នាថ្មីៗនេះធនាគារពាណិជ្ជកម្មជីបម៉ុងបានចុះហត្ថលេខាលើកិច្ចព្រមព្រៀងជាមួយនឹងដៃគូពាណិជ្ជកម្មថ្មីចំនួន៦ ដើម្បីឲ្យសេវាកម្មនៃការបើកប្រាក់ខែ (Payday) មានដំណើរការទៅបានយ៉ាងរលូន។ នាពេលបច្ចុប្បន្ននេះធនាគារមានក្រុមហ៊ុន ចំនួន៣០ដែលជាដៃគូពាណិជ្ជកម្មនិង មានគណនីជិត១០,០០០គណនី។
លោក ហុង សុខឡេង ( Hong Sok Leng) ដែលជាអនុប្រធានជាន់ខ្ពស់នៃធនាគារពាណិជ្ជកម្មជីបម៉ុង បានមានប្រសាសន៍ថា ដៃគូអាជីវកម្មថ្មីចំនួន៦ដែលទើបតែបានចុះហត្ថលេខាលើកិច្ចព្រមព្រៀង នៃសេវាកម្ម Payday គឺមានរយៈពេលវែង។ ធនាគារជីបម៉ុងបាននិយាយថា ឥលូវនេះធនាគារជាធនាគារបែបឌីជីថល ដែលផ្ដោតទៅលើបច្ចេកវិទ្យា សម្រាប់ការធ្វើប្រតិបត្តិការ និង កិច្ចការជំនួញផ្សេងៗ ដូចជា ការទូទាត់ប្រាក់បៀវត្ស ការដកប្រាក់ ការផ្ទេរប្រាក់និង សេវាកម្មហិរញ្ញវត្ថុផ្សេងទៀត។ លោក សុខឡេង បានបន្ថែមទៀតថា សេវាកម្ម Payday របស់ធនាគារបានផ្ដល់នូវអត្ថប្រយោជន៍ផ្សេងៗជាច្រើន សម្រាប់ក្រុមហ៊ុន និង និយោជិក។ សេវាកម្មនេះជួយបំពេញចិត្តឲ្យនិកយោជកនូវសិទ្ធពិសេស ដូចជាផ្ដល់នូវអត្រាការប្រាក់ខ្ពស់ និង ការបញ្ចុះអត្រាការប្រាក់កម្ចីទិញផ្ទះជាពិសេស។
លោក ហុង សុខឡេង បានបន្តទៀតថា សេវាកម្ម Payday វាគឺជាប្រព័ន្ធមួយដែលគិតគូរពីអតិថិជន ហើយសេវាកម្មនេះផ្ដល់ជូនតាមរយៈអ៊ីនធើណេតជាមួយនឹងប្រតិបត្តិការដែលអាចបត់បែនបាន ទៅតាមពេលវេលាជាក់ស្ដែងតាមរយៈ ធនាគារអ៊ីនធើណេតសាជីវកម្មជីបម៉ុង។ ធនាគារពាណិជ្ជកម្មជីបម៉ុងសព្វថ្ងៃនេះ មានទូរ ATMs ចំនួន៣៦ និង មានសាខាចំនួន៧។ ធនាគារនឹងបើកសាខា៤ផ្សេងទៀតនៅក្នុងទីក្រុងភ្នំពេញ និង នៅតាមខេត្តមួយចំនួននៅដើមខែមិថុនានេះរួមមាន ខេត្តបាត់ដំបង ខេត្តសៀមរាប និង ខេត្តកំពង់ចាម និង នៅលើវិថីផ្លូវលេខ២៧១ នៅក្នុងទីក្រុងភ្នំពេញ។
លោក លាង ម៉េង ( Leang Meng) ដែលជាសមាជិកក្រុមប្រឹក្សាភិបាលនិង ជាប្រធានស្ដីទីនៃធនាគារពាណិជ្ជជីបម៉ុងមានប្រសាសន៍ថា ធនាគារជីបម៉ុងបានប្ដេជ្ញាចិត្តថានឹងក្លាយជាធនាគារពាណិជ្ជឌីជីថលឈានមុខគេនៅក្នុងប្រទេសកម្ពុជា និង មានភាពល្បីល្បាញជាងគេ។ ហើយលោកបានបន្ថែមទៀតថា ធនាគារចង់ឮនូវការចង់បានព្រមទាំងតម្រូវការពីអតិថិជន និងដៃគូពាណិជ្ជរបស់ខ្លួន ដើម្បីស្វែងរកដំណោះស្រាយ និង ស្វែងរកសេវាកម្មមួយដែលល្អដើម្បីបំពេញតម្រូវការឲ្យអតិជន និង ដៃគូពាណិជ្ជរបស់ខ្លួន។ជាចុងក្រោយគាត់បានបន្ថែមទៀតថា “ការធ្វើសេវាកម្ម និង ផលិតផលបែបឌីជីថលនេះ គ្រាន់តែជាជំហានទី១នៃការចាប់ផ្ដើមតែប៉ុណ្ណោះ ពួកយើងនៅមានជំហាន១០ផ្សេងទៀតដែលត្រូវឆ្ពោះទៅរក”។
