ការពារគណនី Facebook របស់អ្នកពីការ Hack

2037

បណ្តាញសង្គម Facebook ត្រូវបានមហាជនខ្មែរនិយមប្រើប្រាស់ក្នុងការទំនាក់ទំនង ផ្សព្វផ្សាយ ធ្វើពាណិជ្ជកម្ម តាមដានព័ត៌មានប្រចាំថ្ងៃ និងការកំសាន្តជាដើម។ ក៏ប៉ុន្តែ​មួយរយៈ​​ចុងក្រោយ​​នេះ​​ យើង​សង្កេត​​ឃើញថា​គណនី​​Facebook​​ជាច្រើន​​ ត្រូវបាន​គេ​Hack​​ចូល​ និង​ប្រើប្រាស់​ក្នុងផ្លូវអប្បាយមុខនានា ដូចជាឆបោកប្រាក់ ក្នុងរូបភាពខ្ចីប្រាក់អ្នកដែលស្គាល់គ្នា​ ឬទាញយក​ទិន្នន័យ​ផ្សេងៗ ដើម្បីប្រើប្រាស់ក្នុងផ្លូវអាក្រក់​ ពិសេសចំពោះថ្នាក់ដឹកនាំ ឬបុគ្គលសំខាន់ៗ ដែលអាចបណ្តាលឲ្យប៉ះពាល់ដល់កេរ្ត៍ឈ្មោះ​របស់បុគ្គលនោះ។ ថ្ងៃនេះ គំនិត សូមបង្ហាញពីវិធីសាស្ត្រ   ក្នុងការការពារគណនី Facebook របស់អ្នកពីការ Hackចូល។

១. ប្រើប្រាស់លេខសម្ងាត់ (Password) ដែលពិបាកក្នុងការទាយ

ជាការពិតណាស់ ការដាក់លេខសម្ងាត់ដែលពិបាកទាយគឺជាវិធីសាស្ត្រដ៏ងាយស្រួល និងសាមញ្ញមួយក្នុងការរក្សាគណនីរបស់អ្នកឲ្យមានសុវត្ថិភាព។ ប៉ុន្តែមនុស្សភាគច្រើនបានដាក់នូវលេខសម្ងាត់ដែលពួកគេងាយស្រួលចាំនៅពេលបង្កើតគណនីដំបូង ដូចជាលេខថ្ងៃ ខែ ឆ្នាំកំណើត ជាដើមដែលមានការងាយស្រួលក្នុងការ Hackចូលយ៉ាង​ខ្លាំង​។ ដូច្នេះប្រសិនបើលោកអ្នកយល់ថាលេខសម្ងាត់របស់អ្នកមានលក្ខណៈដូចដែលបានរៀបរាប់ គំនិត សូមណែនាំឲ្យលោកអ្នកផ្លាស់ប្តូរវាចេញ ដោយជំនួសមកវិញនូវ​ លេខសម្ងាត់ដែលខ្លាំង និងពិបាកក្នុងការទាយ។

គម្រូ Password ដែលខ្លាំង

២. ជៀសវាងការរក្សាទុកលេខសម្ងាត់នៅទីសាធារណៈ

អ្នកដែលប្រើប្រាស់បណ្តាញសង្គមនៅទីសាធារណៈ ជាពិសេសគឺកុំព្យូទ័រនៅតាមហាងកាហ្វេ ឬកន្លែងដែលផ្តល់សេវាអ៊ីនធឺណេតតែម្តង ព្រោះថាគេអាចនឹងទាញយកទិន្នន័យពីអ្នកបានដោយងាយ។ ហេតុដូចនេះអ្នក ចាំបាច់ត្រូវធ្វើការចាកចេញ (Log Out) នៅពេលប្រើប្រាស់រួច ព្រមទាំងលុបចោលនូវសកម្មភាពអ្វីដែលអ្នកបានប្រើរួច (Clear History)។

៣. កុំលេងល្បែងប្រភេទ Instant App នៅលើបណ្តាញសង្គម

ល្បែងប្រភេទ Instant App នៅលើបណ្តាញសង្គមជាច្រើន ដូចជាល្បែងទស្សន៍ទាយចរិក ឬទស្សន៍ទាយថ្ងៃអនាគត​ និងប្រភេទកម្មវិធីផ្លាស់ប្តូរមុខទៅតាមអាយុផ្សេងៗសុទ្ធតែអាចធ្វើឲ្យអ្នកបាត់បង់ទិន្នន័យ ក៏ដូចជាគណនីដោយមិនដឹងខ្លួន។ ព្រោះនៅពេលដែលអ្នកលេងប្រភេទ Instant App ទាំងនោះប្រៀបបានដូចជាអ្នកអនុញ្ញាតឲ្យគេយកព័ត៌មានពីអ្នករួចទៅហើយ។

៤. ប្រើប្រាស់ប្រព័ន្ធចាក់សោពីរជាន់ (Two-factor authentication)

ប្រព័ន្ធចាក់សោពីរជាន់ ឬ Two-factor authentication នេះគឺជាប្រព័ន្ធមុខងារសុវត្ថិភាពមួយដែលក្រុមហ៊ុន Facebook បានដាក់ឲ្យប្រើប្រាស់តាំងពីឆ្នាំ ២០១៧កន្លងម្ល៉េះ។  ដោយប្រព័ន្ធសុវត្ថិភាពនេះទាមទារឲ្យអ្នកដាក់នូវលេខកូដចំនួន០៦ខ្ទង់ និងដាក់លេខទូរស័ព្ទ ឬ Email ដែលអ្នកប្រើប្រាស់ចូល ហើយវានឹងលោតជាសារនៅលើទូរស័ព្ទ ឬ Email របស់អ្នកនៅពេលដែលមានមនុស្ស ឬ Device ប្លែកមុខដូច (កុំព្យូទ័រ Smart Phone…)ចង់ចូលទៅកាន់គណនីរបស់អ្នក​។

Previous articleតើសៀវភៅបានផ្តល់ប្រយោជន៍អ្វីខ្លះដល់អ្នកអាន?
Next articleមនុស្ស​៧​ប្រភេទដែលមិនអាចទិញអចលនទ្រព្យបាន ទោះក្នុង​ស្ថានភាពណាក៏ដោយ
លោក ខៀក វិទ្យារតនៈ គឺជាអ្នកបង្កើត និងសរសេរមាតិការនៅក្នុងគេហទំព័រ គំនិត ផ្នែកបច្ចេកវិទ្យា ផ្នែកយុទ្ធសាស្ត្រទីផ្សារឌីជីថល ផ្នែកធុរកិច្ច និងផ្នែកចំណេះដឹងទូទៅ។ សព្វថ្ងៃនេះ លោកមានតួនាទីជា Business Development Manager ដែលកំពុងតែបម្រើការងារនៅក្នុងហាងសៀវភៅអនឡាញ Naek Arn ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន គំនិត។ ចំពោះប្រវត្តិសិក្សាវិញ លោកគឺជានិស្សិតដែលបញ្ចប់ការសិក្សាផ្នែក វិទ្យាសាស្ត្រពាណិជ្ជកម្មអេឡិចត្រូនិក និងភស្តុភារកម្ម (Science of eCommerece & Logistics) ពីវិទ្យាស្ថានជាតិ និបតិក (NIPTICT) ក៏ដូចជានិស្សិតដែលបញ្ចប់ការសិក្សាថ្នាក់បរិញ្ញាប័ត្រ ផ្នែក Professional Communication នៅសកលវិទ្យាល័យភូមិន្ទភ្នំពេញផងដែរ (RUPP)។ មិនត្រឹមតែប៉ុណ្ណោះ លោកក៏ជាអ្នកជំនាញខាងផ្នែក Digital Marketing Associate ដែលមានវិញ្ញាបនប័ត្រទទួលស្គាល់ដោយក្រុមហ៊ុន Facebook ផ្ទាល់ផងដែរ។ លោកក៏ជាមនុស្សដែលចូលចិត្តវិភាគវែកញែកនៅលើប្រធានបទផ្សេងៗ ស្វែងយល់ពីអ្វីថ្មីៗ ចូលចិត្តការធ្វើដំណើរកម្សាន្តដើម្បីរៀនពីបរិបទសង្គម និងតាមដានគ្រប់ព័ត៌មានទូទៅទាំងក្នុង និងក្រៅប្រទេស៕