យោងតាមក្រសួងពាណិជ្ជកម្មបានឱ្យដឹងថា កាលពីថ្ងៃទី១០ ខែកុម្ភៈ កន្លងមក ឯកឧត្តម ប៉ាន សូរស័ក្តិ បានចូលរួមនៅក្នុងពិធីបើកវេទិកាធុរកិច្ច វិនិយោគ និងទេសចរណ៍ កម្ពុជា-ចិន ដោយមានការអញ្ជើញចូលរួមពីសំណាក់ ឯកឧត្តម Hu Chunhua ឧបនាយករដ្ឋមន្រ្តីនៃសាធារណរដ្ឋប្រជាមានិតចិន ព្រមទាំងវត្តមានរបស់ ឯកឧត្តម លោកជំទាវ ឧបនាយករដ្ឋមន្ត្រី រដ្ឋមន្ត្រី និងឥស្សរៈជនជាន់ខ្ពស់ ជាពិសេសវត្តមានធុរជន និងវិនិយោគិនកម្ពុជា-ចិន ក្នុងវិស័យធុរកិច្ច វិនិយោគ និងទេសចរណ៍ជាច្រើនរូបទៀត ដែលធ្វើឡើងនៅឯទីក្រុងប៉េកាំង ប្រទេសចិន។
ជាកិច្ចចាប់ផ្តើម ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានមានប្រសាសន៍ថា សម្រាប់កិច្ចសហប្រត្តិបត្តិការវិស័យពាណិជ្ជកម្មរវាងកម្ពុជា-ចិន ក្រៅពីសក្តានុពលទីផ្សារដែលមានស្រាប់ ដូចជា៖ កិច្ចព្រមព្រៀងពាណិជ្ជកម្មសេរីអាស៊ាន-ចិន និងកិច្ចព្រមព្រៀងអាសិប (RCEP) កម្ពុជាបានបន្តពង្រីកសក្តានុពលថ្មីៗបន្ថែមទៀត នោះគឺកិច្ចព្រមព្រៀងពាណិជ្ជកម្មសេរីកម្ពុជា-ចិន ដែលបានចូលជាធរមានកាលពីថ្ងៃទី១ ខែមករា ឆ្នាំ២០២២ កន្លងទៅនេះ ដែលជាមូលដ្ឋានសម្រាប់ត្រួសត្រាយផ្លូវក្នុងការអនុវត្តភាពជាដៃគូយុទ្ធសាស្រ្ត និងជំរុញកិច្ចសហប្រតិបត្តិការក្នុងវិស័យសេដ្ឋកិច្ច ពាណិជ្ជកម្ម និងវិនិយោគរវាងប្រទេសទាំងពីរឱ្យកាន់តែរឹងមាំបន្ថែមទៀត។
ឯកឧត្តមរដ្ឋមន្រ្តី បានបន្តទៀតថា ក្រៅពីនេះ កម្ពុជាបានបន្តជំរុញលើកកម្ពស់ និងធ្វើឱ្យមានការអភិវឌ្ឍន៍ទៅលើវិស័យផ្សេងៗទៀងសម្រាប់ការនាំចេញ ដោយខិតខំទាញយកអត្ថប្រយោជន៍ពីកាលានុវត្តភាពដែលមាននាពេលបច្ចុប្បន្ន និងចាំបាច់ត្រូវរៀបចំធានានូវភាពអំណោយផលពីទីផ្សារថ្មីៗ ព្រមទាំងត្រូវពង្រឹងភាពប្រកួតប្រជែងបន្ថែមទៀត។ ដោយផ្ដោតទៅលើការនាំចេញទៅបណ្តាប្រទេសក្នុងតំបន់ ដែលផ្តល់សក្តានុពលដល់ធុរជន និងវិនិយោគិនក្នុង និងក្រៅប្រទេស ជាពិសេសទៅទៀតនោះគឺ ធុរជន និងវិនិយោគិនចិន៕
