12

Sann Thaven

កាលពីថ្មីៗនេះ ក្រសួងអប់រំ យុវជន និងកីឡា បានសាកល្បងដាក់បញ្ចូលនូវមុខវិជ្ជាទាក់ទងនឹងហិរញ្ញវត្ថុ ក្នុងកម្មវិធីសិក្សាចាប់ពីកម្រិតថ្នាក់បឋម ដល់ថ្នាក់វិទ្យាល័យ សម្រាប់តែសាលាដែលមានក្នុងខេត្តចំនួន 3 ប៉ុណ្ណោះ គឺខេត្តកំពង់ចាម ខេត្តកំពត និងខេត្តសៀមរាប។ ចំពោះការបញ្ចូលនូវការបង្រៀនចំណេះដឹងផ្នែកហិរញ្ញវត្ថុក្នុងកម្មវិធីសិក្សានេះ ក្រសួងអប់រំ បានសហការជាមួយធនាគារជាតិនៃកម្ពុជា និងគ្រប់ភាគីពាក់ព័ន្ធ ដើម្បីលើកកម្ពស់អក្ខរកម្មហិរញ្ញវត្ថុ។ ហើយនេះ បើយោងតាមប្រសាសន៍របស់ឯកឧត្តម រស់ សុវាចា អ្នកនាំពាក្យក្រសួងអប់រំ យុវជន និងកីឡា។

ចំពោះគោលបំណងនៃការដាក់បញ្ចូលនូវចំណេះដឹងផ្នែកហិរញ្ញវត្ថុនេះ គឺដើម្បី

– ជួយសិស្សានុសិស្សទាំងអស់ឱ្យមានការអភិវឌ្ឍជាមូលដ្ឋាននៃវិជ្ជាសម្បទា បំណិនសម្បទា និងចរិយាសម្បទា អំពីការខ្ចីប្រាក់ និងការផ្តល់ប្រាក់កម្ចី ដើម្បីផ្លាស់ប្តូរអាកប្បកិរិយារបស់ពួកគេក្នុងការគ្រប់គ្រងប្រាក់ផ្ទាល់ខ្លួន។

– ជួយសិស្សានុសិស្សទាំងអស់ឱ្យចេះជ្រើសរើសយកការសម្រេចចិត្តដ៏ត្រឹមត្រូវលើការចាយវាយជាប្រចាំថ្ងៃ ការសន្សំ និងការគ្រប់គ្រងថវិកាផ្ទាល់ខ្លួនបានល្អ ដើម្បីចូលរួមលើកកម្ពស់គុណភាពជីវិត។

គួរបញ្ជាក់ផងដែរថា ចំណេះដឹងផ្នែកហិរញ្ញវត្ថុនេះ ពិតជាមានសារៈសំខាន់ណាស់សម្រាប់ជីវិតរស់នៅប្រចាំថ្ងៃរបស់មនុស្សម្នាក់ៗ ហើយការសម្រេចចិត្តនៃការដាក់បញ្ចូលចំណេះដឹងផ្នែកហិរញ្ញវត្ថុក្នុងកម្មវិធីសិក្សា ដោយបង្រៀនសាកល្បងដល់សិស្សានុសិស្សនេះ ពិតជាយុទ្ធសាស្រ្តបញ្រ្ជាបចំណេះដឹងផ្នែកហិរញ្ញវត្ថុដ៏ល្អ ដើម្បីធ្វើឱ្យពួកគេមានការយល់ដឹងអំពីហិរញ្ញវត្ថុតាំងពីក្មេងមក។ ប៉ុន្តែទោះបីជាយ៉ាងណាក៏ដោយ ការដាក់សាកល្បងដំបូងអាចមិនរលូនដូចនឹងផែនការគ្រោងទុក ប៉ុន្តែយើងជឿជាក់ថា ក្រសួងអប់រំនឹងមានវិធានការ ដើម្បីធ្វើឱ្យការអនុវត្តន៍នេះកាន់តែល្អប្រសើរនាពេលអនាគត។

ពាណិជ្ជកម្ម

ភាពខុសគ្នារវាង គុណតម្លៃ និង តម្លៃ

Sann Thaven

គុណតម្លៃ និងតម្លៃ ជាផ្នែកមួយដែលម្ចាស់អាជីវកម្មខ្នាតតូច មធ្យម ឬលក្ខណៈគ្រួសារមិនទាន់មានការយល់ច្បាស់នៅឡើយ ឬក៏មានការបែងចែកមិនដាច់រវាងពាក្យទាំងពីរនេះ ហើយជួនកាលប្រើប្រាស់ខុសក្បួនជាដើម។ បន្ថែមពីនេះ អ្នកក៏ត្រូវដឹងថា គុណតម្លៃ និងតម្លៃ ជារឿងដែលអ្នកត្រូវដឹង ដើម្បីអាចស្វែងរកប្រាក់ចំណេញដល់ក្រុមហ៊ុន។

គុណតម្លៃ

“គុណតម្លៃ” នៅក្នុងអាជីវកម្ម សំដៅលើការបង្កើតនូវអ្វីដែលធ្វើឱ្យអតិថិជនទទួលបាននូវភាពពេញចិត្តកាន់តែខ្លាំងដោយសមស្របតាមទស្សនៈនៃការយល់ឃើញរបស់អតិថិជន និងផ្ដល់នូវបទពិសោធន៍ល្អៗជាមួយក្រុមហ៊ុន។ បន្ថែមពីនេះ គុណតម្លៃ ជាទូទៅគឺជាការពិពណ៌នាថាជាអត្ថប្រយោជន៍អ្វីដែល អតិថិជននឹងទទួលបានពីផលិតផលឬសេវាកម្មនៅក្នុងអាជីវកម្មនីមួយៗ។ បើនិយាយឱ្យសាមញ្ញ គុណតម្លៃ គឺជាអ្វីដែលធ្វើឱ្យអតិថិជនបានយល់ថាផលិតផល ឬសេវាកម្មទាំងនោះមានតម្លៃខ្លាំងសម្រាប់ពួកគេ។

តម្លៃ

“តម្លៃ” នៅក្នុងអាជីវកម្មមានពីរផ្នែក ដែលភាគច្រើនវាក៏បានធ្វើឱ្យម្ចាស់អាជីវកម្មថ្មីថ្មោង ឬបុគ្គលផ្សេងទៀតមានការភ័ន្តច្រលំ គឺ Cost និង Price។ ចំពោះតម្លៃ (Cost) សំដៅលើតម្លៃដែលក្រុមហ៊ុនបានចំណាយលើការបង្កើតផលិតផល ឬសេវាកម្មសម្រាប់ដាក់លក់។ រីឯតម្លៃ (Price) សំដៅលើ ចំនួនទឹកប្រាក់ដែលអតិថិជនត្រូវបង់ប្រាក់ដើម្បីទទួលបានផលិតផល ឬសេវាកម្មពីក្រុមហ៊ុនរបស់អ្នក។

ពាណិជ្ជកម្ម

ហេតុអ្វីចាំបាច់បង្កើត “គុណតម្លៃ” សម្រាប់អតិថិជន?

Sann Thaven

ការធ្វើអាជីវកម្ម គឺជាទីចាប់អារម្មណ៍របស់យុវជនជំនាន់ក្រោយជាច្រើននាក់ ជាពិសេសបច្ចុប្បន្ននេះ ក៏កំពុងមានអាជីវកម្មជាច្រើនប្រភេទនៅលើទីផ្សារពិភពលោកផងដែរ។ ហេតុដូចនេះហើយ ទើបមានអាជីវកម្មមួយចំនួនកំពុងទទួលរងការប្រកួតប្រជែងគ្នាយ៉ាងខ្លាំង ប៉ុន្តែក៏មានអាជីវកម្មមួយចំនួនទៀតក៏កំពុងជោគជ័យនៅលើទីផ្សារ ដោយមិនមានគូប្រជែង ឬក៏មានតិចបំផុត។ ម្យ៉ាងវិញទៀត ចំពោះអាជីវកម្មដែលជោគជ័យ ក៏ដូចជាមិនសូវមានគូប្រជែងច្រើន ឬក៏គូប្រជែងមិនអាចយកឈ្នះបាន សុទ្ធតែបានបង្កើតគុណតម្លៃសម្រាប់ផ្ដល់ជូនអតិថិជន។

កត្តាទាំងនេះហើយ ទើបម្ចាស់អាជីវកម្មថ្មីថ្មោង និងម្ចាស់អាជីវកម្មខ្នាតតូច មធ្យម ត្រូវតែចាំបាច់មានការយល់ដឹង និងបង្កើតគុណតម្លៃសម្រាប់ផ្ដល់ជូននូវផលិតផល និងសេវាកម្មដ៏មានតម្លៃសម្រាប់អតិថិជន។

គួរបញ្ជាក់ផងដែរថា ការបង្កើតគុណតម្លៃសម្រាប់អតិថិជន សំដៅលើការផ្តល់នូវផលិតផល និងសេវាកម្មដែលមានប្រយោជន៍ខ្លាំងសម្រាប់អតិថិជន ដោយសមស្របជាមួយតម្រូវការទីផ្សារ ពេលវេលា និងចំណូលរបស់អតិថិជន។ និយាយឱ្យសាមញ្ញ គឺជាការផ្ដល់នូវផលិតផលឬសេវាកម្មដែលមានគុណតម្លៃ ដូចជាអាចដោះស្រាយលើភាពចង់បានរបស់អតិថិជន និងមានតម្លៃ ក៏ដូចជាផ្ដល់នូវអត្ថប្រយោជន៍ដែលអតិថិជនមានលទ្ធភាពចំណាយ ហើយក៏សក្តិសមក្នុងការចំណាយបំផុត។

បន្ថែមពីនេះ ចំណុចខាងក្រោម នឹងបង្ហាញពីសារៈសំខាន់មួយចំនួនទៀតនៃការបង្កើតគុណតម្លៃសម្រាប់អតិថិជន។

បង្កើនកេរ្តិ៍ឈ្មោះម៉ាកយីហោឱ្យកាន់តែល្អ
បង្កើនប្រាក់ចំណូល និងប្រាក់ចំណេញ
ធ្វើឱ្យអាជីវកម្មរបស់អ្នកមានភាពខុសប្លែកពីគូប្រកួតប្រជែង
ធ្វើឱ្យអាជីវកម្មមានភាពជោគជ័យក្នុងរយៈពេលវែង
បង្កើនភាពជឿជាក់ និងទំនុកចិត្តដល់អតិថិជនចំពោះការផ្តល់ជូនរបស់ក្រុមហ៊ុន
បង្កើនភាពពេញចិត្ត និងបទពិសោធន៍ល្អៗដល់អតិថិជន
បង្កើនចំនួនអតិថិជនដ៏ស្មោះត្រង់ចំពោះក្រុមហ៊ុន ដែលពួកគេមកទិញម្ដងហើយតែងតែមកទិញម្ដងទៀតដោយមិនងាយផ្លាស់ប្ដូរចិត្តទៅរកផលិតផលឬសេវាកម្មរបស់អាជីវកម្មផ្សេងទៀត។ បន្ថែមពីនេះ ពួកគេនឹងជួយណែនាំបន្តទៅកាន់អ្នកដទៃឱ្យមកប្រើប្រាស់ផលិតផលឬសេវាកម្មក្នុងក្រុមហ៊ុនរបស់អ្នកដែរ។

ពាណិជ្ជកម្ម

ប្រភេទការងារ ដែលបង្កើនភាពច្នៃប្រឌិតដល់អ្នក

Sann Thaven

ប្រភេទការងារ ដែលអាចបង្កើនភាពច្នៃប្រឌិតដល់មនុស្សគ្រប់គ្នា គឺមានច្រើន ប៉ុន្តែនៅក្នុងខ្លឹមសារខាងក្រោមនេះ នឹងបង្ហាញប្រភេទការងារមួយចំនួនដែលកំពុងមានភាពពេញនិយមទាំងនៅកម្ពុជា និងទីផ្សារការងារពិភពលោក។ ហើយប្រភេទការងារទាំងនោះ តែងតែទាមទារឱ្យមានការសិក្សាស្រាវជ្រាវឱ្យបានខ្លាំង និងត្រូវតែមានភាពប្លែក ហើយថ្មីជានិច្ច ដោយមិនអាចធ្វើដដែលៗបានឡើយ។ ការងារទាំងនោះ រួមមាន៖

1. អ្នករចនាក្រាហ្វិក (Graphic designer)

អ្នករចនាក្រាហ្វិក គឺជាអ្នកបង្កើតរូបភាពសម្រាប់គេហទំព័រ ប្រព័ន្ធផ្សព្វផ្សាយសង្គម (Facebook, Instagram, YouTube និងផ្សេងៗទៀត) ការផ្សាយពាណិជ្ជកម្ម ខិត្តប័ណ្ណ ទស្សនាវដ្តី ឡូហ្គោ សៀវភៅ របាយការណ៍ និងជាច្រើនទៀត។

ចំពោះអ្នកធ្វើការផ្នែករចនាក្រាហ្វិក ភាគច្រើនមានតម្រូវការទីផ្សារខ្ពស់ ពីព្រោះមានឧស្សាហកម្មជាច្រើនកំពុងត្រូវការ ដូច្នេះហើយអ្នករចនាក្រាហ្វិក ទាមទារឱ្យមានការសិក្សាជានិច្ចដើម្បីស្វែងរកគំនិតថ្មី និងច្នៃប្រឌិតសម្រាប់ម្ចាស់អាជីវកម្មនានា ក្នុងការផ្សព្វផ្សាយ ក៏ដូចជាលើកកម្ពស់ម៉ាកយីហោរបស់ពួកគេតាមរយៈការរចនាបែបថ្មី និងស្របតាមតម្រូវការ។

2. អ្នកចម្លង (Copywriter)

អ្នកចម្លង គឺជាអ្នកបង្កើតមាតិកាដ៏គួរឱ្យចាប់អារម្មណ៍ដោយសមស្របជាមួយនឹងអ្វីដែលក្រុមហ៊ុនត្រូវការ ហើយក៏ត្រូវជាមួយនឹងទំនោររបស់មនុស្សដែលជាអតិថិជន និងអាចបញ្ចុះបញ្ចូលអ្នកអានឱ្យធ្វើសកម្មភាពក្នុងការសម្រេចចិត្តទិញ ឬធ្វើតាមអ្វីដែលអ្នកសរសេរចង់បាន។

ចំពោះមុខតំណែងជាអ្នកចម្លងនេះ ទាមទារឱ្យមានការយកចិត្តទុកដាក់ខ្ពស់លើព័ត៌មានលម្អិត យល់ច្បាស់ពីគោលបំណងដែលក្រុមហ៊ុនចង់បាន មានសមត្ថភាពធ្វើឱ្យមានតុល្យភាពនៃគម្រោងជាច្រើនរបស់ក្រុមហ៊ុន និងត្រូវមានការគិតប្រកបដោយភាពច្នៃប្រឌិតជានិច្ច។

3. ស្ថាបត្យករ (Architects)

ស្ថាបត្យករ គឺជាអ្នកធ្វើផែនការ និងរចនាផ្ទះ រោងចក្រ អគារការិយាល័យ និងសំណង់ជាច្រើនទៀត។ ហើយពួកគេភាគច្រើនធ្វើការលើគម្រោងសំណង់សាធារណៈ ឬឯកជន ព្រមទាំងរចនាសម្រាប់ទាំងខាងក្នុង និងខាងក្រៅ។

ចំពោះអ្នកធ្វើការផ្នែកនេះ ពិតជាមានតម្រូវជានិច្ចនៅក្នុងទីផ្សារប្រទេសនីមួយៗ ហើយក៏ទាមទារឱ្យមានការច្នៃប្រឌិតខ្ពស់ផងដែរ ពីព្រោះអតិថិជនតែងតែចង់បានការរចនាមួយដែលល្អស្របតាមតម្រូវការរបស់ពួកគេម្នាក់ៗ។ បន្ថែមពីនេះ ពួកគេតែងតែត្រូវជួបជាមួយអតិថិជនដើម្បីឈ្វេងយល់បន្ថែមពីតម្រូវការអតិថិជនសម្រាប់ការរចនា និងរៀបចំគំរូនៃការរចនានោះ ក៏ដូចជារៀបចំការចំណាយ និងពេលវេលាសាងសង់។

4. អ្នករចនាម៉ូដ (Fashion designers)

អ្នករចនាម៉ូដ គឺជាអ្នកបង្កើតការរចនានូវស្នាដៃដើមរបស់ខ្លួនឯងលើសម្លៀកបំពាក់ថ្មី ស្បែកជើង ការបូប និងគ្រឿងសម្ភារៈជាច្រើនទៀតដែលមានលក្ខណៈទាន់សម័យទៅតាមតម្រូវការរបស់មនុស្ស។

ជាទូទៅ អ្នកធ្វើការផែ្នកនេះ ពួកគេតែងតែគូសវាសនូវគំនិតលើការរចនារបស់ពួកគេ ព្រមទាំងជ្រើសរើសសាច់ក្រណាត់ និងលំនាំដែលប្រើក្នុងការផលិតរបស់របរ ក៏ដូចជាបច្ចេកទេសផលិតកម្មដែលប្រើដើម្បីធ្វើឱ្យការរចនានោះមានភាពរស់រវើក បន្ទាប់មកធ្វើការកែច្នៃទៅជាបណ្តុំដែលនឹងទាក់ទាញអ្នកប្រើប្រាស់ និងអ្នកលក់រាយ។

5. សិល្បករតុបតែងមុខ (Makeup artists)

អ្នកធ្វើការផ្នែកតុបតែងមុខ ភាគច្រើនអនុវត្តន៍លើការតុបតែងមុខដល់អតិថិជនសម្រាប់ព្រឹត្តការណ៍នានា ដូចជាអាពាហ៍ពិពាហ៍ ពិធីជប់លៀង និងជាច្រើនទៀត។ ចំពោះអ្នកធ្វើការផ្នែកនេះ ទាមទារឱ្យមានសិល្បៈក្នុងការតុបតែងមុខឱ្យបានស្អាតស៊ីនឹងទម្រង់មុខរបស់អតិថិជន និងសមស្របទៅតាមភាពចង់បានរបស់អតិថិជន។

ពាណិជ្ជកម្ម

របៀបដែល Netflix បង្កើត Competitive Advantage បានជោគជ័យ

Sann Thaven

Competitive Advantage (គុណសម្បត្តិប្រកួតប្រជែង) សំដៅលើកត្តា ឬគុណលក្ខណៈដែលអនុញ្ញាតឱ្យក្រុមហ៊ុនផ្តល់នូវការផលិតសេវាកម្ម ឬផលិតផលដែលមានតម្លៃសមរម្យ និងមានគុណភាពខ្ពស់ជាងដៃគូប្រកួតប្រជែងរបស់ខ្លួន។ ជាពិសេស ជួយធ្វើឱ្យអាជីវកម្មដំណើរការបានយូរអង្វែង ហើយក៏ពិបាកឱ្យដៃគូប្រកួតប្រជែងផ្សេងទៀតចម្លងតាមបានក្នុងរយៈពេលខ្លី។

តើក្រុមហ៊ុន Netflix ធ្វើបែបណា ទើបអាចបង្កើត Competitive Advantage បានជោគជ័យ?

ចំពោះយុទ្ធសាស្រ្តបង្កើត Competitive Advantage សម្រាប់ក្រុមហ៊ុន គឺNetflix ផ្ដោតលើបទពិសោធន៍ប្រើប្រាស់ និងការរៀនសូត្រ ដើម្បីរក្សាសេដ្ឋកិច្ចមាត្រដ្ឋានថាមវន្ត (dynamic scale economy)។

បន្ថែមពីនេះ នៅក្នុងយុទ្ធសាស្រ្តនោះ ក្រុមហ៊ុន Netflix បានអនុវត្តន៍តាមវិធីដូចខាងក្រោម៖

1. ធ្វើឱ្យអតិថិជនកាន់តែចំណេញ

ចំពោះអតិថិជនដែលបានបង់ប្រាក់ជាមួយនឹង Netflix កាន់តែច្រើន ពួកគេក៏កាន់តែទទួលបានផលចំណេញកាន់តែច្រើនដូចគ្នា។ នៅក្នុងចំណុចនេះ ក្រុមហ៊ុន Netflix បានចំណាយច្រើនលើការបង្កើតមាតិកា ដោយផ្អែកលើតម្លៃថែរ មានន័យថា រាល់ខ្លឹមសារដែលក្រុមហ៊ុន Netflix ទទួលបានអាជ្ញាប័ណ្ណ ឬផលិតដោយខ្លួនឯង បានធ្វើឱ្យក្រុមហ៊ុនទទួលរងនូវការខាតបង់ប្រាក់ក្នុងភាពថេរជានិច្ច ដោយមិនគិតពីចំនួនមនុស្សមើលវាឡើយ។

ការធ្វើបែបនេះ Netflix កាន់តែមានកំណើនអតិថិជន ជាហេតុធ្វើឱ្យក្រុមហ៊ុនទទួលបានប្រាក់ចំណូលជាច្រើនជារៀងរាល់ឆ្នាំ តាមរយៈការធ្វើឱ្យអតិថិជនម្នាក់ៗទទួលបានមាតិកាថ្មីៗពីក្រុមហ៊ុន ដោយគ្រាន់តែចំណាយបន្ថែមតិចតួចបំផុត។

2. ការពង្រីកវិសាលភាពរបស់ខ្លួន

ក្រុមហ៊ុន Netflix ទម្រាំអាចបង្កើតលំហូរនៃប្រាក់ចំណូលដល់ក្រុមហ៊ុនឱ្យមានប្រសិទ្ធភាព ព្រមទាំងអាចមានទំហំធំជាងដៃគូប្រកួតប្រជែងជាច្រើនរបស់ខ្លួន គឺ Netflix បានធ្វើវាឡើងអស់រយៈពេល 20 ឆ្នាំមកហើយ ដោយទើបតែជោគជ័យលើការបើកដំណើរការសេវាកម្មរកប្រាក់ចំណូលក្នុងរយៈពេលប៉ុន្មានឆ្នាំចុងក្រោយនេះ។

បន្ថែមពីនេះ Netflix នៅតែបន្តក្នុងការបង្កើនភាពងាយស្រួលនៃសេវាកម្មរបស់ខ្លួនដោយបង្កើនភាពពេញចិត្ត និងចំណង់ចំណូលចិត្តលើការប្រើប្រាស់របស់អតិថិជនជាមួយ Netflix តាមរយៈការធ្វើឱ្យអតិថិជនកាន់តែមានភាពរីករាយ ងាយស្រួល និងអាចឈានដល់ការបង់ប្រាក់ (subscribers)។

Netflix ក៏បានអ៊ិនកូដឡើងវិញ (re-encoded) នូវកាតាឡុករបស់ខ្លួនទាំងមូលឱ្យកាន់តែមានរូបភាពល្អបំផុតដែលអាចធ្វើទៅបានដោយប្រើកម្រិតបញ្ជូនតិចតួចតាមរយៈកម្មវិធីបង្កើនប្រសិទ្ធភាពថាមវន្ត (Dynamic Optimizer) ។ ក្រុមហ៊ុន Netflix ក៏បានបញ្ចេញមុខងារដែលមនុស្សគ្រប់គ្នាអាចទាញយក នៅក្នុងប្រទេសចំនួន 130 សម្រាប់ការប្រើប្រាស់។

គួរបញ្ជាក់ផងដែរ ក្រុមហ៊ុន Netflix បានធ្វើឱ្យការទស្សនាល្អបំផុតនៅលើទូរទស្សន៍ដែលបានភ្ជាប់ជាមួយ Netflix ប៉ុន្តែបន្ទាប់មកក្រុមហ៊ុនបានធ្វើការសិក្សាស្រាវជ្រាវដើម្បីអភិវឌ្ឍន៍ខ្លួន ដូច្នេះហើយក្រុមហ៊ុនក៏ចាប់ផ្ដើមពង្រីកខ្លួនដោយអនុញ្ញាតឱ្យមនុស្សទស្សនាមាតិកានានារបស់ក្រុមហ៊ុន Netflix នៅក្នុងទូរស័ព្ទ។ ហើយតាមរយៈការពង្រីកវិសាលភាពរបស់ខ្លួន និងការធ្វើឱ្យល្អប្រសើរនេះ បានធ្វើឱ្យក្រុមហ៊ុន Netflix ទទួលបានភាពរីកចម្រើនជាបន្តបន្ទាប់ក្នុងទីផ្សារនៅប្រទេសនានា។

3. សមត្ថភាពគ្រប់គ្រងហានិភ័យ និងចេះចាប់យកឱកាស

ក្រុមហ៊ុន Netflix តែងតែមានសមត្ថភាពក្នុងការគ្រប់គ្រងហានិភ័យនានា និងចេះទាញយកឱកាសដែលកើតចេញពីភាពចម្រុះនៃបរិយាកាសពិភពលោក។ ជាក់ស្ដែងនៅពេលដែល Netflix ជ្រៀតចូលទីផ្សារនៅប្រទេសឥណ្ឌាដែលជាប្រទេសសម្បូរការប្រកួតប្រជែងខ្លាំងនោះ Netflix បានរៀបចំយុទ្ធសាស្រ្តដើម្បីបង្ហាញទៅកាន់អតិថិជននៅទីនោះឱ្យមើលឃើញពីតម្លៃដ៏ល្អបំផុត ដែលជាហេតុធ្វើឱ្យមានការចាប់អារម្មណ៍ជាខ្លាំង។ ហើយនេះជាភាពឆ្លាតវៃក្នុងការបត់បែនរចនាសម្ព័ន្ធរបស់ខ្លួននៅក្នុងលក្ខខ័ណ្ឌរបស់ប្រទេសឥណ្ឌា ដែលធ្វើឱ្យក្រុមហ៊ុននេះមានភាពរឹងមាំក្នុងការជ្រៀតចូលទីផ្សារអន្តរជាតិបានយ៉ាងល្អ។

4. វិនិយោគលើការបង្កើតបណ្ដាញខាងក្រៅឱ្យបានច្រើន

ក្រុមហ៊ុន Netflix បានវិនិយោគលើការបង្កើតបណ្ដាញទំនាក់ទំនងខាងក្រៅរបស់ខ្លួននៅទូទាំងទីផ្សារដែលមានសក្ដានុពលខ្ពស់សម្រាប់ការចូលប្រើប្រាស់ Netflix ឬអាចនិយាយបានថា ក្រុមហ៊ុននេះព្យាយាមបង្កើតបណ្ដាញជាមួយនឹងតំបន់ណាដែលសម្បូរអតិថិជនគោលដៅរបស់ខ្លួន។

ក្រុមហ៊ុន Netflix បានចុះហត្ថលេខាលើកិច្ចព្រមព្រៀងជាមួយក្រុមហ៊ុនក្រុមហ៊ុនទូរទស្សន៍បង់ប្រាក់សំខាន់ៗ ដូចជាក្រុមហ៊ុន Sky Italia, Canal +, KKDI នៅក្នុងប្រទេសជប៉ុន និង Izzie នៅម៉ិកស៊ិក កាលពីឆ្នាំ 2019។ ចំពោះការបង្កើតទំនាក់ទំនងនេះ Netflix មានគោលបំណងក្នុងការប្រើប្រាស់ទំនាក់ទំនងទាំងនេះដើម្បីចែកចាយមាតិកាដោយផ្ទាល់ទៅកាន់អ្នកស្រុកនៅតំបន់ទនោះ។ បន្ថែមពីនេះ នៅពេលដែល Vodafone បើកដំណើរការសេវាកម្មទូរទស្សន៍របស់ខ្លួននៅក្នុងប្រទេសអៀរឡង់ក្នុងឆ្នាំ 2016 ក្រុមហ៊ុន Netflix ក៏បានចំណាយប្រាក់ដើម្បីឱ្យ Vodafone ជំរុញការផ្សព្វផ្សាយនៅលើ Amazon Prime, Now TV និង Apple TV។ គួរបញ្ជាក់ផងដែរថា Vodaphone ដំណើរការនៅក្នុងប្រទេសចំនួន 26 និងមានបណ្តាញដៃគូជាង 50។

5. វិនិយោគខ្លាំងលើបច្ចេកវិទ្យា

ក្រុមហ៊ុន Netflix បានវិនិយោគលើបច្ចេកវិទ្យារបស់ខ្លួនរយៈពេលជាងមួយទស្សវត្សរ៍ តាមរយៈការធ្វើឱ្យអតិថិជនកាន់តែងាយស្រួលស្វែងរកមាតិកាណាដែលជាចំណង់ចំណូលចិត្តរបស់ខ្លួន មានន័យថា ប្រសិនបើអតិថិជនបានបង់ប្រាក់ជាមួយ Netflix ដូច្នេះនៅពេលអតិថិជនចូលចិត្តលើមាតិកាបែបណា នោះ Netflix នឹងមានប្រព័ន្ធណែនាំលើមាតិកាផ្សេងទៀតដែលស្រដៀង ឬជាប្រភេទដែលអតិថិជនចូលចិត្ត។ ហើយនេះ ជាអ្វីដែលធ្វើឱ្យអតិថិជនកាន់តែសប្បាយចិត្តជាមួយនឹង Netflix។

ពាណិជ្ជកម្ម

បើអតិថិជនខឹង តើគួរធ្វើបែបណាទើបរំសាយកំហឹងអតិថិជនបាន?

Sann Thaven

ការធ្វើអាជីវកម្មអ្វីក៏ដោយ តែងតែព្យាយាមបង្កើតនូវបទពិសោធន៍ល្អៗជាមួយអតិថិជន ដើម្បីធ្វើឱ្យពួកគេមានការពេញចិត្ត និងសប្បាយចិត្ត ព្រមទាំងអាចត្រឡប់មកទិញម្ដងទៀត។ ទោះបីជាយ៉ាងនេះក្ដី វាក៏នៅតែមានចន្លោះខ្វះខាតណាមួយដែលធ្វើឱ្យអតិថិជនមិនពេញចិត្ត ឬឈានដល់ការខឹងជាដើម។

ហេតុនេះ ក្នុងនាមជាម្ចាស់អាជីវកម្ម អ្នកលក់ និងអ្នកផ្ដល់សេវាកម្មអតិថិជន ប្រសិនបើជួបស្ថានភាពបែបនេះ ដូចជាអតិថិជនកំពុងមានការខឹងខ្លាំង តើត្រូវធ្វើបែបណាដើម្បីសម្រួលស្ថានភាព និងអាចរំសាយកំហឹងអតិថិជន ហើយធ្វើឱ្យពួកគេសប្បាយចិត្តឡើងវិញបាន?

ខ្លឹមសារខាងក្រោមនេះ នឹងបង្ហាញគន្លឹះមួយចំនួន ដើម្បីអ្នកអាចយកអនុវត្តន៍ក្នុងការរំសាយកំហឹងរបស់អតិថិជនឱ្យបានល្អបំផុត។

1. ធ្វើជាអ្នកស្ដាប់ដ៏ល្អ

នៅក្នុងចំណុចនេះ អ្នកត្រូវអនុញ្ញាតឱ្យអតិថិជននិយាយឱ្យបានច្រើននូវភាពមិនពេញចិត្តរបស់ពួកគេ ហើយអ្នកត្រូវធ្វើជាអ្នកស្ដាប់ដ៏ល្អ ដើម្បីឈ្វេងយល់ពីបញ្ហារបស់អតិថិជន។ បន្ថែមពីនេះ អ្នកក៏ត្រូវបង្ហាញពីភាពយល់ចិត្តដល់អតិថិជន ថាអ្នកពិតជាយល់ពីស្ថានភាពរបស់ពួកគេ ហើយហេតុអ្វីបានជាវាធ្វើឱ្យអតិថិជនមានការខឹងបែបណា?

ជារួមមក អ្នកត្រូវស្ដាប់ការនិយាយរបស់អតិថិជនដោយយកចិត្តទុកដាក់ ដើម្បីឈ្វេងយល់អំពីបញ្ហាដែលធ្វើឱ្យអតិថិជនមានការខឹងសម្បានោះ បន្ទាប់មកបង្ហាញពីការយល់ចិត្ត និងការយល់អំពីស្ថានភាពបែបនោះ តាមរយៈការដាក់ខ្លួនឯងឱ្យចូលក្នុងស្ថានភាពនោះ។

2. បង្ហាញការសុំទោស

ក្រោយពីអ្នកបានយល់អំពីស្ថានភាពរបស់អតិថិជនរួចហើយ អ្នកក៏ត្រូវបង្ហាញពីការសុំទោសទៅកាន់អតិថិជនលើបញ្ហាដែលបានធ្វើឱ្យកើតមានឡើងលើពួកគេ ហើយអ្នកក៏ត្រូវបង្ហាញថា អ្នកបានទទួលយករាល់កំហុសនោះ។ បន្ថែមពីនេះ អ្នកក៏ត្រូវធានាថា អតិថិជនចាប់ផ្ដើមការត្រជាក់ចិត្តឡើងវិញ ដោយគ្មានភាពខឹងសម្បាខ្លាំងទៀតឡើយ។

3. ការសួរបញ្ជាក់ឡើងវិញ

អ្នកត្រូវលើកនូវបញ្ហារបស់អតិថិជនលើចំណុចសំខាន់ៗឡើងវិញ និងសួរបញ្ជាក់ពីអតិថិជន ថានេះជាបញ្ហាដែលធ្វើឱ្យពួកគេមិនពេញចិត្ត។ បន្ទាប់មក អ្នកត្រូវបង្ហាញពីការស្ដាប់យ៉ាងសកម្ម និងយកចិត្តទុកដាក់ជាមួយពួកគេ ដើម្បីធ្វើយ៉ាងណាឱ្យអតិថិជនមានអារម្មណ៍កក់ក្ដៅ និងមានក្ដីសង្ឃឹមថា អ្នកនឹងផ្ដល់ដំណោះស្រាយដ៏ល្អសម្រាប់ពួកគេ។

4. ស្វែងរក និងផ្ដល់ដំណោះស្រាយ

អ្នកអាចសួរទៅកាន់អតិថិជនថា តើអ្វីដែលពួកគេចង់ឱ្យអ្នកជួយដោះស្រាយ? បន្ទាប់មកអ្នកត្រូវមានភាពបត់បែន ដោយស្វែងរក ឬក៏ផ្ដល់ជាដំណោះស្រាយទៅកាន់អតិថិជនយ៉ាងល្អ ព្រមទាំងធានាថាអតិថិជនកាន់តែមានអារម្មណ៍ល្អ និងពេញចិត្ត ហើយក៏មិនបានបាត់ទំនុកចិត្តពីក្រុមហ៊ុនរបស់អ្នក។ ជាចុងបញ្ចប់ការសន្ទនាក្រោយពីដោះស្រាយបញ្ហាជូនអតិថិជនរួចហើយ អ្នកត្រូវតែនិយាយពាក្យអរគុណអតិថិជន ជាមួយនឹងស្នាមញញឹម ដើម្បីបង្ហាញថាអ្នករីករាយនឹងដោះស្រាយបញ្ហាជូនពួកគេ និងស្វាគមន៍ពួកគេមកកាន់ក្រុមហ៊ុនរបស់អ្នកម្ដងទៀត។

ពាណិជ្ជកម្ម

តើដឹកនាំបែបណា ទើបក្រុមការងារកាន់តែស្រលាញ់ការងាររបស់ពួកគេ?

Sann Thaven

ការដឹកនាំមានច្រើនបែបទៅតាមចរិតលក្ខណៈរបស់អ្នកដឹកនាំ ហើយការដឹកនាំក៏ជាផ្នែកសំខាន់ណាស់ក្នុងការជួយក្រុមការងារដែលនៅក្រោមបង្គាប់ឱ្យកាន់តែមានផលិតភាពការងារ និងឆាប់សម្រេចបាននូវគោលដៅដែលក្រុមហ៊ុនចង់បាន។ បន្ថែមពីនេះ ការដឹកនាំដែលអាចធ្វើឱ្យក្រុមការងារកាន់តែស្រលាញ់ការងារដែលពួកគេកំពុងធ្វើ វាកាន់តែអស្ចារ្យ ពីព្រោះក្រុមហ៊ុននោះនឹងសម្បូរដោយធនធានមនុស្សខ្លាំង ការសហការបំពេញការងារកាន់តែល្អ និងជួយក្រុមហ៊ុនឱ្យរីកចម្រើនបានយូរអង្វែង។ ប៉ុន្តែសំណួរសួរថា តើត្រូវដឹកនាំបែបណា ទើបអាចឱ្យក្រុមការងារកាន់តែស្រលាញ់ការងាររបស់ពួកគេ? ដូច្នេះខ្លឹមសារខាងក្រោមនឹងពន្យល់បង្ហាញ។

1. ដឹកនាំដោយឆ្ពោះទៅកាន់ទស្សនវិស័យវែងឆ្ងាយ

ការដឹកនាំដ៏ល្អបំផុត គឺជាការដឹកនាំដោយមានគោលដៅជាក់លាក់មួយដើម្បីសម្រេចជោគជ័យរួមគ្នា មិនមែនព្យាយាមដាក់គោលដៅសម្រេចការងារសម្រាប់បុគ្គលម្នាក់ៗ ឬសម្រាប់គ្រប់ផ្នែក ដោយគ្មានទស្សនវិស័យរួមគ្នានោះឡើយ។ បន្ទាប់មក ត្រូវធានាថា ការដឹកនាំ ត្រូវតែមានទស្សនវិស័យវែងឆ្ងាយ និងពន្យល់បង្ហាញឱ្យក្រុមការងារទាំងអស់បានយល់ដឹងច្បាស់ពីគោលដៅមួយនោះ ដើម្បីធ្វើសកម្មភាពឆ្ពោះទៅកាន់ការសម្រេចជោគជ័យរួមគ្នា។

ធ្វើបែបនេះ ក្រុមការងារកាន់តែយល់ច្បាស់ថា ការងារដែលពួកគេកំពុងធ្វើវាពិតជាសំខាន់ និងបានចូលរួមចំណែកយ៉ាងសកម្មដើម្បីសម្រេចនូវទស្សនវិស័យនោះ។

2. ជួយក្រុមការងារឱ្យរីកចម្រើនទាំងអស់គ្នា

ក្នុងនាមជាអ្នកដឹកនាំ ត្រូវបង្ហាញនូវការយកចិត្តទុកដាក់ និងការខ្វាយខ្វល់ចំពោះភាពរីកចម្រើនក្រុមការងារម្នាក់ៗ។ បន្ថែមពីនេះ អ្នកដឹកនាំដ៏អស្ចារ្យ ត្រូវយល់ពីភាពខ្លាំង និងភាពខ្សោយរបស់ក្រុមការងារ ហើយដឹងពីរបៀបដើម្បីជួយពួកគេឱ្យឆ្ពោះទៅកាន់អ្វីដែលល្អបំផុតសម្រាប់ពួកគេ។ ធ្វើបែបនេះ ក្រុមការងារកាន់តែយល់ច្បាស់នឹងគោលដៅរបស់ខ្លួនឯង និងកាន់តែមើលឃើញពីតម្លៃនៃភាពជោគជ័យក្នុងការអាជីពការងារផ្ទាល់ខ្លួន ព្រមទាំងព្យាយាមធ្វើអ្វីដែលជាខ្លួនឯង និងកាន់តែស្រលាញ់ការងារដែលកំពុងធ្វើរាល់ថ្ងៃ តាមរយៈការសម្លឹងឃើញឱកាសរីកចម្រើនក្នុងរយៈពេលវែង។

3. ជំរុញក្រុមការងារឱ្យមានគោលដៅសម្រាប់ការងារ

ក្រុមការងារភាគច្រើន ពួកគេធ្វើការដោយមានគោលដៅធំបំផុត គឺចង់បានតំណែងខ្ពស់ ប្រាក់ខែខ្ពស់ និងបញ្ចប់ការងារឱ្យបានល្អស្របតាមថ្នាក់ដឹកនាំចង់បាន ហើយជួនកាលមានគោលដៅការងារបែបមិនច្បាស់លាស់។ ហេតុដូចនេះហើយ ក្នុងនាមជាអ្នកដឹកនាំ ត្រូវតែជួយជំរុញក្រុមការងារទាំងអស់ឱ្យធ្វើការដោយភ្ជាប់ជាមួយនឹងគោលដៅការងារសម្រាប់រយៈពេលវែង មិនមែនរយៈពេលខ្លីដោយគ្រាន់តែចង់ឡើងតំណែង ឬចង់បានតែប្រាក់ខែខ្ពស់គឺគ្រប់គ្រាន់នោះទេ។

នៅក្នុងចំណុចនេះ អ្នកត្រូវពន្យល់ណែនាំ ឬចង្អុលបង្ហាញផ្លូវដល់ក្រុមការងាររបស់អ្នកឱ្យយល់ច្បាស់ថា គោលដៅសម្រាប់ការងារមិនមែនគ្រាន់តែមានដូចរៀបរាប់ខាងលើនោះទេ ប៉ុន្តែវាមានលើសហ្នឹង ដួចជាធ្វើការដើម្បីអាចក្លាយជាអ្នកជំនាញនាពេលអនាគត អាចក្លាយជាអ្នកដឹកនាំ អាចក្លាយជាអ្នករកស៊ី និងជាច្រើនទៀត។ ហើយការដែលឡើងតំណែង និងឡើងប្រាក់ខែ វាគ្រាន់តែជាជណ្ដើរដើម្បីឡើងទៅផ្នែកបន្ទាប់នៃគោលដៅសំខាន់របស់អ្នក ពីព្រោះអ្នកនឹងមិនបន្តធ្វើការពេញមួយជីវិតនោះទេ ប៉ុន្តែអ្នកនឹងធ្វើការដើម្បីមានអ្វីមួយដែលនៅសល់សម្រាប់កូនចៅជំនាន់ក្រោយ ហើយអ្នកក៏បានចូលនិវត្តន៍ជាមួយនឹងជីវភាពដ៏ល្អ។ល។ ធ្វើបែបនេះ ក្រុមការងាររបស់អ្នកនឹងចាប់ផ្ដើមសម្លឹងមើលឃើញអនាគតកាន់តែវែងឆ្ងាយលើអាជីពការងារដែលពួកគេកំពុងធ្វើ ហើយពួកគេកាន់តែដាក់ចិត្តផ្ដោត និងពេញចិត្តនឹងអ្វីដែលពួកគេកំពុងធ្វើកាន់តែខ្លាំងមិនខាន។

ពាណិជ្ជកម្ម

តើ Content Writer, Copywriter និង Content Creator ខុសគ្នាដូចម្ដេច?

Sann Thaven

ប្រសិនបើអ្នកកំពុងចាប់អារម្មណ៍ចង់ធ្វើការផ្នែក Content Writer ឬ Copywriter ឬ Content Creator ប៉ុន្តែអ្នកមិនទាន់យល់ច្បាស់អំពីវា ឬក៏ម្យ៉ាងទៀតអ្នកកំពុងមានការបែងចែកមិនដាច់រវាងបីផ្នែកនេះ ជាអ្វី ដូច្នេះខ្លឹមសារអត្ថបទខាងក្រោមនឹងបង្ហាញការប្រៀបធៀបបែបខ្លីៗ ដើម្បីងាយស្រួលដល់អ្នកក្នុងការបែងចែកផ្នែកទាំងបីនេះឱ្យបានដាច់ និងកាន់តែយល់ច្បាស់លើផ្នែកទាំងបីនេះ។

1. Content Writer (អ្នកសរសេរមាតិកា)

អ្នកសរសេរមាតិកា ជាអ្នកបង្កើតខ្លឹមសារអត្ថបទដែលផ្តល់ព័ត៌មាន អប់រំ កម្សាន្ត ឬណែនាំដល់អ្នកអានសមស្របជាមួយនឹងគោលបំណងក្រុមហ៊ុនចង់បានសម្រាប់នៅក្នុងគេហទំព័រ និងប្រភេទប្រព័ន្ធផ្សព្វផ្សាយផ្សេងទៀតប្រកបដោយវិជ្ជាជីវៈ។ ហើយក្នុងនាមជាអ្នកសរសេរមាតិកា ក៏ត្រូវមានសមត្ថភាពក្នុងការសរសេរមាតិកាដែលអាចធ្វើឱ្យអ្នកអានមានចាប់អារម្មណ៍ចូលមើលគេហទំព័រ ឬអានអត្ថបទដែលបានសរសេរនោះ។

2. Copywriter (អ្នកចម្លង)

អ្នកចម្លង ស្ទើរតែមានតួនាទីនិងទំនួលខុសត្រូវដូចទៅនឹងអ្នកសរសេរមាតិកាដែរ ប៉ុន្តែខុសគ្នាត្រង់ថា អ្នកចម្លង មានគោលបំណងបង្កើនចំណាប់អារម្មណ៍មនុស្សឱ្យអាន និងសម្រេចចិត្តទិញលើអ្វីដែលបានសរសេរផ្សព្វផ្សាយនោះ ឬអាចនិយាយបែបសាមញ្ញថា ជាអ្នកសរសេរបញ្ចុះបញ្ចូលដើម្បីលក់។ បន្ថែមពីនេះ អ្នកចម្លង ត្រូវតែមានភាពស្មោះត្រង់ក្នុងការសរសេរផ្សព្វផ្សាយផលិតផល ឬសេវាកម្ម ដើម្បីចៀសវាងការសរសេរអួតលើសពីការពិតជាក់ស្ដែងដើម្បីតែចង់ទាក់ទាញចំណាប់អារម្មណ៍របស់អតិថិជនឱ្យសម្រេចចិត្តទិញជាដើម។

3. Content Creator (អ្នកបង្កើតមាតិកា)

អ្នកបង្កើតមាតិកា មានតួនាទីនិងទំនួលខុសត្រូវច្រើនជាងអ្នកសរសេរមាតិកា ពីព្រោះអ្នកសរសេរមាតិកា គ្រាន់តែផ្ដោតខ្លាំងលើការសរសេរ ប៉ុន្តែអ្នកបង្កើតមាតិកាផ្តោតខ្លាំងលើការបង្កើតវីដេអូ រចនារូបភាព និងជាច្រើនទៀត ព្រមទាំងក៏ជាអ្នកសរសេរមាតិកាផងដែរ។ បន្ថែមពីនេះ ប្រសិនបើអ្នកចង់ក្លាយជាអ្នកបង្កើតមាតិកា អ្នកត្រូវតែមានជំនាញក្នុងការផលិតប្រព័ន្ធផ្សព្វផ្សាយ ការទំនាក់ទំនង និងរបៀបចែកចាយមាតិកាដែលអ្នកបានបង្កើតនោះ។

ពាណិជ្ជកម្ម

របៀបឈ្វេងយល់ពីតម្រូវការរបស់អតិថិជន

Sann Thaven

ការយល់ដឹងអំពីតម្រូវការរបស់អតិថិជន សំដៅលើការដឹងពីអ្វីដែលអតិថិជនចង់បាន និងព្យាយាមរិះរកគ្រប់មធ្យោបាយដើម្បីធ្វើយ៉ាងណាដើម្បីបំពេញនូវតម្រូវការអតិថិជន តាមរយៈផ្តល់នូវផលិតផលកាន់តែប្រសើរឡើង បង្កើនយុទ្ធសាស្រ្តទីផ្សារឱ្យបានល្អ និងសេវាកម្មអតិថិជនដ៏អស្ចារ្យ។

ចំពោះប្រភេទនៃតម្រូវការរបស់អតិថិជន អ្នកអាចពិចារណាលើចំណុចដូចខាងក្រោម៖

តម្លៃ៖ អ្នកអាចពិចារណាលើការបង្កើតផលិតផលឬសេវាកម្មណាដែលសក្តិសមនឹងថវិកាផ្ទាល់ខ្លួនរបស់អតិថិជនគោលដៅរបស់អ្នកដែលពួកគេហ៊ាននឹងចំណាយ។
បទពិសោធន៍៖ អ្នកត្រូវសិក្សាអំពីបទពិសោធន៍ដ៏រីករាយបំផុតនៅពេលពួកគេប្រើប្រាស់ផលិតផល ឬសេវាកម្ម។
មុខងារ៖ អ្នកក៏ត្រូវសិក្សាអំពីផលិតផល ឬសេវាកម្មណាដែលអាចដោះស្រាយបញ្ហាជាក់លាក់មួយសម្រាប់អតិថិជនគោលដៅរបស់អ្នក។
អារម្មណ៍៖ អ្នកក៏ត្រូវសិក្សាអំពីអារម្មណ៍ជាក់លាក់ដែលអតិថិជនគោលដៅរបស់អ្នកអាចមានពេល ពួកគេប្រើប្រាស់ផលិតផលរបស់អ្នក។
ការបំពេញបន្ថែមដ៏ល្អ៖ អ្នកត្រូវសិក្សាពីផលិតផលដែលដំណើរការល្អប្រសើរជាងផលិតផលផ្សេងទៀតដែលអតិថិជនរបស់អ្នកកំពុងប្រើប្រាស់។
ផ្ទាល់ខ្លួន៖ អ្នកត្រូវតែសិក្សាពីបទពិសោធន៍ផ្ទាល់ខ្លួនរបស់អតិថិជនដែលមាននៅពេលធ្វើអន្តរកម្មជាមួយម៉ាកយីហោរបស់អ្នក ឬទាក់ទងសេវាកម្មអតិថិជនដែលអ្នកផ្ដល់ជូនពួកគេ។
សង្គម៖ អ្នកត្រូវតែសិក្សាអំពីតម្រូវការទីផ្សារបច្ចុប្បន្ន ថាតើទីផ្សារកំពុងមានតម្រូវការអ្វ? តើអ្នកនឹងត្រូវធ្វើបែបណាដើម្បីធ្វើឱ្យត្រូវនឹងស្ថានភាពទីផ្សារ?។ល។

បន្ថែមពីនេះ អ្នកក៏អាចសិក្សាឈ្វេងយល់ពីតម្រូវការរបស់អតិថិជន តាមរយៈវិធីខាងក្រោម៖

1. កំណត់ទីផ្សារគោលដៅរបស់អ្នក

នៅក្នុងចំណុចនេះ អ្នកត្រូវតែធ្វើការសិក្សាស្រាវជ្រាវឱ្យបានលម្អិតលើអតិថិជនគោលរបស់អ្នក ដើម្បីកាន់តែងាយស្រួលសម្រាប់អ្នកក្នុងការបង្កើតយុទ្ធសាស្ត្រដំណើរការសម្រាប់ក្រុមហ៊ុនដ៏ល្អបំផុត។ ជាឧទាហរណ៍ ប្រសិនបើទីផ្សារគោលដៅរបស់អ្នកត្រូវបានបង្កើតឡើងសម្រាប់មនុស្សវ័យជំទង់ ដូច្នេះអ្នកនឹងត្រូវដឹងថា ត្រូវធ្វើយុទ្ធសាស្រ្តទីផ្សារ និងបង្កើតផលិតផល ឬសេវាកម្មបែបណាសម្រាប់មនុស្សវ័យជំទង់។ បន្ថែមពីនេះ អ្នកត្រូវសិក្សាអំពីប្រជាសាស្រ្តសំខាន់ៗនៅក្នុងទីផ្សារគោលដៅរបស់អ្នកផងដែរ រួមមានកម្រិតនៃការអប់រំ កម្រិតនៃប្រាក់ចំណូល កន្លែងដែលអតិថិជនរបស់អ្នករស់នៅ ចំណង់ចំណូល អាយុ និងភេទជាដើម។ ធ្វើបែបនេះ អ្នកនឹងកាន់តែងាយស្រួលរៀបចំយុទ្ធសាស្រ្តទីផ្សារ និងការផ្សព្វផ្សាយឱ្យមានប្រសិទ្ធភាពខ្ពស់ជាមួយនឹងក្រុមអតិថិជនគោលដៅរបស់អ្នក។

2. ឈ្វេងយល់ពីមូលហេតុដែលអតិថិជននឹងទិញ

ក្រោយពីអ្នកបានកំណត់អត្តសណ្ណាណអតិថិជនគោលដៅរបស់អ្នកនៅក្នុងចំណុចទីមួយរួចហើយ។ ជំហានបន្ទាប់ អ្នកត្រូវសិក្សាឈ្វេងយល់ពីរបៀបដែលអតិថិជននឹងសម្រេចចិត្តទិញផលិតផល ឬសេវាកម្មណាមួយ តាមរយៈការបង្ហាញនូវមូលហេតុសំខាន់ៗដែលពួកគេនឹងទិញផលិតផល ឬសេវាកម្មនោះ។ ហេតុដូចនេះ អ្នកអាចឈ្វេងយល់ពីអ្វីដែលអតិថិជនគោលដៅរបស់អ្នកត្រូវការ ដោយពឹងផ្អែកលើហេតុផលជាក់លាក់ណាមួយឬច្រើន។ ដូច្នេះហើយអ្នកអាចកត់ចំណាំលើហេតុផលទាំងនោះ បន្ទាប់មកអ្នកអាចបង្កើតចំណង់ក្នុងការចង់ទិញកាន់តែខ្លាំងលើផលិតផល ឬសេវាកម្មដែលអ្នកនឹងបង្កើតសម្រាប់ពួកគេ។

គួរបញ្ជាក់ផងដែរថា ការដែលអាចរកឃើញនូវមូលហេតុសំខាន់ និងជាក់លាក់ដែលអតិថិជនសម្រេចចិត្តទិញអ្វីមួយនោះ វានឹងជួយអ្នកឱ្យងាយស្រួលបង្កើតនូវផលិតផលឬសេវាកម្មដើម្បីផ្ដល់ជូនអតិថិជនបានយ៉ាងត្រឹមត្រូវនិងសមស្របជាមួយនឹងតម្រូវការអតិថិជន។ ជាពិសេស អ្នកក៏កាន់តែងាយស្រួលធ្វើយុទ្ធសាស្រ្តទីផ្សារដោយចងភ្ជាប់រវាងតម្រូវការដ៏រំជើបរំជួលជាមួយអតិថិជន ដោយធ្វើឱ្យអតិថិជនកាន់តែមានអារម្មណ៍ថា អ្នកបានផ្ដល់នូវអ្វីដែលពួកគេចង់បាន ព្រមទាំងអ្នកក៏អាចជួយឱ្យអាជីវកម្មរបស់អ្នកអាចដំណើរការយូរអង្វែងផងដែរ តាមរយៈការធ្វើអាជីវកម្មសមស្របជាមួយនឹងតម្រូវការទីផ្សារ។

3. វិភាគគូប្រជែងរបស់អ្នក

ការវិភាគដៃគូប្រកួតប្រជែងរបស់អ្នក វាក៏ជាផ្នែកមួយសំខាន់ក្នុងការជួយអ្នកក្នុងការកំណត់តម្រូវការរបស់អតិថិជនផងដែរ តាមរយៈការសិក្សាវិភាគលើរបៀបដែលគូប្រជែងរបស់អ្នកផ្ដល់សេវាកម្ម ឬលក្ខណៈពិសេសផ្សេងៗលើផលិតផលសេវាកម្មរបស់ពួកគេទៅកាន់អតិថិជន។ បន្ទាប់មក អ្នកក៏ត្រូវគិតវិភាគដែរថា ប្រសិនបើគូប្រជែងរបស់អ្នកផ្ដល់អ្វីពិសេសដល់អតិថិជន ច្បាស់ណាស់អតិថិជននឹងចង់ទទួលបានវាពីក្រុមហ៊ុនរបស់អ្នកដែរ ដូច្នេះអ្នកត្រូវគិតពិចារណាលើអាជីវកម្មរបស់អ្នកវិញ ថាតើអ្នកនឹងធ្វើអ្វីបន្ថែមដើម្បីផ្ដល់ជូននូវគុណតម្លៃដ៏ល្អជាងគូប្រជែងរបស់អ្នក?

បន្ថែមពីនេះ អ្នកក៏ត្រូវសិក្សាវិភាគលើចំណុចខ្វះខាតរបស់គូប្រជែងរបស់អ្នក ដើម្បីកែលម្អខ្លួនឯង ក៏ដូចជាពង្រឹងខ្លួនឯងឱ្យកាន់តែល្អ ជាពិសេសបង្កើតអ្វីដែលថ្មីសម្រាប់បំពេញនូវចំណុចខ្វះខាតដែលគូប្រជែងរបស់អ្នកគ្មាន ប៉ុន្តែអ្នកមានក្នុងការផ្ដល់ជូនដល់អតិថិជន ហើយវាក៏ជាអ្វីដែលអតិថិជនរបស់អ្នកត្រូវការផងដែរ។

ពាណិជ្ជកម្ម

ហេតុអ្វីអ្នកទីផ្សារ ចាំបាច់ត្រូវសិក្សាពីអាកប្បកិរិយារបស់អ្នកប្រើប្រាស់?

Sann Thaven

ការសិក្សាអំពីអាកប្បកិរិយារបស់អ្នកប្រើប្រាស់ មានសារៈសំខាន់បំផុតសម្រាប់អ្នកទីផ្សារ ដោយសារតែពួកគេចាំបាច់ត្រូវតែដឹងឱ្យបានលម្អិតអំពីដំណើរការនៃការគិតរបស់អតិថិជនគោលដៅ ដើម្បីវាយលុកទីផ្សារឱ្យចំនឹងគោលដៅដែលក្រុមហ៊ុនបានគ្រោងទុកក្នុងផែនការ។

គួរបញ្ជាក់ផងដែរថា អាកប្បកិរិយារបស់អ្នកប្រើប្រាស់ សំដៅលើការសិក្សាអំពីដំណើរការរបស់អតិថិជនម្នាក់ៗ ឬជាក្រុម លើរបៀបដែលពួកគេសម្រេចចិត្តជ្រើសរើសទិញផលិតផលឬសេវាកម្មដើម្បីប្រើប្រាស់ និងការសម្រេចចិត្តឈប់ប្រើប្រាស់ផលិតផលឬសេវាកម្មនោះ ព្រមទាំងសិក្សាពីរបៀបឆ្លើយតបខាងផ្នែកអារម្មណ៍ ផ្លូវចិត្ត និងអាកប្បកិរិយារបស់អ្នកប្រើប្រាស់។ ចំពោះប្រភេទនៃអាកប្បកិរិយារបស់អ្នកប្រើប្រាស់មានចំនួនបួន រួមមានអាកប្បកិរិយាទិញជាទម្លាប់ អាកប្បកិរិយាស្វែងរកភាពខុសគ្នា អាកប្បកិរិយាកាត់បន្ថយការទិញ និងអាកប្បកិរិយាសិក្សាវិភាគច្រើនមុននឹងសម្រេចចិត្តថាទិញ។

បន្ថែមពីនេះ ការសិក្សាឈ្វេងយល់អំពីអាកប្បកិរិយារបស់អ្នកប្រើប្រាស់ វាពិតជាសំខាន់ណាស់សម្រាប់អ្នកទីផ្សារ និងក្រុមហ៊ុននានា ដូច្នេះហើយខាងក្រោមនេះ នឹងបង្ហាញនូវចំណុចសំខាន់មួយចំនួនអំពីការសិក្សាពីអាកប្បកិរិយារបស់អ្នកប្រើប្រាស់។

1. បង្កើនប្រសិទ្ធភាពលើយុទ្ធសាស្រ្តទីផ្សារ

ការយល់ដឹងអំពីអាកប្បកិរិយារបស់អ្នកប្រើប្រាស់ គឺជាធាតុសំខាន់នៃយុទ្ធសាស្រ្តទីផ្សារ ព្រោះមុននឹងអាចអនុវត្តន៍យុទ្ធសាស្ត្របាន វាចាំបាច់ត្រូវសិក្សាឈ្វេងយល់ឱ្យបានពេញលេញអំពីតម្រូវការ និងការរំពឹងទុករបស់អ្នកប្រើប្រាស់ដែលជាគោលដៅរបស់ក្រុមហ៊ុនរបស់អ្នក។ ដើម្បីអាចធ្វើបែបនេះបាន គឺវាទាមទារឱ្យអ្នកទីផ្សារត្រូវសិក្សាឱ្យបានច្បាស់ពីរបៀបដែលអ្នកប្រើប្រាស់នឹងមានប្រតិកម្ម របៀបដែលអតិថិជននឹងសម្រេចចិត្តទិញ ឬមិនទិញផលិតផលសេវាកម្មរបស់អ្នក និងរបៀបដែលអតិថិជនទទួលឥទ្ធិពលពីយុទ្ធសាស្រ្តទីផ្សារដែលអ្នកបានអនុវត្តន៍នោះ។

2. បង្កើនអតិថិជនដ៏ស្មោះត្រង់ដល់ក្រុមហ៊ុន

ក្រុមហ៊ុននីមួយៗ តែងតែត្រូវការអតិថិជនដ៏ស្មោះត្រង់សម្រាប់ក្រុមហ៊ុនរបស់ពួកគេឱ្យបានច្រើនតាមដែលអាចធ្វើបាន ពីព្រោះពួកគេនឹងជាអតិថិជនដែលមិនងាយផ្លាស់ប្ដូរចិត្តងាកទៅរកក្រុមហ៊ុនគូប្រកួតប្រជែង និងជាផ្នែកមួយដ៏សំខាន់ក្នុងការជួយជំរុញការផ្សព្វផ្សាយតាមរយៈការជួយណែនាំបន្ត។ ហេតុនេះ ទើបអ្នកទីផ្សារត្រូវសិក្សាឱ្យបានស៊ីជម្រៅពាក់ព័ន្ធនឹងអាកប្បកិរិយារបស់អ្នកប្រើប្រាស់ ដើម្បីអាចរកឃើញនូវវិធីឆ្ពោះទៅកាន់ការជំរុញឱ្យមានអតិថិជនដ៏ស្មោះត្រង់បានច្រើនជូនដល់ក្រុមហ៊ុន ព្រមទាំងអាចបង្កើនការលក់ និងធ្វើឱ្យម៉ាកយីហោក្រុមហ៊ុនកាន់តែរឹងមាំ។

ពាណិជ្ជកម្ម

ជំនាញលក់សំខាន់បំផុត ដែលអ្នកលក់ទាំងអស់ត្រូវតែមាន!

Sann Thaven

ជំនាញលក់ ជាផ្នែកមួយសំខាន់ណាស់សម្រាប់អ្នកចូលចិត្តការលក់ ជាពិសេសម្ចាស់អាជីវកម្ម ពីព្រោះបើម្ចាស់អាជីវកម្មគ្មានជំនាញលក់ទេ នោះនឹងពិបាកក្នុងការដឹកនាំក្រុមលក់ឱ្យទទួលបានលទ្ធផលល្អដើម្បីបង្កើនការលក់ និងបង្កើនប្រាក់ចំណូលសម្រាប់ក្រុមហ៊ុនផងដែរ។ ទោះបីជាយ៉ាងណា ជំនាញលក់ វាមានធាតុចូលជាច្រើន ដើម្បីអាចក្លាយជាអ្នកលក់ដ៏ខ្លាំងបាន ប៉ុន្តែខ្លឹមសារអត្ថបទនេះនឹងបង្ហាញនូវជំនាញពាក់ព័ន្ធសំខាន់ៗមួយចំនួន ដើម្បីឱ្យអ្នកលក់គ្រប់រូបពង្រឹងសមត្ថភាពផ្នែកលក់ឱ្យកាន់តែខ្លាំង។

1. ចំណេះដឹងលើផលិតផលឬសេវាកម្មដែលកំពុងលក់

ការបណ្ដុះខ្លួនឯងឱ្យមានចំណេះដឹងលើផលិតផលឬសេវាកម្មដែលខ្លួនឯងកំពុងលក់បានច្បាស់ និងបានច្រើនបំផុតតាមដែលអាចធ្វើបាន វាជាមូលដ្ឋានគ្រឹះដ៏សំខាន់ក្នុងការលក់ឱ្យមានប្រសិទ្ធភាពខ្ពស់បំផុត។ ហេតុអ្វីបានជាដូច្នេះ? ជាធម្មតាទេ ប្រសិនបើអ្នកលក់មានចំណេះដឹង ឬយល់ដឹងច្រើនលើផលិតផលឬសេវាកម្មដែលខ្លួនឯងកំពុងលក់ គឺពួកគេនឹងងាយស្រួលក្នុងការណែនាំនិងផ្ដល់ព័ត៌មានបានច្បាស់ដល់អតិថិជន។

ហេតុដូចនេះហើយ ក្នុងនាមជាអ្នកលក់ ត្រូវតែធ្វើឱ្យខ្លួនឯងមានចំណេះដឹងលើផលិតផលឬសេវាកម្មដែលខ្លួនឯងកំពុងលក់នោះឱ្យបានស៊ីជម្រៅ ដើម្បីអាចងាយស្រួលផ្ដល់ព័ត៌មានដល់អតិថិជនបានគ្រប់ជ្រុងជ្រោយ ព្រមទាំងអាចដោះស្រាយរាល់ចម្ងល់របស់អតិថិជន។ល។

2. ជំនាញស្តាប់យ៉ាងសកម្ម

ការស្ដាប់យ៉ាងសកម្មនេះ វាពិតជាសំខាន់ណាស់សម្រាប់អ្នកលក់គ្រប់រូប ពីព្រោះវាជាផ្នែកមួយដើម្បីអាចឱ្យអ្នកឈ្វេងយល់ពីតម្រូវការរបស់អតិថិជនបានច្បាស់ និងធ្វើឱ្យអតិថិជនមានអារម្មណ៍ថាអ្នកបានយកចិត្តទុកដាក់ចំពោះពួកគេ។ បន្ថែមពីនេះ វាមិនមែនជាការគ្រាន់តែស្ដាប់អតិថិជននិយាយប៉ុណ្ណោះនោះទេ ប៉ុន្តែវាជាការស្ដាប់ដោយយកចិត្តទុកដាក់ ការស្ដាប់ដើម្បីឈ្វេងយល់ពីអ្វីដែលអតិថិជនកំពុងជួបបញ្ហាឬកំពុងចង់បានអ្វីមួយ និងចេះសួរនាំបន្ថែម ដើម្បីអាចបំពេញគ្រប់តម្រូវការដែលអតិថិជនចង់បាន។

ហេតុនេះហើយ ក្នុងនាមជាអ្នកលក់ ត្រូវតែសិក្សាឈ្វេងយល់ និងអនុវត្តន៍ឱ្យបានច្រើនលើជំនាញក្នុងការស្ដាប់ឱ្យបានសកម្ម ដោយកាត់បន្ថយការស្ដាប់ដែលគ្រាន់តែស្ដាប់អតិថិជននិយាយ ហើយក៏ចប់ដោយមិនដឹងច្បាស់ថាអតិថិជនចង់បានអ្វី ហើយមិនដឹងគួរពន្យល់ណែនាំ ឬដោះស្រាយបែបណាឱ្យកាន់តែល្អដែលសមស្របទៅនឹងតម្រូវការអតិថិជនជាដើម។

3. ជំនាញយល់ចិត្ត

ជំនាញមួយនេះ គឺជាផ្នែកមួយក៏កាន់តែសំខាន់សម្រាប់អ្នកលក់គ្រប់រូបផងដែរ ពីព្រោះវាជាផ្នែកមួយដែលអាចឱ្យអ្នកលក់កាន់តែចូលជិតអតិថិជន តាមរយៈការយល់ពីស្ថានភាព និងអារម្មណ៍របស់អតិថិជន។ បន្ថែមពីនេះ អ្នកលក់នឹងកាន់តែដឹងថា អ្វីជាចំណុចឈឺចាប់ ការភ័យខ្លាច និងក្ដីព្រួយបារម្ភរបស់អតិថិជន តាមរយៈពាក្យសម្ដីរបស់អតិថិជន និងសកម្មភាពដែលអតិថិជនបង្ហាញមក។ ដូច្នេះហើយជាលទ្ធផល អ្នកលក់អាចបង្កើតទំនាក់ទំនងផ្នែកផ្លូវចិត្ត និងបង្កើតទំនាក់ទំនងយូរអង្វែងជាមួយអតិថិជន។

4. ការកសាងទំនាក់ទំនង

ការកសាងទំនាក់ទំនង សំដៅលើការចងភ្ជាប់រវាងក្រុមហ៊ុនជាមួយនឹងអតិថិជន ដូច្នេះអ្នកលក់ទាំងអស់ត្រូវតែមានតិចនិកក្នុងការផ្ដល់ជូននូវគុណតម្លៃ ឬផលប្រយោជន៍ផ្សេងៗដល់អតិថិជន ជាជាងគ្រាន់តែនិយាយផ្ដល់នូវព័ត៌មានលម្អិតពីផលិតផលឬសេវាកម្មដល់អតិថិជន។ គួរបញ្ជាក់ផងដែរថា គោលដៅសំខាន់ក្នុងការកសាងទំនាក់ទំនងជាមួយអតិថិជននេះ គឺចង់បង្កើតទំនុកចិត្តជាមួយអតិថិជនបានកាន់តែខ្លាំង និងបម្លែងពួកគេឱ្យក្លាយជាអតិថិជនដ៏ស្មោះត្រង់ជាមួយនឹងក្រុមហ៊ុន។

5. ការទំនាក់ទំនងប្រកបដោយប្រសិទ្ធភាព

ការទំនាក់ទំនងឱ្យមានប្រសិទ្ធភាពនេះ អ្នកលក់ត្រូវតែចេះបង្វឹកខ្លួនឯងឱ្យស្ទាត់ជំនាញលើការទំនាក់ទំនងជាមួយនឹងអតិថិជនឱ្យបានល្អបំផុត ទាំងការជួបអតិថិជនផ្ទាល់ ឬការសន្ទនាក្នុងអនឡាញ។ បន្ថែមពីនេះ អ្នកនោះចេះប្រើប្រាស់កាយវិកាបែបវិជ្ជមានក្នុងការទំនាក់ទំនងជាមួយអតិថិជន ចេះប្រើប្រាស់សម្លែងក្នុងការនិយាយទៅមានភាពទាក់ទាញ ឬបង្ហាញពីការយល់ចិត្ត ចេះនិយាយបែប Storytelling និងចេះប្រើប្រាស់បញ្ញាផ្នែកអារម្មណ៍បានល្អ។

6. ជំនាញចរចា

ការលក់អ្វីក៏ដោយ តែងតែមានការតថ្លៃ ឬការចរចាពីអតិថិជន ដូច្នេះក្នុងនាមជាអ្នកលក់ក៏ត្រូវមានជំនាញចរចាឱ្យមានប្រសិទ្ធភាព និងបែបឈ្នះឈ្នះជាមួយអតិថិជនផងដែរ ដើម្បីអាចបង្ហាញថា ការសម្រេចចិត្តទិញលើអ្វីមួយនោះវាសក្តិសមបំផុតសម្រាប់គាត់ ហើយបញ្ចប់ការចរចាដោយមានការពេញចិត្តទាំងអស់គ្នា។ ហេតុដូចនេះ អ្នកលក់ត្រូវតែចាប់ផ្ដើមសិក្សារៀនសូត្របន្ថែមលើជំនាញនេះ។

ពាណិជ្ជកម្ម

មនុស្ស 28 នាក់ ទទួលបានជោគជ័យយ៉ាងខ្លាំងបន្ទាប់ពីអាយុ 40 ឆ្នាំ

Sann Thaven

ភាពជោគជ័យរបស់មនុស្សទូទាំងពិភពលោកមានចំនួនច្រើនណាស់ ដោយអ្នកខ្លះក៏ជោគជ័យនៅក្នុងអាយុតិច ហើយអ្នកខ្លះក៏ជោគជ័យនៅក្នុងអាយុច្រើន។ ជាក់ស្ដែងលោក Mark Zuckerberg និងលោក Bill Gates បានបង្កើតអាជីវកម្មដោយមានតម្លៃរាប់លានដុល្លាររបស់ពួកគេនៅក្នុងវ័យជំទង់ រីឯលោក Colonel Harland Sanders ស្ថាបនិកនៃក្រុមហ៊ុន KFC បានជោគជ័យក្នុងការដំណើរការអាជីវកម្ម និងមានភាពល្បីល្បាញនៅពេលគាត់មានអាយុ 65 ឆ្នាំ។

បើយោងតាមការសិក្សាស្រាវជ្រាវរបស់សាស្រ្តាចារ្យ MIT លោក Pierre Azoulay បានវិភាគមនុស្ស 2.7 លាននាក់ដែលបង្កើតក្រុមហ៊ុននៅចន្លោះឆ្នាំ 2007 និង 2014 ដោយគាត់បានរកឃើញថា ស្ថាបនិកដែលមានអាយុ 50 ឆ្នាំ ភាគច្រើនកំពុងទទួលបានភាពជោគជ័យខ្លាំងលើអ្វីដែលពួកគេកំពុងធ្វើ។ ហើយអាយុជាមធ្យមនៃស្ថាបនិកដែលបានបង្កើតអាជីវកម្មទទួលបានជោគជ័យ គឺអាយុប្រហែល 40 ឆ្នាំ។

គួរបញ្ជាក់ផងដែរថា ទោះបីជាពិភពលោកក៏សម្បូរមនុស្សទទួលបានជោគជ័យច្រើនប៉ុណ្ណាក៏ដោយ ប៉ុន្តែនៅក្នុងខ្លឹមសារអត្ថបទនេះ នឹងបង្ហាញពីមនុស្សល្បីៗចំនួន 28 ដែលមិនបានជោគជ័យទាល់តែសោះរហូតដល់អាយុ 30 ឆ្នាំ ប៉ុន្តែបន្ទាប់ពីឈានដល់អាយុ 40 ឆ្នាំ ពួកគេទទួលបានភាពជោគជ័យយ៉ាងខ្លាំង។ ហើយនេះដកស្រង់ចេញពី គេហទំព័រ Business Insider។

1. Stan Lee

Stan Lee គឺជាអ្នកបង្កើតរឿង “The Fantastic Four” នៅក្នុងឆ្នាំ 1961 ហើយវាក៏ជារឿងដ៏ល្បីមួយផងដែរ។ ក្នុងរយៈពេលប៉ុន្មានឆ្នាំបន្ទាប់ គាត់បានបង្កើត Marvel Universe ដែលជារឿងព្រេងនិទាន ដោយមានតួអង្គ ដូចជាSpider-Man និង X-Men ដែលជារូបតំណាងវប្បធម៌នៅសហរដ្ឋអាមេរិក។ គួរបញ្ជាក់ផងដែរថា លោក Lee បានទទួលមរណភាពកាលពីចុងឆ្នាំ2018 ក្នុងជន្មាយុ 95 ឆ្នាំ។

2. Toni Morrison

Toni Morrison គឺជាអ្នកនិពន្ធដែលបានឈ្នះពានរង្វាន់ណូបែល និងPulitzer លើការសរសេររឿងប្រលោមលោកដំបូងគេរបស់នាងក្នុងវ័យ 40 ឆ្នាំ ដោយមានចំណងជើងថា “The Bluest Eye”។ បន្ថែមពីនេះ ខណៈពេលដែល Morrison កំពុងធ្វើការជាអ្នកកែសម្រួលនៅ Random House នាងក៏បានឈ្នះរង្វាន់ Pulitzer នៅអាយុ 56 ឆ្នាំ និងរង្វាន់ណូបែលផ្នែកអក្សរសាស្ត្រនៅអាយុ 62 ឆ្នាំ។

គួរបញ្ជាក់ផងដែរថា Toni Morrison បានទទួលមរណភាពនៅឆ្នាំ 2019 នៅអាយុ 88 ឆ្នាំ។

3. Vera Wang

Vera Wang ជាអ្នកជំនាញផ្នែកជិះស្គី និងជាអ្នកសារព័ត៌មាន មុនពេលចូលប្រឡូកក្នុងឧស្សាហកម្មម៉ូដនៅអាយុ 40 ឆ្នាំ។ សព្វថ្ងៃនេះនាងគឺជាអ្នករចនាម៉ូដស្ត្រីលំដាប់កំពូលរបស់ពិភពលោក។

4. Laverne Cox

Laverne Cox គឺជាតារាសម្ដែងដែលត្រូវបានតែងតាំងជាតារាសម្ដែង Emmy និងជាសកម្មជនសិទ្ធិឆ្លងដែន។ នាងទទួលបានភាពល្បីល្បាញជាមួយនឹងតួនាទីរបស់នាងនៅក្នុងរឿង “Orange Is the New Black” របស់ Netflix ក្នុងឆ្នាំ 2013 នៅពេលនាងមានអាយុ 41 ឆ្នាំ។ ក្នុងឆ្នាំ 2014 នាងបានចូលប្រឡូកក្នុងក្របទស្សនាវដ្តី TIME នៅអាយុ 42 ឆ្នាំ។ នៅអាយុ 45 ឆ្នាំ នាងត្រូវបានតែងតាំងជា Emmy ដំបូងរបស់នាង។

5. Donald Fisher

Donald Fisher គឺជាម្ចាស់ហាងសម្លៀកបំពាក់ GAP ដ៏ល្បីល្បាញមួយរបស់ពិភពលោក។ ទោះបីជាយ៉ាងណា ការចាប់ផ្ដើមដំបូងរបស់គាត់លើហាងសម្លៀកបំពាក់ GAP ដំបូងនៅ San Francisco ក្នុងឆ្នាំ 1969 ដោយគាត់មានអាយុ 40 ឆ្នាំ ជាមួយនឹងភរិយារបស់គាត់ ដោយការចាប់ផ្ដើមនោះគឺគាត់គ្មានបទពិសោធន៍ទាល់តែសោះលើការលក់រាយ ប៉ុន្តែគាត់អាចធ្វើឱ្យហាងសម្លៀកបំពាក់នោះក្លាយជាភាពពេញនិយមបានយ៉ាងឆាប់រហ័ស និងឈានដល់ភាពល្បីល្បាញទូទាំងពិភពលោក។

គួរបញ្ជាក់ផងដែរថា Donald Fisher បានទទួលមរណភាពនៅឆ្នាំ 2009 នៅអាយុ 81 ឆ្នាំ។

6. Samuel L. Jackson

Samuel L. Jackson គឺជាតារាហូលីវូដជាច្រើនឆ្នាំមកហើយ ប៉ុន្តែគាត់មិនសូវមានភាពល្បីល្បាញប៉ុណ្ណាឡើយ។ ក្រោយមក នៅក្នុងអាយុ 43 ឆ្នាំ គាត់ទទួលបានពានរង្វាន់ក្នុងរឿង “Jungle Fever” របស់ Spike Lee ក្នុងឆ្នាំ 1991 ហើយគាត់ក៏ចាប់ផ្ដើមមានភាពល្បីល្បាញខ្លាំង។

7. Kris Jenner

Kris Jenner មានអាយុ 52 ឆ្នាំនៅពេលដែលនាងបានជួបជាមួយផលិតករហូលីវូដ Ryan Seacrest ក្នុងឆ្នាំ 2007 ដើម្បីបញ្ចេញគំនិតលើកម្មវិធីទូរទស្សន៍ការពិតលើរឿងគ្រួសាររបស់នាង។ ហើយការពិតនៃការបង្ហាញរបស់គាត់ពីការរក្សាទំនាក់ទំនងជាមួយកូនស្រីគឺ Kim Kardashians ហើយវាបានក្លាយជារឿងដ៏ពេញនិយម។ Kris Jenner ក៏បានបន្តគ្រប់គ្រងការបណ្តាក់ទុនផ្សេងៗរបស់កូនៗក្នុងវិស័យម៉ូដ សម្រស់ និងប្រព័ន្ធផ្សព្វផ្សាយ។

8. Gary Heavin

Gary Heavin បានបើកមជ្ឈមណ្ឌលកាយសម្បទា Curves ដំបូងបង្អស់ក្នុងឆ្នាំ 1992 នៅពេលគាត់មានអាយុ 40 ឆ្នាំ ព្រមទាំងបានធ្វើឱ្យម៉ាយីហោនោះមានភាពរីកលូតលាស់យ៉ាងលឿនបំផុតនៅក្នុងទសវត្សរ៍ទី90។

9. Robin Chase

Robin Chase បានបង្កើតក្រុមហ៊ុន Zipcar នៅអាយុ 42 ឆ្នាំក្នុងឆ្នាំ 2000។ នាងបានចាកចេញពីក្រុមហ៊ុនក្នុងឆ្នាំ 2011 ហើយបន្តបង្កើត និងផ្តល់ប្រឹក្សាដល់ការចាប់ផ្តើមអាជីវកម្ម ក៏ដូចជាបម្រើជាសមាជិកនៃវេទិកាសេដ្ឋកិច្ចពិភពលោក។

10. Sam Walton

Sam Walton មានអាជីពគ្រប់គ្រងការលក់រាយដ៏ជោគជ័យក្នុងវ័យ 20 និង 30 ឆ្នាំរបស់គាត់ ប៉ុន្តែផ្លូវរបស់គាត់ទៅកាន់ភាពជោគជ័យផ្នែកតារាសាស្ត្របានចាប់ផ្តើមនៅអាយុ 44 ឆ្នាំ នៅពេលដែលគាត់បានបង្កើត Wal-Mart ដំបូងនៅ Rogers រដ្ឋ Arkansas ក្នុងឆ្នាំ 1962។

គួរបញ្ជាក់ផងដែរថា Sam Walton បានទទួលមរណភាពនៅឆ្នាំ 1992 នៅអាយុ 74 ឆ្នាំ។

11. Henry Ford

Henry Ford មានអាយុ 45 ឆ្នាំនៅពេលដែលគាត់បានបង្កើតរថយន្តម៉ូដែល T នៅឆ្នាំ 1908។ ចំពោះរថយន្តម៉ូដែល T នេះផងដែរ វាបានធ្វើឱ្យមានការផ្លាស់ប្ដូរជីវិតប្រចាំថ្ងៃ និងផ្លាស់ប្ដូរទេសភាពទីក្រុងនៅសហរដ្ឋអាមេរិក និងបដិវត្តន៍អាជីវកម្ម។

12. Jack Weil

Jack Weil បានបង្កើតម៉ាកសម្លៀកបំពាក់គង្វាលគោដ៏ពេញនិយមបំផុតមួយ ដែលមានឈ្មោះថា Rockmount Ranch Wear នៅពេលគាត់មានអាយុ 45។ គួរបញ្ជាក់ផងដែរថា គាត់ធ្វើជានាយកប្រតិបត្តិនៅក្នុងក្រុមហ៊ុននេះរហូតគាត់បានទទួលមរណៈភាពនៅអាយុ 107 ឆ្នាំ ក្នុងឆ្នាំ 2008។

13. Rodney Dangerfield

Rodney Dangerfield ត្រូវបានគេចងចាំថាជាតារាកំប្លែងជើងចាស់ ប៉ុន្តែមុននឹងក្លាយជាតារាកំប្លែងដ៏ល្បីល្បាញមានមនុស្សទទួលស្គាល់ច្រើនបែបនេះ គឺនៅពេលគាត់បានបង្ហាញខ្លួនក្នុងកម្មវិធី “The Ed Sullivan Show” នៅអាយុ 46 ឆ្នាំ។

14. Momofuku Ando

Momofuku Ando គឺជាអ្នកជំនួញជនជាតិតៃវ៉ាន់-ជប៉ុន ដែលជាស្ថាបនិកនៃក្រុមហ៊ុន Nissin Food Products, Ltd ដែលជាក្រុមហ៊ុនអាហារជប៉ុនដ៏ល្បីល្បាញមួយ។ ទោះបីជាយ៉ាងនេះក្ដី ការចាប់ផ្ដើមដំបូងរបស់គាត់ គឺការបង្កើត ramen នៅអាយុ 48 ឆ្នាំ ក្នុងឆ្នាំ 1958 ដោយមិនសូវមានការគាំទ្រឡើយ ជាពិសេសត្រូវបានគេចាត់ទុកថាកន្លែងគាត់ជាកន្លែងផលិតអាហារដែលគ្មានប្រយោជន៍ ប៉ុន្តែក្រោយពីគាត់នៅតែអាចបម្លែងវាឱ្យក្លាយជាកន្លែងល្បីល្បាញវិញនៅក្នុងប្រទេសជប៉ុន។

គួរបញ្ជាក់ផងដែរថា Momofuku Ando បានទទួលមរណភាពនៅខែមករា ឆ្នាំ 2007។

15. Julia Child

Julia Child ធ្លាប់បានធ្វើការលើការផ្សាយពាណិជ្ជកម្ម និងប្រព័ន្ធផ្សព្វផ្សាយ មុនពេលចាប់ផ្ដើមសរសេរសៀវភៅធ្វើម្ហូបដំបូងរបស់នាងនៅពេលនាងមានអាយុ 50 ឆ្នាំ ដោយចាប់ផ្តើមអាជីពរបស់នាងជាមេចុងភៅដ៏ល្បីល្បាញនៅក្នុងឆ្នាំ 1961។

16. Jack Cover

Jack Cover ធ្លាប់បានធ្វើការជាអ្នកវិទ្យាសាស្ត្រសម្រាប់ស្ថាប័ននានារួមទាំង NASA និង IBM មុនពេលគាត់ក្លាយជាសហគ្រិនជោគជ័យម្នាក់នៅអាយុ 50 ឆ្នាំ លើការបង្កើតកាំភ្លើង Taser stun នៅក្នុងឆ្នាំ 1970។

17. Betty White

Betty White គឺជាតារាកំប្លែងដែលបានឈ្នះពានរង្វាន់ច្រើនបំផុតក្នុងប្រវត្តិសាស្ត្រ ប៉ុន្តែនាងមិនបានក្លាយជាបុគ្គលដែលមានភាពល្បីល្បាញនៅឡើយនោះទេ រហូតដល់នាងបានចូលរួមសម្តែងក្នុងរឿង “The Mary Tyler Moore Show” ក្នុងឆ្នាំ 1973 នៅអាយុ 51 ឆ្នាំ ទើបកេរ្តិ៍ឈ្មោះរបស់អ្នកកាន់តែល្អ និងជោគជ័យខ្លាំងជាងមុន។

គួរបញ្ជាក់ផងដែរថា Betty White បានទទួលមរណៈភាពនៅអាយុ 99ឆ្នាំ ក្នុងឆ្នាំ 2021 ។

18. Steve Carell

Steve Carell គឺជាតារាសម្តែងជនជាតិអាមេរិក តារាកំប្លែង ផលិតករ អ្នកនិពន្ធ និងជាអ្នកដឹកនាំរឿងហើយគាត់ក៏ត្រូវបានគេស្គាល់ច្រើនលើរឿងល្បីៗ ដូចជារឿង “The 40-year-old Virgin” និង “The Big Short”។ បន្ថែមពីនេះ នៅអាយុ42 ឆ្នាំ គាត់ចាប់ផ្ដើមកាន់តែមានភាពជោគជ័យ នៅពេលគាត់បានដើរតួជា Michael Scott ក្នុងរឿង “The Office” ។

19. Tim និង Nina Zagat

Tim និង Nina Zagat ធ្លាប់ជាមេធាវី ប៉ុន្តែនៅពេលពួកគេមានអាយុ 51 ឆ្នាំ ពួកគេបានផ្សព្វផ្សាយលើការប្រមូលមតិយោបល់វាយតម្លៃលើភោជនីយដ្ឋានដំបូងរបស់ពួកគេ ដែលមានឈ្មោះថា Zagat ក្នុងឆ្នាំ 1979។ Zagat គឺជាកន្លែងដែលជួយណែនាំភោជនីដ្ឋានផ្សេងៗដោយឆ្លងកាត់ការវាយតម្លៃបានយ៉ាងល្អ ទាំងលើអាហារ ការតុបតែង សេវាកម្ម និងតម្លៃ ដើម្បីផ្ដល់ជម្រើសក្នុងការងាយស្រួលស្វែងរកភោជនីដ្ឋានដ៏ល្អ។ ចំពោះដំណើរការអាជីវកម្មនេះ បានធ្វើឱ្យពួកគាត់ទាំងពីរនាក់ ទទួលបានភាពជោគជ័យយ៉ាងខ្លាំង។

20. Taikichiro Mori

Taikichiro Mori គឺជាអ្នកសិក្សាម្នាក់ដែលបានក្លាយជាអ្នកវិនិយោគអចលនទ្រព្យនៅអាយុ 51 ឆ្នាំ ហើយគាត់ក៏បានបង្កើតក្រុមហ៊ុន Mori Building ទទួលបានជោគជ័យផងដែរ។ ការវិនិយោគដ៏អស្ចារ្យរបស់គាត់បានធ្វើឱ្យគាត់ក្លាយជាអ្នកមានបំផុតនៅលើពិភពលោកក្នុងឆ្នាំ 1992 ដោយមានទ្រព្យសម្បត្តិសុទ្ធសរុបចំនួន 13 ពាន់លានដុល្លារ។

21. Ray Kroc

Ray Kroc បានចំណាយវេលាជាច្រើនរបស់គាត់លើអាជីពជាអ្នកលក់ឧបករណ៍ milkshake មុនពេលគាត់បានទិញយកក្រុមហ៊ុន McDonald’s នៅអាយុ 52 ឆ្នាំក្នុងឆ្នាំ 1954។ គាត់បានពង្រីកវាទៅជាម៉ាកយីហោអាហាររហ័សធំបំផុតរបស់ពិភពលោក និងមានការគាំទ្រខ្លាំងផងដែរ។

22. Wally Blume

Wally Blume ធ្លាប់បើកដំណើរការអាជីវកម្មទឹកដោះគោ មុនពេលចាប់ផ្តើមក្រុមហ៊ុនការ៉េមផ្ទាល់ខ្លួនរបស់គាត់ឈ្មោះ Denali Flavors នៅអាយុ 57 ឆ្នាំក្នុងឆ្នាំ 1995។ ហើយការចាប់ផ្ដើមក្រុមហ៊ុនការ៉េមនេះ បានធ្វើឱ្យគាត់ទទួលបានភាពរីកចម្រើនយ៉ាងខ្លាំង ដោយមានប្រាក់ចំណូលចំនួន 80 លានដុល្លារកាលពីឆ្នាំ 2009។

23. Laura Ingalls Wilder

Laura Ingalls Wilder បានចំណាយពេលជាច្រើនឆ្នាំចុងក្រោយនៃពាក់កណ្ដាលជីវិតរបស់គាត់លើការសរសេររឿង ព្រមទាំងឱ្យកូនស្រីរបស់នាងដែលមានឈ្មោះថា Rose ធ្វើជាអ្នកកែសម្រួល។ នាងបានបោះពុម្ភផ្សាយជាលើកដំបូងលើសៀវភៅ “Little House” នៅអាយុ 65 ឆ្នាំក្នុងឆ្នាំ 1932។ ចំពោះសៀវភៅនោះ ទទួលបានភាពជោគជ័យជាខ្លាំង ហើយក៏បានក្លាយជាសៀវភៅអក្សរសាស្ត្រសម្រាប់កុមារ និងជាមូលដ្ឋានសម្រាប់កម្មវិធីទូរទស្សន៍ “Little House on the Prairie” ផងដែរ។

24. Harland Sanders

Harland Sanders ត្រូវបានគេស្គាល់ថាជា Colonel Sanders ដែលគាត់ជាស្ថាបនិកនៃក្រុមហ៊ុនមាន់បំពង KFC។ ភាពជោគជ័យរបស់គាត់លើការចាប់ផ្ដើមដំណើរការក្រុមហ៊ុន KFC គឺនៅពេលគាត់មានអាយុ 62 ឆ្នាំ ក្នុងឆ្នាំ 1952។ បន្ថែមពីនេះ គាត់បានលក់អាជីវកម្មជា Franchise ក្នុងតម្លៃ 2 លានដុល្លារក្នុងរយៈពេល 12 ឆ្នាំក្រោយមក។

25. Anna Mary Robertson Moses

Anna Mary Robertson Moses ត្រូវបានគេស្គាល់ថាជា Grandma Moses បានចាប់ផ្តើមអាជីពគំនូរដ៏អស្ចារ្យរបស់នាងនៅអាយុ 78 ឆ្នាំ។ នៅក្នុងឆ្នាំ 2006 គំនូរមួយរបស់នាងបានលក់ក្នុងតម្លៃ 1.2 លានដុល្លារ ហើយនេះជាភាពជោគជ័យមួយសម្រាប់នាង។

26. Harry Bernstein

Harry Bernstein បានចំណាយពេលយូរក្នុងការសរសេរដោយភាពមិនច្បាស់លាស់ ប៉ុន្តែទីបំផុតគាត់ក៏ទទួលបានភាពល្បីល្បាញនៅអាយុ 96 ឆ្នាំសម្រាប់សៀវភៅអនុស្សាវរីយ៍ឆ្នាំ 2007 របស់គាត់ គឺ “The Invisible Wall: A Love Story That Broke Barriers”។

27. Arianna Huffington

Arianna Huffington បានបង្កើតបណ្ដាញផ្សព្វផ្សាយព័ត៌មាន ដែលមានឈ្មោះថា The Huffington Post (HuffPost) នៅអាយុ 55ឆ្នាំ។ ការចាប់ផ្ដើមមួយនេះ បានធ្វើឱ្យនាងទទួលបានភាពជោគជ័យជាខ្លាំងលើប្រព័ន្ធផ្សព្វផ្សាយឌីជីថល តាមរយៈការធ្វើការជាអ្នកអត្ថាធិប្បាយនយោបាយផង និងជាអ្នកនិពន្ធសម្រាប់អាជីពដំបូងរបស់នាងផង។ ក្រោយមក HuffPost បានលក់ទៅឱ្យ AOL ក្នុងតម្លៃ 315 លានដុល្លារ។

ពាណិជ្ជកម្ម

ស្រ្តីដែលមានលុយច្រើនជាងគេប្រចាំប្រទេសហ្វីលីពីន តើគាត់ធ្វើអ្វីខ្លះ ទើបអាចវ៉ាដាច់មហាសេដ្ឋីផ្សេងៗ?

Sann Thaven

សេដ្ឋកិច្ចរបស់ប្រទេសហ្វីលីពីនបានកើនឡើង 8.3% នៅក្នុងត្រីមាសទីមួយនៃឆ្នាំ 2022 ដោយសារតែតម្រូវការនៅក្នុងស្រុកបានចាប់ផ្តើមល្អឡើងវិញពីជំងឺរាតត្បាតCovid-19។ បន្ថែមពីនេះ ប្រធានាធិបតីទើបជាប់ឆ្នោតថ្មីរបស់ប្រទេសហ្វីលីពីន លោក Bongbong Marcos Jr. ក៏បានសន្យាថានឹងរក្សាសន្ទុះនៃកំណើនសេដ្ឋកិច្ចនេះ។ ទោះជាយ៉ាងណាក៏ដោយ សម្ពាធអតិផរណានៃការកើនឡើងតម្លៃទំនិញ និងថាមពល ហើយការនាំចេញក៏ត្រូវបានកាត់បន្ថយទៅកាន់ប្រទេសចិនបានអូសទាញសន្ទស្សន៍ភាគហ៊ុនគោលធ្លាក់ចុះ 6% ចាប់ពី 11 ខែមុន នៅពេលដែលទ្រព្យសម្បត្តិត្រូវបានវាស់វែងចុងក្រោយ។ សូម្បីតែប្រាក់ប៉េសូក៏បានធ្លាក់ចុះ 12% ក្នុងរយៈពេលដូចគ្នានេះ។ ជាលទ្ធផល ទ្រព្យសម្បត្តិរួមនៃអ្នកមានបំSM Investments,ផុតទាំង 50 របស់ប្រទេសនេះបានធ្លាក់ចុះរហូតដល់ 72 ពាន់លានដុល្លារ។

ទោះបីជាយ៉ាងណា ក្នុងចំណោមមហាសេដ្ឋីទាំង 50 នាក់ ប្រចាំប្រទេសហ្វីលីពីន ក៏មានស្រី្តម្នាក់មានទ្រព្យសម្បត្តិសុទ្ធសរុបច្រើនជាងគេ គឺលោកស្រី Sy siblings។ បើយោងតាមទស្សនវដ្ដី Forbes បានឱ្យដឹងថា លោកស្រីមានទ្រព្យសម្បត្តិសុទ្ធសរុបចំនួន 12.6 ពាន់លានដុល្លារ ដោយគិតត្រឹមថ្ងៃទី10 ខែសីហា ឆ្នាំ2022។

តើលោកស្រី Sy siblings ធ្វើអ្វីខ្លះ ទើបអាចវ៉ាដាច់មហាសេដ្ឋីទាំង 49 រូបផ្សេងទៀតបាន?

លោកស្រី Sy siblings មានឈ្មោះក្រៅថា Teresita ព្រមទាំងមានបងប្អូនចំនួន 6 នាក់ ដូចជាលោកស្រីផ្ទាល់, Elizabeth, Henry Jr., Hans, Herbert និង Harley ហើយក៏បានទទួលមរតកពីឪពុកចុងរបស់ពួកគេ លោក Henry Sy Sr. ផងដែរ។ បន្ថែមពីនេះ លោកស្រី Sy siblings គឺជាសហប្រធានក្រុមប្រឹក្សាភិបាលនៃក្រុមហ៊ុន SM Investments ដែលជាក្រុមហ៊ុនធំជាងគេនៅអាស៊ីអាគ្នេយ៍ ដែលមានចំណាប់អារម្មណ៍នៅក្នុងហាងលក់ទំនិញ ផ្សារទំនើប ធនាគារ សណ្ឋាគារ អចលនទ្រព្យ និងការរុករករ៉ែ។ ចំពោះក្រុមហ៊ុននេះផងដែរ ត្រូវបានចាប់ផ្ដើមដំបូងដោយឪពុកចុងរបស់នាង។ បន្ទាប់មកក៏នាងជាមួយនឹងបងប្អូនទាំង 5 នាក់ទៀតរួមភាគហ៊ុនគ្នាដើម្បីកាន់កាប់ក្រុមហ៊ុន SM Investments និង SM Prime ក្រោយពីលោក Henry Sy Sr ផ្ទេរឱ្យពួកគេ។

គួរបញ្ជាក់ផងដែរថា ភាពរីកចម្រើនរបស់ក្រុមហ៊ុន គឺដោយសារតែការចូលហ៊ុនរួមគ្នា និងការសហការគ្នាដ៏ល្អរបស់បងប្អូនលោកស្រី Sy siblings ព្រមទាំងជ្រើសរើសអ្នកជំនាញពីខាងក្រៅដើម្បីជួយប្រតិបត្តិការប្រចាំថ្ងៃនៅក្នុងក្រុមហ៊ុន ហើយពួកគាត់ធ្វើជាក្រុមប្រឹក្សាភិបាល និងណែនាំយុទ្ធសាស្ត្ររួមសម្រាប់ SM។

ជារួមមក ហេតុផល ក៏ដូចជាសកម្មភាពទាំងនេះហើយ ទើបធ្វើឱ្យលោកស្រី Sy siblings មានទ្រព្យសម្បត្តិសុទ្ធសរុបច្រើនជាងគេក្នុងចំណោមមហាសេដ្ឋី 50 រូបទៀត ព្រមទាំងក្លាយជាស្រ្តីដែលមានជាងគេប្រចាំប្រទេសហ្វីលីពីន។

ពាណិជ្ជកម្ម

6 សំណួរដើម្បីបង្កើតយុទ្ធសាស្រ្តទីផ្សារលើកដំបូង

Sann Thaven

ការធ្វើទីផ្សារអាចមានភាពស្មុគស្មាញច្រើន ដោយមានយុទ្ធនាការស្ទើរតែរាប់មិនអស់នៅទូទាំងបណ្ដាញជាច្រើន ដើម្បីផ្ដល់ជាគំនិតក្នុងការបង្កើតយុទ្ធសាស្រ្តធំៗសម្រាប់ធ្វើអាជីវកម្ម។ ទោះបីជាយ៉ាងណា ក៏ការបង្កើតយុទ្ធសាស្រ្តទីផ្សារលើកដំបូងអាចមានភាពពិបាកសម្រាប់អ្នកទើបចាប់ផ្ដើមអាជីវកម្មដោយមិនបានយល់ច្បាស់អំពីការបង្កើតយុទ្ធសាស្រ្តទីផ្សារឱ្យមានប្រសិទ្ធភាព។ ហេតុនេះ ខ្លឹមសារខាងក្រោមនេះ នឹងបង្ហាញនូវចំនួន 6 ដើម្បីផ្ដល់ជាគំនិតសម្រាប់បង្កើតយុទ្ធសាស្រ្តទីផ្សារឱ្យបានល្អប្រសើរ។ នេះបើយោងតាមគេហទំព័រផ្លូវការរបស់ Entrepreneur។

1. តើនរណាជាអតិថិជនគោលដៅរបស់អ្នក?

អ្នកត្រូវតែស្គាល់ថានរណាជាអតិថិជនគោលដៅរបស់អ្នក តាមរយៈការកំណត់អត្តសញ្ញារបស់ពួកគេ មិនមែនកំណត់ថាមនុស្សគ្រប់គ្នាជាអតិថិជនរបស់អ្នកឡើយ។ បន្ថែមពីនេះ ដើម្បីកំណត់ថានរណាជាអតិថិជនគោលដៅដ៏ពិតប្រាកដដែលអ្នកផ្ដោតលើ ចូរសួរសំណួរខ្លួនឯងមួយចំនួនដូចខាងក្រោម៖

តើនរណាជាប្រភេទអតិថិជនដែលអ្នកចូលចិត្តធ្វើការជាមួយ?
តើនរណាជាប្រភេទអតិថិជនដែលអ្នកងាយស្រួលក្នុងការធ្វើការជាមួយ?
តើនរណាទំនងជាចង់បានផលិតផលសេវាកម្មរបស់អ្នក?
តើនរណាហ៊ានចំណាយលុយលើអ្វីដែលអ្នកកំពុងលក់?

ធ្វើបែបនេះអ្នកនឹងដឹងយ៉ាងច្បាស់ថាក្រុមមនុស្សបែបណាជាអតិថិជនគោលដៅរបស់អ្នក ហើយពួកគេមានជីវភាពបែបណា ជាអ្នកមាន ជាអ្នកមធ្យម ឬអ្នកមិនសូវមានលុយ និងយល់ដឹងពីទំនោរចូលចិត្តរបស់ពួកគេ ដូច្នេះហើយអ្នកនឹងងាយស្រួលក្នុងការបង្កើតយុទ្ធសាស្រ្តទីផ្សារឱ្យចំនឹងគោលដៅដែលអ្នកចង់បាន។

2. តើពួកគេត្រូវការអ្វីខ្លះពីអ្នក?

នៅក្នុងចំណុចនេះ ចង់ឱ្យអ្នកដឹងកាន់តែច្បាស់ថា តើក្រុមមនុស្សប្រភេទណាដែលអ្នកកំពុងផ្ដោតលើ និងផ្ដល់អ្វីខ្លះសម្រាប់ពួកគេ។ ហេតុដូចនេះ អ្នកក៏ត្រូវសិក្សាឱ្យបានស៊ីជម្រៅបន្ថែមទៀតអំពីទស្សនៈនៃការយល់ឃើញរបស់អតិថិជន តាមរយៈការសួរសំណួរដូចខាងក្រោម៖

តើពួកគេមានបញ្ហាប្រឈមអ្វីខ្លះនៅក្នុងជីវិតប្រចាំថ្ងៃ?
តើពួកគេត្រូវជម្នះបញ្ហាអ្វីខ្លះដើម្បីអាចពង្រីកអាជីវកម្មរបស់ពួកគេ ការធ្វើឱ្យចំណេញពេលវេលាជាងមុន និងអាចកាត់បន្ថយភាពតានតឹង?
តើអ្នកនឹងបង្កើតអ្វីដើម្បីជួយដោះស្រាយបញ្ហារបស់អតិថិជន?

គួរបញ្ជាក់ផងដែរថា អ្នកមិនអាចជ្រើសរើសការលក់ផលិតផល ឬសេវាកម្មតាមតែចិត្តចង់របស់ខ្លួនឯង ដោយមិនសិក្សាពីអ្វីដែលអតិថិជនចង់បានឡើយ ជាពិសេសអ្នកក៏ត្រូវជ្រើសរើសទីតាំងឱ្យបានត្រឹមត្រូវដើម្បីងាយស្រួលក្នុងការផ្ដល់ជូនដល់អតិថិជន និងអតិថិជនងាយស្រួលស្វែងរក។

3. តើពួកគេភាគច្រើនចំណាយពេលនៅឯណា?

ចំណុចនេះ សំដៅលើការសិក្សាលើទីកន្លែងដែលអតិថិជនភាគច្រើនចំណាយពេលច្រើនជាមួយ មិនថានៅក្នុងបណ្ដាញសង្គម និងទីតាំងផ្ទាល់នោះទេ គឺត្រូវសិក្សាឱ្យបានច្បាស់ ដើម្បីងាយស្រួលវាយលុកទីផ្សារឱ្យចំទីកន្លែងដែលអតិថិជនគោលដៅរបស់អ្នកកំពុងស្ថិតនៅ។

បន្ថែមពីនេះ អ្នកក៏អាចឆ្លើយនឹងសំណួរមួយចំនួនខាងក្រោមផងដែរ៖

តើវេទិកាអនឡាញអ្វីខ្លះដែលពួកគេពេញនិយមក្នុងការចូលរួម?
តើពួកគេចូលចិត្តចូលរួមព្រឹត្តិការណ៍អ្វីខ្លះ?
តើប្រព័ន្ធផ្សព្វផ្សាយអ្វីដែលពួកគេយកចិត្តទុកជាមួយខ្លាំងជាងគេ?
តើពួកគេភាគច្រើនចូលចិត្តទៅទីកន្លែងណា?

ក្រោយពីអ្នកបានសិក្សាអំពីទីតាំងរួចរាល់ហើយ ជំហានបន្ទាប់អ្នកត្រូវចាប់ផ្ដើមចំណាយពេលវេលាលើទីកន្លែងណាដែលអ្នកបានសិក្សាថាអតិថិជនរបស់អ្នកពេញនិយមនៅទីនោះ ដើម្បីបង្កើតទំនាក់ទំនង និងវិនិយោគលើទីផ្សារឱ្យបានខ្លាំង ដូចជាការបង្កើតមាតិកាដ៏ទាក់ទាញសម្រាប់អតិថិជន និងបង្ហាញពីរបៀបដែលអ្នកអាចដោះស្រាយបញ្ហារបស់អតិថិជន។

4. តើនៅពេលណាអ្នកអាចទាក់ទងជាមួយពួកគេ?

នៅចំណុចនេះ អ្នកត្រូវសិក្សាឱ្យបានស៊ីជម្រៅពាក់ព័ន្ធនឹងពេលវេលារបស់អតិថិជនគោលដៅរបស់អ្នក ថាតើពេលវេលាបែបណាដែលពួកគេទំនេរ? បន្ទាប់មកអ្នកអាចរៀបចំយុទ្ធនាការក្នុងការបង្កើតយុទ្ធសាស្រ្តផ្សព្វផ្សាយឱ្យត្រូវនឹងពេលវេលាដែលពួកគេនឹងចំណាយពេលជាអ្នក មិនមែនផ្សព្វផ្សាយពេលណាដែលអតិថិជនរបស់អ្នកជាប់រវល់ឡើយ។

5. ហេតុអ្វីពួកគេគួរជ្រើសរើសអ្នកជាងគូប្រជែងរបស់អ្នក?

ជាធម្មតាទេ ការធ្វើអាជីវកម្មអ្វីក៏ដោយ ក៏តែងតែមានដៃប្រកួតប្រជែង ហេតុដូចនេះមានតែការធ្វើឱ្យអាជីវកម្មរបស់ខ្លួនឯងកាន់តែមានគុណតម្លៃ និងអ្វីដែលពិសេសសម្រាប់ផ្ដល់ជូនអតិថិជន ព្រមទាំងផ្ដល់ជម្រើសដ៏ល្អជាងដៃគូប្រកួតប្រជែងរបស់អ្នកនោះទេ ទើបអាជីវកម្មរបស់អ្នកអាចឈរនៅលើទីផ្សារបានយូរអង្វែងបាន។

កត្តានេះហើយ អ្នកត្រូវតែព្យាយាមពង្រឹងអាជីវកម្មលើផ្នែកគុណតម្លៃ ជាជាងការប្រកួតគ្នាលើតម្លៃ និងស្វែងរកអ្វីដែលជាហេតុផលដ៏ល្អដោយអាចទាក់ទាញចិត្តអតិថិជនរបស់អ្នកជ្រើសរើសយកអ្នកជាជាងដៃគូប្រកួតប្រជែងរបស់អ្នក។

គួរបញ្ជាក់ផងដែរថា អតិថិជនជាទូទៅ ពួកគេមានទំនោរផ្តល់អាទិភាពដល់ភាពងាយស្រួល ទំនាក់ទំនង ភាពច្បាស់លាស់ សាមញ្ញ និងភាពខុសប្លែកពីគេ។ ហេតុនេះអ្នកអាចគិតពិចារណាលើផ្នែកទាំងនេះខ្លះ ដើម្បីធ្វើឱ្យអាជីវកម្មរបស់អ្នកកាន់តែមានភាពលេចធ្លោ និងអាចទាក់ទាញទំនុកចិត្តពីអតិថិជនបានច្រើន។

6. តើធ្វើបែបណាទើបអាចទាញអតិថិជនដើម្បីបង្កើតប្រាក់ចំណូល?

នៅពេលដែលអ្នកបានសិក្សាស៊ីជម្រៅ និងបានស្គាល់ច្បាស់ពីអតិថិជនគោលដៅរបស់អ្នកស្របតាមប្រាំចំណុចខាងលើហើយ ជំហានបន្ទាប់អ្នកត្រូវបម្លែងពួកគេឱ្យក្លាយជាឱកាសក្នុងការបង្កើតប្រាក់ចំណូលសម្រាប់ក្រុមហ៊ុន តាមរយៈ៖

ការបង្កើតឱកាសក្នុងការប្រាស្រ័យទាក់ទងជាមួយអតិថិជន
បង្កើតផែនទីនៃការលក់
ធ្វើយុទ្ធសាស្រ្តដើម្បីទាក់ទាញឱ្យអតិថិជនការចូលរួមពីអតិថិជន

ពាណិជ្ជកម្ម

តើកត្តាអ្វីដែលធ្វើឱ្យក្រុមហ៊ុន USAA អាចឈរជើងលើទីផ្សារ 100ឆ្នាំបាន?

Sann Thaven

ក្រុមហ៊ុន USAA គឺជាក្រុមហ៊ុនសេវាកម្មហិរញ្ញវត្ថុឈានមុខគេមួយរបស់សហរដ្ឋអាមេរិក ដែលផ្តល់ដំណោះស្រាយធានារ៉ាប់រង ធនាគារ ការវិនិយោគ និងអ្នកចូលនិវត្តន៍នៅក្នុងក្រុមហ៊ុនមានសមាជិកជាង 13 លាននាក់។ ជាក់ស្ដែងចំពោះខែមិថុនា ឆ្នាំ2022 នេះ ក្រុមហ៊ុន USAA បានប្រារព្ធខួប 100 ឆ្នាំ ដែលជាទីមោទនភាពសម្រាប់ក្រុមហ៊ុនផងដែរ។ នេះបើយោងតាមគេហទំព័ររបស់ Entrepreneur។

គួរបញ្ជាក់ផងដែរថា ការដែលអាចដំណើរការអាជីវកម្មឱ្យមានអាយុកាល 100ឆ្នាំ វាជារឿងមួយដ៏អស្ចារ្យ ព្រមទាំងជាក្ដីស្រមៃរបស់សហគ្រិននានា។ ហេតុនេះ តើកត្តាអ្វីដែលអាចធ្វើឱ្យក្រុមហ៊ុន USAA អាចឈរជើងដ៏រឹងមាំនៅលើទីផ្សារអស់រយៈពេល 100ឆ្នាំនេះ?

យោងតាមប្រសាសន៍របស់ប្រធាន និងនាយកប្រតិបត្តិនៃក្រុមហ៊ុន USAA លោក Wayne Peacock បានបង្ហាញនូវការអនុវត្តន៍គោលការណ៍ភាពជាអ្នកដឹកនាំរបស់ខ្លួនចំនួន 7 ចំណុចសំខាន់ៗ។

1. ភាពជាអ្នកដឹកនាំត្រូវតែមានគោលបំណង

លោក Peacock បាននិយាយថាភាពជាអ្នកដឹកនាំដែលមានគោលបំណង ជាទ្រព្យសម្បត្តិដ៏សំខាន់សម្រាប់ក្រុមហ៊ុន ព្រោះវាមានភាពងាយស្រួលដឹកនាំក្រុមការងារធ្វើការដើម្បីឆ្ពោះទៅកាន់គោលដៅដ៏ជាក់លាក់ និងឆាប់សម្រេចនូវគោលដៅនោះបានលឿន ជាពិសេសអាចឱ្យអ្នកជំនាន់ក្រោយដឹកនាំបន្តជំនួសបានស្របតាមគោលបំណងដែលបានកំណត់សម្រាប់ក្រុមហ៊ុន។

ទោះបីជាយ៉ាងនេះក្ដី អ្នកដឹកនាំត្រូវតែចាប់ផ្ដើមជាមួយនឹងផ្នត់គំនិតដែលធ្វើជាអ្នកដឹកនាំដែលមានគោលបំណង តាមរយៈការមានភាពស្មោះត្រង់ចំពោះខ្លួនឯងលើគោលដៅដែលបានកំណត់ ព្រមទាំងកំណត់នូវអ្វីដែលចង់ធ្វើ និងកំណត់ផលប៉ះពាល់លើអ្វីដែលចង់ធ្វើនោះ ដើម្បីត្រៀមខ្លួនក្នុងការរកដំណោះស្រាយ។ បន្ថែមពីនេះ ការដែលកំណត់គោលបំណងជាអាទិភាពនៃភាពជាអ្នកដឹកនាំសម្រាប់អ្នកដឹកនាំ វានឹងជួយអ្នកដឹកនាំក្នុងការចៀសវាងនូវការសម្រេចចិត្តការងារតូចតាច ឬការងារណាមិនសូវសំខាន់ និងអាចដឹកនាំក្រុមហ៊ុនឆ្ពោះទៅកាន់គោលដៅរយៈពេលវែង ហើយក្រុមហ៊ុនអាចឈរជើងនៅលើទីផ្សារបានយូរអង្វែង។

2. មានភាពបត់បែន

ក្រោយពីលោក Peacock បានបម្រើការងារឱ្យ USAA គឺគាត់ចាប់ផ្ដើមកាន់តែដឹងយ៉ាងច្បាស់ថា ទោះបីជាមានគោលដៅ និងផែនការច្បាស់លាស់យ៉ាងណា វាក៏នៅតែអាចមានបញ្ហាណាមួយមករំខានផងដែរ ដូច្នេះហើយមានតែភាពបត់បែននោះទេ ទើបអាចសម្របខ្លួនជាមួយស្ថានភាពនោះបាន តាមរយៈការរក្សាគោលដៅក្រុមហ៊ុននៅដដែល ប៉ុន្តែរៀបចំរចនាសម្ព័ន្ធយុទ្ធសាស្រ្តជាប្រចាំថ្ងៃស្របតាមស្ថានភាពជាក់ស្ដែង។

3. ដឹកនាំក្រុមឱ្យសម្រេចកិច្ចការងារ និងជោគជ័យទាំងអស់គ្នា

ការដែលដឹកនាំក្រុមក្នុងការជំរុញឱ្យសម្រេចកិច្ចការងារស្របតាមគោលដៅដែលបានកំណត់ ជារឿងសំខាន់ណាស់ ប៉ុន្តែអ្វីដែលសំខាន់ទៀតនោះ ការបណ្ដុះបណ្ដាលក្រុមការងារ និងការដឹកនាំសមាជិកក្រុមទាំងអស់ឱ្យមានតុល្យភាពរវាងការងារ និងជីវិតផ្ទាល់ខ្លួន ព្រមទាំងជោគជ័យទាំងអស់គ្នា ហើយនេះបើយោងតាមប្រសាសន៍របស់លោក Peacock។

ចូរចងចាំថា ការបំពេញការងារបានល្អសម្រាប់ក្រុមហ៊ុន វាជារឿងសំខាន់ ប៉ុន្តែអ្វីដែលកាន់តែសំខាន់ទៀតនោះការដែលដឹកនាំក្រុមការងារឱ្យមានផលិតភាពការងារ និងជោគជ័យក្នុងជីវិត តាមរយៈការមានតុល្យភាពរវាងជីវិតផ្ទាល់ខ្លួន និងការងារ ព្រមទាំងមានការបណ្ដុះបណ្ដាលបន្ថែម។

4. តែងតែបន្តការសិក្សារៀនសូត្រជានិច្ច

លោក Peacock បាននិយាយបន្ថែមទៀតថា លក្ខណៈដ៏ល្អបំផុតសម្រាប់អ្នកដឹកនាំ គឺតែងតែបន្តការសិក្សារៀនសូត្រជានិច្ច ព្រមទាំងចូលចិត្តក្នុងការស្វែងរកឱកាសដើម្បីរៀនអ្វីថ្មីៗ និងសិក្សាអំពីការដឹកនាំមនុស្ស ឬទំនោរ ក៏ដូចជាចំណង់ចំណូលចិត្តរបស់មនុស្សជាដើម។

ចូរចងចាំថា ដើម្បីអាចដំណើរការក្រុមហ៊ុនឱ្យឈរនៅក្នុងទីផ្សារបានយូរអង្វែង គឺមានការបន្តការសិក្សារៀនសូត្រជានិច្ចនោះទេ ដើម្បីអាចទទួលបានចំណេះដឹងថ្មីៗ និងអាចមើលឃើញឱកាសបានច្រើន ជាពិសេសអាចធ្វើឱ្យក្រុមហ៊ុនតាមទាន់សម័យកាល។

5. បង្កើតបរិយាកាសដ៏ល្អសម្រាប់ក្រុមរបស់អ្នកដើម្បីឈ្នះ

ជាទូទៅមនុស្សតែងតែទៅធ្វើការជារៀងរាល់ថ្ងៃ ដូច្នេះពួកគេអាចមានអារម្មណ៍ថាកន្លែងការងារដូចជាមិនគួរឱ្យចាប់អារម្មណ៍ចង់ទៅ និងគ្មានគុណតម្លៃអ្វីច្រើនសម្រាប់ពួកគេនោះឡើយ។ ហេតុដូចនេះ ទើបលោក Peacock បានចែករំលែកថា ដើម្បីធ្វើឱ្យក្រុមការងារទាំងអស់មានអារម្មណ៍ស្រស់ស្រាយ ព្រមទាំងចាត់ទុកកន្លែងការងារជាកន្លែងដ៏មានគុណតម្លៃសម្រាប់ពួកគេ ដូច្នេះក្នុងនាមជាអ្នកដឹកនាំគួរតែផ្ដល់អាទិភាពក្នុងការបង្កើតបរិយាកាសការងារមួយប្រកបដោយសុវត្ថិភាពសម្រាប់ពួកគេ។ បរិយាកាសការងារដែលមានសុវត្ថិភាព សំដៅលើការធ្វើឱ្យក្រុមការងារមានអារម្មណ៍ថាពួកគេមានសុវត្ថិភាពគ្រប់គ្រាន់ដើម្បីនាំយកនូវអ្វីដែលជាភាពល្អបំផុតសម្រាប់ពួកគេ តាមរយៈការចេះឱ្យតម្លៃខ្ពស់លើការងារដែលកំពុងធ្វើ ដឹងថាខ្លួនឯងជានរណា និងកំពុងធ្វើអ្វី នោះពួកគេនឹងចាត់ទុកកន្លែងការងារជាកន្លែងដ៏ល្អ ដើម្បីបំពេញការងារឆ្ពោះទៅតាមគោលដៅរបស់ក្រុមហ៊ុន និងគោលដៅដែលខ្លួនឯងចង់ឃើញសម្រាប់ជីវិតផ្ទាល់ខ្លួននាពេលអនាគត។

6. បង្កើតទំនាក់ទំនងដ៏ល្អរវាងបេសកកម្មក្រុមហ៊ុន ជាមួយក្រុមការងារ

នៅក្នុងចំណុចនេះ សំដៅលើការធ្វើឱ្យបេសកកម្មរបស់ក្រុមហ៊ុនមានទំនាក់ទំនងដ៏ល្អជាមួយនឹងក្រុមបុគ្គលិកទាំងអស់ តាមរយៈការធ្វើឱ្យបុគ្គលិកទាំងអស់មានការយល់ច្បាស់ពីគោលដៅរបស់ក្រុមហ៊ុន និងហេតុផលសំខាន់ៗដែលនៅពីក្រោយខ្នងការងាររបស់ពួកគេកំពុងធ្វើការ។ ធ្វើបែបនេះ ពួកគេនឹងមានអារម្មណ៍ថា ពួកគេកំពុងជួយក្រុមហ៊ុនឱ្យឆ្ពោះទៅកាន់គោលដៅមួយដ៏ជាក់លាក់ ព្រមទាំងពួកគេកំពុងធ្វើការដ៏សំខាន់ ហើយមានការឱ្យតម្លៃខ្ពស់លើអ្វីដែលពួកគេកំពុងធ្វើ។

ជាក់ស្ដែងចំពោះក្រុមហ៊ុន USAA តែងតែព្យាយាមធ្វើឱ្យមានអាទិភាព និងបេសកកម្មរបស់ក្រុមហ៊ុនមានភាពច្បាស់លាស់ចំពោះសមាជិកក្រុមទាំងអស់។ ធ្វើបែបនេះ ក្រុមការងារទាំងអស់នឹងចាត់ទុកការងារជារឿងសំខាន់សម្រាប់ពួកគេ ហើយមិនមែនធ្វើការដើម្បីតែប្រាក់ខែមួយមុខឡើយ ប៉ុន្តែចាត់ទុកគោលដៅរបស់ក្រុមហ៊ុនជារឿងសំខាន់ ព្រមទាំងព្យាយាមទាំងអស់គ្នាក្នុងការសម្រេចនូវគោលដៅរបស់ក្រុមហ៊ុនពោរពេញដោយថាមពល និងកម្លាំងចិត្ត។

7. បង្ហាញពីការយកចិត្តទុកដាក់ជាមួយក្រុមការងារ

ក្នុងនាមជាអ្នកដឹកនាំ ត្រូវតែបង្ហាញឱ្យឃើញនូវអាកប្បកិរិយាប្រកបដោយការយល់ចិត្ត និងការយោគយល់ជាមួយក្រុមការងារ ដើម្បីអាចជួយបង្កើតអារម្មណ៍សុវត្ថិភាពសម្រាប់សមាជិកក្រុម ដោយជំរុញឱ្យពួកគេក្លាយជាមនុស្សល្អបំផុតស្របតាមអ្វីដែលពួកគេចង់បាន និងហ៊ានបើកចំហអំពីទុក្ខកង្វល់ទាំងឡាយដែលពួកគេមាននៅកន្លែងធ្វើការជាមួយនឹងអ្នក។ ធ្វើបែបនេះ ក្រុមការងារនឹងកាន់តែមានអារម្មណ៍ថាកក់ក្ដៅ និងធ្វើការពោរពេញដោយក្ដីសង្ឃឹមរួមជាមួយនឹងភាពរីករាយជាប្រចាំថ្ងៃ។

ពាណិជ្ជកម្ម

ហេតុអ្វីត្រូវបង្វឹកក្រុមការងារឱ្យចេះជំនាញសេវាកម្មអតិថិជន ជាជាងគ្រាន់តែជួលមនុស្សឱ្យមកធ្វើការផ្នែកនេះ?

Sann Thaven

ជំនាញសេវាកម្មអតិថិជន ភាគច្រើនម្ចាស់អាជីវកម្មយល់ថាវាជារឿងធម្មតា ប៉ុន្តែពួកគេមិនបានដឹងទេថា ផ្នែកនេះជួយក្រុមហ៊ុនពួកគេឱ្យកាន់តែរីកចម្រើនទៅមុខ តាមរយៈការចងចិត្តអតិថិជនជាមួយក្រុមហ៊ុន ដោយមិនមែនគ្រាន់តែប្រើយុទ្ធសាស្រ្តទីផ្សារផ្សព្វផ្សាយទាក់ទាញចំណាប់អារម្មណ៍អតិថិជន និងការលក់ផលិតផលសេវាកម្មជូនពួកគេប៉ុណ្ណោះនោះទេ។ ហើយការចងចិត្តអតិថិជននេះ គឺជាផ្នែកសេវាកម្មអតិថិជនដ៏ល្អរបស់ក្រុមហ៊ុន។

ចូរចងចាំថា អតិថិជនជាផ្នែកមួយដ៏សំខាន់បំផុតសម្រាប់ក្រុមហ៊ុន ពីព្រោះបើក្រុមហ៊ុនគ្មានអតិថិជនគាំទ្រ នោះក្រុមហ៊ុនច្បាស់ជាគ្មានចំណូល ហើយបើគ្មានចំណូលក្រុមហ៊ុនក៏មិនអាចបន្តដំណើរទៅមុខបានដែរ។ ហេតុនេះ ធ្វើបែបណាទើបមានអតិថិជនច្រើននៅក្នុងក្រុមហ៊ុន? ចម្លើយនោះគឺ ការផ្ដល់សេវាកម្មអតិថិជនដ៏ល្អបំផុត ដែលលើសពីការធ្វើទីផ្សារ ការលក់ និងផ្ដល់ផលិតផលសេវាកម្ម។ ហេតុអ្វីបានជាដូច្នេះ? ពីព្រោះទោះបីជាការធ្វើទីផ្សារល្អ មានផលិតផលសេវាកម្មល្អ និងមានក្រុមលក់ល្អច្រើនប៉ុណ្ណាក៏ដោយ ក៏វាទាមទារឱ្យមានសេវាកម្មអតិថិជនដ៏ល្អបំផុតផងដែរ បើគ្មានសេវាកម្មអតិថិជនល្អ នោះធ្វើទីផ្សារបានអតិថិជនច្រើនតែដំបូង ហើយក៏បាត់ទៅវិញ។ បើមានផលិតផលសេវាកម្មគុណភាពល្អ ប៉ុន្តែការផ្ដល់សេវាកម្មអតិថិជនធ្វើឱ្យអតិថិជនមិនពេញចិត្ត ឬមានបទពិសោធន៍មិនល្អ ក៏អតិថិជនឈប់មកទិញវិញដែរ។ មួយវិញទៀត បើក្រុមលក់ គ្រាន់តែព្យាយាមដើម្បីលក់ ហើយគ្មានជំនាញសេវាកម្មអតិថិជន ក៏ពិបាកក្នុងការលក់ និងចងចិត្តអតិថិជនឱ្យត្រឡប់មកទិញម្ដងទៀតផងដែរ។ ហេតុនេះ សេវាកម្មអតិថិជនជារឿងដ៏សំខាន់ ដែលម្ចាស់អាជីវកម្មទាំងអស់ ជាពិសេសម្ចាស់អាជីវកម្មបែបជួបភ្ញៀវច្រើន ដូចជាអាជីវកម្មប្រឹក្សាលើការថែរក្សាសម្រស់ អាជីវកម្មបែបភោជនីយដ្ឋាន និងផ្សេងៗទៀត ដែលមិនអាចមើលរំលងបាន។

បន្ថែមពីនេះ សំណួរសួរថា បើផ្នែកសេវាកម្មបម្រើអតិថិជនសំខាន់បែបហ្នឹង តើគួរជួលបុគ្គលិកដែលមានជំនាញផ្នែកសេវាកម្មអតិថិជនឱ្យបានច្រើនឬក៏យ៉ាងណា? ឬម្យ៉ាងទៀត ក្រុមហ៊ុនត្រូវតែមានវគ្គបណ្ដុះបណ្ដាលសម្រាប់ក្រុមការងារពាក់ព័ន្ធនានាក្នុងក្រុមហ៊ុនឱ្យចេះជំនាញនេះឬក៏យ៉ាងណា? តើគួរធ្វើបែបណាទើបល្អ?

ឆ្លើយតបនឹងចម្ងល់នេះ ម្ចាស់អាជីវកម្មគួរតែមានវគ្គបណ្ដុះបណ្ដាលក្រុមការងារឱ្យមានជំនាញសេវាកម្មអតិថិជន ព្រមទាំងរៀបចំក្បួនក្នុងការផ្ដល់សេវាកម្មអតិថិជនឱ្យបានល្អបំផុត ជាជាងគ្រាន់តែសម្រុកជួលបុគ្គលិកផ្នែកសេវាកម្មអតិថិជន ពីព្រោះផ្នែកលក់ ផ្នែកធ្វើទីផ្សារ អ្នកសន្ដិសុខ និងអ្នកអនាម័យដែលរៀបចំក្រុមហ៊ុនឱ្យមានផាសុកភាព ក៏ត្រូវការក្នុងការមានជំនាញនេះ ដើម្បីធ្វើឱ្យអតិថិជនកាន់តែមានបទពិសោធន៍ល្អៗជាមួយក្រុមហ៊ុនផងដែរ។ ហើយការមានធ្វើឱ្យអតិថិជនមានបទពិសោធន៍ល្អៗ និងមានការពេញចិត្ត គឺពាក់ព័ន្ធនឹងសេវាកម្មអតិថិជន។

បន្ថែមពីនេះ ចំណុចខាងក្រោម នឹងជួយអ្នកក្នុងការគិតពិចារណា។

ចំពោះក្រុមហ៊ុនដែលត្រូវជួបអតិថិជនច្រើន ឬអតិថិជនចេញចូលច្រើន គួរតែកុំព្យាយាមជួលបុគ្គលិកផ្នែកសេវាកម្មអតិថិជនច្រើនឱ្យសោះ ប៉ុន្តែព្យាយាមផ្ដល់សេវាកម្មបណ្ដុះបណ្ដាលបុគ្គលិកពាក់ព័ន្ធទាំងអស់ដែលតែងតែជួបអតិថិជន ឱ្យចេះពីរបៀបផ្ដល់សេវាកម្មអតិថិជនដ៏ល្អ។
កុំគ្រាន់តែជួលបុគ្គលិកផ្នែកសេវាកម្មអតិថិជនឱ្យច្រើន ប៉ុន្តែត្រូវគិតផ្ដោតលើការរៀបចំដំណើរការក្នុងក្រុមហ៊ុនឱ្យមានការផ្ដល់ជូនសេវាកម្មដ៏ល្អ។ នៅក្នុងចំណុចនេះ ម្ចាស់អាជីវកម្មអាចសិក្សារៀនសូត្រផ្នែកនេះ ដើម្បីអាចបន្ដរៀបចំនិងជួយក្រុមការងារឱ្យផ្ដល់សេវាកម្មអតិថិជនល្អ ឬអាចជួលអ្នកជំនាញផ្នែកសេវាកម្មអតិថិជនក្នុងការជួយបណ្ដុះបណ្ដាល ឬរៀបចំក្រុមហ៊ុនអ្នកឱ្យមានដំណើរការផ្ដល់សេវាកម្មអតិថិជនឱ្យបានល្អ ស្របតាមគោលបំណងដែលអ្នកចង់បាន។
អ្នកត្រូវដឹងថា ការដែលផ្ដល់សេវាកម្មអតិថិជនដ៏ល្អ អ្នកនឹងអាចរក្សាអតិថិជនដែលមានស្រាប់ និងទទួលបានអតិថិជនថ្មីៗជាបន្តបន្ទាប់ ព្រមទាំងអាចទទួលបានមតិកែលម្អដ៏ស្មោះត្រង់ពីអតិថិជនដែលពេញចិត្តនឹងក្រុមហ៊ុនរបស់អ្នកពិតប្រាកដ។

ពាណិជ្ជកម្ម

Alibaba និងមហាសេដ្ឋីសិង្ហបុរី បានជាប់ឈ្មោះលើការសាងសង់អគារខ្ពស់ជាងគេរបស់ Lion City

Sann Thaven

ក្រុមហ៊ុនពាណិជ្ជកម្មអេឡិចត្រូនិកយក្សមួយរបស់ប្រទេសចិន Alibaba និងភាពជាដៃគូជាមួយក្រុមហ៊ុន Perennial Holdings ព្រមទាំងរាប់បញ្ចូលមហាសេដ្ឋីសិង្ហបុរី លោក Kuok Khoon Hong និងលោក Ron Sim បានជាប់ឈ្មោះក្នុងការយល់ព្រមពីរដ្ឋាភិបាលក្នុងការសាងសង់អគារខ្ពស់កប់ពពកនៅក្នុងទីក្រុង Lion ប្រទេសសិង្ហបុរី ដែលជាទីផ្សារដ៏ល្អបំផុតមួយនៅក្នុងតំបន់អាស៊ី និងតំបន់ប៉ាស៊ីហ្វិក។

ចំពោះការសាងសងនោះ ត្រូវបានអាជ្ញាធរអភិវឌ្ឍន៍ទីក្រុងយល់ព្រមលើសំណើរកាលពីថ្ងៃទី7 ខែកក្កដា ឆ្នាំ2022នេះ ដើម្បីសាងសង់អគារពាណិជ្ជកម្ម សណ្ឋាគារ និងលំនៅដ្ឋានដែលមានកម្ពស់ 63 ជាន់ នៅលើទីតាំង 8 Shenton Way ក្នុង Tanjong Pagar នៅជិត Raffles Place ដែលជាតំបន់ពាណិជ្ជកម្មកណ្តាល។ អចលនទ្រព្យនេះត្រូវបានសាងសង់ឡើងដំបូងក្នុងឆ្នាំ 1986 ជាអគាររតនាគារ ធ្លាប់ជាទីស្នាក់ការកណ្តាលរបស់ក្រុមហ៊ុនវិនិយោគរដ្ឋ Temasek Holdings។

បន្ថែមពីនេះ អគារដែលសាងសងនឹងមានកម្ពស់អតិបរមា 305 ម៉ែត្រ ព្រមទាំងអាចក្លាយជារចនាសម្ព័ន្ធខ្ពស់ជាងគេក្នុងប្រទេសសិង្ហបុរី នៅពេលអគារនេះត្រូវបានបញ្ចប់ការសាងសង់អំឡុងឆ្នាំ 2028 ដែលខ្ពស់ជា Guoco Tower ដែលមានកម្ពស់ 284 ម៉ែត្រ ដែលបច្ចុប្បន្នជាអគារខ្ពស់ជាងគេបំផុតរបស់ទីក្រុង Lion។ គួរបញ្ជាក់ផងដែរថា អគារខ្ពស់ទាំងពីរនេះ ត្រូវបានភ្ជាប់ទៅនឹងស្ថានីយ៍រថភ្លើងក្រោមដី Tanjong Pagar។

ក្រៅពី Alibaba និងភាពជាដៃគូជាមួយក្រុមហ៊ុន Perennial ក៏មានក្រុមហ៊ុន Chip Eng Seng និងការបណ្តាក់ទុនរួមគ្នារវាង SingHaiyi Group និង Haiyi Holdings ដែលគ្រប់គ្រងដោយមហាសេដ្ឋីអចលនទ្រព្យលោក Gordon Tang និងប្រពន្ធរបស់គាត់ បានយល់ព្រមទិញភាគហ៊ុននៅក្នុង 8 Shenton Way កាលពីដើមឆ្នាំនេះផងដែរ។

ពាណិជ្ជកម្ម

របៀបសរសេរប្រវត្តិរូបសង្ខេបឡើងវិញ ដើម្បីផ្លាស់ប្ដូរការងារដ៏ល្អ

Sann Thaven

នៅពេលចង់ស្វែងរកការងារ ឬចង់ផ្លាស់ប្ដូរអាជីពការងារថ្មីដែលកាន់តែល្អនៅកន្លែងក្រុមហ៊ុនផ្សេងៗ ជាធម្មតាក្រុមហ៊ុនទាមទារឱ្យមានប្រវត្តិរូបសង្ខេប មុននឹងឈានដល់វគ្គសម្ភាសន៍ការងារជាមួយអ្នកជ្រើសរើសបុគ្គលិក។ ហេតុដូចនេះ ប្រវត្តិរូបសង្ខេបជាផ្នែកមួយដ៏សំខាន់ក្នុងការស្វែងរកការងារ ឬអាចនិយាយបានថា ជាផ្នែកដែលជួយជំរុញឱ្យអ្នកទទួលបានឱកាសការងារស្របតាមក្ដីបំណងប្រាថ្នា។

បន្ថែមពីនេះ អ្នកក៏ត្រូវដឹងដែរថា ចំណេះជំនាញបទពិសោធន៍ការងាររបស់អ្នកតែងតែមានការផ្លាស់ប្ដូរ ឬរីកចម្រើនទៅមុខជានិច្ច ដូច្នេះប្រសិនបើអ្នកចង់ដាក់ពាក្យធ្វើការងារនៅកន្លែងណាមួយលើអាជីពការងារដែលអ្នកស្រលាញ់ ចូរកុំយកប្រវត្តិរូបសង្ខេបដែលអ្នកធ្លាប់សរសេរពីមុនទៅដាក់ពាក្យម្ដងទៀត ដោយគ្មានការកែប្រែអ្វីសោះ។ ចូរធ្វើបច្ចុប្បន្នភាព ឬសរសេរប្រវត្តិរូបសង្ខេបរបស់អ្នកឡើងវិញជានិច្ចរាល់ពេលអ្នកផ្លាស់ប្ដូរការងារ ឬចង់ធ្វើឱ្យអាជីពការងាររបស់អ្នកកាន់តែល្អស្របតាមការចង់បាននៅកន្លែងថ្មី។

តើគួរសរសេរឡើងវិញ ឬកែប្រែប្រវត្តិរូបសង្ខេបរបស់អ្នកបែបណាទើបល្អ? ខ្លឹមសារខាងក្រោមនេះនឹងជួយបង្ហាញគន្លឹះសំខាន់ៗមួយចំនួនដល់អ្នក។

របៀបសរសេរកែលម្អប្រវត្តិរូបសង្ខេបឡើងវិញ

ការសរសេររៀបរាប់អំពីព័ត៌មានផ្ទាល់ខ្លួន សំដៅលើការសរសេរពិពណ៌នាបែបខ្លីៗថា តើអ្នកជានរណា? ព្រមទាំងបង្ហាញពីហេតុផលសំខាន់ៗរបស់អ្នកក្នុងការផ្លាស់ប្តូរអាជីពការងារថ្មី គោលដៅថ្មី របៀបដែលបទពិសោធន៍ដែលអ្នកធ្លាប់មានពីមុនអាចផ្លាស់ប្ដូរអ្នកចូលទៅក្នុងឧស្សាហកម្មថ្មី និងមូលហេតុដែលអ្នកធ្វើបានល្អបំផុតសម្រាប់ការងារដែលអ្នកកំពុងដាក់ពាក្យនោះ។

ជំហានបន្ទាប់ អ្នកត្រូវសរសេររំលេចបង្ហាញពីបទពិសោធន៍របស់អ្នកដែលធ្លាប់មានកន្លងមក តាមរយៈការសរសេរបង្ហាញពីជំនាញដែលអ្នកបានធ្វើនៅពេលអ្នកធ្វើការនៅក្រុមហ៊ុនពីមុន។ នៅចំណុចនេះ អ្នកក៏ត្រូវដឹងថា អ្នកជ្រើសរើសបុគ្គលិកទាំងអស់ ពួកគេតែងតែសម្លឹងឃើញ ឬចាប់អារម្មណ៍ខ្លាំងលើចំណេះជំនាញបទពិសោធន៍ និងទេពកោសល្យរបស់អ្នក តាមរយៈការផ្ដោតមើលលើការសរសេរនូវចំណុចសំខាន់ៗដែលអ្នកបានសរសេរពីអ្វីដែលបានអនុវត្តន៍ជាក់ស្ដែង។ ឧទាហរណ៍ អ្នកមានជំនាញទំនាក់ទំនងដ៏ល្អ ជាអ្នកសហការជាមួយក្រុមការងារដ៏ខ្លាំង និងមានភាពវៃឆ្លាតផ្នែកអារម្មណ៍ជាដើម។

មិនត្រឹមតែប៉ុណ្ណឹងនោះទេ អ្នកក៏អាចសរសេរពិព៌ណ៌នាបន្ថែមពីប្រវត្តិការងារដែលពាក់ព័ន្ធរបស់អ្នកផងដែរ ប៉ុន្តែចៀសវាសសរសេរបញ្ចូលនូវការងារណាដែលអ្នកធ្លាប់ធ្វើ ប៉ុន្តែវាមិនមានភាពពាក់ព័ន្ធឬមានភាពសំខាន់លើមុខតំណែងឬជំនាញដែលអ្នកកំពុងដាក់ពាក្យធ្វើការនោះ។

ជាចុងក្រោយ អ្នកត្រូវសរសេរបង្ហាញពីការអប់រំរបស់អ្នក ដូចជាព័ត៌មានលម្អិតអំពីវិញ្ញាបនប័ត្រ ឬវគ្គសិក្សាដែលអាចពាក់ព័ន្ធ ទោះបីជាអ្នកមិនទាន់បានបញ្ចប់វាក៏ដោយ។

ពាណិជ្ជកម្ម

របៀបបង្កើនប្រសិទ្ធភាពទំនាក់ទំនងជាមួយអតិថិជន តាមរយៈ Meta Business Suite

Sann Thaven

Meta Business Suite គឺជាឧបករណ៍ប្រើប្រាស់ឥតគិតថ្លៃ ហើយវាក៏រួមបញ្ចូលគ្នារវាង Facebook, Instagram និងឧបករណ៍ផ្ញើសារនៅក្នុងកន្លែងតែមួយផងដែរ។ ដូច្នេះអ្នកអាចប្រើប្រាស់នូវឧបករណ៍នេះ ដោយមានការសន្សំពេលវេលា បង្កើតទំនាក់ទំនងជាមួយអតិថិជនបានកាន់តែច្រើន ហើយក៏ជួយធ្វើឱ្យអតិថិជនសប្បាយចិត្តជាមួយនឹងការឆ្លើយតបលឿនៗរបស់អ្នក និងទទួលបានលទ្ធផលអាជីវកម្មកាន់តែល្អប្រសើរ តាមរយៈការជំរុញការលក់បានច្រើន។

បន្ថែមពីនេះ មិនថាអ្នកប្រើប្រាស់វានៅក្នុងទូរស័ព្ទដៃ ឬនៅក្នុងកុំព្យូទ័រនោះទេ Meta Business Suite នឹងធ្វើឱ្យអ្នកមានភាពងាយស្រួលក្នុងការមើលការជូនដំណឹង និងឆ្លើយតបសាររបស់អតិថិជនបានយ៉ាងឆាប់រហ័សទាំងនៅលើ Facebook Messenger និងInstagram នៅកន្លែងតែមួយ ព្រមទាំងអាច បង្កើតការឆ្លើយតបជាមួយនឹងអតិថិជនដោយស្វ័យប្រវត្តិផងដែរ។ ម្យ៉ាងទៀត អ្នកក៏អាចកំណត់ពេលវេលាក្នុងការផុសផ្សព្វផ្សាយ និងផ្សាយពាណិជ្ជកម្មសម្រាប់អាជីវកម្មរបស់អ្នកបានយ៉ាងងាយស្រួល។

តើប្រើប្រាស់ Meta Business Suite ដោយរបៀបណា?

ការប្រើប្រាស់ Meta Business Suite នឹងជួយអ្នកក្នុងការឆ្លើយតប និងទំនាក់ទំនងជាមួយអតិថិជនបានកាន់តែមានប្រសិទ្ធភាពជាងមុន ព្រមទាំងជួយក្រុមអ្នកឆ្លើយតបសារអតិថិជនទាំងអស់មិនចំណាយពេលច្រើនក្នុងការចូលមើល Facebook ផង Instagram ផង នោះឡើយ។

បើយោងតាមទំព័រផ្លូវការរបស់លោក Neil Patel បានបង្ហាញពីរបៀបប្រើប្រាស់ Meta Business Suite មួយចំនួន ដើម្បីបង្កើនទំនាក់ទំនងជាមួយអតិថិជនកាន់តែមានប្រសិទ្ធភាពជាងមុន។

1. ប្រើ Filters និង Labels

អ្នកអាចស្វែងរកពាក្យ App label នៅខាងស្ដាំដៃ (Label បកជាភាសាខ្មែរថា ស្លាកសញ្ញា) ហើយអ្នកអាចចាប់ផ្ដើមកំណត់ក្នុងការដាក់ស្លាកសញ្ញាក្នុងការទំនាក់ទំនងជាមួយអតិថិជនម្នាក់ៗ ដើម្បីអ្នកដឹងថាអតិថិជនដែលអ្នកកំពុងឆ្លើយតបនោះកំពុងស្ថិតនៅក្នុងស្លាកសញ្ញាមួយណា។ គួរបញ្ជាក់ផងដែរ ការកំណត់ដាក់ស្លាកសញ្ញាទំនាក់ទំនងជាមួយអតិថិជនមាន 3 រួមមានអតិថិជនថ្មី (New Customer) សារៈសំខាន់ (Important) និងកាលបរិច្ឆេទសម្រាប់ថ្ងៃនេះ (Today’s date)។

ចំពោះការប្រើប្រាស់ Filters អ្នកអាចស្វែងរកនៅខាងឆ្វេងដៃផ្នែកខាងលើ បន្ទាប់មកអ្នកអាច Filters សម្រាប់សារអាទិភាព ឬសារណាដែលអ្នកមិនទាន់បានអាន។

2. កំណត់ការឆ្លើយតបដោយស្វ័យប្រវត្តិ

ការកំណត់ការឆ្លើយតបដោយស្វ័យប្រវត្តិ ជាផ្នែកមួយជួយអ្នកក្នុងការចំណេញពេលវេលា។ អ្នកអាចកែសម្រួល និងរក្សាទុកការឆ្លើយតបដោយស្វ័យប្រវត្តិរាល់សំណួរទូទៅរបស់អតិថិជនដែលតែងតែសួរបានយ៉ាងងាយស្រួល ព្រមទាំងឆ្លើយតបដោយមានប្រសិទ្ធភាពខ្ពស់។

អ្នកអាចកំណត់ការឆ្លើយតបដោយស្វ័យប្រវត្តិបាន ដោយអ្នកអាចស្វែងរកពាក្យ Automations នៅខាងស្ដាំដៃនៃផ្នែកខាងលើ បន្ទាប់មកចុចលើវា និងអាចសរសេរការឆ្លើយតបដោយស្វ័យប្រវត្តិជាភាសាខ្មែរក៏បាននៅកន្លែងប្រអប់សារ។

3. គ្រប់គ្រងព័ត៌មានអតិថិជន

ចំពោះការគ្រប់គ្រងព័ត៌មានអតិថិជន នឹងជួយអ្នកក្នុងការបិទការលក់ តាមរយៈការបញ្ចូលនូវព័ត៌មានទំនាក់ទំនង ចំណង់ចំណូលចិត្ត និងអាចកំណត់ចំណាំទម្រង់ផ្សេងៗដែលជាព័ត៌មានសំខាន់របស់អតិថិជនដោយឥតគិតថ្លៃ។ ហើយព័ត៌មានទាំងនេះ អ្នកអាចសរសេរនៅត្រង់ពាក្យ About នៅខាងស្ដាំដៃ បន្ទាប់មកយកពាក្យ Add details។

4. ជំរុញឱ្យមានលទ្ធផលអាជីវកម្មល្អបន្ថែមទៀត

នៅក្នុងចំណុចនេះអ្នកអាចចែករំលែកផលិតផល ឬធ្វើការណាត់ជួបជាមួយអតិថិជនតាមរយៈផ្ញើសារដោយផ្ទាល់។ ធ្វើបែបនេះ វានឹងជួយអ្នកក្នុងការស្គាល់អតិថិជនកាន់តែប្រសើរ ជួយពួកគេបានច្រើន និងអាចរក្សានូវចំណងទាក់ទងជាមួយអតិថិជន។

ពាណិជ្ជកម្ម

1...192021...74 Page 20 of 74