យុទ្ធសាស្ត្រទីផ្សារ 7Ps គឺជាយុទ្ធសាស្ត្រទីផ្សារដ៏មានប្រសិទ្ធភាពមួយ ជាពិសេស សម្រាប់អាជីវកម្មដែលទើបតែចាប់ផ្តើមដំបូង។ តាមរយៈការអនុវត្តន៍នូវយុទ្ធសាស្ត្រមួយនេះអ្នកនឹងអាចស្គាល់កាន់តែច្បាស់អំពីអាជីវកម្មរបស់អ្នក និងអតិថិជនគោលដៅរបស់អ្នក។ បន្ថែមពីលើនេះទៅទៀត វាក៏អាចជួយអ្នកក្នុងការកំណត់ថាអ្វីដែលដំណើរការ និងអ្វីដែលមានបញ្ហានៅក្នុងការធ្វើអាជីវកម្មទាំងមូលផងដែរ។
តើយុទ្ធសាស្រ្តទីផ្សារ 7Ps មានអ្វីខ្លះ?
- ផលិតផល (Product)
ជាផលិតផលដែលមានដាក់លក់នៅលើទីផ្សារ ហើយផលិផលទាំងនោះចែកចេញជាពីរធំៗគឺ ទំនិញ និងសេវាកម្ម។ ជាពិសេស ផលិតផលដែលអ្នកដាក់ឱ្យចរាចរនៅលើទីផ្សារត្រូវតែជាផលិតផលដែលមានតម្រូវការ មានន័យថាមានអតិថិជនដែលចង់បានផលិតផលនោះទៅប្រើប្រាស់ ឬក៏ផលិតផលនោះជាផលិតផលដែលបង្កើតតម្រូវការ។ ម្យ៉ាងទៀងបើក្នុងនាមជាម្ចាស់អាជីវកម្មវិញ អ្នកត្រូវតែយល់ដឹងឱ្យបានច្បាស់លាស់អំពីផលិតផល ឬសេវាកម្មរបស់ខ្លួន ដោយធានាបានថាជាផលិតផលដែលមានគុណភាព និងបំពេញតម្រូវការទីផ្សារបាន។
2. តម្លៃ (Price)
តម្លៃសំដៅលើចំនួនទឹកប្រាក់ដែលអតិថិជនបានចំណាយទៅលើការទិញផលិតផល ឬសេវាកម្ម។ មួយវិញទៀតតម្លៃត្រូវតែមានសមតុល្យគ្នារវាងផលិតផល និងផលិតកម្ម ជាពិសេសនោះ តម្លៃមិនអាចទាបជាងថ្លៃដើមបានទេ ព្រោះថាការផ្លាស់ប្តូរតម្លៃមានឥទ្ធិពលយ៉ាងសំខាន់ទៅលើការលក់ និងតម្រូវការផលិតផល។
3. ទីតាំង (Place)
ទីតាំងគឺជាកន្លែងដែលធ្វើការចែកចាយទំនិញ ឬសេវាកម្មរបស់អ្នកទៅកាន់អ្នកប្រើប្រាស់ ហើយទីតាំងគឺជាផ្នែកមួយដែលជួយឱ្យទីផ្សារមានសក្តានុពល។ ហើយអ្នកក៏មិនត្រូវតែនិយាយអំពីទីតាំង ដោយមិននិយាយអំពីទីផ្សារគោលដៅរបស់អ្នកបាននោះទេ ព្រោះសមាសធាតុនេះត្រូវការភាពច្បាស់អំពីគោលដៅរបស់បុគ្គលផងដែរ។ នៅពេលដែលអ្នកបានកំណត់អំពីអតិថិជនគោលដៅរបស់អ្នក នោះអ្នកនឹងរកឃើញវិធីសាស្រ្តចែកចាយដ៏មានប្រសិទ្ធភាពបំផុតដែរ។
4. ប្រម៉ូសិន (Promotion)
ការប្រូម៉ូសិន គឺជាយុទ្ធសាស្ត្រផ្សព្វផ្សាយ ដែលធ្វើយ៉ាងណាឱ្យទាក់ទាញការចាប់អារម្មណ៍អតិថិជន ដើម្បីទទួលបានការគាំទ្រទាំងពេលបច្ចុប្បន្ន និងពេលអនាគត។ តើត្រូវធ្វើយ៉ាងណាដើម្បីអាចផ្សព្វផ្សាយដល់អតិថិជនគោលដៅ និងតើវាត្រូវបានផ្សព្វផ្សាយញឹកញាប់ប៉ុណ្ណា? ខាងក្រោមនេះគឺជាបច្ចេកទេសខ្លះៗនៅក្នុងការផ្សព្វផ្សាយ៖
- ការផ្សាយពាណិជ្ជកម្ម
- ការលក់
- ទំនាក់ទំនងសាធារណៈ
- ប្រព័ន្ធផ្សព្វផ្សាយសង្គម។
5. មូលធនមនុស្ស (People)
តើអាជីវកម្មមិនអាស្រ័យលើធនធានមនុស្សដែលជាអ្នកគ្រប់គ្រងទេឬ? ជាការពិតអាជីវកម្មដែលជោគជ័យគឺតែងតែមាន មូលធនមនុ្ស ឬធនធានមនុស្ស ប្រកដដោយសមត្ថភាពគ្រប់គ្រាន់ ព្រោះពួកគេគឺជាផ្នែកមួយនៃការផ្តល់ជូនដល់អាជីវកម្មនៅផលិតផល និងសេវាកម្ម សម្រាប់អតិថិជន។
6. ដំណើរការ (Process)
ដំណើរការ គឺជាជំហាននីមួយៗ ដែលត្រូវការដើម្បីផ្តល់សេវាកម្មដល់អតិថិជន។ ដំណើរការនៃជំហាននីមួយៗនេះ ត្រូវបានបែងចែកសម្រាប់បុគ្គលិកតាមផ្នែក ឬតាមជំនាញ ដើម្បីធ្វើឱ្យប្រាកដថាការងាររបស់ពួកគេអាចទទួលបានលទ្ធផលខ្ពស់ និងទទួលបានជោគជ័យ។ ហើយនៅក្នុងចំណុចនេះទៀតសោត គឺជាវិធីសាស្រ្តដែលដំណើរការទៅលើការលក់ ការចែកចាយ ឬប្រតិបត្តិការផ្សេងៗទៀត ដោយអាចធានាឱ្យក្រុមហ៊ុនរបស់អ្នកដំណើរការទៅមុខបានរលូន។
7. រូបភាពជាក់ស្ដែង (Physical evidence)
នៅត្រង់ចំណុចនេះគឺសំដៅលើសម្ភារៈដែលធ្វើការវេចខ្ចប់ផលិតផល បង្កាន់ដៃ និងសេវាកម្មអតិថិជនជាដើម។ លើសពីនេះ អ្នកត្រូវធានាបានថា រាល់សកម្មភាពជាក់ស្តែងនានា ដែលយើងកំពុងតែផ្តល់ទៅឱ្យអតិថិជនត្រូវតែមានភាពល្អប្រសើរជានិច្ច៕
