ឱកាសល្អសម្រាប់កសិករ កម្ពុជានឹងមានវិនិយោគិនមកបណ្តាក់ទុនលើវិស័យស្រូវអង្ករពីប្រទេសម៉ាល់ឌីវ

11
កសិកម្ម

យោងតាមការចុះផ្សាយរបស់ក្រសួងព័ត៍មាន កាលពីថ្ងៃទី16 ខែមករា ថ្មីៗកន្លងមកនេះ សម្តេចតេជោ ហ៊ុន សែន បានជួយពិភាក្សាជាមួយប្រធានាធិបតីម៉ាល់ឌី គឺឯកឧត្តម អ៊ីប្រាហ៊ីម ម៉ូហាមេដ សូលី។ នៅក្នុងជំនួបនេះសម្ដេចបានលើកទឹកចិត្តទៅដល់ វិនិយោគិនម៉ាល់ឌីវ ឲ្យមកវិនិយោគលើវិស័យស្រូវអង្ករនៅកម្ពុជា ប្រសើរជាជាងគ្រាន់តែទិញ ដើម្បីគ្រប់គ្រងលើគុណភាព និងតម្លៃ ហើយព្រមទាំងបញ្ជាក់ថា អង្ករកម្ពុជាមានឈ្មោះល្បី និងជាប់ជាអង្ករល្អបំផុតរបស់ពិភពលោក។

នៅថ្ងៃបន្ទាប់ ឯកឧត្តម សុខ ចិន្ដាសោភា អគ្គលេខាធិការនៃក្រុមប្រឹក្សាអភិវឌ្ឍន៍កម្ពុជា បានមានប្រសាសន៍ថា ប្រមុខរាជរដ្ឋាភិបាលកម្ពុជា និងប្រមុខរដ្ឋម៉ាល់ឌីវ បានឯកភាពពងឹង និងពង្រីកកិច្ចសហប្រតិបត្តិការសេដ្ឋកិច្ច វិនិយោគ និងទេសចរណ៍នៃប្រទេសទាំងពីរ។ ហើយឯកឧត្តម បានបញ្ជាក់បន្ថែមថា “សម្តេចបានផ្តល់អនុសាសន៍ បើទិញអង្ករយើងខ្ញុំអរ ប៉ុន្តែបើយកល្អ ធ្វើម៉េចឯកឧត្តម ប្រធានាធិបតីលើកទឹកចិត្តឱ្យមានអ្នកវិនិយោគិនម៉ាល់ឌីវ មកបណ្តាក់ទុនរោងចក្រម៉ាស៊ីនកិនស្រូវ មានទាំងឃ្លាំងស្តុកស្រូវ ប្រមូលទិញស្រូវពីប្រជាកសិករ ធ្វើការកិនស្រូវ វេចខ្ជប់ នឹងលក់ទៅម៉ាល់ឌីវក៏បាន និងប្រទេសផ្សេងទៀតក៏បាន”។

នៅថ្ងៃដដែលក្រសួងកសិកម្ម រុក្ខាប្រមាញ់ និង នេសាទ បានផ្សព្វផ្សាយនូវពូជស្រូវថ្មីមួយប្រភេទ គឺមានឈ្មោះថា «ចំប៉ីស៧០» ជាពូជស្រូវស្រាលក្រអូប ដែលសម្រេច​បាន​បន្ទាប់​ពី​ធ្វើ​ពិសោធន៍​និង​បង្កាត់អស់​រយៈ​ពេល​៩​ឆ្នាំ​ ដោយ​វិទ្យាស្ថាន​ស្រាវ​ជ្រាវ និង​អភិវឌ្ឍ​កសិកម្ម​កម្ពុជា (CARDI) តាមរយៈការបង្កាត់រវាងពូជស្រូវផ្ការំដួលជាប្រភេទពូជស្រូវស្រាលប្រកាន់រដូវ ដែលមានគុណភាពល្អប្រណិត ជាមួយនិងស្រឡាយស្រូវ CNI9024 ជាស្រឡាយស្រូវស្រាលមិនប្រកាន់រដូវ មានដងដើមល្អមកពីប្រទេសចិន។

សូមបញ្ជាក់ថា សហព័ន្ធស្រូវអង្ករកម្ពុជាបង្ហាញរបាយការណ៍ថា កម្ពុជាបាននាំចេញអង្ករចំនួន 63 ម៉ឺនតោន ទៅកាន់ទីផ្សារអន្តរជាតិក្នុងឆ្នាំ 2022 កើនឡើង 3,2 ភាគរយបើធៀបនឹងឆ្នាំ 2021។

កសិកម្ម