spot_img
spot_img
Homeធុរកិច្ចអ្វីទៅជាការរើសអើងនៅក្នុងអង្គភាព?

អ្វីទៅជាការរើសអើងនៅក្នុងអង្គភាព?

-

ការរើសអើង​ជា​ការវិនិច្ឆ័យ​ទៅលើ​នរណាម្នាក់​ដោយ​ផ្អែក​តែលើ​ផ្នត់គំនិតផ្ទាល់​ខ្លួន​​ឬ​​ក្រុម​ខ្លួន​តែ​ម្យ៉ាង​និង​មិនខ្វល់​ថា​វា​ខុស​ឬ​ត្រូវទេ​។ វា​ជា​បញ្ហា​ប្រឈម​ដែល​ជា​ញឹកញាប់​វា​តែងតែ​កើតឡើង​​នៅក្នុង​ក្រុម​មនុស្ស​ជាច្រើន​។ វា​ក៏​ជា​ដំណាក់កាល​ដែល​ធ្ងន់ធ្ងរ​ជាងគេ​នៅក្នុង​ចំណោម​ការ​ប្រកាន់​តូចៗ​ផ្សេងៗ​ទៀត​។ ក្នុង​នាមជា​អ្នកដឹកនាំ​ម្នាក់ អ្នក​នឹង​មិនអាច​គ្រប់គ្រង​មនុស្ស​បាន​ដោយ​ងាយស្រួល​ឡើយ​បើ​អ្នក​មិនបាន​ស្វែង​យល់​ពី​ប្រភេទ​នៃ​ការ​ប្រកាន់​របស់​បុគ្គលិក​ម្នាក់ៗ​ឲ្យ​បាន​ច្បាស់លាស់​និង​មិន​ព្យាយាម​ស្វែងរក​ដំណោះស្រាយ​ទាក់ទង​នឹង​បញ្ហា​ទាំងនេះ​ឲ្យ​វា​កាន់តែ​ប្រសើរ​ឡើង។ ផ្នត់គំនិត​របស់​មនុស្ស​ប្រកាន់​ខ្ជាប់​នូវ​ការរើសអើង​ដោយផ្អែក​លើ​កត្តា​មុខមាត់ ភេទ អាយុ ពណ៌​សម្បុរ ជាតិ​សាសន៍ សាសនា ជីវភាព​គ្រួសារ និង​កាយសម្បទា​ជាដើម​។ ខាងក្រោមនេះ​ជា​ប្រភេទ​នៃ​ការរើសអើង​ព្រមទាំង​ដំណោះស្រាយ​មួយចំនួន​ផងដែរ ​៖

មុនពេល​ដែល​យើង​លើក​យក​ពី​ដំណោះស្រាយ​ យើង​នឹង​បង្ហាញ​ពី​ទម្រង់​នៃ​សកម្មភាព​ខ្លះៗ​ដែល​សរបញ្ជាក់​ឲ្យ​ឃើញថា​អង្គភាព​របស់អ្នក​មាន​ការរើសអើង​ជាមុនសិន​ ៖

ទម្រង់​នៃ​សកម្មភាព​រើសអើង

១. គោលការណ៍​ឬ​ការប្រតិបត្តិ​មិនមាន​ភាពស្មើគ្នា ៖ ភាគច្រើន​វា​ជា​សកម្មភាព​នៃ​ថ្នាក់ដឹកនាំ​នៅក្នុង​ស្ថាប័ន​ដែល​មិនផ្តល់​ឱកាស​ដល់​បុគ្គលិក​គ្រប់រូប​ស្មើៗ​គ្នា​ចំពោះ​សិទ្ធិ​និង​សមត្ថភាព​ដែល​គេ​សម​នឹង​ទទួលបាន​ដូចជា​ការផ្តល់​តួនាទី​ការងារ ពេល​ឈប់​សម្រាក ការ​ផ្អាកពី​ការងារ​ជាដើម។​ មួយវិញទៀត​ការ​អនុវត្តន៍​ចំពោះ​អ្នកក្រោមបង្គាប់​នៅពេល​ដែល​គេ​ត្រូវ​ឡើង​ដំណែង រង្វាន់​លើក​ទឹកចិត្ត ឬ​ផ្តល់​ប្រាក់​បៀវត្សរ៍​មិន​សមស្រប​តាម​ការ​បំពេញ​ការងារ។ ឧទាហរណ៍ ក្រុមហ៊ុន​លក់​គ្រឿង​សម្អាង​មានគោលការណ៍​ថា​បុគ្គលិក​ផ្នែក​លក់​ត្រូវតែ​ជា​មនុស្សស្រី​និង​មាន​សម្រស់​ស្រស់ស្អាត​។

២.ការបំពាន​ផ្លូវភេទ ៖ សកម្មភាព​ទាំងឡាយ​ទាំង​កាយវិការ​និង​ពាក្យ​សម្តី​ដែល​ប៉ះពាល់​ផ្នែក​រាងកាយ​ចំពោះ​បុគ្គលិក​ណាម្នាក់។

៣.ការគម្រាម​កំហែង ៖ ការប្រើប្រាស់​កាយវិការ​ឬ​ពាក្យ​សម្ដី​មិនសមរម្យ​របស់​បុគ្គល​ឬ​ក្រុម​ណាមួយ​ដែល​នាំឲ្យ​បុគ្គល​ឬ​ក្រុមផ្សេង​ទៀត​មានអារម្មណ៍​ថា​មិនមាន​សុវត្ថិភាព។

៤.ការមើលងាយ ៖ យក​រឿង​អាម៉ាស​របស់គេ​មក​ធ្វើជា​រឿង​កំប្លែង ចំអក​ឡកឡឺយ និង​លេងសើច​ដែល​ធ្វើឲ្យ​ភាគី​ម្ខាង​ទៀត​មានអារម្មណ៍​មិនសប្បាយ​ចិត្ត​និង​ខ្មាសគេ​។ វា​ក៏​ជា​ការរិះគន់​ទៅកាន់​នរណាម្នាក់​ពី​សមត្ថភាព​និង​ជំនាញ​របស់គេ​ថា​គេ​មិនអាច​ធ្វើ​ដូច​ខ្លួន​បាន។

៥.ការប្រើប្រាស់​ពាក្យ​សម្តី​មិន​សមរម្យ ៖ ពាក្យ​សម្តី​មិន​សមរម្យ​មាន​ច្រើន​ដូចជា ការជេរ​ប្រទេច ពាក្យ​ដែល​និយាយ​ដោយ​ការជះ​កំហឹង ពាក្យចំអក​ជាដើម។ វា​ជា​ការ​ប្រមាថ​កិតិ្តយស​របស់​និយោជិក​ផ្សេងទៀត​យ៉ាង​ធ្ងន់ធ្ងរ។​

៦.ចំណូលចិត្ត​ចំពោះ​បុគ្គល ៖​ ជា​សកម្មភាព​ដែល​ភាគច្រើន​កើតឡើង​ចំពោះ​គណៈគ្រប់គ្រង​ឬ​ថ្នាក់​ដឹកនាំ​ដែល​ផ្តល់​ជា​រង្វាន់​លើក​ទឹកចិត្ត​ ការសរសើរ តម្លើង​ឋានន្តរ​សក្តិ​ ចំពោះ​តែ​បុគ្គលិក​ណា​ដែល​​ខ្លួន​ស្រលាញ់​ពេញចិត្ត​តែ​ប៉ុណ្ណោះ។ ប៉ុន្តែ​វា​ក៏​អាច​កើត​ចំពោះ​បុគ្គលិក​គ្នា​ឯង​ផងដែរ។

ខាងលើ​សុទ្ធតែ​ជា​សកម្មភាព​មួយចំនួន​ដែល​យើង​ចាត់វាចូលទៅ​ក្នុង​ការរើសអើង​ទាំងអស់។ តើ​អ្នក​ត្រូវ​ធ្វើ​យ៉ាងណា​ដើម្បី​កុំ​ឲ្យ​ការរើសអើង​ដក់ជាប់​នៅក្នុង​ខួរក្បាល​របស់​បុគ្គលិក​ម្នាក់ៗ​និង​អាច​កែប្រែ​ផ្នត់គំនិតរបស់​ពួកគេ​បាន? បើ​នេះ​ជា​ក៏ជា​ចម្លើយ​នៃសំណួរ​ដែល​អ្នក​ចង់​បាន​ដូចគ្នា​ដែរ គំនិត​សូម​លើក​យក​ដំណោះស្រាយ​ខ្លះៗ​មកបង្ហាញ​និង​ធ្វើ​ការពិចារណា​ទាំងអស់គ្នា ៖

ដំណោះស្រាយ​នៃ​សកម្មភាព​រើសអើង

  • បង្កើត​ឲ្យ​មានគោលការណ៍​ទាក់ទង​នឹង​ការ​ប្រឆាំង​ការរើសអើង​នៅក្នុង​អង្គភាព ៖ ថ្វីត្បិតតែ​នៅ​ប្រទេស​យើង​មាន​ច្បាប់ទាក់ទង​នឹង​ការរើសអើង​របស់ក្រសួងការងារ​ពិតមែន​ ប៉ុន្តែ​វា​មិនទាន់​គ្រប់គ្រាន់​នៅឡើយ​ទេ​។ អង្គភាព​ត្រូវ​បង្កើត​ឲ្យមាន​ច្បាប់​នេះ​ប្រចាំ​ក្រុមហ៊ុន​របស់ខ្លួន​ឯង​ថែមទៀត​ដើម្បី​អាច​ធានា​បានថា​ក្រុមហ៊ុន​នឹង​មាន​ភាពតឹងរ៉ឹង​សម្រាប់​អនុវត្ត​ជាមួយ​អ្នក​ដែល​ល្មើស​នឹង​ច្បាប់​មិនថា​ការរើស​បុគ្គលិក​ចូល​មកធ្វើការ ការប្រតិបត្តិ​ការងារ​របស់​និយោជិក ព្រមទាំង​ការប្រាស្រ័យ​ទាក់ទង​គ្នា​នៅក្នុង​ក្រុម។ មួយវិញទៀត វា​ជួយ​ឲ្យ​ម្នាក់ៗ​មានអារម្មណ៍​ថា​ខ្លួនគេ​មាន​សុវត្ថិភាព​ព្រោះ​មាន​ច្បាប់​ការពារ។
  • អភិវឌ្ឍ​និង​អនុវត្ត​គោលការណ៍​នោះ ៖ គ្រាន់តែ​បង្កើត​មិនទាន់​ល្អ​ឥតខ្ចោះ​នោះទេ ត្រូវតែ​អនុវត្ត​និង​ផ្សព្វផ្សាយ​ឲ្យ​បាន​ដឹង​គ្រប់ៗ​គ្នា​ថែមទៀត។ អ្នក​ត្រូវ​ពិនិត្យ​មើល​ឲ្យ​បានហ្មត់ចត់​ចំពោះ​អ្នក​គ្រប់គ្រង​និង​បុគ្គលិក​គ្រប់​ផ្នែក​ទាំងអស់​នៅក្នុង​ស្ថាប័ន​របស់អ្នក​។
  • លើកទឹកចិត្ត​ឲ្យ​បុគ្គលិក​មិនខ្លាច​ក្នុង​ការ​ទាមទារ​រក​សិទ្ធិ​របស់ខ្លួន ៖ បើសិនជា​មាន​បុគ្គលិក​ណាម្នាក់​ទទួលរង​ភាព​អយុត្តិធម៌​ដោយ​មិនអាច​ទទួលយក​បាន​ពី​ការរើសអើង អ្នក​អាច​ណែនាំ​ឲ្យ​ពួកគេ​ទៅ​ពិភាក្សា​រក​ដំណោះស្រាយ​ជាមួយ​ថ្នាក់លើ​របស់គេផ្ទាល់។
  • បង្កើតឲ្យ​មាន​សិក្ខាសាលា​និង​វគ្គ​បណ្តុះបណ្តាល ៖ ប្រសិនបើ​អ្នក​អនុញ្ញាត​ឲ្យ​ពួកគេ​បានឈប់​សម្រាក​ពី​ការងារ​ខ្លះ និង​បង្កើត​ឲ្យមាន​កម្មវិធី​ទាក់ទង​នឹង​ការជម្រុញ​ការលុបបំបាត់​ការរើសអើង​នៅក្នុង​ស្ថាប័ន នោះ​វា​នឹង​ជួយ​ឲ្យ​បុគ្គលិក​មានអារម្មណ៍​ថា​ពួកគេ​ត្រូវបាន​គេ​យកចិត្ត​ទុកដាក់​យ៉ាងប្រសើរ​។ មួយវិញទៀត​វា​ក៏​អាចជួយ​ឲ្យ​គេអាច​កែប្រែ​ផ្នត់គំនិត​មិនល្អ​រវាងគ្នា​និង​គ្នា​ផងដែរ។
  • ចំពោះ​អ្នកដឹកនាំ​និង​បុគ្គលិក​ឬ​បុគ្គលិក​និង​បុគ្គលិក ៖
    • បង្កើតជា​ដំណើរ​កម្សាន្ត​ឬ​កម្មវិធី​ជួបជុំ​សប្បាយ​ជាមួយ​គ្នា ៖ ការធ្វើ​បែបនេះ​គោលបំណងគឺ​ធ្វើឲ្យ​មានភាព​ស្និទ្ធស្នាល​និង​យល់​ពី​គ្នា​ឲ្យ​បានច្រើន។
    • ណែនាំ​និង​ដោះស្រាយ​ដោយផ្ទាល់ ៖​ បើគេពិតជា​មានការរើសអើង​គ្នា ពួកគេ​ពិតជា​ពិបាក​ដោះស្រាយ​ជាមួយ​គ្នា​ណាស់។ ហេតុនេះ​អ្នក​អាច​​ចូល​ធ្វើ​ជាជនទី៣​ជួយ​ដោះស្រាយ​បញ្ហាឲ្យ​គេបាន។
    • ផ្ទេរ​ដំណែង ៖ អ្នក​អាច​ប្តូរ​តួនាទី​របស់​បុគ្គលិក​ដែល​ពិតជា​មិនអាច​ស្រុះស្រួល​ជាមួយ​គ្នា​បាន​​ទៅកាន់​មុខដំណែង​ផ្សេង​ដែល​ទាក់ទងគ្នា​ជាមួយ​មុខ​ដំណែង​ចាស់។

យើង​ទទួលស្គាល់​ថា​ការរើសអើង​ជា​រឿងមួយ​ដែល​ស្មុគស្មាញ​និង​ពិបាក​ដោះស្រាយ​ណាស់​មិនថាតែ​នៅក្នុង​ស្ថាប័នរដ្ឋ​និង​ឯកជន​ប៉ុណ្ណោះ​ទេ។ ប៉ុន្តែ​មិនថា​យ៉ាងណា​ក៏ដោយ​វា​ជារឿង​ដែលគួរឲ្យ​ឈឺចាប់​ចំពោះ​អ្នក​ដែល​ទទួលរង​អំពើ​ទាំងអស់នេះ​។ អ្នក​ត្រូវចាំថា​មនុស្ស​ទាំងអស់​សុទ្ធតែ​មានសិទ្ធិ​ស្មើៗ​គ្នា។

 

 

Pisey So
Pisey So
សូ ពិសី​មាន​តួនាទី​ផ្នែក Business Creative នៅក្នុងគំនិត​​ដែល​ផ្តោតលើ​ការបង្កើត​មាតិកា​ធុរកិច្ច សហគ្រិន យុទ្ធសាស្ត្រ​​អាជីវកម្ម​សម័យ​ទំនើប​ព្រមទាំង​ធ្វើករណី​សិក្សា​ទៅលើ​អាជីវកម្ម​​ក្នុងស្រុក។គាត់​ក៏​​ជា​និស្សិត​នៅ​សាកលវិទ្យាល័យ​មេគង្គកម្ពុជា​សិក្សា​ផ្នែក​​​គ្រប់គ្រង​ធុរកិច្ច​អន្តរជាតិ​។ គាត់​​ធ្លាប់​ចូលរួម​សិក្ខា​សាលា​និង​វគ្គ​បណ្តុះបណ្តាល​ដូចជា ​ភាពជា​អ្នកដឹកនាំ ជំនាញទន់ និង​ជំនាញ​នៃ​ការលក់​ជាច្រើន ​​ព្រមទាំង​សកម្មភាព​ក្នុង​ការងារ​ស្ម័គ្រចិត្ត​ផងដែរ។

រៀនពីអ្វីថ្មីៗ

spot_img

អត្ថបទថ្មិៗ