Home ធុរកិច្ច វិធីសាស្ត្រនៃការកំណត់ថ្លៃចំពោះផលិតផលថ្មី

វិធីសាស្ត្រនៃការកំណត់ថ្លៃចំពោះផលិតផលថ្មី

5625

ស្រមៃថា​បើ​អ្នក​បើក​អាជីវកម្ម​ដោ​យជ្រើសរើស​ផលិតផល​សម្រាប់លក់​រួចហើយ បន្ទាប់មក​អ្នក​បាន​ដើរដល់​ជំហាន​ដ៏​លំបាក​បំផុត​ចំពោះ​មនុស្សភាគច្រើន​គឺ​​ស្វែងរក​​យុទ្ធសាស្ត្រ​នៃ​ការកំណត់ថ្លៃ។ តើ​អ្នក​គួរតែ​ដាក់​តម្លៃ​ឲ្យ​ស្មើ ទាប​ជាង ឬ​ខ្ពស់​ជាង​ដៃ​គូប្រកួតប្រជែង​របស់អ្នក? អ្នក​អាច​ចូល​ទៅកាន់​គេហទំព័រ​របស់​ពួកគេ ​និង​វិភាគ​ពី​ភាពខុសគ្នា​រវាង​អ្វី​ដែល​អ្នក​ផ្តល់ឲ្យ​និង​អ្វី​ដែលគេ​ផ្តល់ឲ្យ។ ខាងក្រោមនេះ​ជា​គន្លឹះ​មួយចំនួន​ដែល​អ្នក​ត្រូវ​ពិចារណា​នៅពេល​ស្វែងរក​​យុទ្ធសាស្ត្រ​នៃ​ការកំណត់ថ្លៃ ៖

  • ថ្លៃដើម​ផលិតកម្ម ៖ នៅទីនេះ​គឺ​សម្ដៅ​ទៅលើ​ការបម្រើ​សេវាកម្ម​នៅក្នុង​អាជីវកម្ម​រួមទាំង​បូក​បញ្ចូលជាមួយ​នឹង​ពេលវេលា​របស់អ្នក​នៅក្នុង​ដំណើរ​ការ​ផលិតកម្ម។
  • គេហទំព័រ​និង​ការ​ចំណាយ​ទៅលើ​គេហទំព័រ ៖ បើ​អ្នក​ត្រូវ​មាន​គេហទំព័រ ដំបូង​អ្នក​ត្រូវ​ចំណាយលុយ​ទៅលើ​ការកសាង​គេហទំព័រ ថែរក្សា​គេហទំព័រ និង​បង់ប្រាក់​ប្រចាំខែ​ដើម្បី​ឲ្យ​គេហទំព័រ​របស់អ្នក​ដំណើរការ​បានល្អ​នៅលើ​ប្រព័ន្ធអ៊ីនធឺណិ​ត(Internet)។
  • ការចំណាយ​ទៅលើ​ថ្លៃ​ឈ្នួល​ការិយាល័យ ៖ អ្នក​នឹង​ត្រូវការ​កុំព្យូទ័រ​ដ៏ល្អ​មួយ​និង​គ្រឿង​បរិក្ខារ​ផ្សេងទៀត​ដូចជា​ម៉ាស៊ីន​ស្គែន​និង​ម៉ាស៊ីន​ព្រីន។ វត្ថុ​សំខាន់​ផ្សេងៗ​ទៀត​នៅក្នុង​ការិយាល័យ​ដូចជា​ ចន្លោះ​សម្រាប់​ធ្វើការ(តុ​និង​កៅអី) ឬ​តុ​សម្រាប់​ដាក់​របស់បម្រុង​និង​ក្រដាស​ធ្វើការ។
  • ចំណាយ​ប្រតិបត្តិការ៖ អ្នកត្រូវ​ធ្វើការ​វិភាគ ថាតើអ្នកនឹងត្រូវ​ការចំណាយ​ការ​លើការធ្វើប្រតិបត្តិការ​ចំនួនប៉ុន្មាន ដូចជា​ ចំណាយលើបុគ្គលិក ចំណាយ​លើ​ឈ្នួល​ទីតាំង​ការិយាល័យ ឬហាង ឬចំណាយ​ផ្សេង​ៗ​ទៀត​ដែលពាក់ព័ន្ធ​នឹងប្រតិបត្តិការដើម្បី​អាច​ឱ្យ​អាជីវកម្មរបស់អ្នក​អាច​ដំណើរ​ការទៅបាន។
  • វត្ថុ​ធាតុដើម ៖ បើ​អ្នក​​នឹង​បង្កើត​ទំនិញ​រូបិយ​ដើម្បីលក់​ អ្នក​ត្រូវការ​ស្តុក​ទុក​វត្ថុ​ធាតុដើម​ជាមុន។
  • ថ្លៃដើម​ក្នុង​ការធ្វើ​ទីផ្សារ ៖ អ្នក​នឹង​ត្រូវ​ធ្វើការ​ផ្សព្វផ្សាយ​ដើម្បី​ឲ្យ​មាន​អ្នកស្គាល់​ផលិតផល​ថ្មី​របស់យើង​។ មុននឹង​មានការផ្សព្វផ្សាយ​ ក្នុងនាមអ្នក​ជា​ម្ចាស់អាជីវកម្ម​អ្នក​ត្រូវ​ដឹងពី​អតិថិជន​គោលដៅ​របស់អ្នក​ជាមុនសិន(សិក្សា​លើ​ទីផ្សារ​ជាមុន)។ ការផ្សព្វផ្សាយ​អាច​មាន​២​ប្រភេទ​គឺ​តាម​ប្រព័ន្ធអ៊ីនធឺណិត​(Internet) និង​តាម​ធ្វើទីផ្សារ​ខាង​ក្រៅ។ បើ​អ្នកជ្រើស​ប្រើ​តាម​ប្រព័ន្ធ​អ៊ីនធឺណិត​(Internet) អ្នក​នឹង​ត្រូវ​ដឹងថា​គេ​អាច​ធ្វើ​បាន​តាម​វិធី​ណាខ្លះ​ដូចជា​បណ្តាញ​កម្សាន្ត​សង្គម ឬ​គេហទំព័រ។ បើ​ជា​គេហទំព័រ អ្នក​ត្រូវ​ចំណាយ​លុយ​មួយចំនួន​ទៅលើ​គេហទំព័​រដើម្បី​មាន​ចំនួន​អ្នកចូល​មើល​គេហទំព័រ​របស់អ្នក​ឲ្យកាន់តែ​ច្រើន។ វា​អាច​ថា​មាន​ជម្រើស​នៃ​ការផ្សព្វផ្សាយ​ដោយ​ឥតគិតថ្លៃ​មួយចំនួន​ដែរ ប៉ុន្តែ​ការផ្សព្វផ្សាយ​ដែល​ត្រូវការ​ចំណាយប្រាក់​គឺ​មាន​ប្រសិទ្ធភាព​ជាង។ មួយវិញទៀត បើ​អ្នក​ជ្រើស​ប្រើ​វិធីធ្វើផ្សារ​ខាង​ក្រៅ ដូចជា​ចូលរួម​ការតាំងពិព័ណ៌ ដាក់​ជា​ស្តង់​នៅតាមសិក្ខា​សិលា ការចែក​ខិត្តប័ណ្ណ និង​តាមវិធី​ផ្សេងៗទៀត អ្នក​ក៏​ត្រូវចំណាយ​លុយ​ជាច្រើន​ទៅលើ​បុគ្គលិក ពេលវេលា ការជួល​ជាដើម។ ម្យ៉ាងទៀត អ្នក​ក៏​ត្រូវការ​ចំណាយលុយ​ទៅលើ​ការ​ធ្វើកាត​សម្គាល់អាជីវកម្ម​ដើម្បី​ប្រើប្រាស់។

ជាការពិតណាស់ នៅមាន​​ចំណុច​ពាក់ព័ន្ធ​ជាច្រើនទៀត​ដែលក្នុង​នាមអ្នក​ជា​ម្ចាស់អាជីវកម្ម​ត្រូវ​ធ្វើកា​រ​ពិចារណា​ទៅលើ​​យុទ្ធសាស្ត្រ​នៃការ​កំណត់ថ្លៃ ក្រៅពី​វិធីគោល​ខាងលើ។ អ្នក​ត្រូវ​គិតគូរ​ឲ្យបាន​ល្អិតល្អន់​ទៅលើ​ការចំណាយ​ផ្សេងៗ​ធ្វើយ៉ាងណា​ឲ្យ​វា​អាចគ្របដណ្តប់​លើថ្លៃដើម និង​ការចំណាយ​បាន។ ជាចុង​បញ្ចប់ អ្វី​ដែល​អ្នក​ត្រូវការ​ដើម្បី​កំណត់ថ្លៃ អ្នក​ត្រូវ​ប្រាកដ​ថា​វា​អាចឲ្យ​អ្នក​រកប្រាក់​ចំណេញ​បាន​យ៉ាងសមរម្យ និងនាំ​អ្នក​ទៅកាន់​ភាពជោគជ័យ​ទៅថ្ងៃ​អនាគត។

ប្រភព៖ www.smallbusinessbrief.com