spot_img
spot_img
Homeយុទ្ធសាស្ត្រទីផ្សារយុទ្ធសាស្ត្រទីផ្សារសំខាន់ចំនួន 9 សម្រាប់ការចាប់ផ្តើមអាជីវកម្មដំបូង

យុទ្ធសាស្ត្រទីផ្សារសំខាន់ចំនួន 9 សម្រាប់ការចាប់ផ្តើមអាជីវកម្មដំបូង

-

ការដែលអាចមានសមត្ថភាពក្នុងការចាប់ផ្ដើមអាជីវកម្ម ជារឿងមួយដ៏ល្អបំផុត ប៉ុន្តែទោះជាយ៉ាងណា ដើម្បីធ្វើឱ្យអាជីវកម្មនោះអាចដំណើរការបានរលូន និងមានមនុស្សស្គាល់ច្រើន គឺទាមទារឱ្យមានការធ្វើទីផ្សារ។ ​ការធ្វើទីផ្សារ មានសារៈសំខាន់ណាស់សម្រាប់គ្រប់អាជីវកម្មទាំងអស់ ជាពិសេសអាជីវកម្មទើបតែចាប់ផ្ដើម។

ការចាប់ផ្ដើមអាជីវកម្មដំបូង ច្បាស់ណាស់ថាគ្មាននរណាបានស្គាល់ឡើយ បើស្គាល់ក៏មានចំនួនតិចដែរ ដូច្នេះនៅក្នុងអត្ថបទមួយនេះ នឹងបង្ហាញអ្នកនូវយុទ្ធសាស្រ្តទីផ្សារសំខាន់ៗចំនួន 9 ដែលអ្នកអាចសាកល្បងអនុវត្តន៍ក្នុងអាជីវកម្មរបស់អ្នកបាន។

1. ការជ្រើសរើសទីផ្សារ

ដើម្បីអាចជ្រើសរើសទីផ្សារបានត្រឹមត្រូវ ខាងក្រោមនេះមានកត្តាសំខាន់ៗចំនួន4 ដែលត្រូវពិចារណា៖

  • ទំហំទីផ្សារ៖ តើអ្នកកំណត់គោលដៅប្រជាសាស្រ្តក្នុងតំបន់ណា? ហើយកំណត់ក្រុមមនុស្សដែលអ្នកចង់ផ្ដោតលើ និងដឹងច្បាស់ថាតើអតិថិជនសក្តានុពលប៉ុន្មាននាក់នៅក្នុងទីផ្សារគោលដៅរបស់អ្នក?
  • ការប្រកួតប្រជែងទីផ្សារ៖ តើទីផ្សារឆ្អែតទេ? ដូច​ជា​នៅ​ក្នុង​នោះ​មាន​គូ​ប្រជែង​ច្រើន​ជាដើម។
2. ការកំណត់ថវិកា

ក្នុងនាមជាម្ចាស់អាជីវកម្ម មុននឹងធ្វើទីផ្សារ ត្រូវតែគិតថា តើ​អ្នក​អាច​ចំណាយ​កញ្ចប់លុយ​ប៉ុន្មាន​ទៅ​លើ​យុទ្ធសាស្ត្រ​ទីផ្សារ​ពេល​ចាប់ផ្ដើម​របស់​អ្នក? បន្ទាប់មក ត្រូវតែរៀបផែនការចំណាយឱ្យបានត្រឹមត្រូវ។

3. ការជ្រើសរើសបណ្តាញប្រព័ន្ធផ្សព្វផ្សាយសង្គមត្រឹមត្រូវ

អ្នកត្រូវតែជ្រើសរើសបណ្ដាញសង្គមណាដែលកំពុងពេញនិយម ហើយប្រមូលម្ដុំដោយអតិថិជនគោលដៅរបស់អ្នកដែលមាននៅទីនោះ ដូចជា Facebook, Instagram, TikTok និងផ្សេងទៀត។ បន្ទាប់មក អ្នកក៏ត្រូវដឹងថា តើភាគច្រើនអតិថិជនរបស់អ្នក ចូលចិត្តអ្វីខ្លាំងជាងគេនៅលើបណ្ដាញសង្គមនោះ? និងត្រូវឈ្វេងយល់លើប្រភេទនៃបណ្ដាញសង្គមនោះឱ្យបានច្រើនផងដែរ ដើម្បីធ្វើយ៉ាងណាឱ្យការផ្សព្វផ្សាយរបស់អ្នកកាន់តែមានប្រសិទ្ធភាពខ្ពស់។

អ្វីដែលកាន់តែសំខាន់ទៀតនោះ អ្នកក៏ត្រូវកំណត់ពេលវេលាល្អបំផុតដើម្បីផ្សព្វផ្សាយ ប្រើបញ្ជីពាក្យគន្លឹះ និងជ្រើសរើសអ្នកមានឥទ្ធិពលនៅលើបណ្ដាញសង្គមដើម្បីសហការគ្នាជាដើម។

4. ការបង្កើតមាតិកា

ដើម្បីអាចធ្វើទីផ្សារឱ្យកាន់តែទទួលបានលទ្ធផលល្អ ក៏ទាមទារឱ្យមានការបង្កើតមាតិកាដែលមានឥទ្ធិពលខ្ពស់ដើម្បីធ្វើការផ្សព្វផ្សាយដែរ។ ដើម្បីអាចបង្កើតមាតិកាបាន អ្នកអាច៖

  • ការបង្កើតបញ្ជីប្រធានបទ៖ មុនពេលចាប់ផ្ដើមប្រតិបត្តិការ អ្នកត្រូវតែបង្កើតបញ្ជីប្រធានបទជាមុនសិន ហើយដើម្បីអាចបង្កើតបញ្ជីប្រធានបទបានល្អ គឺវាពឹងផ្អែកលើពាក្យគន្លឹះសំខាន់ៗរបស់អ្នកសម្រាប់គោលបំណង SEO។ ការប្រើប្រាស់ពាក្យគន្លឹះសំខាន់ៗរបស់អ្នកនៅក្នុងប្លក់ ឬវេបសាយ ឬទំព័រហ្វេសប៊ុករបស់អ្នក ត្រូវតែបង្កើតភាពជឿជាក់នៃការចាប់ផ្ដើមជាមួយនឹងម៉ាស៊ីនស្វែងរក ដែលមនុស្សអាចស្វែងរកឃើញលឿន។
  • ដឹងពីប្រភេទនៃមាតិកាដែលត្រូវផ្សព្វផ្សាយ៖ អ្នកត្រូវដឹងថា តើប្រភេទមាតិកាណាត្រូវជាមួយនឹងផលិតផលសេវាកម្មរបស់អ្នក និងត្រូវជាមួយនឹងចំណង់ចំណូលអតិថិជនរបស់អ្នក ដូចជាការធ្វើវីដេអូកម្សាន្ត ការសរសេរអត្ថបទចែករំលែក ធ្វើ Infographic ។ល។
5. លក់ដំណោះស្រាយ

ម្ចាស់អាជីវកម្មដែលទើបតែចាប់ផ្ដើមអាជីវកម្មដំបូង ភាគច្រើនផ្ដោតតែលើការលក់ផលិតផលសេវាកម្មរបស់ពួកគេ តែភ្លេចគិតរឿងមួយ គឺការលក់ដំណោះស្រាយជូនអតិថិជន។ ការលក់ដំណោះស្រាយនេះ អ្នកអាចបង្ហាញទៅកាន់អតិថិជនឱ្យបានឃើញថា រាល់ផលិតផលសេវាកម្មរបស់អ្នកភាគច្រើនជួយដោះស្រាយលើបញ្ហាអ្វី និងមានចំណុចពិសេសទាក់ទាញអ្វី។ ម្យ៉ាងទៀតអាចធ្វើខ្លួនជាទីប្រឹក្សាយោបល់ជាមួយនឹងអតិថិជន ដើម្បីជួយផ្ដល់ដំណោះស្រាយជូនពួកគេឱ្យបានល្អបំផុត។

ចូរចងចាំថា ការលក់ដំណោះស្រាយជូនអតិថិជន ជាចំណុចមួយដែលទាក់ទាញអតិថិជនឱ្យជឿជាក់លើក្រុមហ៊ុនរបស់អ្នក។

6. មានរឿងគួរឱ្យទាក់ទាញអារម្មណ៍

ការនិទានរឿង (Storytelling) ជាឧបករណ៍លក់មួយដ៏មានឥទ្ធិពលខ្លាំង មានន័យថា ម្ចាស់អាជីវកម្មអាចបង្កើតសាច់រឿងណាដែលគួរឱ្យទាក់ទាញអារម្មណ៍អតិថិជន រួមបញ្ចូលជាមួយនឹងគុណតម្លៃអាជីវកម្មរបស់អ្នក ព្រមទាំងផ្ដល់ជាប្រយោជន៍ជូនអតិថិជន នោះមនុស្សជាច្រើននឹងកាន់តែស្គាល់ម៉ាកយីហោ និងចងចាំអាជីវកម្មរបស់អ្នកមិនខាន។

7. ប្រើការផ្សាយពាណិជ្ជកម្មស្វែងរកបង់ប្រាក់

ការស្វែងរកដោយបង់ប្រាក់បានក្លាយជាបណ្តាញផ្សាយពាណិជ្ជកម្មដ៏ពេញនិយមសម្រាប់ការចាប់ផ្តើមអាជីវកម្ម ដោយវាអនុញ្ញាតឱ្យម្ចាស់អាជីវកម្មទិញយករាល់សកម្មភាពដែលអតិថិជនគោលដៅស្វែងរកនៅក្នុង Google និង Bing។

Google AdWords និង Bing Ads គឺជាបណ្តាញស្វែងរកបង់ប្រាក់ឈានមុខគេ ដែលផ្នែកទាំងពីរនេះមានមុខងារកំណត់គោលដៅពាក្យគន្លឹះជាមួយនឹងគំរូតម្លៃថ្លៃដើមក្នុងមួយចុច។ លើសពីនេះ អ្នកអាចបង្កើតការផ្សាយពាណិជ្ជកម្មផ្ទាល់ខ្លួនសម្រាប់ការចាប់ផ្តើមរបស់អ្នកដែលបង្ហាញនៅក្នុងលទ្ធផលស្វែងរក នៅពេលដែលនរណាម្នាក់ស្វែងរកពាក្យគន្លឹះដែលទាក់ទងនឹងអាជីវកម្មរបស់អ្នក។

8. Run ads សម្រាប់លទ្ធផលរយៈពេលខ្លី

ការ Run ads ជាការផ្សាយពាណិជ្ជកម្មរបស់អ្នកឱ្យទៅដល់ក្រុមមនុស្សដែលអ្នកបានកំណត់ ហើយពួកគេនឹងបានឃើញពីការផ្សព្វផ្សាយរបស់អ្នកបានភ្លាមៗ។ ដូច្នេះត្រង់ចំណុចនេះ អ្នកអាចជ្រើសរើសបុគ្គលិកណាដែលមានជំនាញផ្នែក Run ads ឬ Boosting ដើម្បីឱ្យពួកគេធ្វើរឿងនេះជំនួសអ្នក ក្នុងករណីថាអ្នកមិនចេះផ្នែកនេះ។

9. ប្រើយុទ្ធសាស្រ្ត រុញ និង ទាញ

ជំហានដំបូងម្ចាស់អាជីវកម្ម អាចប្រើនូវយុទ្ធសាស្រ្ត រុញ ដោយព្យាយាមធ្វើយ៉ាងណាយកផលិតផលរបស់ខ្លួនឱ្យទៅដល់អតិថិជន ដើម្បីធ្វើឱ្យពួកគេចាប់ផ្ដើមស្គាល់បន្តិចម្ដងៗ តាមរយៈការចែកចាយទៅកាន់អ្នកលក់រាយឱ្យបានច្រើន ហើយបញ្ចូលបន្តឱ្យទៅដល់អតិថិជន ឬម្យ៉ាងទៀតអាចជាការចែកប្រើប្រាស់សាកល្បង ឬការលេងហ្គេមជាដើម។ បន្ទាប់មក ក្រោយពីបានប្រើយុទ្ធសាស្រ្តរុញហើយ (ត្រូវធានាថាអតិថិជនបានស្គាល់ច្រើន និងកំពុងចង់ដឹងចង់លឺអំពីម៉ាកយីហោរបស់អ្នក) អ្នកអាចចាប់ផ្ដើមប្រើយុទ្ធសាស្រ្តទាញ ដោយអូសទាញឱ្យអតិថិជនរបស់អ្នកចង់បាន និងមករកផលិតផលរបស់អ្នកកាន់តែច្រើន។

ជារួមមក នៅពេលប្រើយុទ្ធសាស្រ្តនេះ អ្នកអាចចាប់ផ្ដើមរុញផលិតផលរបស់អ្នកទៅកាន់អតិថិជន ដើម្បីធ្វើឱ្យពួកគេបានស្គាល់កាន់តែច្រើន និងបានប្រើប្រាស់ បន្ទាប់មក ទាញប្រយោជន៍ពីការប្រើយុទ្ធសាស្រ្តរុញ ដើម្បីទាញឱ្យអតិថិជនមានអារម្មណ៍ចង់បាន និងជឿជាក់លើផលិតផលរបស់អ្នក រហូតអាជីវកម្មរបស់អ្នក កាន់តែមានទីផ្សារធំទូលាយជាងមុន។

Sann Thaven
Sann Thavenhttp://www.kumnit.com
គឺជាអ្នកបង្កើតគំនិត និងសរសេរមាតិកា ពាក់ព័ន្ធនឹងការធ្វើអាជីវកម្ម ភាពជាអ្នកដឹកនាំ សេវាកម្មអតិថិជន ទីផ្សារ ការលក់ និងអាជីពការងារ។ កញ្ញាគឺជានិស្សិតថ្នាក់បរិញ្ញាបត្រគ្រប់គ្រងពាណិជ្ជកម្មអន្តជាតិ។ ចំណង់ចំណូលចិត្ត គឺរៀនអ្វីថ្មីៗ និងចូលរួមកិច្ចការងារសង្គម។

រៀនពីអ្វីថ្មីៗ

spot_img

អត្ថបទថ្មិៗ