កូវីដ១៩នៅតែបន្តធ្វើការយាយីជាបន្តបន្ទាប់ ហើយរយៈពេល៥ខែចុងក្រោយនេះ មានការផ្ទុះការឆ្លងជាសហគមន៍រហូតដល់ទៅ៣ដងឯណោះ ជាពិសេសទំហំនៃការឆ្លងព្រឹត្តិការណ៍សហគមន៍២០កុម្ភៈថ្មីៗនេះនៅតែបន្តសកម្មភាពមិនទាន់មានភាពថមថយនៅឡើយ ហើយមានសភាពធ្ងន់ធ្ងរជាងការផ្ទុះលើកមុនៗ។
ខណៈពេលដែលម៉ាកសញ្ញាមួយចំនួនធំបន្ថយសកម្មភាពរបស់ខ្លួនក្នុងកំឡុងពេលផ្ទុះម្តងៗ ហាងកាហ្វេ និងម្ហូបអាហារក្នុងស្រុកដែលល្បីមួយ Park Café បានបន្ថែមសកម្មភាពកាន់តែខ្លាំងវិញ និងចាប់យកឱកាសក្នុងការចេញប្រតិបត្តិការផ្សព្វផ្សាយទ្រង់ទ្រាយធំទៅវិញ។
ដូចធ្លាប់មានឃ្លាមួយដែលគេចូលចិត្តលើកឡើង គឺ “ក្នុងគ្រោះតែងតែមានលាភវិញ ហើយក្នុងពេលមានហានិភ័យ ក៏ជាពេលដែលមានឱកាសផងដែរ”។
Park Café បានធ្វើយុទ្ធនាការជិះដង្ហែរជាលក្ខណៈទ្រង់ទ្រាយធំ នៅតាមដងផ្លូវ ដើម្បីបង្ហាញថា ហាងកាហ្វេមួយនេះនៅតែសកម្ម ហើយនៅតែបម្រើជូនភ្ញៀវក្នុងពេលដែលមនុស្សជាច្រើនមិនហ៊ានចេញក្រៅ ដោយហាងនេះ មានសេវាកម្មដឹកជញ្ចូនទៅដល់គេហដ្ឋានដែលប្រកបដោយសុវត្ថិភាព។
មិនតែប៉ុណ្ណោះ Park Café ក៏បានប្រើប្រាស់យុទ្ធសាស្ត្រជួយសង្គម (ស្របតាមសម័យកាលទីផ្សារ ៣.០) ដែលជាសម័យកាលមនុស្សឱ្យតម្លៃលើការចេះជួយគ្នាក្នុងគ្រាក្រ ជួយសង្គមពេលមានវិបត្តិដោយការផ្តល់ជូននូវអាហារដល់កងទ័ពអាវសជួរមុខ ក៏ដូចជាកងសមត្ថកិច្ចដែលត្រូវបំពេញការងារយ៉ាងសកម្មក្នុងការប្រយុទ្ធប្រឆាំងនឹងការឆ្លងរាតត្បាតកូវីឌនេះ។
ក្នុងកំឡុងពេលផ្ទុះកូវីដនេះ ថ្វីត្បិតតែអាជីវកម្មជាច្រើនទទួលរងគ្រោះ និងជួបផលលំបាកច្រើន តែនេះជាពេលវេលាមួយដែលយើងត្រូវតែជំនះ ហើយសាកល្បងគ្រប់វិធីសាស្ត្រដើម្បីបន្តដង្ហើម ឬដំណើរទៅមុខបន្តទៀត។ ហើយប្រសិនបើអាច នេះជាពេលវេលាមួយដែលយើងមិនត្រូវនៅស្ងៀមនោះទេ ជាពេលវេលាដែលយើងត្រូវតែមានភាពសកម្មជាងមុន តាមបែបគន្លងថ្មី ជាពិសេសតាមច្រកបច្ចេកវិទ្យា និងវិធីសាស្ត្រផ្សេងៗទៀតដែលអាចបន្តរក្សាកិត្តិនាម និងសកម្មភាពរបស់ហាងយើងបន្តទៀតបាន។ ទោះបីជាករណីខ្លះ អាជីវកម្មយើងនៅមានសភាពតូច និងធនធានតិចតួចនៅឡើយ ឱ្យតែយើងព្យាយាមរកដំណោះស្រាយ គិតរកវិធី ខ្ញុំជឿជាក់ថា យើងប្រាកដជាមានផ្លូវទៅមុខទៀតជាមិនខាន។
