ឥទ្ធិពលដ៏អស្ចារ្យនៃការអាន

990

នៅក្នុងសង្គមនៃភាពជឿនលឿនសព្វថ្ងៃនេះ  ចំណេះដឹងគឺជាស្នូលដ៏សំខាន់សម្រាប់បុគ្គលគ្រប់រូបក្នុងការយកទៅប្រើប្រាស់ដើម្បីអភិវឌ្ឍខ្លួនឯងក៏ដូចជាសង្គមជាតិទាំងមូល។ ក្នុងនោះផងដែរ ចំណេះដឹងផ្សេងៗដែលយើងគ្រប់គ្នាសិក្សារអាចបានមកពីជីវិតនៃការរស់នៅប្រចាំថ្ងៃរបស់យើង សង្គមខាងក្រៅ មនុស្សដែលនៅជុំវិញខ្លួនយើង រួមទាំងការសិក្សារនៅក្នុងសាលារៀនផងដែរ ហើយអ្វីដែលសំខាន់បំផុតដែលយើងគ្រប់រូបមិនអាចមើលរំលងបាននោះគឺការអានសៀវភៅ។

ហេតុអ្វីបានជាការអានសៀវភៅមានសារៈសំខាន់សម្រាប់យើងគ្រប់គ្នា?

ជាក់ស្តែងយើងមើលឃើញថាបុគ្គលល្បីៗជាច្រើនដែលជាមហាសេដ្ឋីពិភពលោកពួកគេមិនបានបោះបង់នូវការអានសៀវភៅនោះទេ ព្រោះពួកគេយល់ថាការសិក្សារស្វែងយល់នូវចំណេះដឹងថ្មីៗគឺបន្ថែមនូវសារៈប្រយោជន៍និងគុណតម្លៃដ៏ប្រសើរថ្លៃថ្លា ហើយអ្វីដែលសំខាន់ជាងនោះពួកគេមើលឃើញថាពិភពលោកត្រូវដើរទៅមុខគ្រប់ពេលវេលា រឿងរ៉ាវថ្មីៗក៏នឹងកើតមានជាបន្តបន្ទាប់ដែលពួកគេមិនអាចមើលរំលងបាន និងត្រូវដើរឲ្យទាន់សម័យកាលផងដែរ។ ក្នុងនោះមានលោក Bill Gates ដែលជានាយកក្រុមហ៊ុន Microsoft ក៏ជាបុគ្គលម្នាក់ដែលចូលចិត្តអាចសៀវភៅមួយរូប បើទោះបីជាសព្វថ្ងៃនេះលោកមាន $113billion នៅក្នុងដៃគាត់ក៏ដោយក៏គាត់មិនបានបោះចោលនូវទំលាប់អានសៀវភៅនេះដែរ ហើយគាត់តែងតែចំណាយពេល៤ម៉ោងក្នុងមួយថ្ងៃក្នុងការអានសៀវភៅ ព្រោះគាត់ជឿជាក់ថាចំណេះដឹងថ្មីៗករកើតមានគ្រប់ពេលវេលាដោយអ្នកនិពន្ធគ្រប់រូបបានសិក្សាររកឃើញហើយយកមកតាក់តែងឬកែសម្រួលជាថ្មីផងដែរ។ នេះសរបញ្ជាក់ឲ្យឃើញថា ការអានសៀវភៅគឺមានសារៈសំខាន់ណាស់សម្រាប់គ្រប់គ្នា មិនថាអ្នកស្ថិតនៅក្នុងវ័យណា​ ស្ថានភាពបែបណា ក៏អ្នកទាំងអស់គ្នាមិនគួរបោះបង់នូទំលាប់អានសៀវភៅនេះដែរព្រោះវាមិនត្រឹមតែជួយខ្លួនអ្នកប៉ុន្តែសេដ្ឋកិច្ចមួយអានរីកចម្រើនទៅមុខបានអាស្រ័យលើអ្នកទាំងអស់គ្នាដែលមានចំណេះដឹង។

តើការអានមានសារៈប្រយោជន៍ខ្លាំងប៉ុណ្ណា?

ដើម្បីឲ្យអ្នកទាំងអស់គ្នាកាន់តែជ្រាបច្បាស់ពីការអានសៀវភៅថាមានសារៈប្រយោជន៍ខ្លាំងប៉ុណ្ណា មកស្វែងយល់ពីអត្ថប្រយោជន៍ខ្លះៗដែលពួកយើងនឹងលើកមកចែកជូនអ្នកទាំងអស់គ្នា។ អ្នកទាំងអស់គ្នាប្រាកដជាដឹងហើយថារាងកាយមនុស្សយើងតែងត្រូវការចំណីអាហារដើម្បីបំពេញកំលាំងក្នុងការធ្វើកិច្ចការផ្សេងៗឲ្យទទួលបានជោគជ័យផងដែរ តែបើទោះបីជាយើងមិនបានធ្វើអ្វីសោះក៏រាងកាយរបស់យើងត្រូវបញ្ចេញថាមពលមកក្រៅ រួមទាំងការធ្វើលំហាត់ប្រាណដើម្បីទទួលបាននូវសុខភាពល្អបន្ថែមទៀតផង។ មិនខុសគ្នាឡើយ ខួរក្បាលក៏ត្រូវការចំណីអាហារដូចគ្នា និង​ការធ្វើការដើម្បីបង្កើនសមត្ថភាពនិងដំណើរការរបស់វា ព្រោះខួរក្បាលរបស់យើងត្រូវការគិតនិងវិភាគទៅលើរឿងរ៉ាវផ្សេងៗដែលអ្នកទាំងអស់គ្នាបានជួបប្រទះ ឬត្រូវដោះស្រាយនូវបញ្ហាផ្សេងៗទៀតជាច្រើន ហេតុដូច្នេះហើយអាហារដែលយើងមើលឃើញថាល្អបំផុតសម្រាប់ខួរក្បាលគឺការអានសៀវភៅនេះឯង មិនថាបញ្ហាដែលអ្នកជួបប្រទះមានស្ថានភាពបែបណាគឺប្រាដកជាអាចរកដំណោះស្រាយបាន ព្រោះថាមានរឿងរ៉ាវនៅក្នុងសៀវភៅជាច្រើនរួមទាំងដំណោះស្រាយជាច្រើនដែលទាក់ទងនឹងជីវិតរស់នៅប្រចាំថ្ងៃរបស់យើងគ្រប់គ្នាទៅតាមប្រភេទសៀវភៅនីមួយៗ។ លើសពីនេះទៀត ការអានសៀវភៅក៏ជួយកាត់បន្ថយជំងឺថប់អារម្មណ៍របស់អ្នកទាំងអស់គ្នាទៀតផង មិន​​ថាអ្ន​កថប់អា​រម្ម​​ណ៍យ៉ា​ងណាក្នុងជីវិ​តប្រ​ចាំថ្ងៃរបស់អ្ន​កឡើយ​ប៉ុ​ន្តែ​វានឹងរលុ​បបាត់ចេញពី​ខួរក្បា​លរ​បស់​អ្នកនៅ​ពេល​ដែល​អ្នកកំពុងតែ​ល​ង់ក្នុ​ង​រឿងដ៏អ​​ណ្ដែតអណ្ដូ​ង​មួយ​ឬប្រ​ធា​នបទមួយ​ដែល​អ្នកចា​ប់អា​រម្មណ៍ ដែលជាការពិតណាស់អ្នកអាចស្រមៃមើលថាបើសិនអ្នកកំពុងគិតអ្វីមួយរហូតដ៏ស្លុងអារម្មណ៍ នោះប្រាកដណាស់ថារបស់នូវជុំវិញអ្នកក៏ដូចជារឿងរ៉ាវដែលមិនល្អរបស់អ្នកអាចបំភ្លេចបានមួយខណៈផងដែរ ហើយអំឡុងពេលនោះអ្នកក៏អាចរកបាននូវដំណោះស្រាយមួយសម្រាប់បញ្ហាដែលអ្នកបានជួបផងដែរ។

ការអានជួយឱ្យអ្នកចេះ និងចាំពាក្យច្រើន

ការអានក៏ជួយជម្រុញឲ្យអ្នកចេះនឹងចាំពាក្យបានច្រើនគួរឲ្យកត់សម្គាល់ ព្រោះកាលណាអ្នកអានកាន់តែច្រើន នោះអ្នកនឹងជួបប្រទះពាក្យដដែលៗនិងស្គាល់ពីពាក្យថ្មីៗផងដែរ។ ដោយឡែកសម្រាប់អ្នកដែលរៀនភាសាបរទេសវិញ ការអាននឹងធ្វើឲ្យការប្រើប្រាស់ពាក្យរបស់ពួកគេមានភាពប្រសើរឡើងទាំងការសរសេរនិងការនិយាយទៀតផង ហើយចំពោះពាក្យបច្ចេកទេសវិញ អ្នកក៏អាចរកពាក្យណាដែលសាមញ្ញនិងងាយស្រួលយល់បានកាន់តែច្រើន។  បន្ថែមលើចំណុចនេះផងដែរ វាក៏ជួយបង្កើននូវការចងចាំដ៏អ្នកគ្រប់គ្នា ព្រោះថាការអានសៀវភៅតម្រូវឲ្យអ្នកមានការចងចាំល្អបើសិនជាសៀវភៅនោះមានលក្ខណៈវែង។ ឧទាហណ៍ការអានសៀវភៅរឿងនឹងតម្រូវឲ្យអ្នកចងចាំសាច់រឿងនិងតួអង្គក្នុងរឿងផងដែរ ដូច្នេះបានន័យថាព័ត៌មាននៃសាច់រឿងពីមួយទំព័រទៅមួយទំព័រត្រូវបានរក្សាទុកក្នុងការចងចាំរបស់អ្នករួចរាល់ផងដែរ ព្រោះហេតុដូចនេះហើយ មិនថាអ្នកអានសៀវភៅផ្សេងទៀតអ្នកអាចចាប់នូវចំណុចសំខាន់បានឆាប់រហ័ស និងអាចចំណាយពេលតិចជាងមុន។  ម៉្យាងទៀត  ការអានបានបន្ថែមកម្រិតនៃការសរសេររបស់អ្នកឲ្យកាន់តែល្អប្រសើរ ការដឹងពាក្យថ្មីៗគឺជាមូលហេតុមួយដែលអាចជួយឲ្យសំណេររបស់អ្នកមានភាពល្អ និងអាចធ្វើឲ្យអ្នកអានងាយស្រួលយល់ដើម្បីបន្ថែមការការចាប់អារម្មណ៍ពីអ្នកអានទៀតផង។ ក្រៅពីដឹងពាក្យថ្មីៗ អ្នកក៏នឹងបានយល់ច្បាស់ពីរចនាបថនៃការសរសេររបស់អ្នកនិពន្ធជាច្រើន ដូច្នេះការអានអាចនឹងជួយឲ្យអ្នកមានសមត្ថភាពដើម្បីសរសេរបានល្អជាងមុនទ្វេរដង។

ការអានគឺជាការកម្សាន្តមួយ

ក្រៅពីទទួលបានចំណេះដឹង ការអានក៏ជាកន្លែងកម្សាន្តមួយដើម្បីបំបាត់ភាពតានតឹងសម្រាប់អ្នកដែលមានក្តីសុខក្នុងពេលចាប់កាន់សៀវភៅផងដែរ ព្រោះថា​ជាឃ្លាំ​ងផ្ទុ​​កនូវរាល់ចំណេះ​ដឹងជាច្រើន ​និងការកម្សា​ន្ដដូច​ជាប្រលោ​មលោក រឿ​ងកំប្លែងថែមទៀតផង​ ហើយសព្វថ្ងៃនេះការដើរលេងឬការកម្សាន្តនានាមានតម្លៃថ្លៃខ្លាំងណាស់ បើអ្នកចំណាយពេលអានសៀវភៅច្រើននោះវាពិតជាប្រសើរខ្លាំងណាស់ ហើយអ្នកក៏ឃើញពិភពលោកបានកាន់តែឆ្ងាយ និងអាចមើលឃើញពីអនាគតដែលឈានចូលមកដល់។  ជាចុងក្រោយនេះដែរ ការអានបានផ្តល់នូវអារម្មណ៍ស្ងប់សុខដល់ផ្លូវចិត្តរបស់យើងឲ្យទទួលនូវអារម្មណ៍ធូរស្រាល ហើយអ្នកក៏អាចក្លាយជាអ្នកលើកទឹកចិត្ត និងចែករំលែកនូវអារម្មណ៍ល្អៗរបស់អ្នកដល់មនុស្សជុំវិញខ្លួនរបស់អ្នកបានទៀតផង។

សរុបមកវិញ ពួកយើងពិតជាអរគុណសម្រាប់អ្នកទាំងអស់គ្នាដែលបានចំណាយពេលអាននៅអត្ថបទខាងលើយ៉ាងយកចិត្តទុកដាក់ ហើយសង្ឃឹមថាអ្នកទាំងអស់គ្នាចូលរួមអានសៀវភៅទាំងអស់គ្នាដើម្បីបង្កើតជាទំលាប់ដ៏ល្អមួយ និងចែករំលែកនូវការអានសៀវភៅនេះដ៏មនុស្សជាទីស្រលាញ់របស់អ្នកគ្រប់គ្នា។