ទំនងតើ!

ការធ្វើធុរកិច្ច​អន្តរជាតិ​តម្រូវឱ្យយើងដឹងពី​វប្បធម៌​របស់ប្រទេស​នីមួយៗដើម្បីងាយស្រួលក្នុងការទំនាក់ទំនង និងបង្កើន​ចំណង​មិត្ត​ភាពកាន់តែជិតស្និតរវាងគ្នានឹងគ្នា និង​បញ្ចៀសការយល់ច្រឡំ​នឹងគ្នាផងដែរ។

សូម្បីតែការចូលអង្គុយនៅភោជនីយដ្ឋាន​ក៏មានពី​​ក្រិតក្រម​ និងអតិថិវិន័យ(etiquette) ផងដែរសម្រាប់ប្រទេស ឬតំបន់មួយចំនួនជាពិសេស​សម្រាប់ជនជាតិចិន។

ប្រជាជនលោកខាងលិច (ជនជាតិ​ស្បែកស) ភាគច្រើន​មិនសូវ​ខ្វល់ខ្វាយច្រើនពី​ទីតាំងកន្លែងអង្គុយប៉ុន្មាននោះទេ។ នៅពេលដែលមានការញ៉ាំអាហារជួបជុំមិត្តភក្តិ ឬ​ការពិសាអាហាសាមគ្គីលក្ខណៈធុរកិច្ច ភ្ញៀវទាំងអស់​អាចជ្រើស​រើសកន្លែងអង្គុយ​ទៅតាម​ការស្រឡាញ់របស់ខ្លួន។ ហើយប្រសិនបើ​ការជួបជុំញ៉ាំអាហារនៅផ្ទះក្នុងឱកាស​បុណ្យ​ណូអែល និងបុណ្យThanksgiving វិញម្ចាស់ផ្ទះតែងតែអង្គុយ​នៅក្បាលតុ ឬចុងតុមានរាងចតុកោណកែង ហើយភ្ញៀវ​អង្គុយសងខាងតុនោះ ដោយ​មិនមានអត្ថន័យ​អ្វីគួរកត់សម្គាល់ពីទីតាំងអង្គុយនោះទេ។

ប៉ុន្តែសម្រាប់ជនជាតិ​ចិន​វិញ ភាគច្រើនគេចូលចិត្ត​អង្គុយតុមូលនៅពេលជួបជុំញ៉ាំអាហារជាមួយគ្នាម្តងៗ ហើយ​ទីតាំងអង្គុយវិញ​គឺអាច​បញ្ជាក់ពីឋានៈរបស់ភ្ញៀវដែលអង្គុយលើកៅអីនោះ។ អ្នកដែលអង្គុយនៅឆ្ងាយជាងគេពីច្រកចូល (ភាគច្រើននៅក្នុងបន្ទប់VIP)គឺជាភ្ញៀវកិត្តិយសដែលមានឋានៈ និងតួនាទីខ្ពស់ជាងគេ ហើយ​អ្នកដែលអង្គុយនៅជិតច្រកទ្វាចូលដែលជាទូទៅនៅទល់មុខ​ភ្ញៀវដែលពិសេសជាងគេនោះគឺជាអ្នកចេញលុយ។ គាត់មិនប្រាកដជាអ្នកអញ្ចើញភ្ញៀវនោះទេ គាត់អាចជាជំនួយការរបស់ដែលអ្នកដែលរៀបចំការជួបជុំនេះឡើងដើម្បីទទួលខុសត្រូវគិតគូរថ្លៃចំណាយអាហារមួយពេលនោះ។ ក្រៅពីនោះ ការអង្គុយគឺធ្វើផ្អែកតាមឋានៈរបស់ភ្ញៀវនីមួយៗពីធំទៅតូចគិតចាប់ពីភ្ញៀវកិត្តិយស​ដែលមានឋានៈខ្ពស់ជាងគេ។

ជាទូទៅសម្រាប់ការជួបជុំរបស់ជនជាតិចិនគឺតែងតែមានតុវិលដើម្បីងាយស្រួលក្នុង​ការលូកចាប់ម្ហូប ហើយអ្នករត់តុតែងតែដាក់ម្ហូបថ្មីៗនៅមុខអ្នកដែលមានឋានៈខ្ពស់ជាងគេ។ ជាទូទៅ​លុះត្រាតែគាត់​ចាប់ផ្តើមលូកម្ហូប​ហើយ ទើបអ្នកផ្សេងចាប់ផ្តើម​បន្តបន្ទាប់តាមក្រោយ។

លោក ហាក់គីមថុង គឺជា ស្ថាបនិក និងនាយក KUMNIT CREATIVE ដែលជា ស្ថាប័ន ផ្តល់សេវាកម្ម និងវគ្គសិក្សាយុទ្ធសាស្ត្រអាជីវកម្មសម័យទំនើប (Digital Marketing) ជាសហស្ថាបនិកគេហទំព័រគំនិត និង​ជា​ប្រធាន​ទីផ្សារ​របសក្រុមហ៊ុនអចលនទ្រព្យ​Century 21 Dream Property។ គាត់ មាន បទពិសោធន៍ការងារជាច្រើន ទាំង​ក្នុង​និង​ក្រៅប្រទេស​ទាក់ទង​ នឹង​វិស័យ​អចលនទ្រព្យ សិក្សា​​ស្រាវជ្រាវ​​ទីផ្សារ​ អាហារ​និង​ភោជនីយដ្ឋាន គ្រឿង​សម្អាង​ និង​ Retail ព្រមទាំង​​ជា​​អ្នក​ប្រឹក្សា​យុទ្ធសាស្ត្រ​អាជីវកម្ម​សម្រាប់​ក្រុមហ៊ុន​មួយចំនួន​ផងដែរ។  គាត់បានចុះកម្មសិក្សា នៅតាមបណ្តាក្រុមហ៊ុនផ្សេងៗ ទាំងក្នុង និងក្រៅប្រទេស ធ្លាប់ចូលរួមកម្មវិធីផ្លាស់ប្តូរវប្បធម៌ សិក្ខាសាលាធុរកិច្ច និង ធ្វើដំណើរ កម្សាន្ដ ទៅប្រទេស​ក្រៅជាច្រើន ដែលនេះសុទ្ធតែជាបទពិសោធ មួយដ៏ល្អសម្រាប់ចែករំលែក និងធ្វើការផ្សព្វផ្សាយបន្ត។