ការអានសៀវភៅជួយអ្នកឱ្យយល់អំពីទស្សនៈផ្សេងៗគ្នាដោយបង្ហាញអ្នកនូវគំនិត បទពិសោធន៍ និងទស្សនៈជាច្រើនដែលអ្នកប្រហែលជាមិនធ្លាប់បានជួបប្រទះក្នុងជីវិតប្រចាំថ្ងៃរបស់អ្នកនោះទេ។ មិនថាវាជារឿងប្រឌិត មិនប្រឌិត អំពីទស្សនៈ ពទពិសោធន៍ ឬកំណាព្យនោះទេ សៀវភៅនឹងធ្វើឱ្យអ្នកយល់ដឹងបន្ថែមពី ពីបទពិសោធន៍ដែលអ្នកជោគជ័យបានឆ្លងកាត់ ទស្សនៈ គំនិត វប្បធម៌ ប្រវត្តិ និងស្ថានភាពផ្សេងៗគ្នា ដើម្បីជួយពង្រីកទស្សនៈរបស់អ្នកឱ្យមានការយល់ដឹងបានកាន់តែច្រើននូវអ្វីដែលអ្នកមិនធ្លាប់បានដឹង។
ជាឧទាហរណ៍ នៅក្នុងរឿងប្រលោមលោក រឿងប្រលោមលោកច្រើនតែស្វែងយល់ពីភាពស្មុគស្មាញនៃអារម្មណ៍ និងទំនាក់ទំនងរបស់មនុស្ស។ តួអង្គអាចប្រឈមមុខនឹងបញ្ហាដែលមិនធ្លាប់បានឆ្លងកាត់ ហើយនៅពេលអ្នកអានទៅតាមដំណើររបស់ពួកគេ អ្នកចាប់ផ្តើមយល់ពីរបៀបដែលមនុស្សនៅក្នុងកាលៈទេសៈ ការគិត មានអារម្មណ៍ និងប្រតិកម្មផ្សេងៗគ្នា។ នេះអាចធ្វើឱ្យអ្នកយល់ពីការគិតរបស់មនុស្សម្នាក់ៗកាន់តែស៊ីជម្រៅ និងបង្រៀនអ្នកឱ្យដឹងពីភាពចម្រុះនៃបទពិសោធន៍របស់មនុស្សម្នាក់ៗ។ ជានេះទៅទៀតការអានសៀវភៅដូចជារបស់បរទេស ដោយមានប្រទេសផ្សេងៗ ឬសម័យកាលនៃប្រវត្តិសាស្ត្របានអនុញ្ញាតឱ្យអ្នកស្វែងយល់អំពីវប្បធម៌ និងសង្គមដែលអាចមានភាពខុសប្លែកពីការរស់នៅរបស់អ្នកផ្ទាល់ ដូចជាបរិបទនៃការរស់នៅខុសៗប្លែកពីគ្នាទៅតាមប្រទេសតំបន់ ការគិតខុសៗពីគ្នា ដោយជួយអ្នកឱ្យមើលឃើញពីទស្សនៈផ្សេងៗគ្នាជាច្រើន។
លើសពីនេះ ការអានជួយអ្នកអាចរៀនពីគំនិត និងទស្សនៈល្អៗរបស់អ្នកប្រាជ្ញដែលមានចំណេះដឹងជ្រៅជ្រះ នោះអ្នកនឹងកើននូវការយល់ដឹងជាមួយនឹងទស្សនៈនៃការគិតបានវែងឆ្ងាយ។ មិនតែប៉ុណ្ណោះអ្នកអាចមានការគិតរបស់អ្នកកាន់តែទូលំទូលាយជាងមុន និងអាចស្វែងយល់ពីការគិតរបស់អ្នកដទៃបានឆាប់រហ័សទៀតផង។
សរុបមក ការអានសៀវភៅបានជួយឱ្យអ្នកមានឱកាសក្នុងស្វែងយល់ពីទស្សនៈផ្សេងៗពីគ្នា ជំរុញការគិត ការយល់ដឹង និងមានគំនិតជាច្រើនក្នុងការដោះស្រាយរាល់នូវបញ្ហាដែលកើតមានឡើង ។
