ពាណិជ្ជកម្ម
Home ហិរញ្ញវត្ថុ តើយើងអាចមាន​លទ្ធភាព​ទិញ​អចលនវត្ថុ​តម្លៃប៉ុន្មាន?

តើយើងអាចមាន​លទ្ធភាព​ទិញ​អចលនវត្ថុ​តម្លៃប៉ុន្មាន?

ការទិញ​អចលនវត្ថុសម្រាប់រស់នៅ ឬសម្រាប់វិនិយោគគឺជារឿងមួយ​ដែល​យើងត្រូវគិតឱ្យបានល្អិតល្អិន​ដើម្បីចៀសវាង​ហានិភ័យ ឬការមិនមានលទ្ធភាពបង់​នៅពាក់កណ្តាលទី។ មានការផ្សព្វផ្សាយ​មិនតិចទេ ដែលប្រើប្រាស់ពាក្យ​ថា បង់ប្រាក់មានភាពងាយស្រួលបំផុត ឬ​មិនចាំបាច់មានប្រាក់កក់ជាដើម (សម្រាប់ការលក់គម្រោង) តែអ្វីដែលសំខាន់ គឺយើងត្រូវ​ដឹងពី​លទ្ធភាព​របស់ខ្លួនឯងជាមុនសិន​ ថាតើយើងអាច​មានលទ្ធភាព​បង់ផ្ទះបានកម្រិតណា។ ពិតមែនហើយ​ ប្រសិនបើ​យើងមានលុយ​សុទ្ធច្រើន គ្រប់តម្លៃទិញ​អចលនវត្ថុនោះ យើងនឹងមិនចាំបារម្មណ៍​ថា​យើង​មានលទ្ធភាពឬអត់នោះទេ។ ប៉ុន្តែ ប្រសិនបើយើងមានលុយតែមួយចំនួនក្នុងដៃ ហើយតម្លៃ​ផ្ទះ/ដីនោះខ្ពស់ជាងនោះយើងត្រូវតែ​ចេះគណនាពីលទ្ធភាពរបស់យើង។ ថ្ងៃនេះ ខ្ញុំនឹងលើកយកវិធីងាយដើម្បី​យើងអាចគណនា​ពីលទ្ធភាព ថាតើយើងអាចទិញ​អចលនទ្រព្យបានតម្លៃប៉ុន្មាន?

១. មានលុយ 20%ទៅ30%​ក្នុងដៃ

ជាទូទៅ មិនថា​យើងទិញ អចលនទ្រព្យ​ពីគម្រោង ឬទិញតពីគេ អ្វីដែលល្អបំផុតគឺយើងត្រូវមាន​20% ទៅ30%នៃ​តម្លៃផ្ទះជាមុន​សិន ហើយ70% ទៅ​80​%ទៀត​ត្រូវកម្ចីពី​ធនាគារ (ធនាគារបច្ចុប្បន្នភាគច្រើន អាចឱ្យកម្ចី​ខ្ពស់បំផុត80%នៃថ្លៃអចលនវត្ថុ ជាមួយ​នឹង​ការ​ប្រាក់ទាប)។ ឧទាហរណ៍យើងមាន​លុយ​ក្នុង​ដៃ​20,000ដុល្លារ យើងអាចគណនាដោយយោងតាមចចំនួន20%ដោយ៖

តម្លៃអចលនវត្ថុគួរទិញ=$20,000/(20/100)=$100,000

ពាណិជ្ជកម្ម

ដូចនេះ តម្លៃផ្ទះដែលអ្នកអាច​មានលទ្ធភាពទិញបានគឺប្រហែល $100,000 ដោយ ពីរម៉ឺនដុល្លារជាលុយផ្ទាល់ខ្លួន និង8ម៉ឺនទៀតជា​លុយខ្ចីពីធនាគារ។ ប៉ុន្តែ វិធីតែមួយ​ខាងលើ​មិនទាន់អាចកំណត់បានមួយ100%​នោះទេថា​យើងពិតជា​អាច​ទិញ​ផ្ទះ​តម្លៃខាងលើនេះ តែត្រូវ​គណនា​រកលទ្ធភាពបង់ប្រចាំខែផងដែរ។

២. គណនាលទ្ធភាពបង់ប្រចាំខែ

ឧទាហរណ៍​ថា​យើង​ត្រូវកម្ចីធនាគារ​80% យើងអាច​ប្រើប្រាស់កម្មវិធីគណនាកម្ចីធនាគារ​តាមរយៈប្រភពជាច្រើន ហើយខ្ញុំសូមណែនាំ​គេហទំព័រមួយដែលមាន​តំណភ្ជាប់មួយនេះ។ ពេលដែលអ្នកចូលទៅក្នុង​តំណភ្ជាប់ អ្នកគ្រាន់តែបំពេញក្នុងប្រអប់ Amount of Loan (ទំហំកម្ចី):$80,000 Loan term in years (រយៈពេលខ្ចី):20ឆ្នាំ និងក្នុង​ក្នុងប្រអប់អាត្រាការការប្រាក់ Interest rate per year: 8% រួចហើយចុច Calculate (គណនា)។

បន្ទាប់ពី​គណនាហើយ អ្នកនឹងឃើញ​ទឹកប្រាក់ដែលត្រូវបង់ប្រចាំខែ $669.15 ហើយត្រូវបង់​រយៈពេល20ឆ្នាំ។ ជាទូទៅ ធនាគារ​នឹង​រំពឹង​អ្នកមានចំណូលយ៉ាងតិច​២ដង​នៃ​ប្រាក់ដែលត្រូវបង់​ប្រចាំខែ​ ប្រសិនបើយោងតាមឧទាហរណ៍ខាងលើ អ្នកត្រូវមាន​យ៉ាងតិចជាង​$1,300ជាចំណូល​ប្រចាំខែ។ ក្រៅពីនេះ អ្នកក៏ត្រូវគិតផងដែរថា តើប្រាក់នៅសល់បន្ទាប់ពីការបង់រំលស់ទៅធនាគារនោះ អាច​ផ្គត់ផ្គង់​ជីវភាព​ប្រចាំថ្ងៃអ្នកដែរឬទេ? ប្រសិនបើមិនប៉ះពាល់ទេ យើងអាចនិយាយបានថា អ្នកអាចទិញបានតម្លៃផ្ទះដែលបានគណនាខាងលើ តែប្រសិន​បើការបង់ប្រចាំខែអ្នកគឺមិនអាច​ទៅរួច ទោះបីជា​មាន​20%ហើយក៏ដោយ អ្នកគួរតែ​បន្ថយទំហំតម្លៃ​អចលនទ្រព្យ ដើម្បីកុំឱ្យប៉ះពាល់ជីវភាពរស់នៅប្រចាំថ្ងៃខ្លាំង ដោយធ្វើយ៉ាងណា អ្នកអាច​មានលទ្ធភាពបង់ប្រចាំខែបាន។

ខ្ញុំលើកទឹកចិត្ត​ឱ្យមានលុយក្នុងដៃខ្លះ ហើយដាក់កម្ចីជាមួយធនាគារ ដើម្បីកាត់បន្ថយ​ទម្ងន់ការប្រាក់ ព្រោះ​ជាទូទៅធនគារ​គិតការប្រាក់ចន្លោះពី7% ទៅ8%សម្រាប់កម្ចីទិញផ្ទះ ខុសពីបង់រំលស់ពីគម្រោងផ្ទាល់ដែលមានអាត្រាការប្រាក់រហូតដល់12%ឯណោះក្នុងមួយឆ្នាំ។

មានគម្រោងខ្លះក៏ផ្តល់ការបង់ប្រាក់20% ឬ30%ដំបូង​រយៈពេលវែងហើយគ្មានការប្រាក់ ដែលជាជម្រើសល្អផងដែរ តែអ្នកក៏ត្រូវគិតនិងវាយតម្លៃថា តម្លៃដែលគេលក់ជូននោះ ពិតជាតម្លៃទីផ្សារ ឬក៏ជាតម្លៃដែលគេបានគិត​បូកបន្ថែម​ការប្រាក់រួចជាស្រេចនៅក្នុងតម្លៃនោះ។

 

លោក ហាក់គីមថុង គឺជា ស្ថាបនិក និងនាយក KUMNIT CREATIVE ដែលជា ស្ថាប័ន ផ្តល់សេវាកម្ម និងវគ្គសិក្សាយុទ្ធសាស្ត្រអាជីវកម្មសម័យទំនើប (Digital Marketing) ជាសហស្ថាបនិកគេហទំព័រគំនិត និង​ជា​ប្រធាន​ទីផ្សារ​របសក្រុមហ៊ុនអចលនទ្រព្យ​Century 21 Dream Property។ គាត់ មាន បទពិសោធន៍ការងារជាច្រើន ទាំង​ក្នុង​និង​ក្រៅប្រទេស​ទាក់ទង​ នឹង​វិស័យ​អចលនទ្រព្យ សិក្សា​​ស្រាវជ្រាវ​​ទីផ្សារ​ អាហារ​និង​ភោជនីយដ្ឋាន គ្រឿង​សម្អាង​ និង​ Retail ព្រមទាំង​​ជា​​អ្នក​ប្រឹក្សា​យុទ្ធសាស្ត្រ​អាជីវកម្ម​សម្រាប់​ក្រុមហ៊ុន​មួយចំនួន​ផងដែរ។  គាត់បានចុះកម្មសិក្សា នៅតាមបណ្តាក្រុមហ៊ុនផ្សេងៗ ទាំងក្នុង និងក្រៅប្រទេស ធ្លាប់ចូលរួមកម្មវិធីផ្លាស់ប្តូរវប្បធម៌ សិក្ខាសាលាធុរកិច្ច និង ធ្វើដំណើរ កម្សាន្ដ ទៅប្រទេស​ក្រៅជាច្រើន ដែលនេះសុទ្ធតែជាបទពិសោធ មួយដ៏ល្អសម្រាប់ចែករំលែក និងធ្វើការផ្សព្វផ្សាយបន្ត។
Exit mobile version