កត្តា​៣​យ៉ាង​ដែល​ជួយ​ឲ្យ​អាជីវកម្ម​ធ្លាក់ចុះងើប​​ឡើងវិញ

1240

មិនថា​ជំនួញ​ណា​ក៏ដោយ​ទោះ​ទទួលបាន​ជោគជ័យ​ក៏​ជួនកាល​នៅតែ​អាច​ជួប​ហានិភ័យ​នៅថ្ងៃណាមួយ​។​ ជាទូទៅ​ការធ្វើ​ពាណិជ្ជកម្ម​គឺ​តែង​មាន​បញ្ហា​ជារៀងរាល់​ឆ្នាំ​ដោយសារ​មូលហេតុ​ជាច្រើន​យ៉ាង​។​ ក្នុងនាម​ជា​ពាណិជ្ជករ​ អ្នក​ត្រូវ​ស្វែងរក​ថា​វិបត្តិ​ទាំងនោះ​កើតឡើង​មកពី​អ្វី​ហើយ​ត្រូវ​ធ្វើយ៉ាងណា​ដើម្បី​ជៀស​ផុត​ពីវា​។​ ដូច្នេះ​នៅក្នុង​អត្ថបទ​នេះ​នឹង​ប្រាប់​អ្នក​ពី​វិធី​ដែល​ជួយ​ស្ដារ​អាជីវកម្ម​ដែល​ធ្លាក់ចុះ​របស់​អ្នក​ឲ្យ​រីកដុះដាល​ឡើង​វិញ៖

១. កិត្តិនាម​

​អាជីវកម្ម​របស់អ្នក​មាន​ភាពងាករេ​ពី​លទ្ធផល​ដែល​បាន​រំពឹងទុក​នោះ​អាចបណ្តាល​មក​ពី​មាន​លក្ខណៈ​ណាមួយ​ដែល​ខុស​ប្រក្រតី​ជាពិសេស​គឺ​កិត្តិនាម​របស់​អ្នក​ផ្ទាល់តែ​ម្តង​។ កិត្តិនាម​គឺ​ពិតជា​សំខាន់​ណាស់​ព្រោះ​វា​បង្ហាញអ្វី​ដែល​អតិថិជន​បាន​ដឹងឮ​មុន​ឃើញ​ផលិតផល​របស់អ្នក​ទៅទៀត។ បុគ្គលិក​ អ្នក​គ្រប់គ្រង ឬដំណើរការអាជីវកម្ម​របស់​អ្នកអាច​បង្ក​​បញ្ហាឬ​​ប្រហែល​ជាបាន​បង្កើត​កំហុស​ណាមួយដោយ​អចេតនា​ធ្វើឲ្យ​កេរ្តិ៍​ឈ្មោះ​របស់អ្នក​ចំពោះ​អតិថិជន​ត្រូវ​ខូចខាត។ ម្យ៉ាង​ទៀត​វាអាច​បណ្តាល​មក​ពី​មាន​ជនខិលខូច​មាន​បំណង​ផ្សព្វផ្សាយ​ព័ត៌មាន​បោកប្រាស​ស្តី​ពី​អាជីវកម្ម​របស់អ្នក​នាំឲ្យ​អតិថិជន​បាត់បង់ទំនុក​ចិត្ត។ អ្នក​ត្រូវ​ពិនិត្យ​ពិច័យ​ឲ្យ​បាន​ច្បាស់​ថាតើពិតជាមាន​បញ្ហា​បែបនេះ​កើតឡើង​ឬអត់។ ប្រសិនបើ​មាន​មែន​អ្នក​ត្រូវ​ប្រញាប់ដោះស្រាយជា​បន្ទាន់រួច​ផ្សព្វផ្សាយជា​សាធារណៈ​ដើម្បី​ស្រោចស្រង់​អាជីវកម្ម​របស់អ្នក​និង​ស្តារ​មុខមាត់ឡើង​មក​វិញ។

២. ការធ្វើ​​ទីផ្សារ

ជាការពិត​​ណាស់​​គ្រប់​ជំនួញ​​ទាំងអស់​​​ទទួលបាន​​ជោគជ័យ​ដោយសារ​តែ​ការ​ធ្វើ​ទីផ្សារ​ល្អ​។ នៅពេល​ដែល​អ្នក​មាន​ទីផ្សារ​​អាជីវកម្ម​មួយ​ដែល​ប្រសើរ​គឺស្មើ​នឹង​អ្នក​មាន​ទាំងកេរ្តិ៍ឈ្មោះ​ល្បីនិង​​អតិថិជន​ច្រើន​។ បើ​​ការ​រកស៊ី​​របស់​អ្នក​ធ្លាក់ចុះ​ អ្នក​ត្រូវ​មើល​ឡើងវិញ​ទៅលើ​ការផ្សព្វផ្សាយ​ទីផ្សារ​ព្រមទាំង​ពិភាក្សា​គ្នា​ពី​ប្រព័ន្ធ​ទីផ្សារ​ចាស់​ថា​គួរ​កែ​វា​យ៉ាងដូចម្តេច​។ អ្នក​ត្រូវ​ដឹងថាការ​ធ្វើទីផ្សារ​គឺ​ផ្អែកទៅលើ​ទំនោរ​នៃ​​អតិថិជនគោលដៅ​របស់អ្នក។ ជួនកាល​អ្នក​បាន​ខិតខំ​ប្រើប្រាស់​មធ្យោបាយ​ដើម្បី​ធ្វើទីផ្សារ​ហើយ​តែគ្មាន​ប្រសិទ្ធភាព​អាច​បណ្តាល​មក​ការធ្វើទីផ្សារ​នោះមិន​បាន​ចំអតិថិជន​គោលដៅ​ឬ​មិនគួរ​ឲ្យ​គេ​ចាប់អារម្មណ៍​ក៏ថាបាន។

៣. ទទួល​យក​មតិ​កែតម្រូវ​ពី​អតិថិជន

កត្តា​ដែល​ជួយ​ឲ្យ​អាជីវកម្ម​អ្នក​ងើបឡើង​​វិញ​បាន​នោះ​គឺ​ការទទួលបាន​មតិ​ពី​អតិថិជន​ហើយយក​មក​អនុវត្ត​នៅលើ​ជំនួញ​របស់អ្នក​។​ ការធ្វើ​បែបនេះ​ជួយ​ឲ្យ​អ្នក​មាន​គំនិត​ជាច្រើន មិនត្រឹមតែ​ប៉ុណ្ណោះ​វា​ថែមទាំ​ង​ជួយ​សន្សំ​ពេលវេលា​​​និង​ការចំណាយ​បាន​ទៀតផង។ នៅពេល​ដែល​អ្នក​ដឹងថា​អាជីវកម្ម​របស់អ្នក​គួរ​កែ​លម្អ​ទៅលើ​អ្វីខ្លះ​នោះ​​ជា​ពិសេស​យល់​ច្បាស់​ពី​ការចង់បាន​របស់​អតិថិជន​ អ្នក​អាច​នឹង​វាយលុក​ចូល​ទីផ្សារ​​បាន​ដោយ​ជោគជ័យ។