សមត្ថភាពក្នុងការសម្របខ្លួនទៅនឹងបរិយាកាសថ្មីពិតណាស់ថាវាមិនងាយស្រួសនោះទេ ប៉ុន្តែអ្នកក៏មិនអាចនៅកន្លែងដដែលៗបានដែរ។ ដូចនេះការសម្របខ្លួននៅកន្លែងមួយដែលថ្មីគឺជាជំនាញដ៏សំខាន់មួយដែលបុគ្គលគ្រប់រូបគួរតែមាននៅក្នុងខ្លួន។ ខាងក្រោមនេះគឺជាចំណុចសំខាន់ៗចំនួនប្រាំមួយ ដែលបង្ហាញពីរបៀបដែលការសម្របខ្លួនបានដើរតួនាទីយ៉ាងសំខាន់ក្នុងភាពជោគជ័យផ្ទាល់ខ្លួន៖
ការទទួលយកការផ្លាស់ប្តូរ៖ បុគ្គលដែលអាចសម្របខ្លួនបានចាត់ទុកការផ្លាស់ប្តូរជាឱកាសដ៏ល្អ ជាជាងការនៅតែកន្លែង និងបរិយាកាសដដែលៗ។ ជំនួសឱ្យការគេចវេសទៅនឹងបរិយាកាសមួយថ្មី អ្នកគួរបើកចិត្តទទួលយក និងរៀនសូត្រអំពីវា។ តាមរយៈការទទួលយកការផ្លាស់ប្តូរនោះនឹងធ្វើឱ្យអ្នករីកចម្រើន ចេះបត់បែន និងសម្របខ្លួនក៏ដូចជាការបើកឱ្យខ្លួនអ្នកទទួលបាននូវឱកាសថ្មីៗ ដែលនាំទៅដល់ការអភិវឌ្ឍន៍សមត្ថភាពកាន់តែខ្លាំងជាងមុន។
ការដោះស្រាយបញ្ហា៖ ការសម្របខ្លួនតម្រូវឱ្យអ្នកមានជំនាញក្នុងការដោះស្រាយបញ្ហា។ នៅពេលដែលប្រឈមមុខនឹងបញ្ហាដែលមិនធ្លាប់បានឆ្លងកាត់ អ្នកនឹងអាចសម្របខ្លួនបានយ៉ាងឆាប់រហ័សដោយវាយតម្លៃស្ថានភាព កំណត់បញ្ហា និងបង្កើតដំណោះស្រាយប្រកបដោយប្រសិទ្ធភាព។ ភាពបត់បែននេះអនុញ្ញាតឱ្យអ្នកកែតម្រូវវិធីសាស្រ្តនៃដំណោះស្រាយឱ្យទទួលបានលទ្ធផលល្អ បើទោះបីជាអ្វីៗមិនដំណើរការដូចការគ្រោងទុកក៏ដោយ។
ភាពអត់ធ្មត់៖ ការសម្របខ្លួនទៅនឹងបរិយាកាសថ្មីអាចជាភាពតានតឹង។ ទោះជាយ៉ាងណាក៏ដោយ អ្នកត្រូវតែមានភាពអត់ធ្មត់ដោយរក្សាភាពស្ងប់ស្ងាត់ក្នុងស្ថានភាពលំបាក។ មិនយូរមិនឆាប់អ្នកនឹងអាចសម្របខ្លួនបានទៅនឹងបរិយាកាសថ្មីក៏ដូចជាទីកន្លែងថ្មីនោះផងដែរ។
បើកចំហចំពោះមតិកែលម្អ៖ នៅពេលដែលអ្នកនៅកន្លែងមួយដែលថ្មីប្រាកដណាស់អ្នកអាចនឹងសាងនូវកំហុស ក៏ប៉ុន្តែទោះបីជាយ៉ាងណាក៏ដោយអ្នកត្រូវរៀនបើកចិត្តទទួលយកនូវការកែលម្អដើម្បីជាមេរៀនឱ្យអ្នករៀនសូត្រនូវអ្វីដែលថ្មី នោះសមត្ថភាពអ្នកក៏មានការអភិវឌ្ឍន៍រីកចម្រើនទៅតាមនោះផងដែរ។
ភាពវៃឆ្លាតក្នុងសង្គម៖ ការសម្របខ្លួនទៅនឹងបរិយាកាសថ្មីជារឿយៗពាក់ព័ន្ធនឹងការប្រាស្រ័យទាក់ទងជាមួយមនុស្សថ្មីៗ យល់អំពីទស្សនៈផ្សេងៗគ្នា និងមានភាពបត់បែនឆាប់រហ័សនៅក្នុងការប្រាស្រ័យទាក់ទងជាមួយអ្នកដទៃ ដែលជំរុញឱ្យទំនាក់ទំនងនោះមានភាពកាន់តែស៊ីជម្រៅ និងអាចឱ្យអ្នកមានការសហការគ្នាក្នុងស្ថានភាពចម្រុះកាន់តែមានប្រសិទ្ធិថែមទៀតផង។
សរុបមក ការសម្របខ្លួនគឺជាជំនាញពហុមុខដែលអាចឱ្យបុគ្គលម្នាក់ៗដោះស្រាយការផ្លាស់ប្តូរទៅកន្លែងថ្មីប្រកបដោយប្រសិទ្ធភាព និងធ្វើឱ្យសមត្ថភាពអ្នកកាន់តែរីកចម្រើននៅក្នុងបរិយាកាសដែលថ្មី។
