ឥឡូវនេះគឺជាពេលវេលាដ៏ល្អឥតខ្ចោះបំផុតដើម្បីរៀបចំផែនការសម្រាប់ឆ្នាំ ២០២៦។ យើងគួររៀបផែនការសម្រាប់ឆ្នាំក្រោយឱ្យហើយ ពីព្រោះថាបើអ្នកចូលឆ្នាំថ្មីដោយគ្មានផែនការហិរញ្ញវត្ថុ គឺដូចជាការចេញដំណើរដោយគ្មានផែនទី។ ខាងក្រោមនេះជា ៥ ជំហានជាក់ស្តែងដើម្បីរៀបចំផែនការហិរញ្ញវត្ថុឲ្យមានប្រសិទ្ធភាពសម្រាប់ឆ្នាំក្រោយ៖
១. ងាកមកមើលហិរញ្ញវត្ថុឆ្នាំចាស់ (Review 2025)
មុននឹងទៅមុខ អ្នកត្រូវដឹងថាអ្នកនៅកន្លែងណា។ ដូចនេះអ្នកត្រូវពិនិត្យមើលរបាយការណ៍ធនាគារ ឬការកត់ត្រារបស់អ្នកក្នុងឆ្នាំ ២០២៥។ សួរខ្លួនឯងថា៖ តើខ្ញុំចំណាយលើសលើរឿងអ្វីខ្លះ? តើខ្ញុំសន្សំបានតាមផែនការទេ? កំហុសឆ្នាំចាស់ គឺជាមេរៀនសម្រាប់ឆ្នាំថ្មី។
២. កំណត់គោលដៅហិរញ្ញវត្ថុថ្មី (Set New Goals)
កុំគ្រាន់តែនិយាយថា “ចង់សល់លុយ”។ ត្រូវកំណត់ឲ្យច្បាស់លាស់ដោយកំណត់គោលដៅធំៗចំនួន ៣ សម្រាប់ឆ្នាំ ២០២៦។ ឧទាហរណ៍៖ “សន្សំឲ្យបាន $៥,០០០”, “បង់ផ្តាច់បំណុលធនាគារ” ឬ “ចាប់ផ្តើមវិនិយោគលើផ្សារហ៊ុន”។ល។
៣. បង្កើតថវិកាប្រចាំខែថ្មី
ថវិកាឆ្នាំមុនអាចនឹងលែងមានប្រសិទ្ធភាព ប្រសិនបើចំណូល ឬការចំណាយរបស់អ្នកបានផ្លាស់ប្តូរ។ ដូចនេះអ្នកគួរប្រើរូបមន្ត ៥០/៣០/២០ (៥០% ចំណាយចាំបាច់, ៣០% ចំណាយតាមចិត្ត, ២០% សន្សំ/វិនិយោគ) ដើម្បីឱ្យដឹងថាលុយរបស់អ្នកចំណាយចំទិសដៅ។
៤. ផ្តល់អាទិភាពលើ “មូលនិធិសង្គ្រោះបន្ទាន់”
ប្រសិនបើឆ្នាំនេះអ្នកមានបញ្ហាលុយកាក់នៅពេលមានវិបត្តិ ឆ្នាំក្រោយត្រូវតែខុសគ្នា។ អ្នកត្រូវដាក់គោលដៅសន្សំឲ្យមូលនិធិទាំងនោះអាចចំណាយបានរយៈពេល ៣ ទៅ ៦ ខែក្នុងករណីដែលអ្នកមានអាសន្ន។ ធ្វើវាជាអាទិភាពទីមួយ មុននឹងគិតរឿងវិនិយោគ ឬទិញរបស់របរធំៗ។
ជារួម ការចំណាយពេល ១ ម៉ោងនៅថ្ងៃនេះដើម្បីរៀបចំផែនការ អាចជួយសង្គ្រោះអ្នកពីភាពតានតឹងរាប់រយម៉ោងនៅឆ្នាំក្រោយ។ ផែនការហិរញ្ញវត្ថុមិនមែនដើម្បីដាក់កម្រិតអ្នកទេ តែដើម្បីផ្តល់ សេរីភាព ឲ្យអ្នកប្រើប្រាស់លុយទៅលើអ្វីដែលសំខាន់បំផុតសម្រាប់ជីវិតរបស់អ្នក។
