១. មិនបានសិក្សាទីផ្សារច្បាស់លាស់
កំហុសធំបំផុតមួយដែលម្ចាស់អាជីវកម្មថ្មីមួយចំនួនតែងតែប្រព្រឹត្ត គឺការចាប់ផ្តើមអាជីវកម្មដោយមិនបានសិក្សាស្រាវជ្រាវទីផ្សារឲ្យបានច្បាស់លាស់។ ពួកគេជឿថាផលិតផល ឬសេវាកម្មរបស់ពួកគេនឹងទទួលបានជោគជ័យ ដោយមិនបានគិតគូរថាតើមានតម្រូវការពិតប្រាកដពីអតិថិជនដែរឬទេ។
២. កង្វះខាតការគ្រប់គ្រងផ្នែកហិរញ្ញវត្ថុ
លុយកាក់គឺជាផ្នែកមួយដ៏សំខាន់នៅក្នុងអាជីវកម្ម។ ការគ្រប់គ្រងហិរញ្ញវត្ថុមិនបានល្អ អាចបណ្តាលឲ្យអាជីវកម្មរបស់អ្នកដួលរលំបានយ៉ាងងាយស្រួល ទោះបីជាអ្នកមានផលិតផលល្អយ៉ាងណាក៏ដោយ។ ម្ចាស់អាជីវកម្មថ្មីជាច្រើនតែងតែមិនបានរៀបចំផែនការថវិកាឲ្យបានច្បាស់លាស់ មិនបានតាមដានលំហូរសាច់ប្រាក់ ឬប្រើប្រាស់លុយផ្ទាល់ខ្លួនលាយឡំជាមួយលុយអាជីវកម្មជាដើម។
៣. ខ្លាចក្នុងការសុំជំនួយ ឬរៀនសូត្រ
មនុស្សមួយចំនួនគិតថាការចាប់ផ្តើមអាជីវកម្មគឺជារឿងដែលត្រូវធ្វើតែម្នាក់ឯង។ ពួកគេខ្លាចក្នុងការសុំយោបល់ ឬជំនួយពីអ្នកដទៃ ដែលធ្វើឲ្យពួកគេខាតបង់ពេលវេលា និងធនធាន នៅពេលដែលគេបើកអាជីវកម្មទាំងមិនបានស្វែងយល់ឱ្យសុីជម្រៅអំពីវា។
៤. មិនមានផែនការអាជីវកម្មច្បាស់លាស់
ការចាប់ផ្តើមអាជីវកម្មដោយគ្មានផែនការអាជីវកម្ម គឺដូចជាការធ្វើដំណើរដោយគ្មានផែនទីដូច្នោះដែរ។ អ្នកនឹងមិនដឹងថាត្រូវទៅទីណា ឬធ្វើយ៉ាងណាដើម្បីទៅដល់គោលដៅរបស់អ្នកឡើយ។ យ៉ាងណាមិញ ផែនការអាជីវកម្មមិនត្រឹមតែជួយអ្នកកំណត់ទិសដៅប៉ុណ្ណោះទេ ថែមទាំងជួយអ្នកឲ្យមើលឃើញពីបញ្ហាប្រឈម និងឱកាសទៀតផង។
៥. ខ្លាចបរាជ័យ និងមិនព្រមរៀនពីកំហុស
ការបរាជ័យគឺជាផ្នែកមួយដែលមិនអាចកាត់ផ្តាច់បានពីដំណើរការអាជីវកម្ម។ ម្ចាស់អាជីវកម្មមួយចំនួយខ្លាចបរាជ័យ រហូតដល់មិនហ៊ានចាប់ផ្តើម ឬនៅពេលបរាជ័យ ពួកគេក៏បោះបង់ចោលភ្លាមៗ។
ជារួមការចាប់ផ្តើមអាជីវកម្មមួយទាមទារនូវការប្តេជ្ញាចិត្ត ភាពវៃឆ្លាត និងការត្រៀមខ្លួនជានិច្ចដើម្បីរៀនសូត្រពីកំហុសឆ្គង។ សូមចងចាំថា ភាពបរាជ័យមិនមែនជាទីបញ្ចប់នោះទេ ប៉ុន្តែជាជំហានមួយឆ្ពោះទៅរកភាពជោគជ័យ។ តើអ្នកត្រៀមខ្លួនដើម្បីចាប់ផ្តើមដំណើរអាជីវកម្មរបស់អ្នកហើយឬនៅ?
