៤ចំណុចគួរចងចាំអំពីការលក់របស់អ្នក

1678

ទាំងនេះ​គឺ​ជាចំណុច​ដែល​អ្នក​មិន​ត្រូវ​បំភ្លេច​នោះទេ​ក្នុងនាម​ជា​អ្នក​លក់​ម្នាក់៖

ទី១ ភាពជាក់លាក់​នៃ​ផលិតផល​ឬ​សេវាកម្ម​របស់អ្នក

វា​មាន​ភាពខុសគ្នា​រវាង​ធ្វើឲ្យ​អតិថិជន​គ្រាន់តែ​ចូលចិត្ត​ផលិតផល​ឬ​សេវាកម្ម​របស់អ្នក​​និង​ធ្វើយ៉ាងណា​ឲ្យ​គេ​ទិញ​ផលិតផល​ឬ​ប្រើប្រាស់​សេវាកម្ម​របស់អ្នក​។ អតិថិជន​ត្រូវការ​អារម្មណ៍​ជាក់ច្បាស់​ពី​​ផលិតផល​ឬ​សេវាកម្ម​របស់អ្នក​ថា​តើ​វា​ត្រូវ​នឹង​ចំណូលចិត្ត​ពួកគាត់​ដែរ​ទេនិង​សេចក្តី​ត្រូវ​ការ​របស់​គាត់ដែរទេ។ ដើម្បី​​កាត់បន្ថយ​​ចម្ងល់​​របស់​ពួកគាត់ អ្នក​ត្រូវ​ចេះ​ឆ្លើយតប​ភ្លាមៗ​រាល់សំណួរ​របស់​អតិថិជន​ក្នុង​គោល​បំណង​ទទួល​បាន​ទំនុកចិត្ត​នៃ​គុណភាព​នៃ​ផលិតផល​ឬ​សេវាកម្ម​ពី​អ្នក​ប្រើប្រាស់​ទាំង​នោះ។

ទី២ ពង្រឹង​ភាពវិជ្ជមាន

ខណៈពេល​ដែល​អ្នក​មាន​ការសន្ទនា​ជាមួយ​អតិថិជន អ្នក​ត្រូវ​ស្តាប់​យ៉ាង​យកចិត្ត​ទុកដាក់​ពី​អ្វី​ដែល​អតិថិជន​របស់អ្នក​និយាយ​ជាពិសេស​​មតិទាក់ទង​នឹង​ផលិតផល​ឬ​សេវាកម្ម​របស់អ្នក​។ មិន​ត្រឹម​តែ​ប៉ុណ្ណោះ​​អ្នកក៏​​ត្រូវតែ​​​ប្រុងប្រយ័ត្ន​ចំពោះ​ការ​ប្រើប្រាស់​​ពាក្យ​សម្ដីនិង​កាយវិការ​​របស់អ្នក​ចំពោះ​ការឆ្លើយតប​ទៅគេ​វិញ​ផងដែរ។ ជួនកាល​ទម្លាប់របស់យើង​គិតថា​ពាក្យ​សម្តី​និង​កាយ​វិការ​ដែល​យើងនិយាយ​និង​ធ្វើ​យើង​គិត​ថា​វា​ជា​រឿង​ធម្មតា​ទេ​ ប៉ុន្តែ​វា​អាច​ប៉ះ​ពាល់​ដល់​អារម្មណ៍​របស់​អតិថិជន​ផង​ក៏​ថាបាន​។ ឧទាហរណ៍នៅពេល​ដែល​អតិថិជន​​និយាយថា “ខ្ញុំ​គិតថា​អ្វី​ដែល​អ្នក​​រៀបរាប់​ពី​ផលិតផល​របស់​អ្នក​គឺមិនអាច​ទៅរួច​ទេ”​​​ ឬ “ខ្ញុំ​គិតថា​ផលិតផល​របស់​អ្នក​ប្រហែល​ជា​មិនអាច​ជួយ​ខ្ញុំ​បានទេ​”។ ពេល​នោះ​អ្នក​អាច​មាន​អារម្មណ៍​មិនពេញចិត្ត​បន្តិច​បន្តួច​តែ​អ្នក​មិន​ត្រូវ​បញ្ចេញ​អាកប្បកិរិយា​អវិជ្ជមាន​ចេញ​មក​ក្រៅ​ទេ។​ ​អ្នក​​គួរ​តែ​​តប​​ទៅអតិថិជន​​​វិញថា “ខ្ញុំ​ឆ្លាប់​ឮ​ពាក្យ​នេះ​ជាច្រើន​ដង​ហើយ​ពី​អតិថិជន​របស់ខ្ញុំ​​មុនពេល​គាត់​សាកល្បង​ប្រើប្រាស់​ផលិតផល​របស់ខ្ញុំ ​ប៉ុន្តែ​ពួកគាត់​នៅតែ​ទិញនិង​យក​ទៅ​ប្រើប្រាស់​ដោយ​ពួកគាត់​ចង់​ដឹង​ពី​គុណភាព​ឲ្យ​បានច្បាស់​។” ទើប​ជាការ​ប្រសើរ។

ទី៣ ផ្តល់​​ភស្តុតាង​ជូន​អតិថិជន​របស់អ្នក

អ្នក​​អាច​ផ្តល់​​ភស្តុតាង​ជូន​អតិថិជន​របស់អ្នក​ថា​គាត់​គួរតែ​ប្រើប្រាស់​ផលិតផល​ឬ​សេវាកម្ម​របស់អ្នក​ជាជាង​គ្រាន់តែ​លក់​ឲ្យ​គាត់​ធម្មតា​។​ យើង​អាច​សាកសួរ​គាត់​ពី​ប្រភេទ​ផលិតផល​ដែល​គាត់​ចង់បាន​ហើយ​​រៀបរាប់​ពី​អត្ថប្រយោជន៍​នៃ​ផលិផល​​ឬ​សេវាកម្ម​ទាំងនោះ​។ ធ្វើ​ដូចនេះ​នៅពេល​ដែល​គាត់​ឮ​​អ្វី​ដែល​​គាត់​បាន​រំពឹង​ទុក​នោះ​គាត់​នឹង​ទិញផលិតផល​នោះ​ជាក់ជា​មិនខាន។ អ្នក​អាច​បង្ហាញ​ជា​វីដេអូ រូបភាព​ ឲ្យ​គាត់​ជួប​អ្នក​ដែល​ធ្លាប់ប្រើ​ផ្ទាល់ នាំគាត់ទៅ​ជួប​អ្នក​ជំនាញ​ ឬ​បង្ហាញ​ប័ណ្ណ​​ដែលអាច​ធានា​ពី​ផលិតផល​របស់​យើង​ជាដើមទៅកាន់​អតិថិជន​ដើម្បី​ឲ្យ​គាត់​កាន់តែ​មាន​ទំនុក​ចិត្ត​ពីលើ​ពាក្យ​សម្តី​របស់យើង​។

ទី៤ រក្សា​តម្រូវការ​របស់​អតិថិជន

អ្នក​ត្រូវ​ផ្គត់ផ្គង់​ផលិតផល​ឬ​សេវាកម្ម​ឲ្យ​ជួប​នឹង​តម្រូវ​របស់​អតិថិជន​។​ អ្នក​គួរតែ​យកចិត្តទុកដាក់​​សាកសួរ​ពួកគាត់​ទាក់ទង​នឹង​ផលិតផល​ឬ​​សេវាកម្ម​ទាំងនោះ​ទាំង​មុន​ កំឡុងពេល និង​ក្រោយ​ពេល​ប្រើ​។​ បើសិនជា​អតិថិជន​មាន​ការរិះគន់​ពី​ផលិតផល​ឬ​សេវាកម្ម​របស់អ្នក អ្នក​ត្រូវ​រិះរក​វិធី​ដោះស្រាយ​ជូន​ពួកគាត់​ឲ្យ​បានសមរម្យ​។ មួយ​វិញទៀត​បើ​វា​មិន​សក្តិសម​ជាមួយ​នឹង​អតិថិជន​ទេ​ អ្នកគួរ​តែ​ប្តូរ​ជូនពួកគាត់ទើប​ជាការ​ប្រសើរ។

Previous articleការត្រៀមខ្លួនសម្រាប់កិច្ចប្រជុំអាជីវកម្មសំខាន់ៗ
Next article៦ប្រភេទនៃនិយោជិក
ហេង ប៊ុននាថ មានតំណែងជា Business Creative នៅគំនិត ដែលមានតួនាទីដែលផ្តោតលើការបង្កើតមាតិការធុរកិច្ច សហគ្រិន យុទ្ធសាស្ត្រអាជីវកម្មសម័យទំនើប ព្រមទាំងធ្វើករណីសិក្សាទៅលើអាជីវកម្មក្នុងស្រុក។ គាត់ក៏ជានិស្សិតថ្នាក់បរិញ្ញាប័ត្រ នៅ វិទ្យាស្ថានជាតិបរទេស(IFL) ផ្នែកអក្សរសាស្រ្តអង់គ្លេស និង សាកលវិទ្យាល័យ បញ្ញាសាស្រ្ត( PUC) ជំនាញ គ្រប់គ្រងអាជីវកម្ម ដែលសុទ្ធសឹងជាសាកលវិទ្យាល័យល្បីៗនៅប្រទេសកម្ពុជា។ ក្រៅពីការសិក្សានឹងការងារ គាត់បានលះបង់ពេលវេលាផ្ទាល់ខ្លួនរបស់គាត់ ក្នុងការចូលរួមសកម្មភាពសង្គម ដើម្បីចែករំលែកបទពិសោធន៌ និងចំណេះដឹងដែលគាត់មានទៅកាន់សហគមន៌ ព្រោះការអភិវឌ្ឍន៌សង្គមគឺជាកិច្ចការ ដែលគាត់គិតថាគួរចូលរួមចំនែក។ បន្ថែមពីនេះ នៅពេលទំនេរ គាត់បានធ្វើការស្មគ្រ័ចិត្ត ក្នុងសិក្សាស្រាជ្រាវ ទៅលើអាជីវកម្មផ្សេងៗ ដើម្បីស្វែងយល់ឱ្យកាន់តែច្បាស់ ពីតថភាពសង្គមខ្មែរ នាពេលបច្ចុប្បន្ន។