ការវិនិយោគគឺជាវិធីដ៏មានប្រសិទ្ធភាពមួយដើម្បីបង្កើនទ្រព្យសម្បត្តិ ប៉ុន្តែវាក៏មានហានិភ័យផងដែរ។ ដើម្បីជៀសវាងការខាតបង់ និងធ្វើការសម្រេចចិត្តបានត្រឹមត្រូវ អ្នកគួរយល់ដឹងពីចំណុចសំខាន់ៗទាំង ៥ នេះ មុននឹងចាប់ផ្តើមវិនិយោគលើអ្វីមួយ។
១. កំណត់គោលដៅវិនិយោគរបស់អ្នក
មុននឹងវិនិយោគ អ្នកត្រូវដឹងច្បាស់ថា អ្នកចង់វិនិយោគដើម្បីអ្វី។ តើអ្នកចង់សន្សំលុយសម្រាប់ចូលនិវត្តន៍ ទិញផ្ទះ ឬសម្រាប់ថ្លៃសិក្សារបស់កូន? គោលដៅរបស់អ្នកនឹងកំណត់ប្រភេទនៃការវិនិយោគដែលសាកសមសម្រាប់អ្នក។
២. យល់ដឹងពីហានិភ័យ
រាល់ការវិនិយោគទាំងអស់សុទ្ធតែមានហានិភ័យ។ អ្នកត្រូវយល់ឲ្យបានច្បាស់ពីក្រុមហ៊ុនដែលអ្នកចង់វិនិយោគ ហើយកុំវិនិយោគលើអ្វីដែលអ្នកមិនទាន់យល់ច្បាស់។ ថែមពីនេះត្រូវដឹងថាតើអ្នកអាចទទួលយកហានិភ័យបានកម្រិតណានៅក្នុងក្រុមហ៊ុនដែលអ្នកចង់វិនិយោគនោះ។
៣. កុំដាក់លុយទាំងអស់ក្នុងភាគហ៊ុនតែមួយតែមួយ
នេះគឺជាគោលការណ៍ដ៏សំខាន់នៃការវិនិយោគ។ ការបែងចែកលុយវិនិយោគទៅលើប្រភេទទ្រព្យសម្បត្តិផ្សេងៗគ្នា (ដូចជាភាគហ៊ុន អចលនទ្រព្យ ឬមាស) អាចជួយកាត់បន្ថយហានិភ័យបាន។ បើការវិនិយោគមួយមិនជោគជ័យ អ្នកនៅតែមានការវិនិយោគផ្សេងទៀតដែលនៅរឹងមាំ។
៤. ត្រៀមខ្លួនសម្រាប់រយៈពេលវែង
ការវិនិយោគមិនមែនជាការរកលុយបានឆាប់រហ័សនោះទេ។ ការវិនិយោគដែលមានផលចំណេញខ្ពស់ជាទូទៅតម្រូវឲ្យមានការអត់ធ្មត់នឹងពេលវេលា។ អ្នកគួរតែមានផ្នត់គំនិតរយៈពេលវែង ហើយមិនធ្វើការសម្រេចចិត្តដោយអារម្មណ៍នៅពេលដែលឃើញតម្លៃទីផ្សារឡើងចុះនោះទេ។
៥. ត្រួតពិនិត្យ និងវាយតម្លៃជាប្រចាំ
ការវិនិយោគមិនមែនជាការទិញហើយទុកចោលនោះទេ។ អ្នកត្រូវចំណាយពេលដើម្បីត្រួតពិនិត្យមើលការវិនិយោគរបស់អ្នកជាប្រចាំ។ ត្រូវប្រាកដថាការវិនិយោគរបស់អ្នកនៅតែស្របទៅតាមគោលដៅរបស់អ្នក ហើយកែសម្រួលផែនការនៅពេលចាំបាច់។
សរុបមក ការវិនិយោគគឺជាដំណើរដ៏វែងឆ្ងាយដែលទាមទារចំណេះដឹង វិន័យ និងការអត់ធ្មត់។ ការអនុវត្តតាមគន្លឹះទាំងនេះនឹងជួយអ្នកធ្វើការសម្រេចចិត្តបានត្រឹមត្រូវ និងកសាងទ្រព្យសម្បត្តិរបស់អ្នកបានដោយជោគជ័យ។
