ការដែលធ្វើឱ្យស្មារតីមានភាពរឹងមាំខ្លាំងបាន គឺត្រូវការរយៈពេលយូរដើម្បីអភិវឌ្ឍន៍ ដោយទាមទារឱ្យមានការអនុវត្តប្រចាំថ្ងៃ ដើម្បីជំរុញខ្លួនឯងឱ្យរីកចម្រើនកាន់តែខ្លាំង រក្សាសុទិដ្ឋិនិយមជាក់ស្តែង និងកំណត់ព្រំដែនដែលមានសុខភាពល្អ។ លើសពីនេះ មនុស្សដែលមានស្មារតីរឹងប៉ឹងភាពច្រើន មិនធ្វើរឿង ដូចជាខ្ជះខ្ជាយពេលវេលា ភាពសោកស្ដាយ ឬលះបង់អំណាចទៅអ្នកដទៃឡើយ។
តើយើងអាចដឹងដោយរបៀបណាថាយើងមានស្មារតីរឹងមាំខ្លាំង? បើយោងតាមអ្នកជំនាញព្យាបាលចិត្តសាស្ត្រ Amy Morin ដែលជាអ្នកនិពន្ធសៀវភៅ “13 យ៉ាងដែលមនុស្សរឹងមាំផ្លូវចិត្តមិនធ្វើ” បានបង្ហាញពីសញ្ញាចំនួន 21 ដែលអ្នកមានភាពរឹងមាំខាងផ្លូវចិត្តតែងតែមាន។
1. ការធ្វើឱ្យមានតុល្យភាពអារម្មណ៍ជាមួយនឹងតក្កវិជ្ជា
មនុស្សដែលមានស្មារតីរឹងមាំ គឺយល់ពីរបៀបដែលអារម្មណ៍របស់ពួកគេអាចមានឥទ្ធិពលលើការគិតរបស់ពួកគេ។ ដូច្នេះរាល់ការសម្រេចចិត្ត តែងតែល្អបំផុតដែលអាចធ្វើទៅបាន ដោយពួកគេធ្វើឱ្យមានតុល្យភាពអារម្មណ៍ជាមួយនឹងតក្កវិជ្ជា។
ចំណាំ៖ តក្កវិជ្ជា មានន័យថា វិធីត្រឹមត្រូវ ឬសមហេតុផលនៃការគិតអំពីអ្វីមួយ។
2. ការជ្រើសរើសអាកប្បកិរិយាប្រកបដោយផលិតភាព
ជាបុគ្គលដែលតែងតែប្រកាន់ខ្ជាប់នូវអាកប្បកិរិយាដែលមានផលិតភាព ទោះបីជាស្ថិតនៅក្នុងខណៈទេសៈណាក៏ដោយ ហើយជាបុគ្គលមានសតិបញ្ញា ដោយមិនសូវខ្ជះខ្ជាយពេលវេលារបស់ខ្លួនទៅធ្វើសកម្មភាពណាដែលមិនមានផលិតភាពឡើយ។
3. ជឿជាក់លើសមត្ថភាពខ្លួនឯងក្នុងការសម្របខ្លួនទៅនឹងការផ្លាស់ប្តូរ
មនុស្សដែលមានស្មារតីរឹងមាំ តែងតែជឿជាក់លើសមត្ថភាពរបស់ពួកគេក្នុងការសម្របខ្លួនទៅនឹងការផ្លាស់ប្តូរ ជាជាងទប់ទល់នឹងវា ទោះបីជាការផ្លាស់ប្ដូរនោះលំបាកប៉ុណ្ណាក៏ដោយ។
4. ប្រឈមមុខនឹងភាពភ័យខ្លាចដែលរារាំងពួកគេ
មនុស្សដែលមានស្មារតីរឹងមាំ មិនចាំបាច់យកឈ្នះលើការភ័យខ្លាចនោះទេ ដោយសារតែពួកគេមានអ្វីមួយដើម្បីបញ្ជាក់ដល់អ្នកដទៃប្រកបដោយភាពជឿជាក់ និងហ៊ានប្រឈមមុខគ្រប់ភាពភ័យខ្លាចទាំងអស់ ដើម្បីធ្វើយ៉ាងណាកុំឱ្យភាពភ័យខ្លាចទាំងនោះរារាំងពួកគេក្នុងការសម្រេចអ្វីមួយ។
5. រៀនពីកំហុសរបស់ខ្លួនឯង
មនុស្សដែលមានស្មារតីរឹងមាំ មិនលាក់លៀម ឬដោះសារពីកំហុសរបស់ខ្លួនឡើយ ប៉ុន្តែផ្ទុយមកវិញ ពួកគេតែងតែហ៊ានប្រឈមមុខរាល់កំហុសដែលពួកគេបានធ្វើឱ្យកើតមាន បន្ទាប់មករៀនអំពីកំហុសនោះដើម្បីកែលម្អឱ្យមានភាពប្រសើរឡើងវិញ។
6. ថ្លឹងថ្លែងការទទួលយកខ្លួនឯងជាមួយនឹងការកែលម្អខ្លួនឯង
មនុស្សដែលមានស្មារតីរឹងមាំ តែងតែទទួលយកខ្លួនឯងថាពួកគេជានរណា? មានចំណុចខ្លាំង និងចំណុចខ្សោយអ្វី? ព្រមទាំងទទួលស្គាល់ពីតម្រូវការរបស់ខ្លួនឯងដើម្បីអភិវឌ្ឍន៍លើចំណុចខ្វះខាតទាំងនោះទៀតផង។
7. អបអរភាពជោគជ័យរបស់អ្នកដទៃ
ជាបុគ្គលដែលចូលចិត្តភាពសហការគ្នា ជាជាងប្រកួតប្រជែងជាមួយអ្នកជុំវិញខ្លួន។ ពួកគេមិនមានអារម្មណ៍ថាជោគជ័យរបស់អ្នកដទៃធ្វើឱ្យសមិទ្ធផលរបស់ខ្លួនធ្លាក់ចុះនោះទេ ថែមទាំងជួយអបអរសាទរចំពោះភាពជោគជ័យរបស់អ្នកដទៃទៀតផង។
8. រស់នៅជាមួយនឹងតម្លៃផ្ទាល់ខ្លួន
មនុស្សដែលមានស្មារតីរឹងមាំ គឺធ្វើការសម្រេចចិត្តដោយភាពងាយស្រួល ពីព្រោះពួកគេយល់ពីអាទិភាពរបស់ពួកគេ ហើយពួកគេរស់នៅតាមតម្លៃរបស់ពួកគេ។
9. ផ្តោតលើការធ្វើឱ្យជំនាញផ្ទាល់ខ្លួនកាន់តែខ្លាំងនិងជាក់លាក់ ជាជាងបង្ហាញ
ខណៈពេលដែលមនុស្សមួយចំនួនស្វែងរកការបញ្ជាក់ពីអ្នកដទៃ មនុស្សដែលមានស្មារតីរឹងមាំមិនសូវខ្វល់ខ្វាយអំពីការទទួលបានការទទួលស្គាល់នោះទេ។ ផ្ទុយទៅវិញ ពួកគេព្យាយាមជំរុញចិត្តខ្លួនឯងឱ្យក្លាយជាមនុស្សកាន់តែប្រសើរជាងមុន។
10. រស់នៅក្នុងជីវិតពិត
មនុស្សមានស្មារតីរឹងប៉ឹង តែងតែធ្វើអ្វីដែលជាភាពពិតរបស់ខ្លួនឯង និងរស់នៅក្នុងជីវិតពិត មិនមែនរស់ក្នុងជីវិតមួយដែលពោរពេញដោយភាពសម្ដែង ឬក្លែងក្លាយឡើយ។ ហើយរាល់ពាក្យសម្ដីរបស់ពួកគេ គឺស្របជាមួយនឹងអាក្បកិរិយារបស់ពួកគេ។
11. ចាត់ទុកការលំបាកក្នុងជីវិតជាឱកាសសម្រាប់ការរីកចម្រើន
ខណៈពេលដែលការលំបាកធ្វើឱ្យមនុស្សខ្លះមានភាពជូរចត់ក៏ពិតមែន តែមនុស្សដែលមានចិត្តគំនិតរឹងមាំ គឺតែងតែចាត់ទុកឱ្យភាពលំបាកធ្វើឱ្យពួកគេកាន់តែប្រសើរឡើង។
12. តម្លៃខ្លួនឯងអាស្រ័យលើអ្នកជានរណា មិនមែនជាអ្វីដែលអ្នកសម្រេចបាន
មនុស្សមានស្មារតីរឹងប៉ឹង តែងតែមានអារម្មណ៍ល្អចំពោះខ្លួនឯង ដោយមិនដែលគិតថាឈ្នះឬចាញ់។
13. អនុវត្តន៍លើយុទ្ធសាស្រ្ត ពន្យាពេលនៃការពេញចិត្ត
មនុស្សដែលមានស្មារតីរឹងមាំ ចាត់ទុកគោលដៅរបស់ពួកគេថាជាការរត់ម៉ារ៉ាតុង មិនមែនជាការរត់ប្រណាំងនោះទេ។ ពួកគេសុខចិត្តទ្រាំនឹងការឈឺចាប់រយៈពេលខ្លី ដើម្បីទទួលបានផលចំណេញរយៈពេលវែង។
ចំណាំ៖ យុទ្ធសាស្រ្តពន្យាពេលនៃការពេញចិត្ត មានន័យថា លះបង់នូវសមិទ្ធផលដែលទទួលបានរយៈពេលខ្ចី និងព្យាយាមធ្វើយ៉ាងណាឱ្យសម្រេចនូវគោលដៅរយៈពេលវែង។
14. ច្នៃភាពបរាជ័យឱ្យក្លាយជាឱកាស
មនុស្សរឹងមាំផ្លូវចិត្ត មិនចាត់ទុកការបរាជ័យជាទីបញ្ចប់នៃផ្លូវនោះទេ។ ផ្ទុយទៅវិញ ពួកគេប្រើភាពបរាជ័យរបស់ពួកគេនោះមកជាឱកាស ដើម្បីទទួលបានចំណេះដឹង ដែលនឹងបង្កើនឱកាសជោគជ័យរបស់ពួកគេនាពេលអនាគត។
15. ជាអ្នកសុទិដ្ឋិនិយមជាក់ស្តែង
មនុស្សដែលមានស្មារតីរឹងមាំ អាចរកមើលស្រទាប់ប្រាក់និងគិតលើផ្នែកភ្លឺ ប៉ុន្តែពួកគេមិនអនុញ្ញាតឱ្យមានទំនោរសុទិដ្ឋិនិយមរបស់ពួកគេធ្វើឱ្យពួកគេងងឹតភ្នែកទៅនឹងការពិតនោះទេ។
16. ទទួលខុសត្រូវរាល់ជម្រើសរបស់ខ្លួនឯង
មនុស្សដែលមានស្មារតីរឹងប៉ឹង មិនដែលស្ដាយក្រោយនូវអ្វីដែលខ្លួនបានសម្រេចចិត្តក្នុងការធ្វើឡើយ ប៉ុន្តែពួកគេទទួលខុសត្រូវទាំងស្រុងចំពោះទង្វើរបស់ខ្លួនឯង។
17. បង្ហាញការដឹងគុណ
មនុស្សដែលមានស្មារតីរឹងមាំ តែងតែទទួលស្គាល់ថាពួកគេមានរឿងរ៉ាវជាច្រើនជាងអ្វីដែលពួកគេត្រូវការ ដូច្នេះពួកគេក៏ត្រូវមនុស្សជាច្រើនដើម្បីជួយគេឱ្យសម្រេចបាននូវគោលដៅ និងតែងតែដឹងគុណចំពោះអ្នកទាំងនោះ។
18. ផ្តោតលើអ្វីដែលអ្នកអាចគ្រប់គ្រងបាន
មនុស្សដែលមានស្មារតីរឹងមាំ តែងតែធ្វើអ្វីឱ្យមានប្រសិទ្ធភាពនិងផលិតភាពក្នុងជីវិត ដោយសារពួកគេលះបង់ធនធានរបស់ពួកគេចំពោះអ្វីដែលពួកគេអាចគ្រប់គ្រងបាន។
19. ចូលរួមក្នុងការដោះស្រាយបញ្ហាយ៉ាងសកម្ម
មនុស្សរឹងមាំផ្លូវចិត្ត មិនផ្អែកផ្ដួលខ្លាំងលើបញ្ហានោះទេ ផ្ទុយទៅវិញ ពួកគេចូលចិត្តស្វែងរក និងបង្កើតដំណោះស្រាយ។
20. បើកចំហដើម្បីរៀនបន្ថែមពីអ្វីៗទាំងអស់ដែលនៅជុំវិញអ្នក
មនុស្សដែលមានស្មារតីរឹងមាំ តែងតែរៀនគ្រប់ស្ថានភាពរបស់ខ្លួន និងរៀនពីមនុស្សដែលពួកគេជួបជារៀងរាល់ថ្ងៃ។
21. កែលំអរាល់ចំណុចខ្វះខាត ជាជាងព្យាយាមបិទបាំង
ខណៈពេលដែលមនុស្សជាច្រើនខិតខំប្រឹងប្រែងបិទបាំងរាល់ចំណុចខ្សោយរបស់ខ្លួនឯង តែមនុស្សដែលមានស្មារតីរឹងមាំ បានវិនិយោគថាមពលរបស់ពួកគេក្នុងការកែលម្អចំណុចខ្វះខាតរបស់ពួកគេ។
