ការរស់នៅដោយមានភាពវិជ្ជមាន មិនមែនមានន័យថាអ្នកត្រូវធ្វើពុតជាសប្បាយចិត្តគ្រប់ពេលនោះទេ។ ប៉ុន្តែវាជាការរៀនបណ្ដុះផ្នត់គំនិត និងអាកប្បកិរិយាមួយចំនួនដែលជួយអ្នកឱ្យមើលឃើញភាពល្អក្នុងជីវិត និងដោះស្រាយបញ្ហាប្រកបដោយប្រសិទ្ធភាព។
ខាងក្រោមនេះជា ១០ អាកប្បកិរិយាដែលធ្វើឱ្យការរស់នៅរបស់អ្នកកាន់តែមានភាពវិជ្ជមាន៖
១. អនុវត្តការដឹងគុណជារៀងរាល់ថ្ងៃ
រាល់ព្រឹក ឬរាល់យប់ ត្រូវចំណាយពេលពីរបីនាទីគិតពី រឿង ៣ យ៉ាងដែលអ្នកដឹងគុណ។ វាអាចជារឿងតូចតាចដូចជា កាហ្វេឆ្ងាញ់មួយពែង សុខភាពល្អ ឬគ្រួសារជាទីស្រលាញ់។ ការដឹងគុណជួយបង្វែរការផ្តោតអារម្មណ៍របស់អ្នកពីអ្វីដែលអ្នកគ្មាន ទៅរកអ្វីដែលអ្នកមាន។
២. ផ្តោតលើអ្វីដែលអ្នកអាចគ្រប់គ្រងបាន
នៅពេលជួបបញ្ហា សូមកុំគិតច្រើនពេកពីអ្វីដែលអ្នកមិនអាចផ្លាស់ប្តូរបាន។ ជំនួសមកវិញ សូម ផ្តោតលើការធ្វើសកម្មភាព លើអ្វីដែលអ្នកអាចគ្រប់គ្រងបាន។ ការធ្វើបែបនេះជួយកាត់បន្ថយភាពតានតឹង និងផ្តល់ឱ្យអ្នកនូវអារម្មណ៍ថាខ្លួនមានអំណាចលើជីវិតខ្លួនឯង។
៣. ហ៊ាននិយាយ “ទេ” ចំពោះអ្វីដែលមិនសំខាន់
អ្នកមិនចាំបាច់ទទួលយកការងារ ឬសំណើគ្រប់យ៉ាងនោះទេ។ ការរៀន បដិសេធរឿងដែលមិនពាក់ព័ន្ធ ឬហួសពីសមត្ថភាព អាចជួយការពារពេលវេលា ថាមពល និងសុខភាពផ្លូវចិត្តរបស់អ្នក។
៤. ផ្តល់ក្តីសប្បុរសដល់អ្នកដទៃ
ការផ្តល់ក្តីសប្បុរស ឬការជួយអ្នកដទៃ ទោះជារឿងតូចតាចក៏ដោយ អាចផ្តល់នូវសេចក្តីសុខក្នុងចិត្តដែលមិនអាចកាត់ថ្លៃបាន។ ការធ្វើបែបនេះមិនត្រឹមតែធ្វើឱ្យអ្នកដទៃសប្បាយចិត្តទេ ថែមទាំងធ្វើឱ្យអ្នកមានអារម្មណ៍ល្អផងដែរ។
៥. ហ៊ុំព័ទ្ធខ្លួនជាមួយមនុស្សវិជ្ជមាន
មនុស្សដែលអ្នកចំណាយពេលជាមួយមានឥទ្ធិពលយ៉ាងខ្លាំងលើអារម្មណ៍របស់អ្នក។ ដូចនេះ ចូរនៅក្បែរមនុស្សដែលលើកទឹកចិត្តអ្នក គាំទ្រអ្នក និងនាំមកនូវថាមពលវិជ្ជមានដល់ជីវិតរបស់អ្នក។
៦. ថែរក្សាសុខភាពកាយ និងចិត្តរបស់អ្នក
សុខភាពល្អគឺជាមូលដ្ឋានគ្រឹះនៃភាពវិជ្ជមាន។ ត្រូវមានទម្លាប់ ហាត់ប្រាណ ញ៉ាំអាហារមានជីវជាតិ និងគេងឱ្យបានគ្រប់គ្រាន់។ សុខភាពល្អជួយកាត់បន្ថយភាពតានតឹង និងធ្វើឱ្យអារម្មណ៍របស់អ្នកស្រស់ថ្លា។
៧. រៀនពីកំហុសជាជាងការបន្ទោសខ្លួនឯង
មនុស្សគ្រប់គ្នាសុទ្ធតែធ្លាប់ធ្វើខុស។ ដូចនេះជំនួសឱ្យការបន្ទោសខ្លួនឯង សូមមើលកំហុសជាមេរៀនមួយ វិភាគពីអ្វីដែលខុស ហើយរៀនពីវាដើម្បីកែលម្អនៅពេលក្រោយ។
៨. ស្វែងរកអត្ថន័យក្នុងអ្វីដែលអ្នកធ្វើ
មិនថាជាការងារ ឬកិច្ចការប្រចាំថ្ងៃ សូមព្យាយាមរក គោលបំណង ឬអត្ថន័យនៅពីក្រោយវា។ នៅពេលអ្នកយល់ថាអ្វីដែលអ្នកកំពុងធ្វើមានតម្លៃ អ្នកនឹងមានកម្លាំងចិត្ត និងអារម្មណ៍វិជ្ជមានជាងមុន។
៩. ហ៊ានចេញពីតំបន់ផាសុកភាព (Comfort Zone)
ការធ្វើរឿងថ្មីៗ ឬការប្រឈមមុខនឹងការភ័យខ្លាចតូចៗ ជួយអ្នកកសាងភាពក្លាហាន និងទំនុកចិត្ត។ ការធ្វើបែបនេះធ្វើឱ្យអ្នកមានអារម្មណ៍រំភើប ហើយនាំមកនូវបទពិសោធន៍ថ្មីៗដល់ជីវិតរបស់អ្នក។
១០. រស់នៅក្នុងបច្ចុប្បន្ន
ការគិតច្រើនពេកពីអតីតកាល ឬអនាគត ធ្វើឱ្យអ្នកបាត់បង់ភាពរីករាយក្នុងពេលបច្ចុប្បន្ន។ ដូច្នេះ អ្នកត្រូវផ្តោតលើការរស់នៅក្នុងពែលបច្ចុប្បន្ន ដោយផ្តោតលើអ្វីដែលអ្នកកំពុងធ្វើ ឬអ្វីដែលកំពុងកើតឡើងនៅជុំវិញខ្លួន។
ជារួម ការអនុវត្តអាកប្បកិរិយាទាំងនេះជាប្រចាំ នឹងជួយផ្លាស់ប្តូរជីវិតរបស់អ្នកឱ្យកាន់តែមានភាពវិជ្ជមាន ស្កប់ស្កល់ និងពោរពេញដោយសុភមង្គល។
