គណៈកម្មការសហភាពអឺរ៉ុបបានជំរុញឱ្យពលរដ្ឋសហភាពអឺរ៉ុបឱ្យទិញម្ហូបអាហារ និងទឹក ក៏ដូចជារបស់របរប្រើប្រាស់សំខាន់ៗស្តុកទុក ដើម្បីប្រើប្រាស់យ៉ាងហោចណាស់ 72 ម៉ោងក្នុងករណីមានសង្រ្គាមកើតឡើង។
ការប្រកាសនេះត្រូវបានចេញផ្សាយកាលពីថ្ងៃពុធ ដោយសង្កត់ធ្ងន់ឱ្យប្រជាពលរដ្ឋអឺរ៉ុបធ្វើការត្រៀមខ្លួនសម្រាប់គ្រាអាសន្ន ដោយសារតែអឺរ៉ុបអាចរងផលអវិជ្ជមានពីការកើនឡើងហានិភ័យសង្គ្រាមរបស់រុស្ស៊ីនៅអ៊ុយក្រែន ធ្វើឱ្យមានភាពតានតឹងផ្នែកភូមិសាស្ត្រនយោបាយ និងការគំរាមកំហែងដល់ហេដ្ឋារចនាសម្ព័ន្ធសំខាន់ៗរបស់ឋអឺរ៉ុប។
ចំណែកឯលោកស្រី Ursula von der Leyen ជាប្រធានគណៈកម្មការអឺរ៉ុបបានគូសបញ្ជាក់ថា ប្រជាពលរដ្ឋ អាជីវករ និងរដ្ឋាភិបាលត្រូវមានឧបករណ៍ទំនាក់ទំនងដើម្បីទប់ទល់ ដើម្បីឆ្លើយតបទៅនឹងវិបត្តិឱ្យបានឆាប់រហ័ស។ ចំណាត់ការនេះធ្វើឡើងបន្ទាប់ពីបណ្តាប្រទេសដូចជាអាល្លឺម៉ង់បានអាប់ដេតផែនការការពារជាតិរបស់ពួកគេ ជាពិសេសពិនិត្យមើល និងកែលម្អពីរបៀបដែលពួកគេទំនាក់ទំនងដើម្បីដោះស្រាយការគំរាមកំហែងផ្នែកសន្តិសុខ ជាពិសេសបញ្ហាដែលបង្កឡើងដោយរុស្ស៊ី។ គោលដៅគឺដើម្បីបង្កើនការត្រៀមខ្លួន និងធានាឱ្យមានការឆ្លើយតបរហ័ស និងសម្របសម្រួលក្នុងគ្រាមានវិបត្តិ។
