ជាទូទៅ សហគ្រិន អ្នកជំនួញស្ទើរតែទាំងអស់គ្នាទៅហើយ តែងតែជួបបសគ្គ ការបរាជ័យ ការក្ស័យធនជាដើម។ ប៉ុន្តែពួកគេទាំងអស់នោះ មិនចុះចាញ់នោះឡើយ តែបែរជាមានកម្លាំងចិត្តបន្តដំណើរទៅមុខឥតឈប់ឈរទៅវិញ ហើយក្នុងនោះទៀតសោតក៏មានកញ្ញា អ៊ុយ អ៊ែណា ម្នាក់ផងដែរ ដែលកញ្ញាជាបុគ្គលជោគជ័យម្នាក់ បានជម្នះរាល់ភាពលំបាកជាច្រើនទំរាំមានថ្ងៃនេះ។
បច្ចុប្បន្ន កញ្ញា អ៊ុយ អ៊ែណា ជានាយកប្រតិបត្តិនៅ ភោជនីយដ្ឋាន ចូលចិត្ត និង នៅ Elna Beauty Care។ លើសពីនេះ កញ្ញាធ្វើការងារនៅតំណងផ្សេងៗទៀតដូចជា កាន់តំណែងជា Managing Dirctor នៅក្រុមហ៊ុន T-Shop TK Avenue និង កាន់តំណែងជា Operation & HR Director នៅក្រុមហ៊ុន HLCC Plus Toul Kork ទៀតផង។ មូលហេតុដែលនាំឱ្យកញ្ញាទទួលបានភាពជោគជ័យបែបនេះ គឺដោយសារតែគាត់មានវត្ថុទិព្វមួយចំនួននៅក្នុងដៃ។
យោងទៅតាមវីដេអូចែករំលែងក្នុងគណនីហ្វេសប៊ុករបស់កញ្ញា បានប្រាប់ពីវត្ថុទិព្វសំខាន់ៗទាំង ៤យ៉ាងដែលនាងតែងតែអនុវត្តន៍ ហើយជាកត្តានាំឱ្យទទួលបានជោគជ័យដូចសព្វថ្ងៃនេះដែរមានដូចខាងក្រោម៖
១. កម្លាំងជម្រុញចិត្ត
កញ្ញា អ៊ុយ អ៊ែណា ប្រាប់ថា ថាមពលជម្រុញនេះ គឺគាត់មានតាំងពីក្មេងមកម្លេះព្រោះថា ថាមពលនេះ នាងទទួលបានមកពីម្ដាយ ដែលនាងចាត់ទុកម្ដាយគឺជាអាយដល ដោយសារការខិតខំប្រឹងប្រែងចិញ្ចឹមរហូតកូន ៤របស់គាត់ទាំងលំបាកលំបិន។ នេះហើយជាកត្តាដែលជួយឱ្យមាន កម្លាំងចិត្ត នៅខាងក្នុង ដើម្បីបន្តដំណើរទៅមុខ។
២. ភាពស្មោះត្រង់
សហគ្រិនស្រស់ស្អាតរូបនេះ បានបន្ថែមថា ភាពស្មោះត្រង់គឺវាពិតជាកត្ដាសំខាន់ ក្នុងការទទួលបានឱកាសការងារផ្សេងៗជាច្រើនពីក្រុមហ៊ុន ដែលយើងកំពុង បម្រើការ ហើយលើសពីនេះទៅទៀត វាក៏ជាឱកាសមួយក្នុងការកសាងទំនាក់ទំនងល្អនៅសង្គមផងដែរ។ កញ្ញាបាននិយាយបញ្ជាក់ថា ភាពស្មោះត្រង់នេះហើយគឺជាទុនដំបូងក្នុងការចេញរកស៊ី ឬបើកអាជីវកម្មផ្សេងៗ។
៣. ការកសាងទំនុកចិត្តឲ្យមនុស្សជុំវិញខ្លួន
នៅត្រង់ចំណុចនេះ នាងបន្តថា វាកាន់តែពិសេស ព្រោះការសាងភាពជឿជាក់មួយបាន វាមិនមែនជារឿងងាយស្រួលពេកនោះទេ ហើយវាក៏មិនមែនកើតចេញឡើងពីមួយថ្ងៃ ឬពីរថ្ងៃនោះដែរ។ ប៉ុន្តែវាត្រូវការធ្វើជារៀងរាលថ្ងៃ និងមានភាពអត់ធ្មត់បំផុត រួមផ្សំទៅនឹងឥរិយាបទ ចរិកលក្ខណៈផងដែរ ទើបអាចធ្វើឲ្យគេទុកចិត្តជឿជាក់ និងហ៊ានដាក់ទុនរកស៊ីជាមួយបាន។
៤. ការផ្ដល់ក្ដីស្រឡាញ់ឲ្យមនុស្សជុំវិញខ្លួន
នៅចំណុចចុងក្រោយនេះ វាពិតជាមានសារៈសំខាន់ខ្លាំងណាស់ មិនថាចំពោះបុគ្គលិក ចំពោះសហគ្រិននោះទេ ត្រូវតែមានការស្រឡាញ់ចូលចិត្តមនុស្សដែលនៅជុំវិញខ្លួន។ ហើយកញ្ញាបានបន្ថែមទៀតថា បើក្នុងនាមជាមេវិញ ត្រូវចេះផ្ដល់ការស្រឡាញ់ ការយកចិត្តទុកដាក់ចំពោះរាល់សមាជិកក្រុមទាំងអស់ ឲ្យពួកគេមានភាពកក់ក្ដៅ ដែលជាហេតុនាំឱ្យបុគ្គលិកមានថាមពលធ្វើការ នោះក្រុមហ៊ុនក៏មានការរីកចម្រើនទៅមុខបានលឿនដែរ។
ជាចុងក្រោយ កញ្ញា អ៊ុយ អ៊ែណា គូសបញ្ជាក់ផងដែរថា “បើទោះបីជាខ្ញុំជួបឧបសគ្គ ជួបការបរាជ័យយ៉ាងណាក៏ដោយ ក៏ខ្ញុំមិនដែលភ្លេចចំណុចសំខាន់ៗទាំង ៤នេះទេ”។
