ការផ្លាស់ប្តូរបច្ចេកវិទ្យាឌីជីថលនៅទូទាំងពិភពលោកកំពុងធ្វើឱ្យទីផ្សារកាន់តែមានការប្រកួតប្រជែងគ្នាខ្លាំងឡើងៗដែលជាកត្តាធ្វើឱ្យអ្នកទីផ្សារត្រូវស្វែងរកវិធីសាស្ត្រដើម្បីចាប់យកអតិថិជនគោលដៅរបស់ខ្លួនជាមួយនឹងយុទ្ធនាការផ្សាយពាណិជ្ជកម្មផ្សេងៗ។ នៅក្នុងករណីនេះដែរ AI កំពុងដើរតួនាទីយ៉ាងធំក្នុងការបង្កើនប្រសិទ្ធភាពនៃយុទ្ធសាស្រ្តទីផ្សារ ហើយវាត្រូវបានគេរំពឹងថានឹងធ្វើការផ្លាស់ប្តូរជាវិជ្ជមានបន្ថែមទៀតនាពេលអនាគត។
យោងតាមគេហទំព័រ Market Business News បានបង្ហើបអំពីចំណុចមួយចំនួនដែលបញ្ញាសិប្បនិម្មិត (Artificial Intelligence) នឹងផ្លាស់ប្ដូរមុខមាត់ថ្មីនៃទីផ្សារនាពេលអនាគត មានដូចជា៖
បទពិសោធន៍ទិញទំនិញដ៏អស្ចារ្យ៖ ផ្ដល់នូវបទពិសោធន៍ទិញទំនិញបែបស៊ីវីល័យថ្មី ដែលវាគឺជាអត្ថប្រយោជន៍ដ៏ធំបំផុតមួយសម្រាប់អាជីវកម្មនឹងប្រើប្រាស់នៅពេលអនាគត។ ដោយឡែកម៉ាកយីហោមួយចំនួនបានចាប់ផ្តើមប្រើប្រាស់ហាងលក់រាយ ដែលបានបើកដំណើរការបញ្ញាសិប្បនិម្មិតរួចហើយ ដែលវានឹងក្លាយទៅជាយុទ្ធសាស្រ្តទីផ្សារដ៏ពេញនិយមបំផុតមួយក្នុងពេលឆាប់ៗនេះ។
ការវិភាគទស្សន៍ទាយ៖ ការផ្សាយពាណិជ្ជកម្មនៅលើ Facebook និង Google ត្រូវបានណែនាំដោយអ្នកជំនាញទីផ្សារ ដោយសារតែកម្រិតជោគជ័យខ្ពស់។ វេទិកាទាំងពីរនេះគឺជាមធ្យោបាយដ៏ល្អបំផុតនៅក្នុងយុគសម័យទំនើបនេះ ដើម្បីកំណត់គោលដៅអ្នកប្រើប្រាស់ និងឈានដល់អតិថិជនកាន់តែទូលំទូលាយបន្ថែមទៀត។
បង្កើតមាតិកាដោយស្វ័យប្រវត្តិ៖ ដូចដែលយើងទាំងអស់គ្នាដឹងហើយថាទីផ្សារមាតិកា គឺជាយុទ្ធសាស្រ្តដ៏មានឥទ្ធិពលបំផុត ដែលអ្នកទីផ្សារប្រើប្រាស់នាពេលបច្ចុប្បន្ននេះ។ ហើយមាតិកាដែលពាក់ព័ន្ធនឹងត្រូវបានបង្កើតឡើងសម្រាបទីផ្សារ SEO (Search Engine Optimization) នៅមិនយូរមិនឆាប់ អ្នកទីផ្សារនឹងអាចប្រើប្រាស់បញ្ញាសិប្បនិម្មិតដើម្បីបង្កើតមាតិកាដែលនឹងពេញចិត្ត សម្រាប់អតិថិជនទាំងអស់បានផងដែរ។
ទំនាក់ទំនងអតិថិជនប្រសើរឡើង៖ ទំនាក់ទំនងអតិថិជនគឺជាទិដ្ឋភាពសំខាន់នៃអាជីវកម្មនីមួយៗ ដែលវាជួយក្នុងការបង្កើតភាពស្មោះត្រង់ដល់អតិថិជនទៀតផង។ បញ្ញាសិប្បនិម្មិតនឹងជួយក្នុងការគ្រប់គ្រងទំនាក់ទំនងអតិថិជនដោយផ្តល់ឱ្យពួកគេនូវបទពិសោធន៍សេវាកម្មពិសេសដោយការប្រមូល វិភាគ និងដំណើរការទិន្នន័យ។
ជាសង្ខេបនៅក្នុងសម័យទំនើបនេះ ទីផ្សារឌីជីថលគឺជាអ្វីមួយដែលមានសារៈសំខាន់ខ្លាំងណាស់សម្រាប់ភាពជោគជ័យរបស់អាជីវកម្ម ហើយបញ្ញាសិប្បនិម្មិតគឺជាធាតុផ្សំដែលសំខាន់។ AI នឹងធ្វើឱ្យវាអាចដំណើរការទៅបានដោយស្វ័យប្រវត្តិនូវកិច្ចការដ៏លំបាកដែលអ្នកទីផ្សារធ្វើក្នុងអំឡុងពេល ផ្សាព្វផ្សាយទីផ្សារឌីជីថល។
