មុនពេលចូលទៅកាន់គន្លឹះខាងក្រោម ដំបូងយើងអាចបំបែកគោលការណ៍គ្រឹះដែលតែងតែធ្វើឲ្យមានការយល់ឃើញខុសចំពោះការធ្វើអាជីវកម្មតាមអនឡាញជាមុនសិន៖
ជំនឿទី ១ ៖ ក្រុមហ៊ុនមួយចំនួនអាចរកលុយបានច្រើនតាមរយៈការលក់តាមប្រព័ន្ធអ៊ីនធឺរណែត។ វាជាការពិតចំពោះក្រុមហ៊ុនធំៗដូចជា Amazon.com និងCompaqជាដើម។ ប៉ុន្តែអ្នកមានដឹងទេ? ក្រុមហ៊ុនរាប់រយក្នុងចំណោមរាប់ពាន់ក្រុមហ៊ុនគឺកំពុងប្រើប្រាស់អ៊ីនធឺណិតដើម្បីតែសន្សំលុយលើថ្លៃដើមនៃការធ្វើប្រតិបត្តិការនិងដើម្បីរឹតបន្តឹងទំនាក់ទំនងជាមួយអតិថិជនរបស់គេតែប៉ុណ្ណោះ។
**ចំណុចត្រូវចងចាំ ៖ ដំបូងអ្នកត្រូវចេះសន្សំលុយដោយការប្រើប្រាស់អ៊ីនធឺណិតមុនពេលដែលអ្នករកលុយតាមប្រតិបត្តិការតាមប្រព័ន្ធអ៊ីនធឺណិត។ ការមានវត្តមានដោយការប្រើប្រាស់អ៊ីនធឺណិតរបស់អ្នកអាចបង្ហាញថាអ្នកមានភាពទាន់សម័យនិងជួយកាត់បន្ថយចំណាយថ្លៃដើមលើចម្ងាយបានល្អ។
អ្នកត្រូវចេះសន្សំលុយដោយការប្រើប្រាស់អ៊ីនធឺណិតមុនពេលដែលអ្នករកលុយតាមប្រតិបត្តិការតាមប្រព័ន្ធអ៊ីនធឺណិត
ជំនឿទី ២ ៖ ការធ្វើអាជីវកម្មតាមអនឡាញគឺជាសំណើរដែលអ្នកធ្វើក៏បានអត់ក៏បាន។ អ្នកគិតថាទោះបីជាមិនមានប្រព័ន្ធអ៊ីនធឺណិតមកជួយក៏អ្នកអាចធ្វើការបានដែរ។ មួយវិញទៀតអ្នកមិនខ្វល់ពីការអភិវឌ្ឍន៍បច្ចេកវិទ្យាសម័យថ្មីឡើយ។ ឧទាហរណ៍ងាយៗពីបញ្ហាដែលបណ្តាលឲ្យមានការខាតបង់កិត្តិយសរបស់ក្រុមហ៊ុនរបស់អ្នកបាននោះគឺបរាជ័យក្នុងការអភិវឌ្ឍន៍មាតិកានៅក្នុងគេហទំព័រ បរាជ័យក្នុងការទាញយកផលប្រយោជន៍ពីបច្ចេកវិទ្យាបច្ចុប្បន្ន បរាជ័យក្នុងការជម្រុញឲ្យការប្រើប្រាស់ប្រព័ន្ធអ៊ីនធឺណិតក្លាយជាវប្បធម៌នៅក្នុងក្រុមហ៊ុនរបស់អ្នក។
ចូររក្សាឲ្យបាននូវការដើរឲ្យទាន់បច្ចេកវិទ្យានិងព្យាយាមវិវត្តខ្លួនឲ្យដើរទាន់សម័យកាលបច្ចុប្បន្ន ព្រមទាំងកែប្រែវាឲ្យក្លាយជាការគាំទ្រដល់បេសកកម្មនិងគោលដៅរបស់ក្រុមហ៊ុនអ្នក។
**ចំណុចត្រូវចងចាំ ៖ គេហទំព័រពាណិជ្ជកម្មគឺជាការអភិវឌ្ឍដែលត្រូវធ្វើជាប្រចាំដែលតែងតែបង្ហាញពីផលិតផលឬសេវាកម្មថ្មីៗរបស់អ្នកទៅកាន់អតិថិជនព្រមទាំងធ្វើវាជារឿយៗ។ អ្នកត្រូវតែឈរលើលំដាប់ខ្ពស់នៅក្នុងឧស្សាហកម្មរបស់អ្នកក៏ដូចជាការប្រើប្រាស់បច្ចេកវិទ្យាដើម្បីអាចឲ្យវាជួយបម្រើឲ្យគោលបំណងរបស់អ្នក។ អ្នកក៏ត្រូវវិភាគពីទំហំនៃការប្រើប្រាស់ប្រព័ន្ធអ៊ីនធឺណិតរបស់អ្នកដោយផ្អែកលើអតិថិជនគោលដៅរបស់អ្នកថាពួកគេជាអ្នកណា នៅក្នុងឬនៅក្រៅប្រទេស។
យើងបានស្គាល់ពីជំនឿខុសឆ្គងមួយចំនួនទាក់ទងនឹងការប្រើប្រាស់ប្រព័ន្ធអ៊ីនធឺណិតរួចមកហើយ ឥឡូវនេះយើងងាកមកពិភាក្សាពីគន្លឹះទាំង៤របស់យើងវិញម្តង ៖
១.ព័ត៌មានសម្បូរបែប ៖ អ្នកដែលចូលទៅមើលគេហទំព័ររបស់អ្នកគឺត្រូវការព័ត៌មានដែលស្របតាមពេល ត្រឹមត្រូវ ការសរសេរបានល្អ និងច្រើន ហើយអាចប្រើការបាន។ ចូរចាំថា មតិ គំនិតដែលមានភាពសមរម្យ និងគ្រប់គ្រាន់ពេញលក្ខណៈគឺជាភាពខុសគ្នាដ៏សំខាន់មួយរបស់អ្នកនិងដៃគូប្រកួតប្រជែងរបស់អ្នក។ អតិថិជននិងអ្នកចូលទៅមើលគេហទំព័ររបស់អ្នកពួកគេចង់មើលការវិភាគរបស់អ្នកថាពិតជាដូចឬខុសពីគំនិតរបស់គេដូចម្តេចខ្លះ ហើយអ្នកមានបានផ្តល់អ្វីដែលពួកគេកំពុងត្រូវការឬអត់។
២.មាតិកាដែលមានទំនាក់ទំនង ៖ យើងត្រូវបង្កើតឲ្យមានទំនាក់ទំនងទៅនឹងព្រឹត្តិការណ៍ផ្សេងៗ។ ឧទាហរណ៍ អ្នកអាចដាក់ម៉ោងរាប់ពេលវេលាថយក្រោយពេលជិតដល់ព្រឹត្តិការណ៍សំខាន់ណាមួយដូចជាថ្ងៃបុណ្យចូលឆ្នាំជាដើម។ មួយវិញទៀត កាលណាយើងមានគេហទំព័រប្រកបដោយការDesignបានល្អនិងអាចបំពេញតម្រូវការគេបាន វានឹងជួយឲ្យយើងទទួលបានមតិកែតម្រូវដ៏មានអត្ថប្រយោជន៍ដែលអាចកសាងទំនុកចិត្តដល់អ្នកប្រើប្រាស់ចំពោះក្រុមហ៊ុនរបស់អ្នកបាន។
៣.អាចបែងចែកបទពិសោធន៍មនុស្សម្នាក់ៗ ៖ ប្រព័ន្ធកុំព្យូទ័រអាចមានសមត្ថភាពចងចាំអ្នករាល់គ្នាដែលចូលមើលនៅក្នុងគេហទំព័ររបស់យើង វាថែមទាំងអាចចាំពីចំណង់ចំណូលចិត្ត ចំណាប់អារម្មណ៍ និងគោលដៅដែលទាំងអស់នោះជាព័ត៌មានដ៏សំខាន់បំផុតចំពោះការអភិវឌ្ឍន៍ផលិតផលឬសេវាកម្មរបស់យើង។
៤.សមាហរណកម្មនៃពាណិជ្ជកម្ម ៖ ជាការពិតបុគ្គលិកនៅក្នុងក្រុមហ៊ុនម្នាក់ៗមិនអាចធ្វើការដាច់តែឯងបានទេ។ ពួកគេត្រូវមានការប្រាស្រ័យទាក់ទងគ្នានិងស្រុះស្រួលគ្នាទើបក្រុមហ៊ុនមានដំណើរការល្អ។ ប៉ុន្តែមានមនុស្សជាច្រើនដែលកំពុងតែជួបប្រទះបញ្ហាបែបនេះ។ គេហទំព័ររបស់ក្រុមហ៊ុនគឺដាក់ពត៌មានរបស់ក្រុមហ៊ុនទាំងអស់ចាប់តាំងពីថ្នាក់អ្នកលក់នៅខាងមុខរហូតដល់អ្នកគ្រប់គ្រងជាន់ខ្ពស់ដែលពត៌មានទាំងអស់នោះត្រូវការវិវត្តរហូត។
ប្រភព៖ www.smallbusinessbrief.com
