នៅពេលដែលនិយាយអំពីការប្រើប្រាស់យុទ្ធសាស្ត្រទីផ្សារតាមប្រព័ន្ធឌីជីថល ប្រាកដណាស់មនុស្សភាគច្រើនគិតទៅដល់ការប្រើប្រាស់យុទ្ធសាស្ត្រផ្សព្វផ្សាយនៅបណ្តាញសង្គមដូចជា Facebook និង Instagram ហើយសម្រាប់អ្នកមួយចំនួនបានគិតរហូតដល់ការផ្សព្វផ្សាយតាម Youtube ឬ Google ឬតាម Emailជាដើម។
ប៉ុន្តែសម្រាប់ម្ចាស់អាជីវកម្ម និងក្រុមហ៊ុនភាគច្រើននៅប្រទេសកម្ពជានាឱកាសបុណ្យចូលឆ្នាំ យើងសង្កេតឃើញថា ពួកគាត់បានផ្តោតទៅលើការបង្កើតមាតិការដើម្បីបង្ហោះលើ Facebook ដែលជាបណ្តាញសង្គមធំជាងគេ និងពេញនិយមជាងគេពីសំណាក់អ្នកប្រើប្រាស់នៅប្រទេសកម្ពុជា។ មាតិការភាគច្រើនគឺផ្តោតលើការរចនារូបភាពជូនពរបុណ្យចូលឆ្នាំ ហើយសម្រាប់ក្រុមហ៊ុនមួយចំនួនបានចំណាយលុយបង្កើតវីដេអូពាណិជ្ជកម្មដែលទាក់ទងនឹងបុណ្យចូលឆ្នាំប្រពៃណីជាតិខ្មែរ វីដេអូខ្លះពោរពេញដោយភាពសប្បាយរីករាយ រីឯវីដេអូខ្លះទៀតគឺមានបញ្ចូលអារម្មណ៍រំជួលចិត្តដើម្បីទាក់ទាញប្រជាប្រិយភាពពីសំណាក់ប្រើប្រាស់បណ្តាញសង្គមឱ្យគេចែករំលែកតគ្នា។
ប៉ុន្តែក្នុងចំណោមក្រុមហ៊ុន និងអាជីវកម្មទាំងអស់ ខ្ញុំសង្កេតឃើញថា ក្រុមហ៊ុនភេសជ្ជៈមួយដែលមានយុទ្ធសាស្ត្រប្លែកពីគេ និងល្អជាងគេ ដោយគាត់មិនត្រឹមតែបង្កើតវីដេអូ ឬរូបភាពជូនពរទេ គឺគាត់គិតរហូតដល់ការឧបត្ថមបង្កើតកម្មវិធីទូរស័ព្ទមួយដែលមានរូបត្លុកតុក្កតាសម្រាប់បុណ្យចូលឆ្នាំប្រពៃណីជាតិ នោះគឺក្រុមហ៊ុន Pepsi។ហេតុអ្វីខ្ញុំនិយាយថាប្លែកគេ និងល្អជាងគេ? ពីព្រោះថា នៅពេលដែលក្រុមហ៊ុនផ្សេងៗផ្តោតតែបង្កើតមាតិការដែលគេពេញនិយមដូចជាសារជូនពរ ឬវីដេអូចូលឆ្នាំ ក្រុមហ៊ុនPepsi បានប្រើប្រាស់យុទ្ធសាស្ត្រមួយថ្មីគឺសហការជាមួយនឹងកម្មវិធី (App) ទូរស័ព្ទបង្កើតជារូបតុក្កតាត្លុកពិសេសសម្រាប់បុណ្យចូលឆ្នាំ ដែលអ្នកប្រើប្រាស់អាចបញ្ចូលមុខរបស់គេទៅក្នុងតុក្កតានោះ ហើយអាចបង្កើតបានជាវីដេអូឆៃយ៉ាំ និងកវីដេអូជិះកង់ទៅវត្តដែលមានមុខអ្នកប្រើប្រាស់នោះ។
ហេតុអ្វីបានជាវិធីសាស្ត្រផ្សព្វផ្សាយដ៏ល្អ? ព្រោះថា កម្មវិធីដែលអាចបង្ហោះជាវីដេអូស្របពេលបុណ្យទានបែបនេះគឺស្ទើរតែមិនមានទេនៅក្នុងពិភពអាជីវកម្មនាសម័យឌីជីថលនេះក្នុងប្រទេសកម្ពុជា ហើយនៅពេលដែលមានកម្មវិធីបែបនេះ អ្នកបង្កើតពិតណាស់បានធ្វើឡើងដើម្បីបំពេញចិត្តអ្នកប្រើប្រាស់ដែលស៊ីនឹងទ្រឹស្តីចិត្តសាស្ត្រសង្គមមួយគឺ Social Currency (ចូលចិត្តបង្ហាញអ្វីដែលខ្លួនមានអារម្មណ៍ថាប្លែក និងអស្ចារ្យ) ហើយរូបភាពដែលប្លែក និងកំប្លុកកំប្លែងបែបនេះ នៅពេលដែលអ្នកដទៃឃើញប្រាកដជាធ្វើតាម និងចែករំលែកតៗគ្នាបង្កើតបានជាសកម្មភាពផុសផុល (Viral)នៅក្នុងពិភពបណ្តាញសង្គម ហើយនេះជាអ្វីដែលក្រុមហ៊ុននីមួយចង់បាននៅលើបណ្តាញសង្គម។ នៅក្នុងរូបវីដេអូនោះ ក៏មានបង្កប់ទឹកក្រូច Pepsi នៅគ្រប់ប្រភេទវីដេអូទាំងអស់ ដែលជាវិធីសាស្ត្រមួយឱ្យអ្នកប្រើប្រាស់មានឱកាសមើលឃើញទឹកក្រូច Pepsi កាន់តែច្រើន។
តើPepsiចំណេញអ្វីពីរូបទឹកក្រូចនៅក្នុងវីដេអូតុក្កតានោះ? Pepsi បានចំណេញនូវចំនួនមនុស្សកាន់តែច្រើនឃើញផលិតផលរបស់ខ្លួន ដែលជាអ្វីដែលអ្នកទីផ្សារចង់បានបំផុត ព្រោះថា នៅពេលដែលយើងឃើញកាន់តែច្រើនដង យើងនឹងចងចាំម៉ាកសញ្ញានោះ ហើយក៏ជាកត្តាមួយដើម្បីឱ្យអតិថិជនសម្រេចចិត្តជ្រើសរើសម៉ាកសញ្ញានោះលើម៉ាកសញ្ញាផ្សេងៗទៀត។
តើអ្នកបានប្រើប្រាស់កម្មវិធីបង្កើតវីដែអូចូលឆ្នាំដែរឬទេ?
