លោក Bill Gates សហស្ថាបនិកក្រុមហ៊ុន Microsoft បាននិយាយថា ក្នុងរយៈពេល ១០ ឆ្នាំខាងមុខ មនុស្សអាចនឹងធ្វើការត្រឹមតែពីរថ្ងៃក្នុងមួយសប្តាហ៍ប៉ុណ្ណោះ ពីព្រោះបញ្ញាសិប្បនិម្មិត (AI) អាចធ្វើកិច្ចការប្រចាំថ្ងៃជាច្រើនជំនួសបាន។ លោកបានលើកឡើងអំពីរឿងនេះនៅក្នុងកម្មវិធី The Tonight Show ជាមួយ Jimmy Fallon និងនៅក្នុងបទសម្ភាសន៍ផ្សេងទៀត។
ថែមពីនេះ លោក Gates បានពន្យល់ថា AI អាចដោះស្រាយការងារដូចជាការផ្តល់ដំបូន្មានផ្នែកវេជ្ជសាស្រ្ត ការបង្រៀន ការផលិត ភស្តុភារកម្ម និងការងារទូទៅផ្សេងៗទៀត ដែលធ្វើឱ្យកិច្ចការទាំងនេះកាន់តែងាយស្រួល និងលឿនជាងមុន។ ខណៈពេលដែល អ្នកជំនាញនិយាយថា នេះគ្រាន់តែជាការព្យាករណ៍អំពីអនាគតប៉ុណ្ណោះ ប៉ុន្តែលោក Gates ជឿថាវាអាចកើតឡើង។
