ឃ្មុំគឺជាប្រភេទសត្វល្អិតដ៏អស្ចារ្យ ហើយមានប្រហែល ២ម៉ឺនប្រភេទផ្សេងៗគ្នានៅក្នុងពិភពលោកយើងនេះ។ ពពួកសត្វល្អិតនេះ មិនត្រឹមតែជួយឲ្យរុក្ខជាតិជាច្រើនមានការលូតលាស់បានល្អនោះទេ ប៉ុន្តែវាថែមទាំងបានផ្តល់នូវទឹកឃ្មុំ ដែលជាអាហារដ៏ពិសេសសម្រាប់យើងទៀតផង។ ទឹកឃ្មុំ មិនត្រឹមតែមានរសជាតិផ្អែមឆ្ងាញ់ប៉ុណ្ណោះទេ វាក៏ជាអាហារមួយប្រភេទដែលផ្តល់នូវគុណប្រយោជន៍ជាច្រើនដល់សុខភាព និងជួយព្យាបាលជម្ងឺបានជាច្រើន។ ចុះប្រសិនបើសត្វឃ្មុំផុតពូជនៅលើផែនដីយើងនេះ តើអាចនឹងមានអ្វីកើតឡើង?
មានមនុស្សជាច្រើនមិនសូវចាប់អារម្មណ៍ពីបញ្ហានេះទេ ដោយសារតែគេគិតថា សត្វឃ្មុំគ្រាន់តែសត្វល្អិតតូចតាចប៉ុណ្ណោះ ដែលវានឹងមិនអាចផ្តល់ផលប៉ះពាល់អ្វីធ្ងន់ធ្ងរដល់ពិភពលោកយើងនេះ។ ប៉ុន្តែបើយោងតាមទ្រឹស្តីមួយរបស់អ្នកវិទ្យាសាស្ត្ររូបវិទ្យាដ៏ល្បីល្បាញ លោកអាល់បឺតអាញស្តាញបានលើកឡើងថា “ការថយចុះចំនួនសត្វឃ្មុំ ធ្វើឲ្យបរិមាណស្បៀងអាហារពិភពលោកថយចុះ ហើយប្រសិនសត្វឃ្មុំនៅក្នុងពិភពលោកផុតពូជវិញនោះ មនុស្សលោកយើងក៏បាត់បង់វត្តមាននៅលើផែនដីនេះក្នុងរយៈពេលតែ៤ឆ្នាំប៉ុណ្ណោះ”។ ទ្រឹស្តីនេះស្តាប់ទៅគឺគួរឲ្យខ្លាច ប៉ុន្តែវាពិតជាងាយស្រួលក្នុងការបកស្រាយទ្រឹស្តីនេះ ព្រោះថា ១/៣ នៃអាហារទាំងអស់ដែលយើងបរិភោគរាល់ថ្ងៃគឺពឹងផ្អែកសត្វឃ្មុំដើម្បីទទួលបានកសិផល។ សត្វឃ្មុំគឺជាភ្នាក់យ៉ាងសំខាន់ដែលមិនខ្វះបាន ព្រោះថាវាជាអ្នកស្រូបយកលំអង និងទឹកដមផ្កាហើយធ្វើដំណើរពីដើមរុក្ខជាតិមួយទៅដើមរុក្ខជាតិមួយទៀត ដែលសកម្មភាពនេះធ្វើឲ្យរុក្ខជាតិនីមួយៗមានការរីកលូតលាស់ល្អ និងទទួលបានផ្លែផ្កាច្រើន។ តាមការវិវត្តន៍ពេលវេលា វាអាចនឹងមានសត្វល្អិតដ៏ទៃទៀតមកជំនួសតួរនាទីសត្វឃ្មុំ ដើម្បីបំពេញចន្លោះកង្វះខាតនៃប្រព័ន្ធអេកូឡូស៊ី ប្រសិនបើសត្វឃ្មុំផុតពូជ។ ប៉ុន្តែក្នុងរយៈពេលខ្លី យើងអាចសន្និដ្ខានបានថាឧស្សាហកម្មអាហារជាច្រើននឹងត្រូវដួលរលំ និងកង្វះស្បៀងអាហារពិភពលោកនឹងកើតមានឡើង។ បើទោះបីបញ្ហានេះអាចនឹងមិនធ្វើឲ្យមនុស្សជាតិផុតពូជក៏ដោយ ប៉ុន្តែយ៉ាងហោចណាស់ យើងនឹងគេចមិនផុតពីឱនភាពសេដ្ឋកិច្ច និង គ្រោះទុរ្ភិក្សនោះទេ។
បើយោងតាមសារព័ត៌មាននានានៅក្នុងពិភពលោក ស្ទើរគ្រប់ទីកន្លែងទាំងអស់ ចំនួនសត្វឃ្មុំកំពុងតែថយចុះយ៉ាងខ្លាំង ហើយនៅកន្លែងខ្លះ សត្វឃ្មុំបានផុតពូជទៅហើយ។ ទីកន្លែងដែលសត្វឃ្មុំផុតពូជ គេបាននាំចូលសត្វឃ្មុំពីតំបន់ដ៏ទៃទៀតដើម្បីទ្រទ្រង់វិស័យកសិកម្ម។ មូលហេតុមួយចំនួនដែលធ្វើឲ្យចំនួនសត្វឃ្មុំថយចុះនិងផុតពូជមានដូចជា ការផ្លាស់ប្តូរអាកាសធាតុ កំណើនសីតុណ្ហភាពផែនដី ការប្រើប្រាស់ថ្នាំគីមីក្នុងដំណាំកសិកម្មជាដើម។
ឯកសារយោង៖
Sciencefocus.com/qa/if-bees-became-extinct-what-effect-would-have-mandkind
Whatwhouldhappencenter.com/what-would-happen-if-bees-went-extinct
Think-differently-about-sheep.com/Bee Facts.htm
Scienceray.com/biology/if-the-bees-go-extinct-the-human-population-will-go-extinct-in-four-years
