ទម្លាប់ទាំង ៣ ដែលធ្វើឲ្យអ្នកធ្លាក់ចូលក្នុងវិបត្តិបំណុលដោយមិនដឹងខ្លួន

វិបត្តិបំណុល មិនមែនតែងតែកើតចេញពីការខ្ចីប្រាក់ច្រើនដុំក្នុងពេលតែមួយនោះទេ។ ជារឿយៗ វាចាប់ផ្តើមពីទម្លាប់តូចៗប្រចាំថ្ងៃ ដែលមើលទៅដូចជាធម្មតា ប៉ុន្តែបន្តិចម្តងៗបានធ្វើឲ្យអ្នកធ្លាក់ក្នុងស្ថានភាពហិរញ្ញវត្ថុដ៏លំបាកដោយមិនដឹងខ្លួន។

ខាងក្រោមនេះជាទម្លាប់ដ៏គ្រោះថ្នាក់ទាំង ៣ ដែលអ្នកគួរជៀសវាង៖

១. ការចំណាយលើសពីចំណូល
នេះគឺជាឫសគល់នៃបញ្ហាបំណុលទាំងអស់។ ទោះបីជាអ្នកមានប្រាក់ចំណូលខ្ពស់ប៉ុណ្ណាក៏ដោយ ប្រសិនបើអ្នកចំណាយលើសពីអ្វីដែលអ្នករកបាន អ្នកនឹងត្រូវខ្ចីលុយដើម្បីទប់ទល់នឹងជីវភាព។ ទម្លាប់នេះច្រើនកើតឡើងនៅពេលដែលអ្នកប្រើ ប័ណ្ណឥណទាន ឬការខ្ចីប្រាក់ងាយៗដើម្បីទិញទំនិញដែលមិនចាំបាច់។

របៀបជៀសវាង: បង្កើតថវិកាប្រចាំខែឲ្យបានច្បាស់លាស់។ តាមដានរាល់ការចំណាយរបស់អ្នក ហើយត្រូវប្រាកដថាការចំណាយសរុបរបស់អ្នកទាបជាងប្រាក់ចំណូល។

២. ការបង់រំលស់ច្រើនពេក
ការបង់រំលស់នីមួយៗមើលទៅហាក់ដូចជាមិនធ្ងន់ធ្ងរទេ ព្រោះទឹកប្រាក់ដែលត្រូវបង់ប្រចាំខែមានចំនួនតិច។ ប៉ុន្តែនៅពេលអ្នកមានការបង់រំលស់ច្រើនមុខក្នុងពេលតែមួយ ដូចជាការបង់រំលស់ទូរស័ព្ទ ម៉ូតូ គ្រឿងអេឡិចត្រូនិច និងរបស់របរផ្សេងទៀត នោះការចំណាយសរុបនឹងកើនឡើងយ៉ាងគំហុក។

របៀបជៀសវាង: កុំសម្រេចចិត្តទិញរបស់អ្វីមួយដោយគ្រាន់តែគិតពីការបង់ប្រចាំខែ។ ត្រូវគិតពីតម្លៃសរុប និងត្រូវសួរខ្លួនឯងថា តើអ្នកពិតជាត្រូវការរបស់នោះខ្លាំងណាស់មែនទេ? ព្យាយាមសន្សំលុយដើម្បីទិញរបស់នោះដោយមិនបង់រំលស់ប្រសើរជាង។

៣. មិនមានថវិកាសម្រាប់ចំណាយបន្ទាន់
ជីវិតតែងតែមានរឿងដែលមិនអាចទាយទុកមុនបាន ដូចជាការជួបគ្រោះថ្នាក់ ការឈឺថ្កាត់ ឬការបាត់បង់ការងារ។ នៅពេលមានរឿងបន្ទាន់កើតឡើង ហើយអ្នកគ្មានប្រាក់សន្សំបម្រុងទុក អ្នកនឹងគ្មានជម្រើសក្រៅពីខ្ចីលុយពីធនាគារ ឬស្ថាប័នហិរញ្ញវត្ថុ ដែលមានអត្រាការប្រាក់ខ្ពស់ឡើយ។

របៀបជៀសវាង: ចាប់ផ្តើមសន្សំលុយភ្លាមៗដើម្បីបង្កើតមូលនិធិសង្គ្រោះបន្ទាន់ (Emergency Fund) ។ ព្យាយាមសន្សំយ៉ាងហោចណាស់ឲ្យបានគ្រប់គ្រាន់សម្រាប់ចំណាយប្រចាំខែរយៈពេល ៣ ទៅ ៦ ខែ។ មូលនិធិនេះនឹងការពារអ្នកពីការធ្លាក់ក្នុងវិបត្តិបំណុលនៅពេលមានរឿងដែលមិននឹកស្មានដល់។

ដោយចៀសវាងទម្លាប់ទាំង ៣ ខាងលើនេះ អ្នកនឹងអាចគ្រប់គ្រងហិរញ្ញវត្ថុរបស់អ្នកបានយ៉ាងល្អ និងការពារខ្លួនពីការធ្លាក់ក្នុងវិបត្តិបំណុល។