ការកំណត់គោលដៅដ៏ឆ្លាតវៃ ដែលមនុស្សគ្រប់គ្នានិយាយថា Setting Smart goals គឺអាចប្រើប្រាស់ក្នុងការកំណត់គោលដៅក្នុងជីវិតផ្ទាល់ខ្លួន កំណត់គោលដៅអាជីវកម្ម និងគោលដៅផ្សេងៗទៀតតាមការកំណត់របស់បុគ្គលម្នាក់ៗ។
ហើយដំណើរការនៃការកំណត់គោលដៅឆ្លាតវៃ ទាមទារឱ្យអ្នកមានភាពប្រាកដនិយមនៅពេលកំណត់គោលដៅ ពីព្រោះការអស់សង្ឃឹម ការបាក់ទឹកចិត្តអាចកើតមានឡើង ប្រសិនបើអ្នកកំណត់គោលដៅដែលពិបាកក្នុងការសម្រេចបាន។
ហេតុដូចនេះ ខ្លឹមសារខាងក្រោម នឹងបង្ហាញអ្នកអំពីរបៀបកំណត់គោលដៅ SMART ឬការកំណត់គោលដៅដ៏ឆ្លាតវៃដែលឆាប់សម្រេចបានលទ្ធផលខ្ពស់។
របៀបកំណត់គោលដៅ តាមក្បួន SMART
1. S= Specific មានភាពច្បាស់លាស់
អ្នកត្រូវតែកំណត់គោលដៅដែលមានភាពជាក់លាក់ ហើយអ្នកក៏ត្រូវយល់យ៉ាងច្បាស់ថា អ្នកចង់បានអ្វី និងចង់សម្រេចកិច្ចការអ្វី។ ត្រូវចងចាំថា ទោះបីជាគោលដៅរបស់អ្នកជាអ្វីក៏ដោយ ក៏ត្រូវតែធ្វើឱ្យប្រាកដថាគោលដៅរបស់អ្នកគួរតែត្រូវបានបញ្ជាក់ឱ្យច្បាស់លាស់ ហើយកំណត់នូវអ្វីដែលនឹងត្រូវសម្រេច និងសកម្មភាពដែលត្រូវអនុវត្ត ដើម្បីសម្រេចគោលដៅ។
សំណួរដើម្បីជាជំនួយដល់អ្នក៖
- តើខ្ញុំចង់សម្រេចអ្វី?
- ហេតុអ្វីខ្ញុំចង់សម្រេចគោលដៅនេះ?
- តើអ្នកណាពាក់ព័ន្ធដើម្បីចូលរួមជួយសម្រេចគោលដៅនោះ?
- តើគោលដៅនេះត្រូវសម្រេចនៅឯណា?
- តើត្រូវចាត់វិធានការអ្វីខ្លះ ដើម្បីសម្រេចបានវា?
- តើអ្វីនឹងជាឧបសគ្គ និងជាតម្រូវការដែលពាក់ព័ន្ធដើម្បីសម្រេចគោលដៅ?
2. M= Measurable អាចវាស់វែងបាន
អ្នកត្រូវមានគោលបំណងជាបរិមាណដែលអាចវាស់វែង និងអាចតាមដានអំពីស្ថានភាព និងភាពរីកចម្រើនរបស់អ្នក។ ក្នុងនោះ អ្នកអាចកំណត់ថា តើទិន្នន័យណាដែលត្រូវប្រើដើម្បីវាស់ស្ទង់គោលដៅ?
សំណួរដើម្បីជាជំនួយដល់អ្នក៖
- តើមានគោលដៅចំនួនប៉ុន្មានដែលអ្នកចង់សម្រេច?
- តើចំណាយពេលប៉ុន្មានទើបអាចសម្រេច?
- តើខ្ញុំដឹងដោយរបៀបណា ប្រសិនបើខ្ញុំបានទៅដល់គោលដៅរបស់ខ្ញុំ?
- តើអ្វីជាសូចនាករនៃវឌ្ឍនភាពរបស់ខ្ញុំ?
3. A= Achievable អាចសម្រេចបាន
គោលដៅត្រូវតែមានភាពប្រាកដនិយម ដើម្បីរក្សានូវភាពរីករាយ និងមានឆន្ទៈក្នុងការខិតខំព្យាយាមសម្រេចវា។ ការកំណត់គោលដៅខ្ពស់ គឺជាការល្អ ប៉ុន្តែអ្នកក៏ត្រូវបំបែកគោលដៅធំនោះ ជាផ្នែកតូចៗដើម្បីកាន់តែងាយស្រួលក្នុងការសម្រេច។ ប្រសិនបើគោលដៅមិនអាចសម្រេចបានទេ អ្នកប្រហែលជាត្រូវបង្កើនធនធានជាមុនសិន ដើម្បីផ្តល់ឱ្យខ្លួនឯងនូវភាពជោគជ័យ។
សំណួរដើម្បីជាជំនួយដល់អ្នក៖
- តើខ្ញុំមានធនធាន និងសមត្ថភាពដើម្បីសម្រេចគោលដៅនោះទេ?
- របៀបសម្រេចគោលដៅ
- តើមានជំនាញ ឬមានអ្វីខ្លះ ដែលជាតម្រូវការដើម្បីជួយសម្រេចគោលដៅ?
4. R= Relevant ភាពប្រាកដនិយម
គោលដៅគួរតែត្រូវគ្នានឹងបេសកកម្មរបស់ខ្លួនឯង ហើយបើធ្វើអាជីវកម្ម គួរតែកំណត់គោលដៅឱ្យត្រូវគ្នានឹងទស្សនវិស័យ និងបេសកកម្មរបស់ក្រុមហ៊ុន ដោយកុំកំណត់គោលដៅគ្រាន់តែជាលំហាត់សម្រាប់អ្វីដែលត្រូវធ្វើ។ លើសពីនេះ ដើម្បីកំណត់បានល្អ អ្នកត្រូវតែកំណត់គោលដៅណាដែលពាក់ព័ន្ធផ្សេងទៀត ដើម្បីកំណត់អត្ថប្រយោជន៍សំខាន់ៗចំពោះខ្លួនឯង ឬចំពោះក្រុមហ៊ុនជាដើម។
សំណួរដើម្បីជាជំនួយដល់អ្នក៖
- តើអ្វីជាគោលដៅអាទិភាពសម្រាប់អ្នក?
- ហេតុអ្វីបានជាខ្ញុំកំណត់គោលដៅនេះ? តើវាមានសារៈសំខាន់ខ្លាំងប៉ុណ្ណា?
5. T= Time-Bound កំណត់ពេលវេលាជាក់លាក់
គោលដៅគួរតែមានពេលវេលាកំណត់ ពីព្រោះគោលដៅដែលគ្មានកាលកំណត់ គឺមិនសូវបានធ្វើបានច្រើនទេ។ ដូច្នេះអ្នកត្រូវតែមានការកំណត់ពេលវេលានៃការចាប់ផ្ដើម និងពេលវេលាដែលត្រូវសម្រេចបានឱ្យជាក់លាក់ ដើម្បីអ្នកអាចវាយតម្លៃភាពជោគជ័យនៃការព្យាយាមរបស់អ្នក និងអាចកំណត់គោលដៅថ្មីបន្តទៀត។
សំណួរដើម្បីជាជំនួយដល់អ្នក៖
- តើអ្នកចង់សម្រេចគោលដៅរបស់អ្នកនៅពេលណា?
- តើត្រូវចាប់ផ្ដើមពីពេលណា និងបញ្ចប់ពីពេលណា?
