spot_img
spot_img
Homeធុរកិច្ច៥សំណួរដែលពិបាកឆ្លើយនៅពេលសម្ភាសន៍ការងារ

៥សំណួរដែលពិបាកឆ្លើយនៅពេលសម្ភាសន៍ការងារ

-

ដើម្បី​ទទួលបាន​ជោគ​ជ័យ​ក្នុងពេល​សម្ភាសន៍ គឺយើង​ត្រូវ​ដឹង​ និង​យល់ចិត្ត​អ្នក​សម្ភាសន៍ថា​គេ​ចង់​បាន​អ្វី និង​ត្រូវការ​អ្វី? មានសំណួរជាច្រើន​ដែល​នឹង​ត្រូវ​បាន​សួរ​នៅ​ពេល​សម្ភាសន៍​ដែល​អ្នក​គួរ​តែ​ត្រៀម​ខ្លួន​ឱ្យ​រួចរាល់​ទុក​ជាមុន។ អ្នកត្រូវតែ​ដឹង និង​កំនត់​ឱ្យ​បាន​ច្បាស់​ថា​ តើ​គេកំពុង​តែចង់បាននូវ​ចម្លើយ​អ្វី​ពីអ្នក។ ក្នុង​អត្ថបទ​នេះ យើង​សូមលើ​យក​នូវ​សំណួរ​ចំនួន​៥ ដែល​តែង​តែ​ត្រូវ​បាន​សួរ ហើយ​វា​ក៏ជា​សំណួរ​ដែល​ពិបាក​នឹង​ឆ្លើយ​ផង​ដែរ៖

១- ចូរអ្នក​រៀបរាប់​អំពី​ខ្លួន​អ្នកផ្ទាល់?

សំណួរ​នេះ​គឺជា​សំណួរ​សំខាន់​មួយ​ដែល​គេតែង​និយម​សួរ​ក្នុង​ពេល​សម្ភាស​ន៍ការងារ។ អ្វី​ដែល​អ្នកសួរ​ចង់​ដឹងនោះគឺ ​ តើ​អ្នក​អាច​ជួយ​បាន​ការ​ងារ​អ្វី​ខ្លះ​ដល់​ក្រុម​ហ៊ុន​របស់គេ? តើ​អ្នក​អាច​នឹង​ផ្តល់​ផល​ប្រយោជន៍អ្វី​ខ្លះ​ដល់ក្រុម​ហ៊ុន​របស់​​គេ​នោះ?

អ្នក​សួរ​គេ​​ចង់​ដឹង​អំពី​ ជំនាញ សមត្ថភាព​ បទពិសោធន៍​ និងភាពខ្លាំង​របស់​អ្នក ជាពិសេស​នោះ​គឺអ្វី​ដែល​ទាក់​ទង​ទៅ​នឹង​ការងារ​ដែល​អ្នក​កំពុង​តែ​ធ្វើការ​សម្ភាសន៍។ អ្នកអាច​ជា​អ្នក​លង​តន្ត្រី​ដ៏​ចំណាន​ម្នាក់ ប៉ុន្តែ​អ្នក​ដែល​សម្ភាសន៍​អ្នក​នឹងមិន​ចាប់​អារម្មណ៍​នោះទេ ប្រសិន​បើ​ការងារ​ដែល​អ្នក​ដាក់​ពាក្យ​សុំ​នោះ​មិន​មែន​ទាក់​ទង​នឹង​តន្ត្រី។ អ្នកគួរ​តែ​ធ្វើការ​ផ្តោត​ទៅ​លើ​ចម្លើយ​ណាដែល​គេ​កំពុងតែសួរ ហើយ​ចៀសវាង​នូវ​ចម្លើយ​ដែលមិនមានការទាក់ទង​នឹងការ​ងារ​របស់​អ្នក។

២- ហេតុអ្វី​បាន​ជា​អ្នក​លាឈប់ ឬចាក​ចេញ​ពី​កន្លែងធ្វើ​ការ​ចាស់​របស់​អ្នក?

នេះ​ជា​សំណួរ​មួយ​ដែល​អ្នក​អាច​នឹង​ត្រូវ​បាន​សួរ។ អ្នក​សម្ភាសន៍​ចង់​ដឹង​ថា តើ​មាន​បញ្ហា​អ្វី​ដែល​បណ្តាល​ឱ្យ​អ្នក​ធ្វើ​ការ​ផ្លាស់​ប្តូរ​កន្លែង​ធ្វើ​ការ? តើ​អ្នក​ជា​អ្នក​បង្ក​បញ្ហា​ដល់​ក្រុមហ៊ុន? ហើយ​បញ្ហា​នេះ​នឹង​អាច​កើត​ឡើង​ម្តង​ទៀត​ដែរ​ឬទេ?

ប្រសិន​បើ​​អ្នក​កំពុង​តែ​រក​ការ​ងារ​ថ្មី​ធ្វើ​ដោយ​សារ​តែ​ត្រូវ​គេ​បណ្តេញ​ចេញ ឬ​ត្រូវ​គេ​កាត់​បន្ថយ​បុគ្គ​លិក អ្នក​គួរ​តែ​ត្រូវ​ត្រៀម​ចម្លើយ​នៃ​សំណួរ​នេះ ឱ្យ​បាន​រួច​រាល់ ដោយ​ផ្តល់​នូវ​ចម្លើយ​ដែល​សង្កត់​ទៅ​លើ​ន័យ​វិជ្ជមាន ជា​ជាង​អវិជ្ចមាន។

អ្នក​ប្រហែល​ជា​អាច​ឆ្លើយ​ថា៖ វា​គឺជា​បទពិសោធន៍​ដែល​ខ្ញុំ​ចង់​បំភ្លេច​វា ប៉ុន្តែ​ខ្ញុំ​បានទទួល​មេរៀន​មួយ​ដ៏​ល្អ​ពី​បទ​ពិសោធន៍​នេះ។

នៅ​ពេល​ដែលជួប​បញ្ហា​អ្វី​ដែល​មិន​ល្អ​នៅ​ក្នុង​បទ​ពិសោធន៍​ការងារ​របស់​អ្នក អ្នក​ត្រូវ​តែ​ផ្លាស់​ប្តូរ​របៀប​ឆ្លើយដោយ​ធ្វើ​យ៉ាង​ណា​ឱ្យ​វា​ទេរ​ទៅ​រក​ភាព​វិជ្ជមាន​វិញ។

៣- ហេតុអ្វី​បានជា​អ្នក​ចង់​ធ្វើ​ការ​នៅ​ទី​នេះ?

អ្នក​សម្ភាសន៍​ចង់​ស្តាប់​នូវ​ចម្លើយ​របស់​អ្នក​ថា ហេតុ​អ្វី​បានជា​អ្នក​ជ្រើសរើស​ក្រុម​ហ៊ុននេះ ឬ​ក៏​មុខ​តំណែង​ណា​មួយ​ដែល​អ្នក​កំពុង​ដាក់​ពាក្យ​សុំ។

ចម្លើយ​ដែល​អ្នកមិន​គួរ​ឆ្លើយ​នោះ​គឺ៖ ខ្ញុំ​បាន​ឃើញ​វា​នៅ​លើ​ទំព័រ​ស្វែង​រកការងារ ហើយ​ខ្ញុំ​ដឹង​ថា​ខ្ញុំ​អាច​បំពេញ​មុខ​តំណែង​នេះ​បាន។ ចម្លើយ​នេះ គឺវា​ប្រហាក់​ប្រហែល​នឹង​ការ​សុំ​នារី​ម្នាក់​ដើម្បី​ធ្វើ​ជា​គួរ​គ្រង ហើយ​នៅ​ពេល​ដែ​ល​នាង​សួរ​ទៅ​វិញថា “ហេតុអ្វី​បាន​ជា​លោកចង់​រៀបការ​ជាមួយ​ខ្ញុំ?”  បុរស​នោះ​ឆ្លើយ​ថា៖ ខ្ញុំតែង​ចង់​រៀប​ការ ហើយនាង​គឺជា​មនុស្ស​ស្រី។ ចម្លើយ​នេះ​គឺជា​ចម្លើយ​ដែល​ទទួលយក​បាន​នោះ​ទេ។

អ្នកគួរ​តែ​ធ្វើ​ការសិក្សា​ស្រាវ​ជ្រាវ​ទៅ​លើ​ក្រុម​ហ៊ុន​ដែល​អ្នក​កំពុងតែធ្វើ​ការ​ដាក់​ពាក្យដូចជា​គោល​នយោបាយ​របស់​ក្រុម​ហ៊ុន និង​បេសកម្ម​ជា​ដើម។ អ្នក​អាច​ឆ្លើយ​ថា គោល​នយោបាយ​ និង​បេសកម្ម​របស់​ក្រុម​ហ៊ុន​នោះ​ ស្រប​ទៅ​នឹង​គោល​គំនិត​របស់​អ្នកហើយ​ជាអ្វី​ដែល​ខ្ញុំ​កំពុង​តែ​ស្វែង​រក។

ចម្លើយ​ផ្សេងទៀត​សម្រាប់​សំណួរ​មួ​យ​នេះ គឺអ្នក​ទៅ​សម្ភាស​ដើម្បី​ចង់​ដង់​ឱ្យ​បាន​ច្បាស់​ថា តើ​កន្លែង​នេះ​ស័ក្តិ​សម​អ្នក​ដែរ​ឬទេ ឬមួយ​ក៏​អ្នក​អាច​ធ្វើ​ការងារនោះ​បាន​ដែរ​ឬទេ។ ចូរ​ចាំ​ថា​ អ្នក​ទៅ​សម្ភាស​ដើម្បី​ធ្វើ​សង្កេត និង​ស្វែង​យល់​ឱ្យ​បាន​ច្រើន​ចំពោះ​ក្រុម​ហ៊ុន​នោះថា​តើ​អ្នក​គួរ​តែ​ធ្វើការ​ឱ្យ​ក្រុមហ៊ុននេះ​ដែរ​ឬទេ ដោយ​មិន​មែន​ទៅ​ទី​នោះ​ដើម្បី​ឱ្យ​តែ​គេ​សង្កេត​និង​ស្វែង​យល់​ពី​អ្នក​នោះ​ទេ?

៤- តើ​អ្នក​មានចំនុចខ្សោយ​អ្វី​ខ្លះ?

នេះ​ជា​សំណួរ​មួយ​ដែល​ពិ​បាក​ឆ្លើយ។ ប្រសិន​បើ​អ្នក​ឆ្លើយ​ដោយ​ទទួល​ស្គាល់​ថា​អ្នក​មាន​បញ្ហា​អ្វី​មួយនោះ គឺបី​ដូច​ជា​អ្នកលក់​ខ្លួន​ឯ​ង​ដូច្នោះ​ដែរ។

និយោជកនឹង​ធ្វើ​ការ​ស្តាប់​ពី​របៀប​រៀប​រាប់​អំពី​គុណ​វិបត្តិ​របស់​អ្នក។ ប្រសិន​បើ​មាន​សំណួរ​នេះត្រូវ​បានសួរ អ្នក​ត្រូវ​តែ​សង្កត់​ទៅ​លើ​ន័​យ​វិជ្ជមាន ពោl​គឺ​និយាយ​អំពី​ជំនាញ​ និង​ចំណេះ​ដឹង​ដែល​អ្នក​កំពុង​តែ​ប្រឹង​ប្រែង​ដើម្បី​ធ្វើ​ការ​អភិវឌ្ឍន៍​ឱ្យ​កាន់តែ​ប្រសើរ​នៅ​ក្នុង​ការ​ងារ​របស់​អ្នក។ ជ្រើស​រើស​គុណ​វិបត្តិ​មួយ​ដែល​អ្នក​មាន ហើយ​ប្រាប់​នូវ​វិធី​ដែល​អ្នក​ដោះ​ស្រាយ​សម្រាប់​បញ្ហា​នោះ។ ខាង​ក្រោម​នេះ គឺជា​ឧទាហរណ៍មួយ​ដែល​អ្នក​អាច​យក​តម្រាប់​តាម៖

ខ្ញុំជា​មនុស្ស​ម្នាក់​ដែល​ចូលចិត្ត​សម្លឹង​អ្វី​ដែល​ធំ។ ប៉ុន្តែ​ខ្ញុំ​ទទួល​ស្គាល់​ថា ពេល​ខ្លះមាន​ចំណុច​ខ្លះ​ខ្ញុំ​មិនបាន​ធ្វើ​ការពិនិត្យ​ឱ្យ​បាន​ល្អិត​ល្អន់។ ហេតុនេះ​ហើយ ខ្ញុំ​តែង​ជ្រើស​រើស​នរណា​ម្នាក់​ដែល​ជាមនុស្ស​ល្អិត​ល្អន់​មកចូល​រួម​ក្នុង​ក្រុម​របស់​ខ្ញុំជា​និច្ច។

អ្នក​ត្រូវ​ឆ្លើយ​នូវ​សំណួរឱ្យ​មាន​លក្ខណៈ​វិជ្ជមាន​ជានិច្ច។ ប្រសិន​បើ​អ្នក​ប្រាប់​អ្នក​សម្ភាសន៍​ថា​អ្នក​មាន​គុណ​វិបត្តិ​ណា​មួយ​នោះ អ្នក​ត្រូវ​តែ​ផ្តល់​ចម្លើយ​មួយ​ដែល​ប្រាប់​នូវ​វិធី​ដែល​អ្នក​ប្រើប្រាស់​ក្នុង​ការ​ដោះស្រាយ​នូវ​គុណ​វិបត្តិ​នោះ។

៥- តើ​អ្នកមានសំណួរ ឬ​ចម្ងល់​អ្វី​ដែរ​ឬ​ទេ?

ទេ ខ្ញុំគិត​ថា​អ្នក​បាន​ប្រាប់​ខ្ញុំ​លម្អិត​រាល់​អ្វី​ដែល​ខ្ញុំ​ចង់​ដឹង​រួច​ទៅ​ហើយ។ ខ្ញុំ​ប្រាកដ​ជាមាន​សំណួរ​ជាច្រើន​ដែល​ត្រូវសួរ​​ប្រសិន​បើ​ខ្ញុំ​បាន​ទទួល​ការងារនេះ។

នេះជាចម្លើយ​ដែល​មនុស្ស​ភាគ​ច្រើន​ឆ្លើយ​នូវ​សំណួរ​នេះ។ នេះ​មិន​មែន​ជា​ចម្លើយ​ដែល​ត្រឹមត្រូវ​ទេ។ នៅ​ពេល​ដែល​អ្នក​ទទួល​បាន​ការងារហើយ​នោះ វា​ប្រហែល​ជា​យឺត​ពេល​ហើយ​ដើម្បី​ធ្វើ​ការ​សួរ​នូវ​រាល់​សំណួរ។

និយោជក​នឹង​រង់​ចាំ​នូវសំណួរ​របស់​អ្នក​ដើម្បី​ចង់​ដង់​ថា​តើ​តើ​មាន​ចំណាប់ ​អារម្មណ៍​យ៉ាង​ណា​ក្នុង​ការ​ធ្វើការ​នៅក្នុង​ក្រុម​ហ៊ុន​របស់​គេ។ ខាង​ក្រោមនេះ​គឺជា​សំណួរ​ដែល​ល្អៗ​ដែល​អាច​សួរ​ក្នុង​ពេល​សម្ភាសន៍។

“បាទ ខ្ញុំ​មាន​សំណួរ​ខ្លះៗ។ បើ​តាម​ការសួរ​របស់​លោក​ក្នុង​ពេល​សម្ភាសន៍ វា​ដូចជា​លោក​កំពុង​តែ​មាន​បញ្ហាជាមួយ​នឹង​អតិថិជន។ តើ​លោក​អាច​ប្រាប់​បន្ថែម​ខ្លះ​ៗ​អំពី​ស្ថាន​ភាព​បច្ចុប្បន្ន​ដែរ​ឬ​ទេ? តើ​មានការ​លំបាក​អ្វី​ខ្លះ​ដែល​និយោកជិក​ថ្មី​នឹង​ជួប​ប្រទះ​?”

ប្រ​សិន​បើ​អ្នក​មិន​​សួរ​សំណួរ​បន្ថែម​នោះ​ទេ អ្នក​នឹង​បាត់​បង់​ឱកាស​ដើម្បី​ធ្វើ​ការ​ប្រមូល​ពត៌មាន​នានា​ដែល​ជា​កត្តា​ក្នុង​ការ​សម្រេច​ចិត្ត​ថា​តើ​ទី​កន្លែង​នេះ​ស័ក្តសម​នឹងអ្នក​ដែរ​ឬទេ។

រាល់​អ្នក​សម្ភាសន៍​នីមួយៗ​តែង​តែ​មាន​របៀប​សួរ និង​សំណួរ​ខុសៗគ្នា។ សំណួរ​ទាំង៥​ខាង​លើ​គឺជា​សំណួរ​ដែល​តែង​ត្រូវ​បាន​សួរ​ជា​ញយៗ ហេតុដូចនេះ​ប្រសិន​បើ​អ្នក​បាន​ត្រៀម​ខ្លួន​រាល់​សំណួរ​ខាង​លើ​ហើយ​នោះ អ្នក​នឹង​មាន​ប្រៀប​ទៅ​លើ​អ្នក ​ដ៏​ទៃ​ទៀត​ដែល​មិន​បាន​ត្រៀម​ខ្លួនទុក​ជាមុន។

 

 

ហាក់ គីមថុង
ហាក់ គីមថុងhttp://www.kumnit.com
លោក ហាក់គីមថុង គឺជាស្ថាបនិកគេហទំព័រគំនិត និងប្រធានក្រុមប្រឹក្សាភិបាលក្រុមហ៊ុន Viniyuk Brokerage Solution Co.,Ltd។ គាត់មានបទពិសោធន៍ទាំងក្នុង និងក្រៅប្រទេសក្នុងវិស័យទីផ្សារឌីជីថល អចលនវត្ថុ និងការអភិវឌ្ឍអាជីវកម្មជិត១០ឆ្នាំមកហើយ។ គាត់ក៏ជាទីប្រឹក្សាយុទ្ធសាស្ត្រអាជីវកម្មផងដែរក្នុងវិស័យអចលនវត្ថុ លក់រាយ និងសេវាកម្ម​សម្រាប់ម្ចាស់អាជីវកម្ម។

រៀនពីអ្វីថ្មីៗ

spot_img

អត្ថបទថ្មិៗ