ជំនាញទំនាក់ទំនងមិនមែនគ្រាន់តែជាការនិយាយនោះទេ តែជាការយល់ដឹង និងការភ្ជាប់ទំនាក់ទំនងជាមួយអ្នកដទៃ។ ការអនុវត្តសកម្មភាពទាំង ៤ នេះជាប្រចាំនឹងជួយបង្កើនប្រសិទ្ធភាពនៃការទំនាក់ទំនងរបស់អ្នក ទាំងក្នុងជីវិតផ្ទាល់ខ្លួន និងក្នុងអាជីពការងារ។ល។
១. អនុវត្តការស្ដាប់ដោយយកចិត្តទុកដាក់
នេះគឺជាចំណុចស្នូលនៃទំនាក់ទំនងដ៏មានប្រសិទ្ធភាព។ ការស្តាប់មិនមែនគ្រាន់តែជាការរង់ចាំដល់វេននិយាយនោះទេ តែជាការផ្តោតអារម្មណ៍ទាំងស្រុងលើអ្វីដែលអ្នកដទៃកំពុងនិយាយ។ នៅពេលអ្នកដទៃនិយាយ សូមកុំរំខានពួកគេ អ្នកអាចងក់ក្បាល ឬឆ្លើយខ្លីៗ (ដូចជា “បាទ/ចាស” ឬ “ខ្ញុំយល់”) ដើម្បីបង្ហាញថាអ្នកកំពុងស្តាប់។ បន្ទាប់មក និយាយត្រឡប់នូវចំណុចសំខាន់ៗដែលពួកគេបានលើកឡើង ដើម្បីបញ្ជាក់ពីការយល់ដឹង។
២. គ្រប់គ្រងភាសាកាយវិការ
កាយវិការរបស់អ្នកអាចនិយាយបានច្រើនជាងពាក្យសម្ដី។ ភាសាកាយវិការវិជ្ជមានអាចកសាងទំនុកចិត្តនិងបង្កើតបរិយាកាសបើកចំហ។ នៅពេលកំពុងសន្ទនាអ្នកគួររក្សាទំនាក់ទំនងភ្នែកដែលសមរម្យ។ ជៀសវាងការឱបដៃ (ដែលបង្ហាញពីការមិនមានទំនុកចិត្ត) ។ល។
៣. និយាយឲ្យបានច្បាស់លាស់ និងមានគោលបំណង
ត្រូវដឹងច្បាស់ពីគោលបំណងនៃការសន្ទនារបស់អ្នក។ ព្រោះថាការនិយាយវែងអន្លាយដោយគ្មានទិសដៅ អាចធ្វើឲ្យអ្នកស្តាប់បាត់បង់ការផ្តោតអារម្មណ៍ និងធុញទ្រាន់។ ដូចនេះមុននឹងចាប់ផ្តើមការសន្ទនាសំខាន់ៗ សូមរៀបចំចំណុចសំខាន់ៗរបស់អ្នកឲ្យបានច្បាស់ និងប្រើពាក្យសាមញ្ញៗដែលងាយយល់ ហើយជៀសវាងពាក្យពេចន៍ដែលស្មុគស្មាញពេក។
៤. សួរសំណួរបើកចំហរ
សំណួរល្អៗអាចជំរុញឲ្យការសន្ទនាមានលក្ខណៈស៊ីជម្រៅ និងបង្ហាញពីការចាប់អារម្មណ៍ពិតប្រាកដរបស់អ្នក។ ជំនួសឲ្យសំណួរដែលឆ្លើយថា “បាទ/ចាស” ត្រូវសួរសំណួរដែលតម្រូវឲ្យមានការពន្យល់។ ឧទាហរណ៍៖ ជំនួស “តើអ្នកពេញចិត្តទេ?” ដោយ “តើមានអ្វីដែលអ្នកគិតថាអាចធ្វើបានល្អជាងនេះ?” ឬ “តើអ្នកមានអារម្មណ៍យ៉ាងណា?”
សរុបមក ការអនុវត្តសកម្មភាពទាំង ៤ នេះជាប់លាប់ នឹងជួយឲ្យអ្នកក្លាយជាអ្នកទំនាក់ទំនងដែលមានប្រសិទ្ធភាព ដែលអាចកសាងទំនាក់ទំនងល្អមួយ។
