៧ មេរៀនពីមហាសេដ្ឋី ដើម្បីកសាងទ្រព្យសម្បត្តិ និងអាជីវកម្ម

ភាពជោគជ័យមិនអាស្រ័យលើចំនួនម៉ោងដែលអ្នកធ្វើការនោះទេ ប៉ុន្តែវាអាស្រ័យលើការរៀនសូត្រពីគោលការណ៍ និងអាថ៌កំបាំងរបស់បុគ្គលដែលជោគជ័យមុនយើង។ ខាងក្រោមនេះ ជាមេរៀនចំនួន ៧ ចេញពីមហាសេដ្ឋី ៧ នាក់ផ្សេងៗគ្នា ដែលជួយឱ្យគាត់កសាងទ្រព្យសម្បត្តិ និងអាជីវកម្មដែលដំណើរការដោយខ្លួនឯងបាន៖

១.ខ្លួនអ្នកគឺជា “អាជីវកម្ម” (រៀនពី Jay-Z)៖ ចូរចាត់ទុកខ្លួនឯងជាទ្រព្យសម្បត្តិដែលមានតម្លៃបំផុត។ កុំលាក់ខ្លួននៅពីក្រោយឈ្មោះក្រុមហ៊ុន តែត្រូវហ៊ានបង្ហាញមុខមាត់ និងរឿងរ៉ាវពិតរបស់អ្នកទៅកាន់ពិភពលោក។ ចងចាំថា អតិថិជនជឿជាក់ និងចង់ធ្វើការជាមួយ “មនុស្ស” ច្រើនជាង “ម៉ាកយីហោ”។

២. កំណត់ស្តង់ដារខ្ពស់បំផុត (រៀនពី Steve Jobs)៖ គាត់ជឿជាក់លើភាពល្អឥតខ្ចោះ និងភាពសាមញ្ញ ដោយគាត់មិនត្រូវសម្របសម្រួលជាមួយលទ្ធផលដែល “គ្រាន់តែអាចទទួលយកបាន” នោះឡើយ។ មេរៀនគឺថា ប្រសិនបើអ្នកចង់ជោគជ័យ អ្នកមិនត្រូវទទួលយកស្តង់ដារទាប ឬភាពមធ្យមនៅក្នុងការងារ និងក្រុមការងាររបស់អ្នកទេ។

៣. បង្កើតពិភពលោកផ្ទាល់ខ្លួន (រៀនពី George Lucas)៖ មុនពេលបញ្ចេញរឿង Star Wars វគ្គ១ George Lucas បានសរសេរត្រៀមសម្រាប់ ៣ វគ្គរួចទៅហើយ។ គាត់ហ៊ានគិតធំ និងបង្កើតពិភពលោកក្នុងក្តីស្រមៃ ទោះបីជាបច្ចេកវិទ្យានៅពេលនោះមិនទាន់អាចធ្វើបានក៏ដោយ (គាត់បង្កើតក្រុមហ៊ុនធ្វើ Special effect ខ្លួនឯង)។ មេរៀនគឺត្រូវមានចក្ខុវិស័យឱ្យធំជាងអ្វីដែលអ្នកគិតថាអាចទៅរួច ១០ ដង។

៤. ជឿជាក់លើខ្លួនឯង ខ្លាំងជាងស្ដាប់គេឯង (រៀនពី Bernard Arnault)៖ នៅពេល Bernard Arnault ទិញយកក្រុមហ៊ុនមេឈ្មោះរបស់ Dior គេគ្រប់គ្នាគិតថាគាត់ឆ្កួត ព្រោះវាជាម៉ាកដែលជិតដួលរលំ។ ប៉ុន្តែគាត់មានចក្ខុវិស័យវែងឆ្ងាយ ៥០ ឆ្នាំទៅមុខ។ នេះបានបង្ហាញថា ក្នុងដំណាក់កាលដំបូងនៃអាជីវកម្ម អ្នកមិនចាំបាច់ឱ្យមនុស្សគ្រប់គ្នាយល់ស្របនឹងអ្នកទេ សំខាន់គឺអ្នកត្រូវមានជំនឿជាក់លើចក្ខុវិស័យដែលអ្នកមើលឃើញ។

៥. លុបចោលមុននឹងកែសម្រួល (រៀនពី Elon Musk)៖ កុំចំណាយពេលកែលម្អការងារដែលមិនចាំបាច់។ រូបមន្តរបស់ Elon Musk គឺត្រូវ «លុបចោល» រាល់កិច្ចការណាដែលមិនផ្ដល់តម្លៃពិតប្រាកដចោលសិន មុននឹងគិតដល់ការកែសម្រួល ឬផ្ទេរឱ្យអ្នកដទៃធ្វើ។ ការកាត់បន្ថយភាពស្មុគស្មាញ គឺជាគន្លឹះដែលធ្វើឱ្យអ្នកដើរទៅមុខបានលឿនបំផុត។

៦. ភាពមិនដឹង ជាអាវុធដ៏មុតស្រួច (រៀនពី Sara Blakely)៖ ជាស្ថាបនិក Spanx គឺអ្នកស្រី Sara Blakely មិនមានចំណេះដឹងខាងសម្លៀកបំពាក់ ឬធុរកិច្ចអ្វីទេ ប៉ុន្តែភាព “មិនចេះ” នេះហើយជាគុណសម្បត្តិ។ ការចាប់ផ្ដើមដោយ “ចិត្តគំនិតអ្នកថ្មី” អនុញ្ញាតឱ្យអ្នកហ៊ានសួរ និងហ៊ានរកដំណោះស្រាយថ្មីៗដែលអ្នកជំនាញចំណាស់ៗមិនដែលហ៊ានធ្វើ។ ភាពល្ងង់ខ្លៅចំពោះឧបសគ្គ ជួនកាលគឺជាកម្លាំងរុញច្រានឱ្យអ្នកបង្កើតអាណាចក្រដ៏អស្ចារ្យបាន។

៧. ចក្ខុវិស័យមកមុន ផែនការតាមក្រោយ (រៀនពី Walt Disney)៖ មុននឹងសង់ Disneyland លោក Walt Disney ចាប់ផ្ដើមពី “រូបគំនូរ” នៃក្ដីស្រមៃ មិនមែនប្លង់បច្ចេកទេសឡើយ។ មេរៀនគឺ៖ ចូរគូររូបភាពនៃភាពជោគជ័យរបស់អ្នកក្នុងរយៈពេល ២០ ឆ្នាំខាងមុខឱ្យបានច្បាស់សិន រួចសឹមស្វែងរកមនុស្ស និងបង្កើតប្រព័ន្ធការងារដើម្បីសម្រេចរូបភាពនោះ។ កុំទាន់រវល់នឹងវិធីធ្វើ បើគោលដៅមិនទាន់ច្បាស់លាស់។

ជារួម ភាពជោគជ័យមិនមែនស្ថិតលើការសម្រុកធ្វើការងារច្រើនម៉ោងឡើយ ប៉ុន្តែវាបានមកពីការមានចក្ខុវិស័យច្បាស់លាស់ ជំនឿជាក់លើខ្លួនឯង និងការហ៊ានធ្វើអ្វីដែលថ្មីប្លែកពីគេ។ ចូរឈប់ធ្វើការតាមទម្លាប់ចាស់ ហើយងាកមកកសាងតម្លៃខ្លួនឯង និងលុបចោលរឿងមិនចាំបាច់ ដើម្បីប្រែក្លាយក្ដីស្រមៃធំធេងឱ្យក្លាយជាការពិត។