Homeធុរកិច្ចអាជីវកម្មកំពុងពេញនិយមស្ទ៊េកបែបប្រេស៊ីល ចាប់ផ្តើមពេញនិយមនៅក្នុងទីផ្សារអាហារ

ស្ទ៊េកបែបប្រេស៊ីល ចាប់ផ្តើមពេញនិយមនៅក្នុងទីផ្សារអាហារ

ទីផ្សារ​អាហារ​ និងភេសជ្ជៈកំពុងតែ​មានភាព​រីកចម្រើនគួរឱ្យកត់សម្គាល់ក្នុងរយៈពេល​ប៉ុន្មានឆ្នាំចុងក្រោយនេះ​ ជាពិសេស​នៅក្នុងទីក្រុងភ្នំពេញ។ កំណើន​នៃចំណូល និងជីវភាព​ បានជម្រុញ​ឱ្យ​អតិថិជនទូទៅ​ចាប់ផ្តើម​ផ្តោត​ហ៊ានចំណាយ​កាន់តែច្រើនឡើងទៅលើអាហារ​ និងភេសជ្ជៈបែបថ្មី ហាងដែល​ល្បីនិងទាន់សម័យ និងតម្លៃខ្ពស់។

ជាក់ស្តែង មុខម្ហូបស៊្ទេក ដែលពីមុនភាគច្រើន​គឺផ្តោតសំខាន់​ទៅលើ​អតិថីជនលោកខាងលិច និងអ្នកមានកម្រិតខ្ពស់​ ហើយមនុស្សទូទៅ​មិនសូវ​ស្គាល់​បាន​នឹងកំពុងពេញនិយមពីសំណាក់អតិថិជនទូទៅ។ ក្នុងចំណោមនោះ ស្ទ៊េក​បែបប្រេស៊ីល​លក្ខណៈអាហាប៊ូហ្វេ កំពុងតែ​ពេញនិយម​យ៉ាងខ្លាំង​ សម្រាប់ការជួបជុំអាហារ​ពេលល្ងាច និងកម្មវិធីជប់លៀងផ្សេងៗ។ វាជាប្រភេទអាហារ​ដែលអតិថិជន​អង្គុយ​នៅតុ ហើយ​មាន​អ្នកបម្រើសេវា​នៅក្នុងភោជនីយដ្ឋានដើររ​អារសាច់គោអូស្ត្រាលី សាច់ចៀម សាច់ជ្រូក សាច់មាន់ប្រហែលជិត​២០​ប្រភេទ​​ជូនភ្ញៀវ​នៅតាមតុ។ ជិត១០​ឆ្នាំ​មុន អាហារប្រភេទនេះគឺ​មានតែ​១ ឬ២ ហាងតែប៉ុណ្ណោះ ហើយអ្នកត្រូវមាន​ថវិការ​មិនក្រោម៥០ដុល្លារទេ​ក្នុង​ម្នាក់ដើម្បី​អាច​សោយសុខ​នូវសាច់ស្ទ៊េកច្រើនប្រភេទ។ តែបច្ចុប្បន្ននេះ​​ អាហារប្រភេទនេះ ចាប់ផ្តើមមានកាន់តែច្រើនកន្លែងទៅៗ និងមានតម្លៃកាន់តែធូរថ្លៃទៅៗ (អាចរកបានក្រោម២០ ទៅ២៥ដុល្លារក្នុងម្នាក់់) ដែលធ្វើឱ្យតម្រូវការចាប់ផ្តើមកម្រើកកាន់តែខ្លាំង។

ជាពិសេស​ យើងឃើញមាន​អាហារប្រភេទនេះ​ចាប់ផ្តើមមានវត្តមានកាន់តែច្រើន​ឡើងនៅក្នុងពីធីជប់លៀងផ្សេងៗដូចជា​ខួបកំណើត និងឡើងគេហដ្ឋាន ដែលជាជម្រើសថ្មី និងជំនួស​ឱ្យ​អាហារ​បែបលក្ខណៈតុការ ធ្វើឱ្យភ្ញៀវចាប់ផ្តើ​ម​ប្លែក​មាត់​ ដែលពីមុនភាគច្រើនឱ្យតែជប់លៀងម្តងៗគឺមានតែម្ហូបប្រហាក់ប្រហែលគ្នា ពីមួយកន្លែងទោមួយកន្លែង។

តើអាហារបែបនេះ និងមានសន្ទុះ​កម្រិតណា? ហើយអាចឈរជើងជាទីពេញនិយម​សម្រាប់អតិថិជនដែលនិយម​ចូលចិត្តអាហារស្ទេក​បានដល់ពេលណា? កុំភ្លេច​តាមដាន​មើលសន្ទុះទីផ្សារទាំងនេះទាំងអស់គ្នា!

ហាក់ គីមថុងhttp://www.hak-kimthong.com
លោក ហាក់គីមថុង គឺជា ស្ថាបនិក និងនាយក KUMNIT CREATIVE ដែលជា ស្ថាប័ន ផ្តល់សេវាកម្ម និងវគ្គសិក្សាយុទ្ធសាស្ត្រអាជីវកម្មសម័យទំនើប (Digital Marketing) ជាសហស្ថាបនិកគេហទំព័រគំនិត និង​ជា​ប្រធាន​ទីផ្សារ​របសក្រុមហ៊ុនអចលនទ្រព្យ​Century 21 Dream Property។ គាត់ មាន បទពិសោធន៍ការងារជាច្រើន ទាំង​ក្នុង​និង​ក្រៅប្រទេស​ទាក់ទង​ នឹង​វិស័យ​អចលនទ្រព្យ សិក្សា​​ស្រាវជ្រាវ​​ទីផ្សារ​ អាហារ​និង​ភោជនីយដ្ឋាន គ្រឿង​សម្អាង​ និង​ Retail ព្រមទាំង​​ជា​​អ្នក​ប្រឹក្សា​យុទ្ធសាស្ត្រ​អាជីវកម្ម​សម្រាប់​ក្រុមហ៊ុន​មួយចំនួន​ផងដែរ។  គាត់បានចុះកម្មសិក្សា នៅតាមបណ្តាក្រុមហ៊ុនផ្សេងៗ ទាំងក្នុង និងក្រៅប្រទេស ធ្លាប់ចូលរួមកម្មវិធីផ្លាស់ប្តូរវប្បធម៌ សិក្ខាសាលាធុរកិច្ច និង ធ្វើដំណើរ កម្សាន្ដ ទៅប្រទេស​ក្រៅជាច្រើន ដែលនេះសុទ្ធតែជាបទពិសោធ មួយដ៏ល្អសម្រាប់ចែករំលែក និងធ្វើការផ្សព្វផ្សាយបន្ត។

Most Popular