១០សំណួរដើម្បីកំណត់ថ្លៃផលិតផលរបស់អ្នក

5645

ផលិតផល​និង​សេវាកម្ម​ល្អ​មិនអាច​ធានា​ថា​អ្នក​នឹង​អាច​មាន​ភាពជោគជ័យ​នោះទេ។ អ្នក​ថែមទាំង​ត្រូវការ​កំណត់ថ្លៃ​ឲ្យ​បានត្រឹមត្រូវ​ផងដែរ​។​ វា​ទាមទារ​ឲ្យ​អ្នក​ដឹង​ពី​អតិថិជន​របស់អ្នក​បានល្អ ពួកគេ​នឹង​ហ៊ាន​ចំណាយ​ប៉ុណ្ណា ព្រមទាំង​ដៃគូ​ប្រកួត​ប្រជែង​របស់អ្នក​គិតថ្លៃ​ប៉ុណ្ណា​ដែរ​។ ខាងក្រោមនេះ​ជា​វិធី​ដែល​យើង​ត្រូវ​ដឹង​ដើម្បី​កំណត់ថ្លៃ​ប្រកប​ដោយ​ប្រសិទ្ធភាព ៖

១. តើ​​អតិថិជន​​​របស់​អ្នក​ស្ម័គ្រចិត្ត​​ចំណាយ​​ប៉ុន្មាន​​មកលើ​​ផលិតផល​​របស់អ្នក​​?

ការកំណត់​ថ្លៃ​មិនត្រឹមតែ​ជា​ការបូកបន្ថែម​ទៅលើ​ថ្លៃដើម​នោះទេ។ វា​អាស្រ័យ​ទៅលើ​ការហ៊ាន​​ចំណាយ​របស់​អតិថិជន​ដែល​ទិញ​ផលិតផល​របស់អ្នក​។ បើ​អ្នក​ប្រើប្រាស់​ថ្លៃ​ដើម​អស់​ ២,០០០​រៀល​ដើម្បី​បង្កើត​វា ​ហើយ​អតិថិជន​របស់អ្នក​ហ៊ាន​ទិញ​អ្នក​ក្នុង​តម្លៃ ១០០,០០០​រៀល នោះមានន័យថា​អ្នក​មាន​ផលិតផល​ដែល​មាន​ភាព​ជោគជ័យ​ហើយ។ ផ្ទុយមកវិញ បើ​អ្នក​មិនបាន​ទទួលប្រាក់​ចំណេញ​អ្វីសោះ នោះ​អ្នក​ក៏​មាន​ភាព​បរាជ័យ​ដូចគ្នា។ ដើម្បី​ជួយ​អ្នក​ក្នុង​ការកំណត់​ថាតើ​អតិថិជន​របស់​អ្នក​ហ៊ានចំណាយ​ប៉ុណ្ណា អ្នក​ត្រូវ​បន្ត​ធ្វើការ​ស្ទាបស្ទង់​ពី​ទីផ្សារ​និង​អតិថិជន​គោលដៅ​បន្តទៀត។

២. តើ​អតិថិជន​ប្រភេទ​ណា​ដែល​អ្នក​ចង់បាន​?

“បើ​អ្នក​កំណត់​អតិថិជន​ដែល​ហ៊ាន​ឲ្យ​តម្លៃ​ខ្ពស់ អ្នក​នឹង​បាន​ប្រាក់​ច្រើន​តែ​ការលក់​តិច។ ប៉ុន្តែ​បើ​អ្នក​កំណត់​​អតិថិជន​ច្រើន អ្នក​នឹង​បាន​លុយ​តិច​តែ​ការលក់ច្រើន។ វិធី​ដោះស្រាយ​ចំពោះ​បញ្ហានេះ​គឺ​កាត់​ទីផ្សារ​ទៅជា​ផ្នែកៗ​ជាមួយ​នឹងថ្លៃ​លក់ផ្សេង​គ្នា។”  Stiving​ មាន​ប្រសាសន៍។

៣.​ តើ​អ្នក​គួរ​មាន​ប្រតិកម្ម​បែបណា​តប​នឹង​ថ្លៃលក់​របស់​ដៃគូ​ប្រកួត​ប្រជែង​?

ក្នុង​យុទ្ធសាស្រ្ត​កំណត់ថ្លៃ មាន​៣​សំណួរ​សំខាន់ៗ​ដើម្បី​សួរ​ដូចជា ៖ តើ​អ្នកណា​ជា​អ្នក​ផ្តល់​ផលិតផល​ស្រដៀង​គ្នា​ជាមួយ​នឹង​អ្នកដែរ? ផលិតផល​របស់​អ្នក​ល្អ​ជាងឬ​អត់? អតិថិជន​អ្នក​យកចិត្ត​ទុកដាក់​ដែរទេ? បើ​ផលិតផល​អ្នក​ល្អ​ជាង អ្នក​ត្រូវ​ដឹងពី​ថ្លៃលក់​របស់​ដៃគូ​ប្រកួត​ប្រជែង​របស់អ្នក​ហើយ​ដាក់ថ្លៃ​ឲ្យ​ខ្ពស់​ជាង​គេ​បន្តិច។ បើអត់ទេ អ្នក​ត្រូវ​ដាក់ថ្លៃ​ឲ្យ​ទាប​ជាងគេ​បន្តិច។ ប៉ុន្តែ​វិធីនេះ​ប្រើ​បាន​ចំពោះ​តែ​អតិថិជន​ដែល​ដឹងពី​តម្លៃ​ផលិតផល​ច្បាស់​ប៉ុណ្ណោះ។​

៤. តើ​អ្នក​អាច​ដាក់ថ្លៃ​លក់ផ្សេងគ្នា​ចំពោះ​កម្រិត​ផលិតផល​ឬ​សេវាកម្ម​ផ្សេងគ្នា​បានដែរ​ទេ?

វា​ជា​ការប្រសើរ​ដើម្បី​ផ្តល់ឲ្យ​អតិថិជន​នូវ​ជម្រើស។ អ្នក​គួរតែ​ផ្តល់​យ៉ាងហោចណាស់​កម្រិត​តម្លៃ​ខុសៗ​គ្នា ៣ យ៉ាង​ចំពោះ​កម្រិត​នៃ​ផលិតផល​របស់យើង ៖ អន់ មធ្យម ល្អ។ វា​នឹង​ធ្វើឲ្យ​អតិថិជន​មាន​ភាពងាយស្រួល​ក្នុងការ​ជ្រើសរើស​ថា​គួរយក​មួយណា​ដែល​ស័ក្តិសម​ជាមួយ​តម្រូវការ​របស់គេ។

៥. តើ​អ្នក​អាច​កែ​តម្រូវថ្លៃ​របស់អ្នក​តាម​របៀបណា?

អតិថិជន​ផ្សេងគ្នា​ប្រាកដ​ជា​មាន​ការស្ម័គ្រចិត្ត​ខុសគ្នា​ដើម្បី​ចំណាយ​ផងដែរ ហើយ​សូម្បី​តែ​ប្រភេទ​អតិថិជន​ដូចគ្នា​ហើយ​ក៏​នៅតែ​បែងចែក​ការចំណាយ​ទៅតាម​ឱកាស​នៃ​ការទិញ​របស់​ពួកគេ។ ដើម្បី​កំណត់ថា​តើពេលណា​និង​អ្នកណា​​ដែល​អ្នក​អាច​កែតម្រូវ​ថ្លៃលក់​បាន អ្នក​អាច​អង្កេត​តាមរយៈ​ទម្លាប់​នៃ​ការទិញ​របស់​អតិថិជន​និង​ធ្វើការ​ស្ទាបស្ទង់​ពី​អ្នក​ប្រើប្រាស់​តាម​ការសម្ភាសន៍​និង​ផ្តោតអារម្មណ៍​តាម​ក្រុម​នីមួយៗ​។

៦. តើ​អ្នក​បានផ្តល់​ហេតុផល​សមរម្យ​មួយ​ដើម្បី​ឲ្យ​អតិថិជន​ចំណាយ​បន្ថែម​មកលើ​ផលិតផល​របស់អ្នក​ដែរទេ​?

ការ​ផ្លាស់ប្តូ​រកើតចេញ​ពី​ការ​អភិវឌ្ឍន៍​ផលិតផល។ បើ​អ្នក​បង្កើត​ឲ្យ​មានការ​អភិវឌ្ឍន៍​ផលិតផល​ដោយ​រឹតបន្តឹង​លើ​គុណភាព ហើយ​ផ្សព្វផ្សាយ​វា​ទៅកាន់​អតិថិជន​របស់អ្នក នោះ​គេ​នឹង​ស្ម័គ្រចិត្ត​ចំណាយលុយ​បន្ថែម​ដូចគ្នា។

៧. តើ​អ្នក​អាច​ដាក់ថ្លៃ​លក់​សម្អាង​លើផលប្រយោជន៍​អរូបិយ​បានទេ?

អាជីវកម្ម​ជាច្រើន​ដែល​ដាក់ថ្លៃ​តាមផលិតផល​ឬ​សេវាកម្ម​របស់ពួកគេ​ផ្ទាល់ ប៉ុន្តែ​ក្រុមហ៊ុន​ផ្សេងទៀត​ដាក់​ថ្លៃ​តាម​ផលប្រយោជន៍​អរូបិយ​ដែលគេ​ផ្តល់ឲ្យ​អតិថិជន។ ឧទាហរណ៍ អ្នក​លក់​ស្ករ​សូកូឡា​ក្នុង​តម្លៃ​ធម្មតា​តែ​បើ​អ្នកផ្សព្វផ្សាយ​ឲ្យ​អតិថិជន​យល់ថា​ការទិញ​ស្ករសូកូឡា​ជូន​មនុស្ស​ពិសេស វា​គឺជា​ការបង្ហាញ​ពី​ក្តីស្រលាញ់​និង​ការចូលចិត្ត នោះ​អ្នក​នឹង​អាច​គិតថ្លៃ​លើស​បន្តិច​បន្តួច​បាន​ដូចគ្នា។

៨. តើ​អ្នក​គួរតែ​ដាក់​ផលិតផល​ជាច្រើន​សម្រាប់​ថ្លៃលក់​តែមួយ​បានទេ?

បើអាច អ្នក​គួរតែ​ប្រើប្រាស់​ការកំណត់ថ្លៃ​ដើម្បី​ទទួល​បាន​ការទិញ​ពី​អតិថិជន​នូវ​ផលិតផល​៣ឬ៤​ជាជាង​មួយ​។ អ្នក​​គួរតែ​ជ្រើសរើស​ផលិតផល​បំពេញ​គ្នា​មក​ដាក់លក់​និង​គិតថ្លៃ​បញ្ចូលគ្នា​តែម្តង។ អ្នក​អាច​ប្រើ​វិធីសាស្ត្រ​បញ្ចុះថ្លៃ​បន្តិចបន្តួច​ចំពោះ​ការទិញ​ផលិតផល​ច្រើនរួមគ្នា​ដើម្បី​ឲ្យ​ការលក់​កាន់តែ​មានចំនួន​កើន​ឡើង​។ ឧទាហរណ៍ នៅហាងលក់ភីហ្សាគេ​លក់​ភីហ្សា​ជា​ឈុត​និង​​ដាក់​​តម្លៃ​រួម​ដោយ​បញ្ចុះ​ថ្លៃ​បន្តិច​ដើម្បី​ឲ្យ​អតិថិជន​ងាក​មកទិញ​ទំនិញ​គេ​បានច្រើន​។

៩. តើ​អ្នក​គួរតែ​បញ្ចុះថ្លៃ​ដើម្បី​ឲ្យ​មានមនុស្ស​មកទិញ​ផលិតផល​របស់អ្នក​ដែរទេ​?

ការលក់​បញ្ចុះ​តម្លៃ​គឺជា​រឿងប្រសើរ ប៉ុន្តែ​តម្លៃ​ពេញ​គួរតែ​ត្រូវ​បាន​រក្សាទុក​នៅជា​លក្ខណៈ​ស្តង់ដា។ មនុស្ស​អាច​មិនបានយល់ពី​​លក្ខណៈ​ពិសេស​នៃ​ផលិតផល​ដែល​គេបានទិញ​យក​ទៅឡើយ​ក៏​ព្រោះតែ​គេ​ទិញ​ដោយសារ​ការបញ្ចុះ​តម្លៃ។ បន្ទាប់មក​វា​នឹង​អាច​ធ្វើឲ្យ​គេ​មានអារម្មណ៍​ថា​គេ​បាន​ទិញ​សម្ភារៈ​ច្រើន​ពេក​លើស​ពី​តម្រូវការ​របស់ខ្លួន​និង​លែង​ចង់ទិញ​តទៅទៀត។ ម្យ៉ាងទៀត នៅពេល​ដែល​មនុស្ស​ចំណាយ​លុយ​តិច​ទៅលើ​ការទិញ​ផលិតផល​មួយ វា​ពិបាក​នឹង​ធ្វើឲ្យ​គេ​តម្លើង​ថ្លៃណាស់ ដែល​នោះ​នឹង​នាំឲ្យ​អ្នក​ពិបាក​ទទួល​បាន​ប្រាក់ចំណេញ​មួយ​ដ៏​សមរម្យ​ដូចគ្នា។

១០.​ តើ​អតិថិជន​របស់អ្នក​ចង់​ទិញ​ផលិតផល​ឬ​សេវាកម្ម​របស់អ្នក​យ៉ាង​ដូចម្តេច?

អ្នក​ត្រូវ​ច្នៃ​ប្រឌិត​គម្រូ​អាជីវកម្ម​ដែលត្រូវ​ជាមួយ​នឹង​របៀប​ដែល​មនុស្ស​ចង់ទិញ​ផលិតផល​របស់អ្នក​ដូចជា​ តាមឆ្នាំ ឬ​តាមខែ​ជាដើម។ អ្នក​​ត្រូវ​ដឹងថា​ពេលណា​ដែល​អតិថិជន​របស់អ្នក​ទិញ​ផលិតផល​របស់អ្នក​ច្រើន​  ពេលណា​តិចឬ​ពេលណា​ដែល​គ្មានសោះ។ អ្នក​ត្រូវ​ដឹងថា​អ្នក​គួរ​ដាក់​តម្លៃ​ដូចម្តេច​ឲ្យ​សមស្រប និង​បត់បែន​តាមរដូវកាល​ដើម្បី​ឲ្យ​មាន​អតិថិជន​មក​ទិញ​ច្រើន។

ការ​ផ្លាស់ប្តូ​រកើតចេញ​ពី​ការ​អភិវឌ្ឍន៍​ផលិតផល

ប្រភព៖ www.entrepreneur.com