មូល​ហេតុ​ដែល​អ្នក​នៅ​តែ​ត្រូវ​ការ​នាមប័ណ្ណ

1034

​នាម​ប័ណ្ណ​​​អាច​​មើល​​ទៅ​​ជា​​រឿង​​ដែល​​ហួស​​សម័យ​​។​ ប៉ុន្តែ​ការ​​យក​​​​នាម​ប័ណ្ណ​​​ទៅ​តាម​​ខ្លួន​​នៅ​​តែ​​សំខាន់​​ពី​​ព្រោះ​​វា​​ផ្តល់​​​ភាព​​ងាយ​​ស្រួល​ក្នុង​​ការ​​ទំនាក់​​ទំនង​​ជា​​មួយ​​នឹង​​អ្នក​​ដទៃ​​ និង​​​មាន​​ភាព​​ផ្ទាល់​​ខ្លួន​ជាង​​ បើ​​យើង​​ប្រៀប​​ធៀប​​ទៅ​​នឹង​​ការ​​ប្រើ​​ប្រាស់​​​ការ​​ទំនាក់​​ទំនង​​តាម​​ប្រព័ន្ធ​​​ឌី​ជី​ថល​។​ ដូច្នេះ​​ហើយ​​ គេ​​មិន​​អាច​​បញ្ឈប់​​ការ​​ប្រើ​ប្រាស់​​​​នាម​ប័ណ្ណ​​នា​​ពេល​​​ខ្លី​​ខាង​​មុខ​​នោះ​​ទេ​ហើយ​​​អ្នក​​ជំនួញ​​តែង​​តែ​​ត្រូវ​​ការ​​វា​​ជា​​ចំា​​បាច់​​។​

  • ​នាម​ប័ណ្ណ​​ធ្វើ​ឲ្យ​គេ​ងាយ​នឹង​ចង​ចាំ​អ្នក​

នៅ​ពេល​ដែល​អ្នក​ជួប​នរណា​ម្នាក់​នៅ​ក្នុង​កម្ម​វិធី​ឬ​ការ​ប្រជុំ​គួរ​តែ​ផ្លាស់​ប្តូរ​​​នាម​ប័ណ្ណ​​របស់​អ្នក ​ព្រោះ​វា​អាច​ជួយ​ឲ្យ​គេ​ងាយ​នឹង​ចង​ចាំ​​មុខ​មាត់​របស់​អ្នក​ទៅ​នឹង​ឈ្មោះ​របស់​អ្នក​។ ​ម៉្យាង​ទៀត​នៅ​ពេល​ដែល​អ្នក​ឲ្យ​​​​នាម​ប័ណ្ណ​​ទៅ​គេ​នោះ​មាន​ន័យ​ថា​អ្នក​ផ្តល់​នូវ​មូល​ហេតុ​មួយ​សម្រាប់​ឲ្យ​គេ​​ទាក់​ទង​មក​អ្នក​​។ ​វីធី​នេះ​ពួក​គេ​អាច​ខល​ទូរស័ព្ទ​ អ៊ី​ម៉ែល​មក​អ្នក​វិញ​ ឬ​យ៉ាង​ហោច​ណាស់​ក៏​អាច​ធ្វើ​ជា​មិត្ត​នៅ​ក្នុង​LinkedIn​ដែរ។

  • ​នាម​ប័ណ្ណ​​ធ្វើ​ឲ្យ​អ្នក​មើល​ទៅ​មាន​ជំនាញ​ជាង​មុន​

មាន​​នាម​ប័ណ្ណ​​ធ្វើ​ឲ្យ​អ្នក​មើល​ទៅ​មាន​ជំនាញ​ជាង​ការ​សរសេរ​ព័ត៌មាន​របស់​អ្នក​នៅ​ក្នុង​ក្រដាស​​ធម្មតា​​ពី​ព្រោះ​វា​បង្ហាញ​ថា​អ្នក​បាន​ចំណាយ​ពេល​វេលា​ក្នុង​ការ​បោះ​ពុម្ព​ប័ណ្ណ​​ដែល​មាន​ព័ត៌​មាន​របស់​អ្នក​នៅ​ក្នុង​នោះ​។ ​ជាង​នេះ​ទៅ​ទៀត​ សាក​គិត​ថា​​បើ​នៅ​ក្នុង​​កម្មវិធី​ណា​​មួយ​ដែល​មនុស្ស​ទាំង​អស់​គេ​មាន​​​នាម​ប័ណ្ណ​​និង​ធ្វើ​ការ​ផ្លាស់​ប្តូរ​​នាម​ប័ណ្ណ​របស់​គេ​ហើយ​អ្នក​បែរ​ជា​គ្មាន​ទៅ​វិញ​។ ​វា​អាច​ធ្វើ​​ឲ្យ​អ្នក​ដាច់​ឆ្ងាយ​ពី​​អ្នក​​​ដទៃ​​និង​​មិន​ស្គាល់​គេ​។

  • ​នាម​ប័ណ្ណ​ជា​វិធី​ដ៏​ល្អ​ក្នុង​ការ​បង្ហាញ​នូវ​ភាព​ជា​ខ្លួន​ឯង

អ្នក​អាច​ជា​សហ​គ្រិន​ឬ​ជា​​បុគ្គលិក​​គេ​ ​ប៉ុន្តែ​វា​មិន​មែន​ជា​បញ្ហា​នោះ​ទេ​។ ​អ្នក​នៅ​តែ​​អាច​មាន​​​ភាព​ជាខ្លួន​ឯង​និង​បង្ហាញ​ពី​​ខ្លួន​ឯង​​នៅ​ក្នុង​​​នាម​ប័ណ្ណ​​របស់​​អ្នក​។ ​មួយ​វិញ​ទៀត​ ​បើ​សិន​ជា​អ្នក​ចង់​ឲ្យ​​នាម​ប័ណ្ណ​​របស់​ខ្លួន​មាន​ភាព​ខុស​ប្លែក​ពី​គេ​និង​មិន​គួរ​ឲ្យ​ធុញ​ទ្រាន់​​ ​អ្នក​អាច​ប្រើ​ប្រាស់​​​​នាម​ប័ណ្ណ​​ដែល​មាន​​ម៉ូដ​ផ្សេង​​ៗ​​ដោយ​​អ្នក​​អាច​សាក​សួរ​​ពី​​​កន្លែង​​ដែល​​ទទួល​​ធ្វើ​​នាម​ប័ណ្ណ​​​នា​នា​។

  • ​នាម​ប័ណ្ណ​ធ្វើ​ឲ្យ​មាន​ភាព​ងាយ​ស្រួល​ជាង​និង​លឿន​ជាង​នៅ​ក្នុង​ការ​ផ្លាស់​ប្តូរ​ព័ត៌​មាន

ឧបករណ៍​ឌី​ជី​ថល​និង​ទូរស័ព្ទ​ទំនើប​អាច​នឹង​មាន​នៅ​គ្រប់​ទី​កន្លែង​ ​ប៉ុន្តែ​ពួក​វា​នៅ​តែ​មិន​អាច​ធ្វើ​ការ​ផ្លាស់​ប្តូរ​ព័ត៌​មាន​លឿន​ជាង​មុន​នោះ​ទេ​។ ​គ្រប់​ឧបករណ៍​ទាំង​អស់​មិន​មែន​សុទ្ធ​តែ​អាច​ដំណើរ​ការ​ជា​មួយ​គ្នា​បាន​ស្រួល​ឡើយ​។​ ​នេះ​ជា​មូល​ហេតុ​ដែល​ធ្វើ​ឲ្យ​ការ​ផ្លាស់​ប្តូរ​ព័ត៌​មាន​តាម​រយៈ​ឌី​ជី​ថល​មាន​ការ​ពិបាក​។ ​ម៉្យាង​វិញ​ទៀត​ ​មនុស្ស​មួយ​ចំនួន​នៅ​តែ​មិន​ចូល​ចិត្ត​ប្រើ​ប្រាស់​ទូរស័ព្ទ​ទំនើប​ឬ​​បើ​គេ​ប្រើ​ប្រាស់​ ​គេ​អាច​នឹង​មិន​ដឹង​ពី​របៀប​ផ្លាស់​ប្តូរ​ព័ត៌​មាន​បែប​ឌី​ជី​ថល​តាម​រយៈ​ទូរស័ព្ទ​ដៃ​ទំនើប​ដែរ​ ​ដូច​នេះ​ការ​យក​​​​​នាម​​ប័ណ្ណ​​តាម​ខ្លួន​អាច​ជា​ជំនួយ​ដ៏​ល្អ​ក្នុង​ស្ថាន​ភាព​បែប​នេះ​។

ប្រភព​៖​www.entrepreneur.com

Previous articleយុទ្ធសាស្ត្រទីផ្សារបណ្តាញសង្គមរបស់សម្បត្តិហ្វាយនែនមានអ្វីដែលប្លែកពីគេ?
Next articleតើ Ponds កំពុងតែដើរខុសគោលដៅមែនដែរឬទេ?
វង្ស​ ​ស្រី​ឡែន​​មាន​​តួ​​នាទី​​ផ្នែក​​ Media Communication ​​នៅ​​គំនិត​​ដែល​​ផ្តោត​​ទៅ​លើ​​ការ​​បង្កើត​​មាតិកា​​ធុរ​​កិច្ច​​ ​សហ​គ្រិន​​ ​យុទ្ធសាស្ត្រ​​អាជីវកម្ម​​សម័យ​​ទំនើប​​ ​ព្រម​​​ទាំង​​ធ្វើ​​ករណី​​សិក្សា​​ទៅ​​លើ​​អាជីវកម្ម​​ក្នុង​​ស្រុក​​។ ​គាត់​​ជា​​និស្សិត​​ដែល​​កំពុង​​សិក្សា​​ថ្នាក់​​បរិញ្ញាប័ត្រ​​នៅ​​វិទ្យាស្ថាន​​ជាតិ​​ប្រៃសណីយ៍​​ ​ទូរគមនាគមន៍​​ បច្ចេកវិទ្យា​​គមនាគមន៍​ ​​និង​​ព័ត៌មាន​ ផ្នែក​​ពាណិជ្ចកម្ម​​អេឡិច​​ត្រូ​និច​។ ​ក្រៅ​​ពី​​ការ​​សិក្សា​​រៀន​​សូត្រ​​នៅ​​ក្នុង​​​សាលា​​ គាត់​​ក៏​​បាន​​ចូល​​រួម​​សិក្ខា​​សាលា​​និង​​វគ្គ​​បណ្តុះ​​បណ្តាល​​ផ្សេងៗ​​ដូច​ជា​​ ​ការ​​ធ្វើ​​ទី​​ផ្សារ​​សម័យ​​ទំនើប​​ ​ជំនាញ​​ទន់​​និង​​ថែម​​ទាំង​​បាន​​ធ្វើ​ការ​​ស្ម័គ្រ​​ចិត្ត​​ក្នុង​​សកម្មភាព​​សង្គម​​ផង​​ដែរ​។