ក្នុងនាមជាអ្នកលក់ ច្បាស់ណាស់អាចនឹងជួបជាមួយអតិថិជនល្អ ឬពេលខ្លះមិនល្អ ប៉ុន្តែទោះបីជាយ៉ាងណាប្រសិនបើអ្នកជាអ្នកលក់ដ៏ល្អ អ្នកនឹងមានដំណោះស្រាយ។ ម្យ៉ាងទៀត ប្រសិនបើអ្នកមិនព្យាយាមធ្វើជាអ្នកលក់ដ៏ល្អនោះទេ អ្នកនឹងធ្វើឱ្យហាងដែលអ្នកកំពុងធ្វើការនោះនឹងបាត់បង់អតិថិជន ព្រមទាំងអាចធ្វើឱ្យខូចកេរ្តិ៍ឈ្មោះហាងផងដែរ។ ហេតុអ្វី? គឺតាមរយៈកំហុសរបស់អ្នកលក់ចំនួន 3 ដែលអាចធ្វើឱ្យអតិថិជនស្អប់ និងពួកគេឈប់មកម្ដងទៀត។

1. គ្មានការស្វាគមន៍ជាអតិថិជន

នៅពេលអតិថិជនចូលមកកាន់ហាង ឬក្រុមហ៊ុនរបស់ខ្លួន បែរជាគ្មាននរណាមករួសរាយរាក់ទាក់ ឬមកសួរនាំអ្វីសោះឡើយ ដែលជាកត្តាធ្វើឱ្យអតិថិជនមានអារម្មណ៍មិនល្អតាំងពីដំបូង។ លើសពីនេះ អ្នកលក់ទាំងអស់ បែរជាមិនរុះរាន់ក្នុងការផ្ដល់សេវាកម្មដ៏ល្អជូនអតិថិជនឡើយ ដោយពេលខ្លះអតិថិជនចូលមកកាន់តែជាង 15នាទីហើយ ប៉ុន្តែមិនទាន់មកសួរអំពីតម្រូវការដែលអតិថិជនចង់បានសោះ សួរថា ប្រសិនបើអតិថិជននោះ គឺជាអ្នកវិញ តើអ្នកនឹងបន្តចង់ទិញ ឬក៏ដើរចេញ?

កត្តានេះហើយ ក្នុងនាមជាថ្នាក់ដឹកនាំ ត្រូវតែរៀបចំប្រព័ន្ធធ្វើការរបស់បុគ្គលិក ដើម្បីធានាថា គ្រប់ងអតិថិជនរបស់អ្នកដែលបានដើរចូលមកកាន់ហាងរបស់អ្នក គ្រប់បុគ្គលិកត្រូវតែមានការស្វាគមន៍ និងធ្វើឱ្យអតិថិជនទាំងអស់មានអារម្មណ៍ស្រស់ស្រាយតាំងពីដើរចូលហាងរបស់អ្នកដំបូង។

2. បង្ហាញពីអាកប្បកិរិយាមិនល្អរបស់ខ្លួន

តើអ្នកធ្លាប់ទេ នៅពេលអ្នកស្នើសុំអ្វីមួយពីអ្នកលក់ ប៉ុន្តែត្រូវអ្នកលក់ទាំងនោះបង្ហាញពីការមិនឱ្យតម្លៃ ឬមិនអើពើនឹងអ្នក? តើអ្នកនឹងមានអារម្មណ៍បែបណា?

ម្យ៉ាងទៀត អាចអ្នកលក់មួយចំនួនបង្ហាញពីការមិនសូវខ្វល់ខ្វាយ និយាយមិនពិរោះជាមួយនឹងអតិថិជន​ និយាយដើមអតិថិជននៅនឹងមុខអតិថិជន ឬស្ដីឱ្យអតិថិជនវិញជាដើម។ ដូច្នេះសំណួរសួរថា បើទង្វើរទាំងឡាយណាដែលធ្វើឱ្យអតិថិជនមានអារម្មណ៍ខឹង ឬមិនស្រណុកនៅក្នុងចិត្ត តើពួកគាត់នឹងសប្បាយរីករាយនឹងមកម្ដងទៀតដែរឬទេ? ហើយពួកគេអាចរិះគន់ហាងរបស់អ្នកតាមរយៈប្រព័ន្ធសង្គមឬទេ? ច្បាស់ណាស់ គឺអាច។

ហេតុដូចនេះ ក្នុងនាមជាអ្នកដឹកនាំ​ ក៏ត្រូវពិចារណាឱ្យបានច្បាស់មុននឹងជ្រើសរើសបុគ្គលិកផ្នែកលក់មកធ្វើការ ព្រមទាំងត្រូវបណ្ដុះបណ្ដាលពួកគេអំពីការផ្ដល់សេវាកម្មល្អដល់អតិថិជន និងការចៀសវាងនូវអាកប្បកិរិយាផ្សេងៗ។

3. បង្ហាញពីការមិនយល់ចិត្តដល់អតិថិជន

អតិថិជនគ្រប់រូបតែងតែចង់ទទួលបានការយល់ចិត្តពីអ្នកលក់ ព្រមទាំងចង់ឱ្យអ្នកលក់អាចផ្ដល់នូវអ្វីដែលពួកគេចង់បាន ដូច្នេះការយល់ចិត្តអតិថិជនជារឿងសំខាន់ណាស់។ ប្រសិនបើអ្នកជាអ្នកលក់ ប៉ុន្តែអ្នកមិនចេះបង្ហាញពីការយល់ចិត្តដល់អតិថិជន មិនចេះសួរនាំអំពីតម្រូវការរបស់អតិថិជន និងមិនព្យាយាមផ្ដល់ដំណោះស្រាយដ៏ល្អជូនអតិថិជនទេ នោះវាពិតជាកំហុសធ្ងន់របស់អ្នក។

ដូច្នេះប្រសិនបើអ្នកចង់ខ្លាំងលើផ្នែកនេះ អ្នកក៏ត្រូវព្យាយាមហ្វឹកហាត់ខ្លួនឯងឱ្យក្លាយជាអ្នកលក់ពូកែ និងមានសមត្ថភាពខ្លាំងក្នុងការផ្ដល់សេវាកម្មដ៏ល្អជូនអតិថិជន។ នៅក្នុងចំណុចនេះ ថ្នាក់ដឹកនាំ ក៏ត្រូវយកចិត្តទុកដាក់ផងដែរ ដោយត្រូវមានការហ្វឹកហាត់បុគ្គលិកឱ្យចេះវិធីយល់ចិត្តអតិថិជន។

មេរៀនជាច្រើនដែលថ្នាក់ដឹកនាំត្រូវបង្រៀនដល់បុគ្គលិក ព្រោះបុគ្គលិកជាធនធានដ៏សំខាន់ក្នុងការជំរុញឱ្យស្ថាប័នទាំងមូលទទួលបានភាពជោគជ័យ។ ប៉ុន្តែនៅក្នុងខ្លឹមសារអត្ថបទមួយនឹងបង្ហាញពីមេរៀនចំនួន 7 ដើម្បីឱ្យថ្នាក់ដឹកនាំទាំងអស់អាចធ្វើការបណ្ដុះបណ្ដាលដោយផ្ទាល់ ឬចាត់វិធានការដើម្បីជួលអ្នកជំនាញ ឬឱ្យប្រធានផ្នែកទាំងអស់បង្រៀនដល់បុគ្គលិកផ្សេងៗទៀតឱ្យយល់ដឹង ដើម្បីធ្វើឱ្យពួកគេបង្កើនផលិតភាពការងារ និងអាចរីកចម្រើននៅក្នុងជីវិតផ្ទាល់ខ្លួន។

1. ការចេះរស់នៅជាមួយគោលដៅជីវិតផ្ទាល់ខ្លួន

បុគ្គលដែលខិតខំធ្វើការដោយគ្មានភាពនឿយហត់ តែងតែធ្វើការដោយមានគោលបំណងជាក់លាក់ និងរស់នៅជាមួយក្ដីស្រមៃផ្ទាល់ខ្លួន។ រីឯបុគ្គលដែលធ្វើការដើម្បីតែបានប្រាក់ខែចិញ្ចឹមជីវិត និងគ្មានគោលដៅជាក់លាក់នៅក្នុងជីវិត តែងតែឆាប់នឿយហត់ ឆាប់បោះបង់ និងឆាប់ធុញទ្រាន់នឹងជីវិតខ្លួនឯងម្ដងម្កាល។ ហេតុដូច្នេះប្រសិនបើអ្នកចង់ធ្វើឱ្យបុគ្គលិករបស់អ្នកខិតខំធ្វើការដោយមានផលិតភាពការងារល្អ ព្រមទាំងរីកចម្រើននៅក្នុងជីវិតរបស់ពួកគេម្នាក់ៗ ក្នុងនាមជាថ្នាក់ដឹកនាំ ត្រូវតែចាត់វិធានការដើម្បីបណ្ដុះបណ្ដាលបុគ្គលិកទាំងអស់ឱ្យមានគោលដៅជីវិត ហើយរស់ជាមួយនឹងគោលដៅជីវិតខ្លួនឯង។

ត្រូវចងចាំថា៖ មនុស្សដែលរស់នៅជាមួយនឹងគោលដៅ តែងតែជាមនុស្សរីកចម្រើន ហើយខិតខំធ្វើអ្វីគ្រប់យ៉ាងដោយអស់ពីសមត្ថភាពដោយមិនចាំបាច់មាននរណាមកដាស់តឿនរហូតឡើយ។ ម្យ៉ាងទៀត ប្រសិនបើស្ថាប័នរបស់អ្នកពោរពេញដោយបុគ្គលបែបនេះ នោះស្ថាប័នរបស់អ្នកក៏កាន់តែរឹងមាំ និងរីកចម្រើនផងដែរ។

2. ការចេះគ្រប់គ្រងហិរញ្ញវត្ថុផ្ទាល់ខ្លួន

ប្រសិនបើបុគ្គលិករបស់អ្នក សុទ្ធតែមានបញ្ហាផ្នែកហិរញ្ញវត្ថុ និងមិនសូវចេះគ្រប់គ្រងហិរញ្ញវត្ថុផ្ទាល់ខ្លួនឱ្យបានល្អនោះទេ ច្បាស់ណាស់វានឹងប៉ះពាល់ដល់ផលិតភាពការងាររបស់ពួកគេ។ នៅពេលផលិតភាពការងាររបស់ពួកគេធ្លាក់ចុះ នោះគោលដៅដែលក្រុមហ៊ុនចង់សម្រេចបាន ក៏ត្រូវពន្យាពេលដែរ ដូច្នេះក្នុងនាមជាថ្នាក់ដឹកនាំ ត្រូវតែមានការបណ្ដុះបណ្ដាលអំពីចំណេះដឹងផ្នែកហិរញ្ញវត្ថុទៅកាន់គ្រប់បុគ្គលិកទាំងអស់ឱ្យបានយល់ដឹង។

ត្រូវចងចាំថា៖ បើបុគ្គលិករបស់អ្នក មានបញ្ហាហិរញ្ញវត្ថុ នោះផលិតភាពការងារ និងភាពរីកចម្រើនរបស់ពួកគេនឹងធ្លាក់ចុះ ហើយប្រសិនបើអ្នកអាចជួយឱ្យបុគ្គលិករបស់អ្នកមានចំណេះដឹងផ្នែកហិរញ្ញវត្ថុ ព្រមទាំងរឹងមាំផ្នែកហិរញ្ញវត្ថុ ពួកគេនឹងរីកចម្រើនតាមរយៈការបង្កើនផលិតភាពការងារ ហើយស្ថាប័នរបស់អ្នកក៏រីកចម្រើនតាមនោះដែរ។

3. ការចេះប្រើប្រាស់ពេលវេលាបានល្អ

​ពាក្យចាស់លោកពោលថា “ពេលវេលាគឺជាមាសប្រាក់” ដូច្នេះពេលវេលាពិតជាមានតម្លៃខ្លាំងណាស់សម្រាប់មនុស្សគ្រប់គ្នា ហេតុនេះប្រសិនបើអ្នកមិនចេះប្រើប្រាស់ពេលវេលាឱ្យបានល្អទេ នោះថ្ងៃណាមួយអ្នកនឹងស្ដាយក្រោយ ពីព្រោះយើងមិនអាចបង្វែរពេលវេលាឱ្យដើរថយក្រោយបានឡើយ។

បន្ថែមពីនេះ ក្នុងនាមជាថ្នាក់ដឹកនាំ អ្នកត្រូវតែបណ្ដុះបណ្ដាលបុគ្គលិកឱ្យយល់ច្បាស់ពីសារៈសំខាន់នៃការចេះប្រើប្រាស់ពេលវេលាឱ្យបានល្អ និងចេះប្រើប្រាស់ពេលវេលាក្នុងការធ្វើអ្វីមួយដែលអភិវឌ្ឍន៍សមត្ថភាព និងអាចបង្កើនផលិតភាពការងារផ្ទាល់ខ្លួន។ ម្យ៉ាងទៀត អ្នកក៏ត្រូវបង្ហាញពីគុណវិបត្តិនៅពេលដែលបុគ្គលិកខ្ជះខ្ជាយពេលវេលា ព្រមទាំងយកពេលវេលាមួយចំនួនទៅធ្វើអ្វីមួយដែលគ្មានបានផលប្រយោជន៍ត្រឡប់មកវិញសម្រាប់ខ្លួនឯង។

ត្រូវចងចាំថា៖ ប្រសិនបើបុគ្គលិករបស់អ្នកចេះប្រើប្រាស់ពេលវេលាបានល្អ នោះពួកគេនឹងបំពេញការងារសំខាន់ៗក៏បានល្អ ព្រមទាំងចេះបែងចែកយ៉ាងល្អរវាងការធ្វើការងារនៅស្ថាប័ន និងការងារផ្ទាល់ខ្លួន។ ធ្វើបែបនេះ បុគ្គលិករបស់អ្នកក៏កាន់តែរីកចម្រើន ហើយស្ថាប័នរបស់អ្នកក៏ជោគជ័យតាមនោះដែរ។

4. ការចេះរបៀបធ្វើការតាមច្បាប់ 80/20

ច្បាប់ 80/20 មានន័យថា ការខិតខំធ្វើការតែ 20% ប៉ុន្តែទទួលបានលទ្ធផលរហូតដល់ទៅ 80% ហើយបើនិយាយឱ្យសាមញ្ញមានន័យថា ខំធ្វើការតែបន្ថិច ប៉ុន្តែទទួលបានលទ្ធផលច្រើន។

នៅក្នុងចំណុចនេះ ចង់បង្ហាញឱ្យអ្នកដឹងថា បុគ្គលិកមួយចំនួនពេលខ្លះរវល់នឹងធ្វើការយ៉ាងខ្លាំងជារៀងរាល់ថ្ងៃ ប៉ុន្តែទទួលបានលទ្ធផលតែបន្តិចរហូតធ្វើឱ្យពួកគេគ្មានកម្លាំងចិត្តធ្វើការបន្តទៀត។ ហេតុអ្វី? ដោយសារតែពួកគេមិនបានធ្វើការតាមច្បាប់ 80/20។ ដូច្នេះក្នុងនាមជាថ្នាក់ដឹកនាំ ត្រូវតែបណ្ដុះបណ្ដាលឱ្យបុគ្គលិកចេះធ្វើការតាមច្បាប់ 80/20 ដោយព្យាយាមធ្វើការណាដែលសំខាន់ និងបន្ទាន់មុន ឬព្យាយាមធ្វើការណាដែលមានគុណប្រយោជន៍ច្រើនមុននឹងធ្វើការងារណាមិនចាំបាច់ឬអាចឱ្យអ្នកផ្សេងធ្វើជំនួសបាន ព្រមទាំងធ្វើការងារណាដែលត្រូវនឹងគោលដៅដែលស្ថាប័នចង់បានឱ្យបានច្រើន។

5. ការចេះសេពគប់មនុស្ស

បុគ្គលិកមួយចំនួននៅក្នុងស្ថាប័នរបស់អ្នក ពេលខ្លះពួកគេមិនយល់ពីរបៀបសេពគប់មនុស្សឱ្យបានត្រឹមត្រូវឡើយ ដូច្នេះក្នុងនាមជាថ្នាក់ដឹកនាំ និងយោងតាមបទពិសោធន៍របស់អ្នក គឺអ្នកត្រូវតែបង្ហាត់បង្ហាញអំពីការសេពគប់មនុស្សដែលធ្វើឱ្យពួកគេមានសេចក្ដីសុខ មានភាពរីកចម្រើន និងអាចជួយគ្នាបានក្នុងគ្រាមានអាសន្ន។ បន្ថែមពីនេះ ត្រូវធ្វើយ៉ាងណាឱ្យពួកគេបានយល់ច្បាស់ថា ការសេពគប់មនុស្សដ៏ល្អ មិនមែនទៅសេពគប់ជាមួយនឹងមនុស្សគ្រប់គ្នាឡើយ ប៉ុន្តែអាចនិយាយរួសរាយ និងអាចយកអាសារជាមួយមនុស្សគ្រប់គ្នាបាន។ ដោយឡែកការសេពគប់អ្នកត្រូវឱ្យបុគ្គលិកអ្នកដឹងថា តើមនុស្សបែបណាគួរនៅក្បែរឱ្យបានច្រើន ឬគួរចៀសវាង? តើមនុស្សបែបណាដែលអ្នកគួររាប់អាន ឬមិនគួររាប់អាន? ។ល។

ត្រូវចងចាំថា៖ ការសេពគប់ ជាកាតាលិករដ៏សំខាន់ក្នុងការជំរុញឱ្យអ្នករីកចម្រើន និងជោគជ័យគ្រប់ភារកិច្ចការងារ ដូច្នេះបើអ្នកអាចធ្វើឱ្យបុគ្គលិករបស់អ្នកចេះសេពគប់ជាមួយមនុស្សបានល្អ នោះពួកគេនឹងរីកចម្រើន ហើយស្ថាប័នរបស់អ្នកនឹងពោរពេញទៅដោយមនុស្សពូកែៗ។

6. ការចេះរៀនសូត្រនូវចំណេះជំនាញបានត្រឹមត្រូវ

នៅលើលោកនេះ មានចំណេះដឹង និងមេរៀនជាច្រើនរាប់មិនអស់ឡើយ ដូច្នេះប្រសិនបើយើងចេះតែរៀនៗដោយគ្មានគោលដៅជាក់លាក់ នោះយើងបានតែចំណេះដឹង ប៉ុន្តែមិនអាចយកទៅប្រើការក្នុងការបង្កើតជាប្រយោជន៍បានឡើយ ហើយនេះជាទង្វើដែលខាតពេលបំផុត។ ហេតុនេះ ក្នុងនាមជាថ្នាក់ដឹកនាំ ត្រូវបង្ហាញដល់បុគ្គលិកគ្រប់គ្នាថា តើចំណេះជំនាញអ្វីដែលពួកគេម្នាក់ៗ ត្រូវព្យាយាមផ្ដោតរៀនឱ្យខ្លាំង ដោយផ្សាភ្ជាប់ទៅនឹងគោលដៅជីវិតដែលពួកគេចង់បាន? តើចំណេះដឹងណាខ្លះដែលគួរតែរៀនដើម្បីឱ្យដឹង និងយល់ ក៏គ្រប់គ្រាន់ មិនចាំបាច់ផ្ដោតខ្លាំងពេក?

7. ការចេះរស់នៅក្នុងសង្គមជាក់ស្ដែង

សង្គមតែងតែមានការផ្លាស់ប្ដូរ ហើយសង្គមជាក់ស្ដែង មិនដូចនឹងការរៀននៅក្នុងការសាលា ឬគ្រាន់តែលឺគេនិយាយបន្តគ្នា។ បន្ថែមពីនេះ អ្នកក៏ត្រូវជំរុញទឹកចិត្តឱ្យបុគ្គលិករបស់អ្នកឱ្យស្គាល់ពីសង្គមជាក់ស្ដែង ព្រមទាំងចេះរៀនបទបែនតាមបរិបទសង្គម និងចេះរស់នៅជាមួយនឹងសង្គមជាក់ស្ដែងដើម្បីធ្វើឱ្យខ្លួនឯងកាន់តែរីកចម្រើនទាំងជីវិតផ្ទាល់ខ្លួន និងជីវិតការងារ។