- ពាក្យចាស់លោកថា “កើតចាស់ឈឺស្លាប់ជារឿងធម្មតា” ចុះបើមនុស្សមិនចេះឈឺមិនចេះចាស់ តើមនុស្សអាចស្លាប់បានដែរ ឬទេ ? យើងរស់នៅ និង ធំដឹងក្តីក្នុងច្បាប់ធម្មជាតិមួយដែលធ្វើឲ្យយើងជឿថាការស្លាប់គឺជារឿងមួយដែលមិនអាចគេចបានឡើយ ។ ចុះបើ “គំនិត” ប្រាប់ថាអ្នកអាចមានជីវិតអមតៈ តើអ្នកចង់បានវាដែរ ឬទេ ? តើអ្នកនឹងធ្វើអ្វីខ្លះ ?
ការគិតពីជីវិតអមតៈហាក់បីដូចជារឿងប្រឌិតមួយជាពិសេសនៅក្នុងសតវត្សទី ១៨ ដែលមនុស្សមានអាយុរស់នៅជាមធ្យមតិចជាង៤០ឆ្នាំ ។ ប៉ុន្តែជីវិតរស់នៅជាមធម្យលើពិភពលោកនៅឆ្នាំ ២០០១ គឺបានកើនឡើងរហូតដល់ទៅ ៦៥ឆ្នាំ ហើយនៅប្រទេសជឿនលឿនមួយចំនួនអាយុរស់នៅជាមធម្យនេះ បានកើនឡើងដល់ទៅ ៨០-៨៥ ឆ្នាំឯនោះ ។ អ្នកវិទ្យាសាស្រ្តជឿថាអាយុរស់នៅជាមធម្យអាចកើនឡើងទ្វេរដងម្តងទៀតក្នុងរយៈពេល២០០ឆ្នាំទៅមុខ ។ តើវាអាចកើនឡើងរហូតដល់ជីវិតអមតៈដែរ ឬទេ ?
អ្នកស្រាវជ្រាវជឿថាជីវិតគឺមានដែនកំនត់ពួកគេបានបញ្ជាក់ថាអាយុអតិបរមារបស់មនុស្សគឺ ១២៥ឆ្នាំ ។ ប៉ុន្តែអ្នកស្រាវជ្រាវខ្លះមើលពិភពលោកទៅអនាគតពោរពេញទៅដោយមនុស្សដែលមានអាយុរាប់សតវត្សដែលខ្លះអាចមានអាយុរហូតពី ៥០០ ទៅ ១០០០ឆ្នាំក៏មាន ។ ជំងឺដែលទាក់ទងទៅនឹងភាពចាស់ជរាដូចជា ជំងឺរវើរវាយនៅពេលចាស់ និង ជំងឺគាំងបេះដូងគឺជាឧបសគ្គដែលរារាំងយើងមិនឲ្យទៅដល់ចំនុចនោះបាន (ជីវិតអមតៈ) ។
សារពាង្គកាយរបស់មនុស្សយើងចុះខ្សោយទៅតាមអាយុកាលដែលនៅទីបំផុតធ្វើឲ្យយើងស្លាប់ ដូចនេះក្នុងការស្វែងរកជីវិតអមតៈអ្នកវិទ្យាសាស្រ្តបានផ្តោតសំខាន់ទៅលើការបញ្ឈប់ភាពចាស់ជរារបស់រាងកាយ ។
១ វិធីសាស្រ្តមួយដែលបានបង្ហាញអំពីការបង្កើនអាយុរបស់សត្វដូចជាសត្វកណ្តុរគឺ “ការតមអាហារដែលមានកាឡូរីក្នុងលក្ខខ័ណ្ឌសមស្របមួយ” ។ ដើម្បីធ្វើការតមអាហារនេះឲ្យបានតត្រឹមត្រូវ អ្នកត្រូវកាត់បន្ថយការទទួលយកកាឡូរីចំនួន ៣០% ពីក្នុងអាហាររបស់អ្នក ប៉ុន្តែអ្នកត្រូវរក្សាការបរិភោគគ្រប់សារធាតុបំប៉នដែលចាំបាច់ទាំងអស់ ។ គ្រោងការនៃការបរិភោគបែបនេះបានបង្ហាញថាវាពិតជាពិបាកណាស់សម្រាប់មនុស្សក្នុងការអនុវត្តន៍តាម ដូចនេះអ្នកស្រាវជ្រាវកំពុងព្យាយាមរកពីមូលហេតុច្បាស់លាស់មួយថា ហេតុអ្វីបានជាការកាត់បន្ថយកាឡួរីអាចជួយដល់ការបង្កើនអាយុបាន ? បើសិនជាពួកគេអាចដោះស្រាយចម្ងល់នេះបាន ពួកគេប្រហែលជាអាចចម្លងយន្តការនេះទៅក្នុងទម្រង់ជាលក្ខណៈថ្នាំបាន ។
២ ថ្នាំប្រឆាំងភាពចាស់ជរាអាចជួយដល់ការផ្អាក ឬ បញ្ឈប់ដំនើរការផលិតរបស់ “ប្រតិកម្មម៉ូលេគុល” ដែលជាម៉ូលេគុលធ្វើឲ្យមានការកើនឡើងនៃការខូចខាតនៅក្នុងរាងកាយនៅពេលដែលយើងមានអាយុកាន់តែច្រើន ។ អ្នកស្រាវជ្រាវកំពុងធ្វើការសន្និដ្ឋានថាតើសារធាតុខ្លះដូចជាសារធាតុ “Resveratrol” ដែលគេរកឃើញមាននៅក្នុងស្រាក្រហមអាចមានប្រសិទ្ធិភាពដែរ ឬទេ ? នៅពេលដែលវាមានទម្រង់ជាលក្ខណៈថ្នាំ ព្រោះថាសារធាតុ “Resveratrol” អាចមានសមត្ថភាពបង្អាក់ដំនើរការនៃភាពចាស់ជរានៅក្នុងកំរិតពូជបាន ។
អ្នកវិទ្យាសាស្រ្តខ្លះគិតថាអង់ស៊ីម “Telomoras” ដែលជាអង់ស៊ីមជួយសះស្រទាប់ការពាររបស់កោសិកាគឺជាចម្លើយ (ទៅរកជីវិតអមតៈ) ហើយអ្នកខ្លះវិញគិតថាការចាក់អ័រម៉ូនដែលផលិតដោយមនុស្សអាចបញ្ឍប់រាងកាយទៅរកចាស់ជរាបាន ។
វាប្រាកដហើយថាមានទ្រឹស្តីបទជាច្រើនដែលអាចប្រាប់ពីវិធីនៃការបញ្ឍប់ភាពចាស់ជរា ប៉ុន្តែទ្រឺស្តីបទខ្លះវាត្រូវការរយៈពេលយូរទៅមុខទៀត ឧទាហរណ៍ដូចជាថ្នាំប្រឆាំងមិនឲ្យចាស់ជាដើម ។ បើសិនជាយើងអាចបង្កើតថ្នាំនោះបានមែន វានៅមានការប្រកួតប្រជែងផ្សេងទៀតដូចជា តើមនុស្សអាចរស់នៅបានអាយុប៉ុន្មានហើយមុនពេលមិនទាន់ប្រើប្រាស់ថ្នាំ ។ បន្ថែមពីនេះទៅទៀតបើទោះបី ការសិក្សាអំពីមូលហេតុដែលធ្វើឲ្យកណ្តុររស់បានយូរអាចធ្វើទៅបានហើយក៏ដោយ ចំពោះការសិក្សាអំពីមនុស្សអាចត្រូវការរយៈពេលពី ៧៥ ទៅ ៨០ឆ្នាំទៀតឯនោះ ។
អ្នកវិទ្យាសាស្ត្រខ្លះពុំចង់ចាំរហូតដល់ ៧៥ ទៅ ៨០ឆ្នាំទេតួយ៉ាងលោក Ray kurweil គាត់បានអះអាងថាព្រឹត្តិការណ៍មួយដែលគេឲ្យឈ្មោះថា “ភាពចម្លែក” (Singularity) នឹងកើតមានឡើងដែលនៅពេលនោះមនុស្សនឹងក្លាយទៅជាម៉ាស៊ីន ។ សាច់ និង ឈាមគឺមិនមែនជាវត្ថុធាតុឥតខ្ចោះសម្រាប់ភាពយូរអង្វែងឡើយ ដូចនេះគេនឹងផ្លាស់ប្តូរវាជាមួយវត្ថុធាតុដែលអាចប្រើប្រាស់បានយូរវិញ ។ ជនអនាគតនិយមមួយចំនួនមើលឃើញអនាគតទៅមុខថាពិភពលោកគឺជាកន្លែងមួយដែលកុំព្យូទ័រគឺជាឧបករណ៍មួយមានតួនាទីរក្សាទុកខួរក្បាលរបស់មនុស្ស ហើយធាតុស៊ីលីកូនជាវត្ថុធ្វើជាផ្នែកសម្រាប់ជំនួសអវៈយវៈទន់ខ្សោយ ។
នៅពេលដែលអ្នកវិទ្យាសាស្រ្តកំពុងដោះស្រាយពីបញ្ហាថាតើ ម៉ាស៊ីន ឬ ការចាក់បញ្ចូលធាតុ “Resveratrol” អាចអ្វើឲ្យយើងមានជីវិតអមតៈនោះ វិធីដែលល្អបំផុតនោះគឺអ្នកគួររីករាយជាមួយពេលវេលាដែលអ្នកកំពុងមាន ៕
ដកស្រង់ និង កែសម្រួលពី: http://science.howstuffworks.com/environmental/life/genetic/humans-live-forever.htm
