៥ជំហានដើម្បីធ្វើទីផ្សារឱ្យ​ខ្លួនឯង និងអួតខ្លួនឯង

1310

Personal Branding (ការធ្វើទីផ្សារឱ្យ​ខ្លួនឯង ឬអួតខ្លួនឯង)គឺពិតជាសំខាន់ណាស់​សម្រាប់គ្រប់ៗគ្នា ដើម្បីធ្វើឱ្យ​គេទុកចិត្ត ជឿជាក់ ហើយវាក៏ជាបច្ច័យ​មួយ​យ៉ាងសំខាន់​អាចឱ្យ​យើង​ឆាប់ទៅដល់គោលដៅ​ដែលយើង​ប្រាថ្នាចង់បាន ហើយអ្វីដែលសំខាន់នោះ គឺយើងត្រូវចេះប្រើប្រាស់​បណ្តាញសង្គម (Facebook និង​ Instagram)ឱ្យមាន​ប្រយោជន៍ដើម្បីផ្សព្វផ្សាយខ្លួនឯងដើម្បីទៅដល់គោលដៅនោះ! ការបង្ហាញ​ចំណុចខ្លាំងខ្លួន ការបង្ហាញសមត្ថភាព​ឱ្យ​អស់ពីពោះចេញទៅទីសាធារណៈ គឺជា​ចំណុចខ្សោយ​របស់ប្រជាជន​ខ្មែរជាច្រើន ដោយសារតែ​ភាពអៀន និងខ្លាចគេ​គិត​មិនល្អចំពោះខ្លួនឯង។ ការមិនហានបញ្ចេញ មិនហានអួតនេះហើយ ដែលជា​របាំងរាំងស្ទះមួយ ធ្វើឱ្យអ្នកនៅជុំវិញ ដៃគូរសហការ ឬថ្នាក់ដឹកនាំពិបាកនឹងដឹងច្បាស់ថាយើងពូកែអ្វី មានសមត្ថភាពអ្វី ឬចង់ធ្វើអ្វី។ ប៉ុន្តែ អួតត្រង់នេះ​មិនមែនចង់​ជម្រុញឱ្យអួតលើសការពិតនោះទេ គឺគ្រាន់តែជាការអួតនូវអ្វីដែលយើងមាន (អួតវិជ្ជមាន និងមិនមែនអួតទ្រព្យសម្បតិ្តនោះទេ) គឺជាការអួតនូវសមត្ថភាព អួតនូវវិជ្ជាជីវៈ អួតដើម្បី​បានឱកាស!

៥ជំហានខាងក្រោមនេះ គឺជាចំណុច​ងាយៗ​ងាយស្រួលចាំ និងដែលគ្រប់គ្នាគួរ​អនុវត្ត​នោះគឺ៖

ការមិនហានបញ្ចេញ មិនហានអួតនេះហើយ ដែលជា​របាំងរាំងស្ទះមួយ ធ្វើឱ្យអ្នកនៅជុំវិញ ដៃគូរសហការ ឬថ្នាក់ដឹកនាំពិបាកនឹងដឹងច្បាស់ថាយើងពូកែអ្វី មានសមត្ថភាពអ្វី ឬចង់ធ្វើអ្វី។

១ មាន​គោលដៅច្បាស់លាស់ និង​ជាក់លាក់ៈ

តើអ្នកចង់ឱ្យអ្នកនៅជុំវិញខ្លួន​អ្នក​គិតយ៉ាងណា ឬផ្សារភ្ជាប់ខ្លួនអ្នកទៅនឹងអ្នកអំពីអ្វី? តើអ្នកចង់ឱ្យគេគិតថាអ្នកពូកែអ្វី? ជំនាញអ្វី? តើអាចជួយដល់គេអ្វីខ្លះ (ដោះស្រាយ ឬផ្តល់សេវាកម្ម​ ។ល។)។

២ ផ្តោតៈ

មិនត្រូវមានគោលដៅ​ច្រើនពេកទេ​ក្នុងពេលតែមួយ ព្យាយាម​មាន​គោលដៅតែមួយ​ ហើយ​សម្រេច​វាឱ្យបានជាមុនសិន រហូត​ទាល់​តែអ្នកជុំវិញខ្លួន​យល់ឃើញ និង​មើលឃើញនូវអ្វីដែលអ្នកចង់ឱ្យគេមើលឃើញ។ ឧទាហរណ៍ អ្នកចង់ឱ្យគេ​គិតថាអ្នកជាអ្នកជំនាញ ឬពូកែខាងរៀបចំយុទ្ធសាស្ត្រទីផ្សារ អ្នកគួរតែផ្តោតបង្ហាញភាព​ខ្លាំងរបស់អ្នកក្នុង​ជំនាញនេះ ចៀសវាង​ចេះគ្រប់មុខក្នុងពេលតែមួយ។ មានមនុស្សជាច្រើន​​ ខំព្យាយាមបង្ហាញថាខ្លួនស្អីក៏ចេះនិងមានជំនាញគ្រប់មុខ តែការបង្ហាញដូចនេះ គឺជាការបង្ហាញឱ្យគេមានអារម្មណ៍ថា គាត់មិនមែនជាអ្នកជំនាញ ហើយធ្វើឱ្យគេមិនទុកចិត្តទៅវិញ ព្រោះថាអ្នកកាន់តែចេះ គេរកអ្នកដែលចេះច្បាស់ មិនមែនរកអ្នកចេះគ្រប់មុខទេ។ 

៣ បង្ហាញ​ថាអ្នកមានជំនាញពីតប្រាកដៈ

ប្រសិន​បើអ្នកចង់​ឱ្យ​គេមើលឃើញ​ថាអ្នកពូកែអ្វី ឬចូលចិត្តអ្វី អ្នកត្រូវ​បង្ហាញ​ពីសកម្មភាពដែលគាំទ្រ​នូវគោលដៅនោះ។ ឧទាហរណ៍​ដូចជា​បង្ហាញពីការសកម្មភាព​ដោះស្រាយបញ្ហានានា ឬក៏​ការបំពាក់បំប៉នសមត្ថភាព​ឥតឈប់ឈរ​ក្នុងជំនាញ​ដែលអ្នកកំពុងតែអួត។ 

៤ មានភាព​ច្នៃប្រឌិត និងប្លែកៈ

ប្រសិនបើអ្នកធ្វើអ្វីដែលប្លែក និងមានភាពច្នៃប្រឌិត ធ្វើឱ្យ​អ្នកនៅជុំខ្លួន​អ្នកឆាប់ចាប់អារម្មណ៍ និងជឿជាក់។

៥ ធ្វើហើយធ្វើទៀតៈ

ជាទូទៅ មុននឹងអាចគេចងចាំ និងមើលឃើញអ្វីដែលអ្នកចង់ឱ្យគេមើលឃើញ​នោះគឺទាមទារឱ្យមានសកម្មភាព​ជាប់លាប់ និង​មិនតិចជាង​៦​ខែទៅ១ឆ្នាំនោះទេ។ ដូចនេះ អ្នកគួរតែព្យាយាម​បង្ហាញ​សកម្មភាព​គាំទ្រគោលដៅរបស់អ្នក​ឱ្យបាន៦ខែឡើងទៅ នោះអ្នកនឹងចាប់ផ្តើមឃើញពីលទ្ធផលបណ្តើរៗ

Previous articleគន្លឹះ៣យ៉ាងដើម្បីជួលអ្នកដែលពូកែឈ្លាសវៃមកធ្វើការ
Next articleនិន្នាការរចនាផលិតផលទាំង៧នេះនឹងមានច្រើននៅឆ្នាំ២០២០
លោក ហាក់គីមថុង គឺជា ស្ថាបនិក និងនាយក KUMNIT CREATIVE ដែលជា ស្ថាប័ន ផ្តល់សេវាកម្ម និងវគ្គសិក្សាយុទ្ធសាស្ត្រអាជីវកម្មសម័យទំនើប (Digital Marketing) ជាសហស្ថាបនិកគេហទំព័រគំនិត និង​ជា​ប្រធាន​ទីផ្សារ​របសក្រុមហ៊ុនអចលនទ្រព្យ​Century 21 Dream Property។ គាត់ មាន បទពិសោធន៍ការងារជាច្រើន ទាំង​ក្នុង​និង​ក្រៅប្រទេស​ទាក់ទង​ នឹង​វិស័យ​អចលនទ្រព្យ សិក្សា​​ស្រាវជ្រាវ​​ទីផ្សារ​ អាហារ​និង​ភោជនីយដ្ឋាន គ្រឿង​សម្អាង​ និង​ Retail ព្រមទាំង​​ជា​​អ្នក​ប្រឹក្សា​យុទ្ធសាស្ត្រ​អាជីវកម្ម​សម្រាប់​ក្រុមហ៊ុន​មួយចំនួន​ផងដែរ។  គាត់បានចុះកម្មសិក្សា នៅតាមបណ្តាក្រុមហ៊ុនផ្សេងៗ ទាំងក្នុង និងក្រៅប្រទេស ធ្លាប់ចូលរួមកម្មវិធីផ្លាស់ប្តូរវប្បធម៌ សិក្ខាសាលាធុរកិច្ច និង ធ្វើដំណើរ កម្សាន្ដ ទៅប្រទេស​ក្រៅជាច្រើន ដែលនេះសុទ្ធតែជាបទពិសោធ មួយដ៏ល្អសម្រាប់ចែករំលែក និងធ្វើការផ្សព្វផ្សាយបន្ត។