មួយរយៈចុងក្រោយនេះ គ្មានអ្វីដែលគេនិយាយច្រើនជាងបញ្ហាCovid-19នោះទេ ហើយបញ្ហានេះបានរីករាលដាលពាសពេញពិភពលោក ធ្វើឱ្យមានការព្រួយបារម្មណ៍យ៉ាងខ្លាំងអំពីការប៉ះពាល់ធ្ងន់ធ្ងរដល់សេដ្ឋកិច្ចប្រសិនបើវាមិនធូរស្រាលនៅក្នុងរយៈពេលដ៏ខ្លីខាងមុខនេះ។ អ្នកសាព័ត៌មានអន្តរជាតិ និងអ្នកជំនាញសេដ្ឋកិច្ចអន្តរជាតិក៏បានព្រមានពីវិបត្តិសេដ្ឋកិច្ចពិភពលោកធ្ងន់ធ្ងរអាចកើតមានឡើងផងដែរ ប្រសិនបើបណ្តោយឱ្យបញ្ហាជម្ងឺនេះនៅតែបន្ត ហើយប្រទេសមួយចំនួននៅតែមិនបានយកចិត្តទុកដាក់ឱ្យបានខ្ពស់ដើម្បីប្រយុទ្ធប្រឆាំងនឹងការរីករាលត្បាតនេះ។ ប្រទេសកម្ពុជាក៏មិនខុសពីប្រទេសដ៏ទៃនៅក្នុងតំបន់ និងទូទាំងពិភពលោកដែរ ចំនួននៃការរីករាលដាលចេះតែកើនឡើងពីមួយថ្ងៃទៅមួយថ្ងៃ បង្កឱ្យមានភាពភ័យខ្លាចយ៉ាងខ្លាំង។
មួយសប្តាហ៍ចុងក្រោយនេះ តាមផ្លូវថ្នល់ហាក់មានសភាពស្ងប់ស្ងាត់ ដោយសារតែការកាត់បន្ថយការចេញក្រៅដែលមិនចាំបាច់។ ការជួបជុំ ពិធីជប់លៀង ពិធីមង្គលការ និងពិធីផ្សេងៗទៀតត្រូវបានលើកពេល ដើម្បីកាត់បន្ថយហានិភ័យនៃការឆ្លងរីករាលដាល។ អាជីវកម្មជាច្រើនចាប់ផ្តើមរងផលប៉ះពាល់ ហើយអាជីវករខ្លះត្រូវបង្ខំបិទទ្វារ ឬផ្អាកដំណើរការដោយសារតែបារម្ភខ្លាច និងបញ្ហាភ្ញៀវធ្លាក់ចុះខ្លាំង។
វិស័យអចលនវត្ថុក៏មិនមានវាសនាខុសពីវិស័យដទៃទៀតដែរ ទោះបីជានៅតែមានការទិញលក់ក៏ពិត តែចំនួនហាក់ថមថយខ្លាំង ហើយក្រុមហ៊ុនភ្នាក់ងារអចលនទ្រព្យ ក្រុមហ៊ុនបុរីអភិវឌ្ឍន៍លំនៅដ្ឋានមួយចំនួនក៏ទទួលរងផលប៉ះពាល់តិច ឬច្រើន ហើយក្រុមហ៊ុនខ្លះក៏ប្រឈមមុខនឹងការក្ស័យធន់ ឬផ្ទាកដំណើរដោយសារតែបញ្ហាភ្ញៀវធ្លាក់ចុះ និងការសំណូមពរផ្អាកការងារមួយរយៈរបស់បុគ្គលិកដែលបញ្ហាទាំងនេះ អាចនឹងជះឥទ្ធិពលអវិជ្ជមានខ្លាំងលើការបង្វិលសាច់ប្រាក់របស់ក្រុមហ៊ុន។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានលើកឡើងថា៖
“ធនាគារ និងស្ថាប័នមីក្រូហរិញ្ញវត្ថុអាចចូលរួមជួយស្រោចស្រង់ និងដោះស្រាយវិបត្តិនេះបានដោយការមានយន្តការបង្កើតកញ្ចប់កម្ចីពិសេសរយៈពេលខ្លីក្នុងសម័យវិបត្តិកូវីដ១៩នេះជូនដល់ក្រុមហ៊ុនភ្នាក់ងារអចលនវត្ថុ ក្រុមហ៊ុនបុរី ក្រុមហ៊ុនអភិវឌ្ឍន៍លំនៅដ្ឋាន និងអាជីវកម្មដទៃទៀតដើម្បីដោះស្រាយការស្ទះសាច់ប្រាក់បង្វិលរយៈពេលខ្លីរបស់ម្ចាស់អាជីវកម្ម។ កញ្ចប់កម្ចីពិសេសនេះ អាចជាកម្ចីរយៈពេលខ្លី ៣ ទៅ៦ខែ ក្នុងអាត្រាការប្រាក់ទាប ឬពិសេសណាមួយ។”
លោកបានបន្តថា រាជរដ្ឋាភិបាលក៏បានចេញយន្តការជាច្រើនដើម្បីទប់ស្កាត់វិបត្តិ ដូចជាការមិនយកពន្ធប្រថាប់ត្រាសម្រាប់ផ្ទះតម្លៃក្រោម៧ម៉ឺនដុល្លារ លើកទឹកចិត្តឱ្យម្ចាស់បុរីបញ្ចុះតម្លៃពិសេសដល់អតិថិជនក្នុងរយៈពេលនេះ និងលើកទឹកចិត្តឱ្យស្ថាបន័ហិរញ្ញត្ថុសម្រួលការបង់ការប្រាក់ដល់អតិថិជនជាដើម ដែលយន្តការទាំងនេះចូលរួមបានយ៉ាងច្រើនក្នុងកាជួយជ្រោមជ្រែងលើកស្ទួយឱ្យវិស័យអចលនទ្រព្យអាចបន្តទៅមុខទៀតនៅក្នុងកាលៈទេសនេះ។ ប៉ុន្តែ ប្រសិនស្ថាប័នហិរញ្ញវត្ថុដែលអាចផ្តល់ហិរញ្ញប្បទានមានគោលការបង្កើតកញ្ចប់កម្ចីពិសេសរយៈពេលខ្លីដូចបានលើកឡើង វាជាការចូលរួមដ៏ធំធេងដើម្បីជួយម្ចាស់អាជីវកម្មអាចដោះស្រាយការស្ទះប្រាក់បង្វិលរយៈពេលខ្លី ហើយវាក៏ជាការចូលរួមដ៏ធំធេងក្នុងការជួយជ្រោងសេដ្ឋកិច្ចឱ្យបន្តរីកចម្រើនទៅ ទោះនៅក្នុងវិបត្តិជម្ងឺផ្លូវដង្ហើមថ្មីនេះ៕
