ការទទួលបានការគោរពមិនមែនជារឿងដែលកើតឡើងដោយឯកឯងនោះទេ។ វាជាលទ្ធផលនៃការធ្វើសកម្មភាព ការសម្រេចចិត្ត និងទង្វើប្រចាំថ្ងៃដែលបង្ហាញពីចរិតលក្ខណៈ និងតម្លៃរបស់អ្នក។ មនុស្សជោគជ័យដែលត្រូវបានគេគោរព គឺតែងតែមានទម្លាប់ និងលក្ខណៈពិសេសមួយចំនួនដែលធ្វើឲ្យពួកគេលេចធ្លោ។
ខាងក្រោមនេះជា ១០ យ៉ាងដែលមនុស្សជោគជ័យធ្វើដើម្បីទទួលបានការគោរព៖
១. ពួកគេរក្សាការសន្យារបស់ខ្លួន
មនុស្សដែលគួរឱ្យគោរព គឺតែងតែធ្វើអ្វីដែលពួកគេបាននិយាយ។ ការរក្សាការសន្យាទោះតូចតាចក្ដី តែនេះបង្ហាញពីភាពស្មោះត្រង់ និងការទទួលខុសត្រូវ ដែលសម្មភាពបែបនេះគឺជាមូលដ្ឋានគ្រឹះនៃទំនុកចិត្ត។
២. ពួកគេគោរពពេលវេលារបស់អ្នកដទៃ
ការគោរពពេលវេលារបស់អ្នកដទៃ គឺជាការបង្ហាញពីការគោរពចំពោះពួកគេ។ មនុស្សជោគជ័យតែងតែមានវិន័យលើខ្លួនឯង ដូចជាការទៅឱ្យទាន់ពេលវេលា ដោយមិនឱ្យអ្នកដទៃរង់ចាំឡើយ។
៣. ពួកគេស្តាប់ច្រើនជាងនិយាយ
មនុស្សដែលគួរឱ្យគោរព មិនមែនជាអ្នកដែលនិយាយច្រើនជាងគេនោះទេ។ ផ្ទុយទៅវិញ ពួកគេជាអ្នកដែល ស្តាប់ដោយយកចិត្តទុកដាក់។ ការស្តាប់ជួយពួកគេយល់ពីទស្សនៈអ្នកដទៃ ហើយធ្វើឱ្យអ្នកដទៃមានអារម្មណ៍ថាត្រូវបានគេឱ្យតម្លៃ។
៤. ពួកគេទទួលស្គាល់កំហុសរបស់ខ្លួន
ការទទួលស្គាល់កំហុសមិនមែនជាភាពទន់ខ្សោយនោះទេ។ ផ្ទុយទៅវិញ វាជាសញ្ញានៃ ភាពក្លាហាន និងភាពចាស់ទុំ។ មនុស្សដែលហ៊ានទទួលខុសត្រូវលើទង្វើរបស់ខ្លួន តែងតែទទួលបានការគោរពពីអ្នកដទៃ។
៥. ពួកគេសរសើរអ្នកដទៃដោយស្មោះត្រង់
មនុស្សជោគជ័យដឹងពីរបៀបលើកទឹកចិត្តអ្នកដទៃ។ ពួកគេមិនខ្លាចក្នុងការសរសើរពីសមត្ថភាព ឬសមិទ្ធផលរបស់អ្នកដទៃនោះទេ។ ការសរសើរដោយស្មោះត្រង់ បង្កើតបរិយាកាសវិជ្ជមាន និងបង្ហាញពីចិត្តទូលាយ។
៦. ពួកគេជួយអ្នកដទៃដោយមិនរំពឹងផល
ការជួយអ្នកដទៃដោយមិនរំពឹងថានឹងទទួលបានអ្វីមកវិញ គឺជាទង្វើដ៏មានតម្លៃ។ មនុស្សជោគជ័យប្រើប្រាស់ចំណេះដឹង និងបណ្ដាញទំនាក់ទំនងរបស់ខ្លួន ដើម្បីជួយអ្នកដទៃឱ្យរីកចម្រើន។
៧. ពួកគេមានភាពស្មោះត្រង់ និងតម្លាភាព
ភាពស្មោះត្រង់ និងតម្លាភាពគឺជាគ្រឹះនៃទំនាក់ទំនងរឹងមាំ។ មនុស្សដែលគួរឱ្យគោរពតែងតែនិយាយការពិត ហើយមិនលាក់បាំង។ ពួកគេមានគោលការណ៍ច្បាស់លាស់ដែលគេប្រកាន់ខ្ជាប់។
៨. ពួកគេមិននិយាយដើមគេ
មនុស្សជោគជ័យដែលមានការគោរព តែងតែជៀសវាងការនិយាយដើមគេ។ ពួកគេផ្តោតលើការងារ ការលូតលាស់ និងរឿងដែលមានប្រយោជន៍ជាជាងរឿងអវិជ្ជមាន។
៩. ពួកគេថែរក្សាសុខភាពកាយ និងចិត្ត
ការមើលថែខ្លួនឯង បង្ហាញថាអ្នកឱ្យតម្លៃលើខ្លួនឯង។ មនុស្សជោគជ័យយល់ថា សុខភាពល្អគឺជាមូលដ្ឋានគ្រឹះនៃផលិតភាព និងកម្លាំងចិត្ត។ ពួកគេមានវិន័យក្នុងការហាត់ប្រាណ ញ៉ាំអាហារល្អ និងគេងគ្រប់គ្រាន់។
១០. ពួកគេបន្តរៀនសូត្រ និងអភិវឌ្ឍខ្លួន
មនុស្សជោគជ័យមិនដែលគិតថាខ្លួនឯងពូកែគ្រប់គ្រាន់នោះទេ។ ពួកគេមានផ្នត់គំនិតរីកចម្រើន ដោយបន្តរៀនសូត្រឥតឈប់ឈរ និងស្វែងរកវិធីកែលម្អខ្លួនឯងជានិច្ច។
ជារួម ការគោរពមិនមែនកើតចេញពីឋានៈ ឬទ្រព្យសម្បត្តិនោះទេ តែចេញពីទង្វើ និងចរិតលក្ខណៈរបស់អ្នក។ ការអនុវត្តចំណុចទាំងនេះជារៀងរាល់ថ្ងៃ នឹងធ្វើឱ្យអ្នកទទួលបានការគោរពពិតប្រាកដពីអ្នកជុំវិញខ្លួន។
