ប្រទេសចិនកំពុងរៀបចំវិធានការឆ្លើយតបទៅនឹងពន្ធ 25% របស់រសហរដ្ឋអាមេរិកដាក់ទៅលើទំនិញរបស់ចិនដែលត្រូវបានកំណត់ឱ្យចូលជាធរមាននៅថ្ងែទី4 ខែមីនាខាងមុខនេះ ហើយភាពតានតឹងខាងពាណិជ្ជកម្មរវាងប្រទេសទាំងពីរនេះដែលជាប្រទេសមានសេដ្ឋកិច្ចធំជាងគេក្នុងពិភពលោកនឹងកើតមានឡើង។
ថ្មីៗនេះ ប្រធានាធិបតីអាមេរិកលោក Trump បានគំរាមដំឡើងពន្ធ 10% បន្ថែមទៀតលើទំនិញចិន ដោយនិយាយថាចិនមិនមានចំណាត់ការគ្រប់គ្រាន់ក្នុងការទប់ស្តាត់លំហូរនៃសារធាតុ fentanyl ចូលទៅក្នុងសហរដ្ឋអាមេរិកនោះទេ ដែលធ្វើឱ្យប្រជាជនអាមេរិកជាច្រើនបានស្លាប់ដោយសារសារធាតុនេះ។
ខណៈពេលដែលប្រទេសចិនកំពុងចាត់វិធានការឆ្លើយតបទៅលើពន្ធអាមេរិកដែលបានដាក់មកលើទំនិញរបស់ខ្លួន ដោយចិននឹងដាក់ពន្ធត្រឡប់ទៅសហរដ្ឋអាមេរិកវិញ ទៅលើផលិតផលកសិកម្មរបស់អាមេរិក ជាជាងដាក់ពន្ធលើទំនិញ ឬវិស័យបច្ចេកវិទ្យា ព្រោះចិនជាទីផ្សារដ៏សំខាន់សម្រាប់ការនាំចេញកសិផលរបស់សហរដ្ឋអាមេរិក។ ការដាក់ពន្ធទៅលើវិស័យកសិកម្មនេះ ចិនអាចដាក់សម្ពាធសេដ្ឋកិច្ចលើកសិករអាមេរិកដែលពឹងផ្អែកខ្លាំងលើការនាំចេញទៅកាន់ប្រទេសចិន។
លើសពីនេះ ប្រទេសចិនក៏កំពុងស្វែងរកការកាត់បន្ថយការពឹងផ្អែកលើការនាំចូលផលិតផលកសិកម្មរបស់អាមេរិកផងដែរ ដោយចិននឹងធ្វើពិពិធកម្មប្រភពរបស់ខ្លួន និងជំរុញផលិតកម្មអាហារក្នុងស្រុក។
