ធ្វើយ៉ាងម៉េចទើបខ្ញុំអាចមានផលិតភាពខ្ពស់បាន?

តើអ្នកធ្លាប់សង្កេតឃើញថានៅក្នុងក្រុមហ៊ុន ឬស្ថាប័នមួយ តែងតែមានមនុស្សមួយក្រុមតូច ដែលមានសកម្មភាព និង​ផលិត​ភាពការងារ​ខ្ពស់ជាងអ្នកដទៃដែរឬទេ? មិនថាតែការងារដែលស្មុគស្មាញ ឬការងារដែលត្រូវការបន្ទាន់នោះទេ ពួកគេសុទ្ធតែអាចធ្វើវារួចរាល់ទាន់ពេលវេលា ព្រមទាំងមានរបៀបរៀបរយល្អទៀតផង​។ តើអ្វីទៅជាអាថ៍កំបាំងរបស់ពួកគេ? តើធ្វើដូចម្ត៉េច ទើបអាចមានផលិតភាពខ្ពស់ដូចពួកគេបាន?

ថ្ងៃនេះ គំនិត សូមលើកយកនូវចំណុចចំនួន ០៥ ដែលមនុស្សមានផលិតភាពខ្ពស់បានអនុវត្ថ ហើយអ្នកក៏អាចធ្វើបានដូចពួកគេដែរ។​

ចំណុចទី១៖ ធ្វើតារាងភាពបន្ទាន់ និងសំខាន់ (The Eisenhower Matrix – Urgent vs Important)

អ្វីទៅជាតារាងភាពបន្ទាន់ និងសំខាន់? តាមពិតទៅវិធីសាស្ត្រនេះ ត្រូវបាននាយឧត្តមសេនីយ៍ផ្កាយប្រាំ និងត្រូវជាអតីតប្រធានាធិបតីទី៣៤ របស់សហរដ្ឋអាមេរិក លោក Dwight D. Eisenhower ប្រើប្រាស់កាលពីសម័យសង្គ្រាមលោកលើកទី០២។ នៅក្នុងរបបដឹកនាំរបស់លោក សហរដ្ឋអាមេរិកបានបង្កើតនូវគម្រោងផ្លូវល្បឿនលឿន បង្កើតអង្គការ NASA ចុះសន្ធិសញ្ញាស្តីពីច្បាប់សិទ្ធរបស់ជនស៊ីវិល បញ្ចប់សង្គ្រាមកូរ៉េទាំងពីរ នាំយកទឹកដីអាឡ៉ាស្កា និងហាវ៉ៃ មកសហរដ្ឋអាមេរិក ក៏ដូចជារក្សាកុំឲ្យមានសង្គ្រាមត្រជាក់ជាមួយប្រទេសរូស្ស៊ី ជាដើម។ មានមនុស្សជាច្រើនបានចោទជាសំណួរថា តើលោកអាចសម្រេចសមិទ្ធផលធំៗទាំងនោះបានដោយ របៀបណាក្នុងរយៈពេលត្រឹមតែ០២ អាណត្តិរបស់លោកតែប៉ុណ្ណោះ។ ចម្លើយយ៉ាងខ្លីនោះ គាត់បានយល់ច្បាស់ណាស់ពីគោលការណ៍ និងភាពខុសគ្នារវាងរឿងដែលបន្ទាន់ និងរឿងដែលសំខាន់។ តួយ៉ាងនៅក្នុងឆ្នាំ ១៩៥៤ លោកធ្លាប់់បានលើកឡើងពីសម្តីនាយកសាលាម្នាក់ ដែលមានប្រសាសន៍ថា៖ “ខ្ញុំមានបញ្ហាពីរដែលត្រូវធ្វើ ទីមួយគឺរឿងដែលបន្ទាន់ ឯមួយទៀតគឺរឿងដែលសំខាន់។ រឿងដែលបន្ទាន់គឺមិនដែលសំខាន់ ឯរឿងសំខាន់គឺមិនដែលបន្ទាន់នោះទេ”។

វិធីសាស្ត្រនេះត្រូវបានគេយកមកកែច្នៃជាបន្តបន្ទាប់រហូតដល់ជាង ៣០ឆ្នាំក្រោយ លោក Stephen Covey  បានលើកវាមករៀបចំ និងលើកឡើងម្តងទៀតនៅក្នុងសៀវភៅ ទម្លាប់០៧យ៉ាងរបស់អ្នកដែលមានប្រសិទ្ធភាពខ្ពស់ (The 07 Habit of Highly Effective People) ដែលក្នុងនោះលោកបានហៅវាថា​ តារាងភាពបន្ទាន់ និងសំខាន់ (The Eisenhower Matrix – Urgent vs Important)។​

ដូច្នេះអ្នកត្រូវចេះបែងចែករឿងដែលអ្នកគ្រោងនឹងធ្វើជាបួនចំណែកដូចខាងក្រោម៖

• រឿងសំខាន់ និងបន្ទាន់ (Important & Urgent) – ជារឿងដែលអ្នកត្រូវធ្វើមុនគេ ហើយអ្នកចាំបាច់ត្រូវតែធ្វើវា បើពុំដូច្នេះ។
• រឿងសំខាន់តែមិនបន្ទាន់ (Important, but Not Urgent) – ជារឿងដែលអ្នកត្រូវធ្វើវា តែអ្នកអាចរៀបចំកាលវិភាគសម្រាប់វាបាន ដោយឲ្យថ្ងៃកំណត់ឲ្យបានច្បាស់លាស់។
• រឿងមិនសំខាន់តែបន្ទាន់ (Not Important, but Urgent) – ជារឿងដែលពុំសូវផ្តល់ផលឲ្យអ្នកវិញទេ ប៉ុន្តែវាជាកាតព្វកិច្ចដែលអ្នកត្រូវធ្វើ
• រឿងមិនសំខាន់ហើយមិនបន្ទាន់ទៀត (Not Important & Not Urgent) – ជារឿងដែលពុំមានប្រយោជន៍សម្រាប់នោះទាល់តែសោះ ហើយប្រសិនបើអ្នកចំណាយពេលជាមួយវាច្រើនពេក នោះអ្នកនឹងខាតបង់ប្រយោជន៍ជាច្រើន។

សូមស្វែងមើលរូបភាពដូចខាងក្រោមនេះ៖     

ចំណុចទី២៖ បំបែកការងារជាផ្នែកកិច្ចការតូចៗ

ហេតុអ្វីបានជាមនុស្សចូលចិត្តពន្យាពេលធ្វើការងារខ្លួន (procrastinate)? មួយក្នុងចំណោមមូលហេតុជាច្រើន ដែលអាចធ្វើឲ្យមនុស្សយើងចូលចិត្តពន្យាពេលធ្វើការងារនោះ​ គឺព្រោះពួកគេមានអារម្មណ៍ថាការងាររបស់ពួកគេមានគួរឲ្យធុញ និងមានទំហំធំពេក ដោយត្រូវចំណាយពេលយូរក្នុងការបំពេញវា។ ដូច្នេះការបំបែកការងារជាផ្នែកកិច្ចការតូចៗ នឹងជួយអ្នកឲ្យមានកម្លាំងចិត្តក្នុងការបំពេញ​ និងសម្រេចការងារនោះ ពីព្រោះបើតាមការស្រាវជ្រាវ វាទាក់ទងនឹងផ្លូវអារម្មណ៍របស់អ្នក ពោលនៅពេលដែលលោកអ្នកបានសម្រេចកិច្ចការអ្វីមួយ ទោះបីជាការងារនោះតូចតាចក៏ដោយ ក៏វាធ្វើឲ្យអ្នកមានអារម្មណ៍ល្អ និងរីករាយមានកម្លាំងចិត្តក្នុងការធ្វើការងារផ្សេងបន្តទៅទៀត។

ចំណុចទី៣៖ ចេះបែងចែកពេលវេលាសម្រាក

ជាការពិតណាស់ ខួរក្បាលរបស់យើងគឺប្រៀបដូចជាគ្រឿងម៉ាស៊ីនមួយអ៊ីចឹង ពោលបើម៉ាស៊ីនមួយនោះធ្វើការឥតមានបានសម្រាក ម៉ាស៊ីនមួយគ្រឿងនោះក៏ងាយនឹងឆាប់ខូចដូចគ្នា។ អ្នកគួរចេះបែងចែកពេលវេលាខ្លះ ដើម្បីឲ្យខួរក្បាលរបស់អ្នកអាចសម្រាកបន្តិច ដើម្បីអាចបន្តដំណើរទៅទៀតបាន។ ប៉ុន្តែមិនមែនការសម្រាកទាំងអស់ សុទ្ធតែជាការសម្រាកដែលត្រឹមត្រូវនោះទេ។ តួយ៉ាងប្រសិនបើអ្នកសម្រាកដោយយកពេលវេលាទៅប្រើទូរស័ព្ទដៃ ឬទៅធ្វើ ឬគិតរឿងអ្វីផ្សេងនោះ វាពុំមែនជាការសម្រាកដែលត្រឹមត្រូវនោះទេ។ ដើម្បីសម្រាកឲ្យត្រឹមត្រូវ អ្នកអាចយកពេលនោះទៅដើរលម្ហែកាយបន្ធូរអារម្មណ៍ ទទួលទានភេសជ្ជៈត្រជាក់ៗមួយកែវ ឬធ្វើសមាធិត្រឹម១០ ទៅ១៥នាទីនោះគឺល្អបំផុតសម្រាប់ខួរក្បាលរបស់អ្នក។

ចំណុចទី៤៖ កុំផ្តោតធ្វើរឿងច្រើនក្នុងពេលតែមួយ

មានមនុស្សមិនច្រើនទេ ដែលអាចមានសមត្ថភាពធ្វើការងារច្រើនក្នុងពេលតែមួយ។ ក៏ប៉ុន្តែទោះបីជាអ្នកអាចមានសមត្ថភាពបែបនេះក៏ដោយ អ្នកមិនគួរប្រើប្រាស់វាច្រើនដងពេកនោះទេ ព្រោះយូរៗទៅអ្នកនឹងចុះខ្សោយនូវកម្លាំងទាំងផ្លូវកាយ និងផ្លូវចិត្ត ចំណែកឯសមត្ថភាពក្នុងការគិតរបស់អ្នក ក៏ចុះថមថយទៅតាមនឹងដូចគ្នា។ ផ្ទុយមកវិញ ប្រសិនបើអ្នកធ្វើការផ្តោតរឿងមួយក្នុងពេលតែមួយ ជួយឲ្យអ្នកអាចធ្វើរឿងនោះបានដោយល្អិតល្អន់ និងល្អប្រសើរ ព្រោះអ្នកអាចមានពេលផ្ទៀងផ្ទាត់ទៅលើការងារនោះបានច្រើនលើកច្រើនសារ។

ចំណុចទី៥៖ រៀបចំកាលវិភាគការងារសម្រាប់ខ្លួនឯង

សម្រាប់មនុស្សដែលមានផលិតភាពខ្ពស់ ការរៀបចំកាលវិភាគការងារសម្រាប់ពួកគេគឺមានសារៈសំខាន់ណាស់។ ព្រោះវាជួយឲ្យគេអាចផ្តោតអារម្មណ៍ទៅលើការងារទាំងនោះបាន ដោយមិនបែកអារម្មណ៍។ ដោយក្នុងកាលវិភាគនោះពួកគេអាចកំណត់ថ្ងៃដែលពួកគេចាប់ផ្តើមការងារ ថ្ងៃដែលនឹងត្រូវបញ្ចប់ ក៏ដូចជាអ្នកដែលជាប់ទាក់ទងក្នុងការងារនោះផងដែរ។ មិនត្រឹមតែប៉ុណ្ណោះ កាលវិភាគជួយឲ្យពួកគេដឹងជាមុនថា តើពួកគេអាចបញ្ចប់ការងារនោះបានទាន់ពេលវេលាដែរឬទេ ប្រសិនបើពុំទាន់នោះ តើនរណាដែលអាចជាគោលដៅដែលពួកគេត្រូវរកជំនួយបាន៕

យើងខ្ញុំសង្ឃឹមថា បន្ទាប់ពីបញ្ចប់អត្ថបទនេះ លោកអ្នកក៏អាចក្លាយជាបុគ្គល ដែលមានផលិតភាពខ្ពស់ ដោយអនុវត្ថតាមវិធីសាស្ត្រខាងលើទាំងអស់នេះ។