នៅក្នុងការធ្វើអាជីវកម្ម ទោះបីជាវាងាយស្រួលក្នុងការថតចម្លងក៏ដោយក៏ប៉ុន្តែវាមិនងាយស្រួលក្នុងការថតចម្លងនូវភាពជោគជ័យជាមួយនឹងយុទ្ធសាស្ត្ររបស់នរណាម្នាក់ទេ។ តើអ្នកនៅចងចាំ HP’s TouchPad ដែរឬទេ? ដែលការខិតខំប្រឹងប្រែងដើម្បីយកគំរូតាម iPad របស់ Apple ត្រូវបានបរាជ័យនិងត្រូវខាតលុយអស់រាប់រយលានដុល្លា។ ដោយស្ថិតនៅលើខ្សែបន្ទាត់តែមួយ ក្រុមហ៊ុន Microsoft បានបរាជ័យយ៉ាងខ្លាំងក្នុងការប្រកួតប្រជែងជាមួយនឹងអាយផតដោយការបង្ហាញនូវអ្វីដែលមានលក្ខណៈស្រដៀងគ្នា។
នៅក្នុងកម្រិតតូចជាងមុន ខ្ញុំគិតថាមនុស្សគ្រប់គ្នាតែងតែមានដៃគូទីផ្សារប្រកួតប្រជែងរៀងៗខ្លួនដែលមើលទៅហាក់ដូចជាការចម្លងឬត្រាប់តាម ជំនួសឲ្យការច្នៃប្រឌិតគិតនូវអ្វីដែលថ្មី។ការផ្ដួលដៃគូរប្រកួតប្រជែងទាំងនេះគឺជារឿងគួរឲ្យចាប់អារម្មណ៍ ហើយក៏ជារឿងដែលគួរតែខឹងដែរ ប៉ុន្តែអ្នកដឹកនាំអាជីវកម្មដែលល្អបំផុតអាចនឹងមានអារម្មណ៍ល្អប្រសើរទៅលើរឿងនេះវិញដោយសារតែពួកគេដឹងថា អ្នកធ្វើត្រាប់តាម និង អ្នកថតចម្លងតាមគឺកម្រនឹងទទួលបានជោគជ័យក្នុងរយៈពេលវែងណាស់។ អ្នកត្រូវទទួលស្គាល់ថា ប្រសិនបើជាមាននរណាម្នាក់តែងផ្ដោតទៅលើអ្វីដែលអ្នកកំពុងធ្វើ នោះមានន័យថាពួកគេមិនអាចយកចិត្តទុកដាក់ទៅលើអាជីវកម្មផ្ទាល់ខ្លួនរបស់ពួកគេទេ ហើយក៏មិនអាចដឹងពីជំហានបន្ទាប់ដែលពួកគេត្រូវដើរដើម្បីទទួលបានជោគជ័យដែរ ជាពិសេសគឺពួកគេមិនដឹងថាខ្លួនឯងកំពុងតែមានអ្វីហើយខ្វះអ្វីនោះទេ ព្រោះតែរវល់តែចម្លងពីគេ។ ម្យ៉ាងវិញទៀត ខ្ញុំធ្លាប់ឃើញក្រុមហ៊ុនជាច្រើនត្រូវបានបរាជ័យដោយសារតែពួកគេចូលចិត្តសន្យាដូចៗគ្នា គឺដូចទៅនឹងដៃគូប្រកួតប្រជែងដទៃៗទៀតដែលធ្លាប់ធ្វើ ហើយបន្ទាប់មកក៏ខ្វះនូវការប្រតិបត្តិទៅតាមពាក្យសន្យា ក៏ព្រោះតែខ្លួនមិនអាចធ្វើឬបំពេញវាបានឲ្យល្អដូចមាត់។
អ្នកប្រកួតប្រជែងដែលអ្នកត្រូវតែប្រុងប្រយ័ត្ននោះគឺជាអ្នកដែលមិននៅលើអេក្រង់រ៉ាដារបស់អ្នកនេះឯង។ពួកគេមិនមែនជាអ្នកចូលចិត្តធ្វើតាមឬចម្លងតាមគេនោះទេ ប៉ុន្តែពួកគេគឺជាអ្នកដែលតែងតែប៉ាន់ស្មាន និង វិភាគ ថាតើមានកើតឡើងនៅលើទីផ្សារខ្លះ?តើតម្រូវការចាំបាច់មួយណាដែលមនុស្សត្រូវការដោយខ្វះមិនបាន? ហើយពួកគេគឺជាអ្នកដែលតែងនិយាយជាមួយអនាគតអតិថិជនរបស់ពួកគេអំពីតម្រូវការរបស់អតិថិជន ហើយគ្រោងនឹងអភិវឌ្ឍការផ្ដល់ឲ្យកាន់តែប្រសើរ និង ពេញចិត្ត។ទាំងនេះគឺជាមូលហេតុដែលឥលូវនេះអ្នកត្រូវប្រាកដថាអ្នកត្រូវផ្ដោតសំខាន់ទៅលើអាជីវកម្មរបស់ខ្លួនឯង និង កន្លែងដែលអ្នកត្រូវបោះជំហាន ប្រសើរជាងផ្ដោតទៅលើអ្នកដែលចម្លងតាមអ្នក។ ក្រុមហ៊ុនដែលអ្នកកំពុងតែប្រកួតប្រជែងគឺ ពួកគេមិនខ្ជះខ្ជាយពេលវេលានៅលើគេហទំព័រ និង នៅលើវេបសាយរបស់អ្នកទេ ប៉ុន្តែពួកគេផ្ដោតការយកចិត្តទុកដាក់ទៅលើផលិតផលរបស់ពួកគេ និង អ្វីដែលចាំបាច់ ឬ ជាអ្វីដែលនៅក្នុងទីផ្សាររបស់អ្នកមិនមាន។
អ្នកត្រូវតែចងចាំថាការដែលអ្នកលេចខ្លួនឡើងមកដំបូងគឺ មិនមានការធានាថានឹងទទួលបានជោគជ័យគ្រប់ពេលគ្រប់វេលានោះទេ។ Apple ដំបូងឡើយមិនទាន់មានលេចចេញនូវស្មាតហ្វូននៅឡើយទេ, Facebook ក៏មិនមែនជាបណ្ដាញសង្គមដំបូងគេដែរ, Tesla ក៏មិនមែនជាឡានអគ្គិសនីដំបូង រីឯ Google ក៏មិនមែនជាម៉ាស៊ីនស្រាវជ្រាវដំបូងគេដែរ។ មេដឹកនាំដែលខ្លាំងពូកែនឹងដឹកនាំអាជីវកម្មរបស់ពួកគេឲ្យកាន់តែរីកចម្រើន ព្រមទាំងខិតខំរិះរកមធ្យោបាយកែច្នៃផលិតផលពួកគេឲ្យកាន់តែមានភាពលេចធ្លោជាងគេនៅលើទីផ្សារ។ដូចនេះអ្នកគឺជាអ្នកដឹកនាំម្នាក់ មិនមែនជាអ្នកដើរតាមគេនោះទេ អឹចឹងហើយអ្នកត្រូវតែផ្ដោតសំខាន់ទៅលើផលិតផលនិងសេវាកម្មដ៏ល្អបំផុតរបស់អ្នក។ខាងក្រោមនេះគឺជាអ្វីដែលអ្នកគួរតែធ្វើ ដើម្បីកុំឲ្យខ្ជះខ្ជាយថាមពលនិងពេលវេលាទៅព្រួយបារម្ភខ្លាចអ្នកដទៃលួចចម្លងវីធីសាស្ត្ររបសអ្នក៖
- ផ្ដោតទៅលើអតិថិជនរបស់អ្នកៈ មានក្រុមហ៊ុនជាច្រើនតែងតែចំណាយពេលវេលាខ្ជះខ្ជាយ និង ចំណាយកម្លាំងឥតប្រយោជន៍ទៅព្រួយបារម្ភពីការប្រកួតប្រជែងជាជាង ព្រួយបារម្ភពីអតិថិជនរបស់ពួកគេទៅទៀត។ ដូចនេះត្រូវថែរក្សាអតិថិជនរបស់អ្នកឲ្យបានល្អកុំឲ្យបាត់បង់ទៅដៃអ្នកផ្សេង។
- បង្កើត Channels សម្រាប់ការផ្ដល់មតិឲ្យគ្នាៈ គំនិតដែលអស្ចារ្យគឺបានមកពីអ្នកដែលពាក់ព័ន្ធ ដូច្នេះចូរស្ដាប់ពី អតិថិជន ដៃគូ និង និយោជិករបស់អ្នក ព្រោះពួកគេអាចជាគន្លឹះដែលអាចជួយអ្នកឲ្យទទួលបាននូវមតិថ្មីៗ ឬ អាចប្រាប់អ្នកពីអ្វីដែលផលិតផលមិនមាននៅលើទីផ្សារ។
- រក្សាចក្ខុវិស័យនៅលើនិន្នាការដែលកំពុងតែរីកចម្រើនៈ AI ( Artificial Intelligence) គឺកំពុងតែផ្លាស់ប្ដូរនូវឧស្សាហកម្មជាច្រើន។ដូចនេះអ្នកគួរតែពិចារណាអំពីរបៀបដែលនិន្នាការទាំងនេះ និង និន្នាការផ្សេងទៀតអាចផ្លាស់ប្ដូរអាជីវកម្មនិង ទីផ្សាររបស់អ្នក។
- កែច្នៃអាជីវកម្មរបស់អ្នកឲ្យបានមុនពេលដែលមានអ្នកធ្វើៈ អ្នកមិនត្រូវគិតគុណប្រយោជន៍នៃការប្រកួតប្រជែងដែលអ្នកមាននៅថ្ងៃនេះទេ ហើយវាក៏មិនស្ថិតស្ថេរជារៀងរហូតនោះដែរ ព្រោះនៅមានរណាម្នាក់ទៀតអាចធ្វើល្អជាងអ្នកទៅទៀត ដូចនេះអ្នកនិងក្រុមហ៊ុនត្រូវតែខ្នះខ្នែងខិតខំបង្កើតនូវអ្វីដែលថ្មី អ្វីដែលប្លែកជាងអ្នកដទៃ។
ជាចុងក្រោយអ្វីដែលអ្នកត្រូវយកចិត្តទុកដាក់ទៅលើនោះ គឺមិនមែនអង្គុយព្រួយបារម្ភពីដៃគូប្រកួតប្រជែងលួចចម្លងអ្វីពីអ្នកនោះទេ តែអ្នកត្រូវយកចិត្តទុកដាក់ទៅលើ៤ចំណុចដែលខ្ញុំបានសរសេរទើបប្រសើរជាង ព្រោះចំណុចទាំងនេះអាចជួយឲ្យអ្នករីកចម្រើនបានយូរអង្វែង។
