ក្រុមហ៊ុន Baidu បានប្រកាសថា Ernie AI chatbot របស់ខ្លួននឹងផ្តល់ជូនឱ្យអ្នកប្រើប្រាស់ AI នេះដោយឥតគិតថ្លៃចាប់ពីខែមេសា ឆ្នាំ 2025 ក្នុងគោលបំណងដើម្បីទទួលបានសន្ទុះឡើងវិញនៅក្នុងទីផ្សារប្រកួតប្រជែងបចេ្ចកវិទ្យា AI ។ ការផ្លាស់ប្តូរនេះកើតឡើងចំពេលមានការប្រកួតប្រជែងកាន់តែខ្លាំងឡើងពីគូប្រជែងដូចជា Doubao របស់ ByteDance និង DeepSeek ដែលម៉ូឌែល AI ទាំងនេះទទួលបានការចាប់អារម្មណ៍ពីអ្នកនិយមប្រើប្រាស់បច្ចកវិទ្យា AI យ៉ាងខ្លាំង។ យ៉ាងណាមិញភាគហ៊ុនរបស់ Baidu បានកើនឡើងជាង 12% នៅហុងកុងបន្ទាប់ពីការប្រកាសនេះ។
Ernie AI chatbot របស់ Baidu គឺជាគំរូ AI ដំបូងបំផុតនៅក្នុងប្រទេសចិនដែលទទួលបានការយល់ព្រមជាផ្លូវការពីរដ្ឋាភិបាលសម្រាប់ការប្រើប្រាស់ជាសាធារណៈ។ វាប្រឈមមុខនឹងការប្រកួតប្រជែងខ្លាំងពីម៉ូឌែល Qwen របស់ក្រុមហ៊ុន Alibaba និង DeepSeek’s V3 ។
តាមរយៈការផ្តល់ជូន Ernie ដោយឥតគិតថ្លៃ Baidu ប្រហែលជាកំពុងព្យាយាមទាក់ទាញអ្នកនិយមប្រើប្រាស់ AI ឱ្យក្រឡេកមកប្រើប្រាស់ Ernie AI chatbot របស់ខ្លួនឱ្យកាន់តែច្រើន។ ប៉ុន្តែវាក៏បង្ហាញពីការលំបាកក្នុងការរកប្រាក់ចំណេញពី AI នៅពេលដែលបច្ចេកវិទ្យា AI ជាច្រើនកំពុងតែប្រកួតប្រជែងគ្នា។ ដូចនេះដើម្បីរកប្រាក់ចំណេញ Baidu អាចនឹងពឹងផ្អែកលើយុទ្ធសាស្ត្រផ្សេងទៀត ដូចជាការគិតប្រាក់អតិថិជនសហគ្រាសសម្រាប់សេវាកម្ម AI កម្រិតខ្ពស់ ឬការផ្តល់មុខងារពិសេស ដូចជាការផ្តល់ជូនសេវាកម្ម Cloud និង Office 365 របស់ពួកគេ។
