មនុស្សភាគច្រើនចំណាយពេលពេញមួយជីវិត ដើម្បីរត់ដេញតាមស្រមោលនៃសេចក្តីសុខដែលអ្នកដទៃជាអ្នកគូសវាសឱ្យ។ ប៉ុន្តែ ការពិតដ៏គួរឱ្យភ្ញាក់ផ្អើលនោះគឺ សន្តិភាពផ្លូវចិត្ត មិនមែនកើតចេញពីការទទួលបានការសរសើរពីអ្នកខាងក្រៅនោះទេ តែវាផ្តើមចេញពីការហ៊ានធ្វើជាខ្លួនឯង និងការរស់នៅដោយគ្មានសម្ពាធនៃពាក្យសម្តីអ្នកដទៃ។ ខាងក្រោមនេះគឺជាគន្លឹះ ៥ យ៉ាងដើម្បីជួយឱ្យអ្នករកឃើញពន្លឺនៃជីវិតថ្មី៖
១. បញ្ឈប់ការរស់នៅដើម្បីផ្គាប់ចិត្តអ្នកដទៃ៖ ការដេញតាមការយល់ព្រមពីអ្នកដទៃ គឺជាការបោះបង់សេរីភាពខ្លួនឯង។ សេរីភាពពិតប្រាកដមិនមែនស្ថិតលើការធ្វើឱ្យគ្រប់គ្នាស្រឡាញ់យើងនោះទេ ប៉ុន្តែវាគឺជា «ការហ៊ានឱ្យគេមិនចូលចិត្ត» ដើម្បីរស់នៅជាខ្លួនឯងយ៉ាងពិតប្រាកដ។
២. អតីតកាលមិនកំណត់ជោគវាសនារបស់អ្នកទេ៖ ភាពឈឺចាប់ពីអតីតកាល មិនមែនជាមូលហេតុដែលកំណត់ពីភាពបរាជ័យរបស់អ្នកនៅថ្ងៃនេះទេ។ ផ្ទុយទៅវិញ អ្នកគឺជាអ្នកជ្រើសរើសថាតើត្រូវយកបទពិសោធន៍ទាំងនោះមកធ្វើជាលេសដើម្បីបន្តការឈឺចាប់ ឬយកវាជាមេរៀនដើម្បីឆ្ពោះទៅរកគោលដៅថ្មីប្រកបដោយក្តីសុខ។
៣. ជីវិតមិនមែនជាការប្រកួតប្រជែងឡើយ៖ ការស្វែងរកការទទួលស្គាល់ពីអ្នកដទៃ នឹងធ្វើឱ្យអ្នកមើលឃើញមនុស្សជុំវិញខ្លួនជាគូប្រជែង។ តែនៅពេលអ្នកឈប់ប្រកួតប្រជែង ហើយឈប់ចាត់ទុកជោគជ័យរបស់អ្នកដទៃថាជាការគំរាមកំហែងដល់អ្នក នោះអ្នកនឹងអាចកសាងទំនាក់ទំនងដ៏ល្អជាមួយសង្គម និងមានសន្តិភាពផ្លូវចិត្ត។
៤. ស្វែងរកក្តីសុខតាមរយៈការផ្តល់តម្លៃដល់អ្នកដទៃ៖ មនុស្សដែលមានក្តីសុខពិតប្រាកដ ផ្តោតលើការជួយឬផ្តល់ប្រយោជន៍ដល់អ្នកដទៃ ដោយមិនទាមទារការសរសើរឬការតបស្នងមកវិញឡើយ។ គ្រាន់តែដឹងថាខ្លួនឯងមានប្រយោជន៍ចំពោះនរណាម្នាក់ ឬសង្គមជាតិ វាគ្រប់គ្រាន់ក្នុងការបង្កើតសេចក្តីសុខដ៏ជ្រាលជ្រៅសម្រាប់ខ្លួនឯងហើយ។
៥. រស់នៅក្នុងពេលបច្ចុប្បន្ន និងឱ្យតម្លៃខ្លួនឯង៖ អ្នកមិនចាំបាច់ត្រូវមានសមិទ្ធផលធំដុំទើបអាចមានក្តីសុខនោះទេ។ អ្នកអាចមានក្តីសុខនៅពេលនេះ វិនាទីនេះ ដោយគ្រាន់តែដឹងថា វត្តមានរបស់អ្នកនៅលើលោកនេះមានតម្លៃ និងអាចផ្តល់ស្នាមញញឹមដល់អ្នកដទៃ។ ចូររីករាយនឹងដំណើរជីវិតប្រចាំថ្ងៃ ជាជាងខ្វល់តែពីរង្វាន់នៅគោលដៅចុងក្រោយ។
សរុបមក មិនថាអ្នកល្អប៉ុណ្ណា ក៏នៅតែមានអ្នកមិនចូលចិត្តអ្នកដែរ។ ដូច្នេះ គន្លឹះនៃសេចក្ដីសុខពិតប្រាកដគឺ “ភាពក្លាហានក្នុងការព្រមឱ្យគេស្អប់”។ ចូរឈប់រស់នៅដើម្បីរង់ចាំតែការទះដៃពីអ្នកដទៃ ហើយងាកមកផ្ដោតលើការរស់នៅក្នុងជីវិតដែលមានន័យ និងជាខ្លួនឯងដែលអ្នកពេញចិត្តវិញ។
