spot_img
spot_img
Homeធុរកិច្ចតើគួរដាក់តម្លៃប៉ុន្មានល្អ? 10 យុទ្ធសាស្រ្តតម្លៃលក់រាយ (ភាគ១)

តើគួរដាក់តម្លៃប៉ុន្មានល្អ? 10 យុទ្ធសាស្រ្តតម្លៃលក់រាយ (ភាគ១)

-

ការ​ដាក់​តម្លៃ​ផលិត​ផល​ឲ្យ​បាន​ត្រឹម​ត្រូវ​គឺ​ជា​ការ​បង្កើត​តុល្យ​ការ​សម្រាប់​អាជីវកម្ម។​ ការ​ដាក់​តម្លៃ​ទាប​មិន​មែន​ជា​វិធី​សាស្រ្ត​ល្អ​បំផុត​ទេ ទោះ​បី​ជា​ចំនួន​នៃ​ការ​លក់​មាន​ច្រើន​​ប៉ុន្តែ​អាច​នឹង​មិន​ចំណេញ​ប៉ុន្មាន​ទេ។ ដូច​គ្នា​ដែរ ចំពោះ​ការ​ដាក់​តម្លៃ​ខ្ពស់​អាច​មាន​ចំនួន​លក់​តិច​ ហើយ​ជម្រុះ​ចេញ “​អតិថិជន​ដែលការចំណាយ​មាន​កំណត់​​” ដូច្នេះ​នាំ​ឲ្យបាត់​បង់​​ចំណែក​ទីផ្សារ​ខ្លះ។

គ្រប់​អាជីវកម្ម​ទាំង​អស់​ត្រូវ​តែ​គិត​គូរ​អំពី​ចំណុច​នេះ​។ ហើយម្ចាស់​អាជីវកម្ម​ត្រូវ​តែ​ពិចារណាដោយ​​ផ្អែក​ទៅ​លើ​កត្តា​មួយ​ចំនួន​ដូច​ជា​​ ការ​ផលិត​ ការ​ចំណាយ​ ចំណូល​ប៉ាន់​ស្មាន​ និង​តម្លៃ​របស់​ដៃ​គូរ​ប្រជែង។ ការ​ដាក់​តម្លៃ​មិន​ថា​ទៅ​លើ​ទំនិញ​ថ្មី ​ឬ​ទំនិញ​ដែល​មាន​ស្រាប់ មិន​មែន​គ្រាន់តែ​​ជា​ ការ​គណនា​គណិតវិទ្យា​ឡើយ។ តាម​ពិត​ទៅ​ ការ​គណនា​តួរ​លេខ​គឺ​គ្រាប់​តែ​ជា​ជំហាន​ដំបូង​មួយ​នៅ​ក្នុង​ដំណើរ​ការ​ទាំង​មូល​ប៉ុណ្ណោះ​។

តួរ​លេខ​គឺ​ជា​ការ​គិត​បែប​តក្ក។ ផ្ទុយ​មក​វិញ​ អតិថិជន​ទិញ​គឺអាស្រ័យ​ពាក់​ព័ន្ធទៅ​នឹង​ចិត្ត​សាស្រ្ត។​ ពួក​យើង​ត្រូវ​តែ​គណនា​តួរ​លេខ​ ប៉ុន្តែ​យើង​ត្រូវ​តែ​ដើរ​មួយ​ជំហាន​ទៀត​​ដែល​មិន​មែន​ជា​ការ​និ​យាយ​អំពី​ការ​គណនាតួរលេខ​​។​

សិល្បៈ​នៃ​ការ​ដាក់​តម្លៃ​ ទាម​ទារ​ឲ្យ​អ្នក​គណនា​ “ឥទ្ធិពល​នៃអាកប្បកិរិយា​មនុស្ស​ទៅ​លើ​ការ​មើល​ឃើញ​អំពី​តម្លៃ”។

ដើម្បីដាក់​តម្លៃ​ផលិតផល​​ អ្នក​ត្រូវ​តែ​សិក្សា​អំពី​យុទ្ធសាស្រ្ត​ដាក់​តម្លៃ​នីមួយៗ និង​ឥទ្ធិពល​ចិត្ត​សាស្រ្ត​ដែលវា​មាន​ទៅ​លើ​អតិថិជន​ ហើយ​អ្នក​អាច​ជ្រើស​រើស​យុទ្ធសាស្រ្ត​មួយ​ដែល​សាក​សម​សម្រាប់​អាជីវកម្ម​ក៏​ដូច​ជា​ផលិត​ផល​របស់​អ្នក​។​

១/ តម្លៃ​លក់​រាយ​៖ ការ​ជ្រើស​រើស​យុទ្ធសាស្រ្ត​​តម្លៃ​​ដែល​ត្រឹម​ត្រូវ​

អាជីវកម្ម​លក់​រាយ​ជា​ច្រើន​ប្រើ​ ការ​ដាក់​តម្លៃ​ឃីស្តូន​​ (ហៅ​ថា keystone pricing។ ខ្ញុំ​នឹង​និយាយបន្ថែម​​នៅ​ខាង​ក្រោម) ដែល​ជា​វីធី​គុណ​​ថ្លៃដើមទ្វេរដង​។ ទោះ​បី​យ៉ាង​ណា​ក៏​ដោយ​ អ្នក​នឹង​ត្រូវ​​​ ​ម៉ាខ​អាប់​ (ហៅ​ថា mark up = ភាពខុសគ្នារវាងតម្លៃលក់និងថ្លៃដើមផលិតផលគិតជាភាគរយនៃថ្លៃដើម) ខ្ពស់​ ឬ​ទាប​ជាង​នេះ អាស្រ័យ​លើ​ស្ថាន​ភាព​ជាក់​ស្តែង។​

នេះ​គឺ​ជា​រូបមន្តងាយៗ​ដើម្បី​គណនា​តម្លៃ​លក់​រាយ​៖

តម្លៃលក់រាយ= ថ្លៃដើមទំនិញ/ ( 100-ភាគរយ​ម៉ាខ​អាប់) x 100

ឧទាហរណ៍​ អ្នក​ចង់​ដាក់​តម្លៃ​ផលិតផល​មួយ​ដែល​មាន​ថ្លៃ​ដើម​ $15 ដោយការ​ម៉ាខ​អាប់ 45% ជំនួស​ឲ្យ​ការ​ម៉ាខ​អាប់ទូទៅ​ 50%។ អ្នក​នឹង​ត្រូវ​គណនា​ដូច​ខាង​ក្រោម៖

តម្លៃលក់រាយ= $15/ ( 100%-45%) x 100

=15/55 x 100

=$27

រូប​មន្ត​​ម៉ាខ​អាប់​នេះ​សាមញ្ញ​ ប៉ុន្តែ​មិនសាកសម​សម្រាប់​គ្រប់​ប្រភេទផលិតផលទេ។ ពីព្រោះ​អាជីវកម្ម​ទាំង​អស់​មិន​ដូច​គ្នា​ ដូច្នេះ​គំនិត​សូម​លើក​បង្ហាញ​វិធី​សាស្រ្ត​​១០​ក្នុង​ការ​ដាក់​តម្លៃ​ដែល​ពេញ​និយម​ ភ្ជាប់​ជាមួយ​ការ​បក​ស្រាយ​អំពី​គុណ​សម្បត្តិ​និង​គុណ​វិបត្តិ​នៃ​វីធីសាស្រ្ត​នីមួយៗ ដើម្បី​អាច​ឲ្យ​ការ​ជ្រើសរើស​របស់​អ្នក​មាន​ភាព​ងាយ​ស្រួល​បន្តិច។

២/ តម្លៃលក់​រាយ​​ចេញ​ដោយ​រោង​ចក្រផលិត MSRP ​ (MSRP=manufacturer suggested retail price)

ដូចទៅ​នឹង​​ឈ្មោះ​របស់វិធីសាស្រ្ត​នេះ​ MSRP គឺជា​តម្លៃលក់​រាយ ​ដែល​រោង​ចក្រណែ​នាំ​​អ្នកចែក​ចាយ​ផលិផលរបស់​ពួកគេ លក់ទៅ​កាន់​អតិថិជន​​។ រោង​ចក្រ​ប្រើ​ប្រាស់​​វិធីសាស្រ្ត​​ MSRP ដើម្បី​បង្កើត​ស្តង់​ដារ​តម្លៃ​សម្រាប់​ផលិតផល​គ្រប់​ទីកន្លែង​​និង​អ្នក​ចែក​ចាយរាយ។

អាជីវកម្ម​ប្រើវិធីសាស្រ្ត​​ MSRP សម្រាប់​ផលិតផល​ស្តង់​ដារខ្ពស់​​ដូច​ជា​គ្រឿងអេឡិច​ត្រូនិក​ជាដើម​។

គុណ​សម្បត្តិ៖ អ្នក​​ចំណេញ​ពេល​វេលា មិនចាំ​បាច់​​គិត​គូរ​អំពី​តម្លៃ​គឺ​គ្រាន់​តែ​ដាក់​តម្លៃ​តាម​ការ​កំណត់​ពី​រោង​ចក្រ​ផលិត។

គុណ​វិបត្តិ​៖ អាជីវកម្ម​ដែល​ប្រើ​ MSRP ជា​​ធម្មតា​មិន​អាច​ប្រកួត​លើ​តម្លៃ​បាន​ទេ ពី​ព្រោះ​គ្រប់​គ្នា​​លក់ក្នុង​តម្លៃ​ដូច​គ្នា​។

៣/ ការ​ដាក់​តម្លៃ​ ​ ឃី​ស្តូន (Keystone pricing)

វា​គឺ​ជា​វិធី​សាស្រ្ត​សាមញ្ញ​មួយដែល​ងាយ​ស្រួល​​។ អ្នក​គ្រាន់​តែ​គុណ​ថ្លៃ​ដើម​ទ្វេរ​ដង​ ដើម្បីទទួល​បាន​តម្លៃ​លក់​រាយ។ ប៉ុន្តែ​មាន​កាលៈទេសៈ​ច្រើន​ដែល​ការ​ដាក់​តម្លៃ​តាម​វីធី​នេះ​អាច​ធ្វើ​ឲ្យ​តម្លៃ​លក់​រាយ​ ទាប​ពេក​ ខ្ពស់​ពេក​ ឬក៏​ត្រូវ​ល្មម​ជាមួយ​អាជីវកម្ម​។

ប្រសិន​បើ​អ្នក​មាន​ផលិតផល​ដែលមាន​​រង្វិល​ការ​លក់​យឺត​ និង​ចំណាយ​ច្រើន​លើ​ការ​ដឹក​ជញ្ជូន​និង​ការស្តុក ហើយ​វាមាន​លក្ខណៈពិសេស​ឬ​មិនមាន​អ្នក​​លក់​​ទូលំ​ទូលាយ​ ដូច្នេះ​អ្នក​ប្រហែល​មិន​សូវ​ចំណេញ​ទេ​បើ​ដាក់​តម្លៃ​តាម​ ឃីស្តូន​។ ក្នុង​ករណី​នេះ​អ្នក​អាច​ប្រើ​ការ​ម៉ាខ​អាប់​ខ្ពស់​ជាង​នេះ​ ដើម្បី​បង្កើន​តម្លៃ​លក់​រាយ​សម្រាប់​  “ផលិតផល​មាន​តម្រូវ​ការ”​ ទាំងនេះ។​

ម៉្យាង​ទៀត​ ប្រសិន​បើ​ផលិតផល​អ្នក​មាន​អ្នក​លក់​ច្រើន​និង​ងាយ​រកទិញ​​បាន​ ការ​ដាក់​​តម្លៃ​ ឃីស្តូន​ អាច​នឹង​ពិបាក​លក់​ចេញ។

គុណ​សម្បត្តិ៖ ការ​ដាក់​តម្លៃ​តាម​ឃីស្តូន ងាយ​និង​លឿន​ ហើយ​ទទួល​បាន​ប្រាក់​ចំណេញម៉ាជីន​​ច្រើន។

គុណ​វិបត្តិ៖ វាអាស្រ័យ​ទៅលើ ភាពងាយ​ស្រួល​រក​ទិញ​ និង​តម្រូវ​ការ​​របស់​ផលិផល​មួយ​។  ការ​ដាក់​តាម​ឃីស្តូន​អាច​មាន​តម្លៃ​ថ្លៃ​ពេក​សម្រាប់​អតិថិជន។

តើមានការដាក់តម្លៃបែបណាទៀតដើម្បីជម្រុញការលក់? តើអាចទេបើហាងលក់ខាតដើម?

ចម្លើយមាននៅក្នុងអត្ថបទបន្ត។ សូមរង់ចាំតាមដាន។

Suos Sovanna
Suos Sovannahttp://www.kumnitcreative.com
អំពី អ្នកនិពន្ធៈ សុវណ្ណា​ គឺជាសហស្ថាបនិកនៃហាងសៀវភៅអញឡាញអ្នកអាន និងជាអ្នកគ្រប់គ្រងផ្នែកទីផ្សារទំនើបនៅស្ថាប័នដដែលនេះ។

រៀនពីអ្វីថ្មីៗ

spot_img

អត្ថបទថ្មិៗ