តើសៀវភៅបានផ្តល់ប្រយោជន៍អ្វីខ្លះដល់អ្នកអាន?

7382

 

ការអានសៀវភៅពិតជាមានសារៈសំខាន់ ព្រមទាំងផ្តល់នូវអត្ថប្រយោជន៍យ៉ាងសម្បូរបែបដល់អ្នកដែលចូលចិត្តអានវា ព្រោះថានៅក្នុងសកលភាវូបនីយកម្មនេះ វាចាំបាច់ទាមទារឲ្យបុគ្គលម្នាក់ៗ ពិសេសអ្នកដែលមានមុខរបរជាអ្នកជំនួញ ម្ចាស់អាជីវកម្ម និងសហគ្រិនជាដើមរៀនសូត្រពីចំនេះដឹងថ្មីៗ ដែលអាចជម្រុញដល់ការរកស៊ីរបស់ខ្លួន។ ជាការពិតណាស់ រាល់របស់របរនានាដែលមនុស្សបានបង្កើត សុទ្ធសឹងតែកើតចេញពីចំណេះដឹង និងសមត្ថភាពរបស់ពួកគេ ដែលមួយភាគធំបានមកពីការអាននេះឯង។ ថ្ងៃនេះ គំនិត សូមនាំលោកអ្នកមកស្វែងយល់ពីអត្ថប្រយោជន៍ផ្សេងៗទៀតនៃការអានសៀវភៅ៖

១. ការអានជួយឲ្យយើងគិតបានវែងឆ្ងាយ

ការអានអាចជួយបំផុសគំនិតរបស់អ្នកដែលអានសៀវភៅ ឲ្យគិតបានវែងឆ្ងាយ និងចេះវិភាគរកហេតុផលបានល្អជាងអ្នកដែលមិនអានសៀវភៅ មិនត្រឹមតែប៉ុណ្ណោះ ការអានសៀវភៅព្រមទាំងបានជួយដល់ការប្រើប្រាស់ភាសារបស់យើង ឲ្យសមស្របនៅក្នុងការទំនាក់ទំនងជាមួយបុគ្គលដែលមានឋានៈ តួនាទី និងវ័យផ្សេងគ្នាផងដែរ។

២. ការអានជាដំណោះស្រាយចំពោះបញ្ហាយ៉ាងមានប្រសិទ្ធភាព

ការអាន​អាចជួយឲ្យអ្នក​ដោះស្រាយ​បញ្ហានានា​ប្រកបដោយ​ប្រសិទ្ធភាព​ ដោយអ្នកនិពន្ធ​សៀវភៅ​ភាគច្រើ​ន​បានបញ្ជូលនូវ​បញ្ហានានា​ដែលខ្លួនគេផ្ទាល់​បានជួបប្រទះ​ និងវិធីសាស្ត្រនានា​ដែលបានជួយឲ្យពួកគេ​ដោះស្រាយ​បញ្ហាទាំងនោះ​។ ជាពិសេស​ សៀវភៅ​ដែលទាក់ទងនឹង​ការធ្វើ​អាជីវកម្ម​ ដែលសហគ្រិន​តូចធំភាគច្រើន​តែងទទួល​បាននូវ​ចំណេះដឹងក្នុងការ​ដោះស្រាយបញ្ហា​ដែលពួកគេ​កំពុងជួបប្រទះ​កំឡុងពេល​ប្រកប​អាជីវកម្ម​។ លើសពីនេះ​ទៅទៀត​ បុគ្គលជោគជ័យ​ភាគច្រើន​មិនមើល​តែភាព​ជោគជ័យ​នោះទេ​ ហើយពួកគេ​ក៏ពុំដែល​បោះបង់ឳកាស​បរាជ័យ​នោះដែរ។​ ជាក់ស្តែង​លោក ជេកម៉ា​ធ្លាប់មាន​ប្រសាសន៍ថា​៖ “អ្នកណាក៏មានកំហុសដែរ​ ប៉ុន្តែអ្វីដែលសំខាន់តើយើងគួររៀន​ និងកែកំហុសនោះដោយរបៀបណា”​។

៣. ការអានជួយឲ្យអ្នកជោគជ័យក្នុងជីវិត

ការអានអាចជួយឲ្យអ្នកមានឳកាសជោគជ័យក្នុងជីវិតច្រើនជាងបុគ្គលទូទៅធម្មតា ក៏ព្រោះតែការអានសៀវភៅបានចូលរួមចំណែកក្នុងការបណ្តុះគំនិតអ្នកអានទៅលើចំណេះដឹង វិជ្ជាជីវៈ មុខរបរ និងជំនាញថ្មីៗមានប្រយោជន៍ដល់ការរស់នៅប្រចាំថ្ងៃ។ ជាក់ស្តែងបុគ្គលជោគជ័យជាច្រើនក្នុងពិភពលោកដូចជាលោក Bill Gates, Elon Musk, Jack Ma, Mark Zuckerberg ជាដើម តែងតែលើកពីប្រយោជន៍នៃការអាន ដែលជំរុញឲ្យពួកគាត់ទទួលបានជោគជ័យដូចសព្វថ្ងៃ។

លោក Bill Gates កំពុងអានសៀវភៅ Business Adventures  (សៀវភៅមួយក្នុងចំនោមប្រាំ ដែលគាត់ចូលចិត្តបំផុត)

៤. ការអានក៏ជាការកំសាន្តផងដែរ

សៀវភៅក៏អាចប្រើជាការអានកំសាន្តនៅពេលទំនេរ លំហែអារម្មណ៍ បន្លប់ទុក្ខកង្វល់នៅក្នុងចិត្តបានផងដែរ ក៏ព្រោះសៀវភៅភាគច្រើនបានរួមបញ្ជូលនូវស្នាដៃសិល្បៈ ដោយមានទាំងអត្ថន័យ អត្ថរស អត្ថរូប ដែលជួយបំពេរអារម្មណ៍អ្នកអាន ឲ្យលន្លង់លន្លោចទៅតាមស្នាដៃរបស់អ្នកនិពន្ធ។ លើសពីនេះទៅទៀត សៀវភៅក៏អាចបង្កើនចំណេះដឹងអ្នកអានយ៉ាងទូលំទូលាយ ចម្រើនសតិប្រាជ្ញា ឲ្យដឹងច្បាស់ អំពី អ្វីល្អី អ្វីអាក្រក់ ភាពទទួលខុសត្រូវ វិន័យ គុណធម៌ និងសីលធម៌ បង្កើនចំណេះដឹង ផ្នែកអក្សរសាស្រ្តស្គាល់ពាក្យកាន់តែច្រើន ពាក្យចាស់ពាក្យថ្មី ពាក្យពិរោះ ពាក្យប្រសើរៗ ដើម្បីយកមកប្រើប្រាស់ក្នុងការនិយាយ និងការសរសេរឲ្យបានកាន់តែល្អមួយកម្រិតថែមទៀត។

No photo description available.

ខាងក្រោមនេះគឺជា សម្តីដកស្រង់ចេញពីបុគ្គលជោគជ័យល្បីៗនៅជុំវិញពិភពលោក៖

១. ប្រធានាធិបតីទី៣៣ របស់សហរដ្ឋអាមេរិក លោក Harry Truman ធ្លាប់មានប្រសាសន៍ថា៖ “មិនមែនឲ្យតែអ្នកអានគឺសុទ្ធតែក្លាយជាអ្នកដឹកនាំនោះទេ តែអ្នកដឹកនាំទាំងអស់គឺសុទ្ធតែជាអ្នកអាន”។

២. មហាសេដ្ឋី និងជាស្ថាបនិកក្រុមហ៊ុនយក្ស SpaceX លោក Elon Musk បានមានប្រសាសន៍នៅក្នុងកិច្ចសម្ភាសន័៍មួយ នៅពេលដែលគេចោទសួរថា តើគាត់រៀនបង្កើតយានអាវកាសបានដោយរបៀបណា លោកក៏បានតបយ៉ាងខ្លីវិញថា៖ “ខ្ញុំអានសៀវភៅ”។

៣. ប្រធានាធិបតីទី៤៤ របស់សហរដ្ឋអាមេរិក លោក Barack Obama ធ្លាប់មានប្រសាសន៍ថា៖ “ការអានគឺពិតជាមានសារៈសំខាន់ណាស់ ប្រសិនបើអ្នកយល់ពីរបៀបនៃការអាន នោះពិភពលោកទាំងមូល នឹងបើកទូលាយសម្រាប់អ្នក”។

៤. មហាសេដ្ឋីលេខរៀងទី០២ ពិភពលោក គឺលោក Bill Gates តែងលើកឡើងពីសារៈប្រយោជន៍នៃការអានថា៖ “ការអានគឺជាវិធីសាស្ត្រដ៏សំខាន់មួយ ដែលខ្ញុំអាចរៀនពីចំណេះដឹងថ្មីៗ និងធ្វើតេស្តសម្ថភាពនៃការយល់របស់ខ្ញុំ”។

 

 

 

Previous articleតើបង្កើតក្រុមយុទ្ធសាស្ត្រទីផ្សារឌីជីថលសម្រាប់ក្រុមហ៊ុនគួរមានប៉ុន្មាននាក់?
Next articleការពារគណនី Facebook របស់អ្នកពីការ Hack
លោក ខៀក វិទ្យារតនៈ គឺជាអ្នកបង្កើត និងសរសេរមាតិការនៅក្នុងគេហទំព័រ គំនិត ផ្នែកបច្ចេកវិទ្យា ផ្នែកយុទ្ធសាស្ត្រទីផ្សារឌីជីថល ផ្នែកធុរកិច្ច និងផ្នែកចំណេះដឹងទូទៅ។ សព្វថ្ងៃនេះ លោកមានតួនាទីជា Business Development Manager ដែលកំពុងតែបម្រើការងារនៅក្នុងហាងសៀវភៅអនឡាញ Naek Arn ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន គំនិត។ ចំពោះប្រវត្តិសិក្សាវិញ លោកគឺជានិស្សិតដែលបញ្ចប់ការសិក្សាផ្នែក វិទ្យាសាស្ត្រពាណិជ្ជកម្មអេឡិចត្រូនិក និងភស្តុភារកម្ម (Science of eCommerece & Logistics) ពីវិទ្យាស្ថានជាតិ និបតិក (NIPTICT) ក៏ដូចជានិស្សិតដែលបញ្ចប់ការសិក្សាថ្នាក់បរិញ្ញាប័ត្រ ផ្នែក Professional Communication នៅសកលវិទ្យាល័យភូមិន្ទភ្នំពេញផងដែរ (RUPP)។ មិនត្រឹមតែប៉ុណ្ណោះ លោកក៏ជាអ្នកជំនាញខាងផ្នែក Digital Marketing Associate ដែលមានវិញ្ញាបនប័ត្រទទួលស្គាល់ដោយក្រុមហ៊ុន Facebook ផ្ទាល់ផងដែរ។ លោកក៏ជាមនុស្សដែលចូលចិត្តវិភាគវែកញែកនៅលើប្រធានបទផ្សេងៗ ស្វែងយល់ពីអ្វីថ្មីៗ ចូលចិត្តការធ្វើដំណើរកម្សាន្តដើម្បីរៀនពីបរិបទសង្គម និងតាមដានគ្រប់ព័ត៌មានទូទៅទាំងក្នុង និងក្រៅប្រទេស៕